UtshovChapter 94
94.1
युधिष्ठिर उवाच
ब्राह्मणेभ्यः प्रयच्छन्ति दानानि विविधानि च
दातृप्रतिग्रहीत्रोर्वा को विशेषः पितामह
Yudhishthira uvacha
Brahmanebhyah prayachchhanti danani vividhani cha
Datripratigrahitrorva ko visheshah pitamaha
94.2
भीष्म उवाच
साधोर्यः प्रतिगृह्णीयात्तथैवासाधुतो द्विजः
गुणवत्यल्पदोषः स्यान्निर्गुणे तु निमज्जति
Bhishma uvacha
Sadhoryah pratigrihniyattathaivasadhuto dvijah
Gunavatyalpadoshah syannirgune tu nimajjati
94.3
अत्राप्युदाहरन्तीममितिहासं पुरातनम्
वृषादर्भेश्च संवादं सप्तर्षीणां च भारत
Atrapyudaharantimamitihasam puratanam
Vrishadarbheshcha sanvadam saptarshinam cha bharata
94.4
कश्यपोऽत्रिर्वसिष्ठश्च भरद्वाजोऽथ गौतमः
विश्वामित्रो जमदग्निः साध्वी चैवाप्यरुन्धती
Kashyapotrirvasishthashcha bharadvajotha gautamah
Vishvamitro jamadagnih sadhvi chaivapyarundhati
94.5
सर्वेषामथ तेषां तु गण्डाभूत्कर्मकारिका
शूद्रः पशुसखश्चैव भर्ता चास्या बभूव ह
Sarveshamatha tesham tu gandabhutkarmakarika
Shudrah pashusakhashchaiva bharta chasya babhuva ha
94.6
ते वै सर्वे तपस्यन्तः पुरा चेरुर्महीमिमाम्
समाधिनोपशिक्षन्तो ब्रह्मलोकं सनातनम्
Te vai sarve tapasyantah pura cherurmahimimam
Samadhinopashikshanto brahmalokam sanatanam
94.7
अथाभवदनावृष्टिर्महती कुरुनन्दन
कृच्छ्रप्राणोऽभवद्यत्र लोकोऽयं वै क्षुधान्वितः
Athabhavadanavrishtirmahati kurunandana
Krichchhrapranobhavadyatra lokoyam vai kshudhanvitah
94.8
कस्मिंश्चिच्च पुरा यज्ञे याज्येन शिबिसूनुना
दक्षिणार्थेऽथ ऋत्विग्भ्यो दत्तः पुत्रो निजः किल
Kasminshchichcha pura yagye yajyena shibisununa
Dakshinarthetha ritvigbhyo dattah putro nijah kila
94.9
तस्मिन्कालेऽथ सोऽल्पायुर्दिष्टान्तमगमत्प्रभो
ते तं क्षुधाभिसंतप्ताः परिवार्योपतस्थिरे
Tasminkaletha solpayurdishtantamagamatprabho
Te tam kshudhabhisantaptah parivaryopatasthire
94.10
याज्यात्मजमथो दृष्ट्वा गतासुमृषिसत्तमाः
अपचन्त तदा स्थाल्यां क्षुधार्ताः किल भारत
Yajyatmajamatho drishtva gatasumrishisattamah
Apachanta tada sthalyam kshudhartah kila bharata
94.11
निराद्ये मर्त्यलोकेऽस्मिन्नात्मानं ते परीप्सवः
कृच्छ्रामापेदिरे वृत्तिमन्नहेतोस्तपस्विनः
Niradye martyalokesminnatmanam te paripsavah
Krichchhramapedire vrittimannahetostapasvinah
94.12
अटमानोऽथ तान्मार्गे पचमानान्महीपतिः
राजा शैब्यो वृषादर्भिः क्लिश्यमानान्ददर्श ह
Atamanotha tanmarge pachamananmahipatih
Raja shaibyo vrishadarbhih klishyamanandadarsha ha
94.13
वृषादर्भिरुवाच
प्रतिग्रहस्तारयति पुष्टिर्वै प्रतिगृह्णताम्
मयि यद्विद्यते वित्तं तच्छृणुध्वं तपोधनाः
Vrishadarbhiruvacha
Pratigrahastarayati pushtirvai pratigrihnatam
Mayi yadvidyate vittam tachchhrinudhvam tapodhanah
94.14
प्रियो हि मे ब्राह्मणो याचमानो; दद्यामहं वोऽश्वतरीसहस्रम्
एकैकशः सवृषाः संप्रसूताः; सर्वेषां वै शीघ्रगाः श्वेतलोमाः
Priyo hi me brahmano yachamano; dadyamaham voshvatarisahasram
Ekaikashah savrishah samprasutah; sarvesham vai shighragah shvetalomah
94.15
कुलंभराननडुहः शतंशता;न्धुर्याञ्शुभान्सर्वशोऽहं ददानि
पृथ्वीवाहान्पीवरांश्चैव ताव;दग्र्या गृष्ट्यो धेनवः सुव्रताश्च
Kulambharananaduhah shatanshata;ndhuryanshubhansarvashoham dadani
Prithvivahanpivaranshchaiva tava;dagrya grishtyo dhenavah suvratashcha
94.16
वरान्ग्रामान्व्रीहियवं रसांश्च; रत्नं चान्यद्दुर्लभं किं ददानि
मा स्माभक्ष्ये भावमेवं कुरुध्वं; पुष्ट्यर्थं वै किं प्रयच्छाम्यहं वः
Varangramanvrihiyavam rasanshcha; ratnam chanyaddurlabham kim dadani
Ma smabhakshye bhavamevam kurudhvam; pushtyartham vai kim prayachchhamyaham vah
94.17
ऋषय ऊचुः
राजन्प्रतिग्रहो राज्ञो मध्वास्वादो विषोपमः
तज्जानमानः कस्मात्त्वं कुरुषे नः प्रलोभनम्
Rishaya uchuh
Rajanpratigraho ragyo madhvasvado vishopamah
Tajjanamanah kasmattvam kurushe nah pralobhanam
94.18
क्षत्रं हि दैवतमिव ब्राह्मणं समुपाश्रितम्
अमलो ह्येष तपसा प्रीतः प्रीणाति देवताः
Kshatram hi daivatamiva brahmanam samupashritam
Amalo hyesha tapasa pritah prinati devatah
94.19
अह्नापीह तपो जातु ब्राह्मणस्योपजायते
तद्दाव इव निर्दह्यात्प्राप्तो राजप्रतिग्रहः
Ahnapiha tapo jatu brahmanasyopajayate
Taddava iva nirdahyatprapto rajapratigrahah
94.20
कुशलं सह दानेन राजन्नस्तु सदा तव
अर्थिभ्यो दीयतां सर्वमित्युक्त्वा ते ततो ययुः
Kushalam saha danena rajannastu sada tava
Arthibhyo diyatam sarvamityuktva te tato yayuh
94.21
अपक्वमेव तन्मांसमभूत्तेषां च धीमताम्
अथ हित्वा ययुः सर्वे वनमाहारकाङ्क्षिणः
Apakvameva tanmansamabhuttesham cha dhimatam
Atha hitva yayuh sarve vanamaharakankshinah
94.22
ततः प्रचोदिता राज्ञा वनं गत्वास्य मन्त्रिणः
प्रचीयोदुम्बराणि स्म दानं दातुं प्रचक्रमुः
Tatah prachodita ragya vanam gatvasya mantrinah
Prachiyodumbarani sma danam datum prachakramuh
94.23
उदुम्बराण्यथान्यानि हेमगर्भाण्युपाहरन्
भृत्यास्तेषां ततस्तानि प्रग्राहितुमुपाद्रवन्
Udumbaranyathanyani hemagarbhanyupaharan
Bhrityastesham tatastani pragrahitumupadravan
94.24
गुरूणीति विदित्वाथ न ग्राह्याण्यत्रिरब्रवीत्
न स्म हे मूढविज्ञाना न स्म हे मन्दबुद्धयः
हैमानीमानि जानीमः प्रतिबुद्धाः स्म जागृमः
Guruniti viditvatha na grahyanyatrirabravit
Na sma he mudhavigyana na sma he mandabuddhayah
Haimanimani janimah pratibuddhah sma jagrimah
94.25
इह ह्येतदुपादत्तं प्रेत्य स्यात्कटुकोदयम्
अप्रतिग्राह्यमेवैतत्प्रेत्य चेह सुखेप्सुना
Iha hyetadupadattam pretya syatkatukodayam
Apratigrahyamevaitatpretya cheha sukhepsuna
94.26
वसिष्ठ उवाच
शतेन निष्कं गणितं सहस्रेण च संमितम्
यथा बहु प्रतीच्छन्हि पापिष्ठां लभते गतिम्
Vasishtha uvacha
Shatena nishkam ganitam sahasrena cha sammitam
Yatha bahu pratichchhanhi papishtham labhate gatim
94.27
कश्यप उवाच
यत्पृथिव्यां व्रीहियवं हिरण्यं पशवः स्त्रियः
सर्वं तन्नालमेकस्य तस्माद्विद्वाञ्शमं व्रजेत्
Kashyapa uvacha
Yatprithivyam vrihiyavam hiranyam pashavah striyah
Sarvam tannalamekasya tasmadvidvanshamam vrajet
94.28
भरद्वाज उवाच
उत्पन्नस्य रुरोः शृङ्गं वर्धमानस्य वर्धते
प्रार्थना पुरुषस्येव तस्य मात्रा न विद्यते
Bharadvaja uvacha
Utpannasya ruroh shringam vardhamanasya vardhate
Prarthana purushasyeva tasya matra na vidyate
94.29
गौतम उवाच
न तल्लोके द्रव्यमस्ति यल्लोकं प्रतिपूरयेत्
समुद्रकल्पः पुरुषो न कदाचन पूर्यते
Gautama uvacha
Na talloke dravyamasti yallokam pratipurayet
Samudrakalpah purusho na kadachana puryate
94.30
विश्वामित्र उवाच
कामं कामयमानस्य यदा कामः समृध्यते
अथैनमपरः कामस्तृष्णा विध्यति बाणवत्
Vishvamitra uvacha
Kamam kamayamanasya yada kamah samridhyate
Athainamaparah kamastrishna vidhyati banavat
94.31
जमदग्निरुवाच
प्रतिग्रहे संयमो वै तपो धारयते ध्रुवम्
तद्धनं ब्राह्मणस्येह लुभ्यमानस्य विस्रवेत्
Jamadagniruvacha
Pratigrahe sanyamo vai tapo dharayate dhruvam
Taddhanam brahmanasyeha lubhyamanasya visravet
94.32
अरुन्धत्युवाच
धर्मार्थं संचयो यो वै द्रव्याणां पक्षसंमतः
तपःसंचय एवेह विशिष्टो द्रव्यसंचयात्
Arundhatyuvacha
Dharmartham sanchayo yo vai dravyanam pakshasammatah
Tapahsanchaya eveha vishishto dravyasanchayat
94.33
गण्डोवाच
उग्रादितो भयाद्यस्माद्बिभ्यतीमे ममेश्वराः
बलीयांसो दुर्बलवद्बिभेम्यहमतः परम्
Gandovacha
Ugradito bhayadyasmadbibhyatime mameshvarah
Baliyanso durbalavadbibhemyahamatah param
94.34
पशुसख उवाच
यद्वै धर्मे परं नास्ति ब्राह्मणास्तद्धनं विदुः
विनयार्थं सुविद्वांसमुपासेयं यथातथम्
Pashusakha uvacha
Yadvai dharme param nasti brahmanastaddhanam viduh
Vinayartham suvidvansamupaseyam yathatatham
94.35
ऋषय ऊचुः
कुशलं सह दानाय तस्मै यस्य प्रजा इमाः
फलान्युपधियुक्तानि य एवं नः प्रयच्छसि
Rishaya uchuh
Kushalam saha danaya tasmai yasya praja imah
Phalanyupadhiyuktani ya evam nah prayachchhasi
94.36
भीष्म उवाच
इत्युक्त्वा हेमगर्भाणि हित्वा तानि फलानि ते
ऋषयो जग्मुरन्यत्र सर्व एव धृतव्रताः
Bhishma uvacha
Ityuktva hemagarbhani hitva tani phalani te
Rishayo jagmuranyatra sarva eva dhritavratah
94.37
मन्त्रिणः ऊचुः
उपधिं शङ्कमानास्ते हित्वेमानि फलानि वै
ततोऽन्येनैव गच्छन्ति विदितं तेऽस्तु पार्थिव
Mantrinah uchuh
Upadhim shankamanaste hitvemani phalani vai
Tatonyenaiva gachchhanti viditam testu parthiva
94.38
इत्युक्तः स तु भृत्यैस्तैर्वृषादर्भिश्चुकोप ह
तेषां संप्रतिकर्तुं च सर्वेषामगमद्गृहम्
Ityuktah sa tu bhrityaistairvrishadarbhishchukopa ha
Tesham sampratikartum cha sarveshamagamadgriham
94.39
स गत्वाहवनीयेऽग्नौ तीव्रं नियममास्थितः
जुहाव संस्कृतां मन्त्रैरेकैकामाहुतिं नृपः
Sa gatvahavaniyegnau tivram niyamamasthitah
Juhava sanskritam mantrairekaikamahutim nripah
94.40
तस्मादग्नेः समुत्तस्थौ कृत्या लोकभयंकरी
तस्या नाम वृषादर्भिर्यातुधानीत्यथाकरोत्
Tasmadagneh samuttasthau kritya lokabhayankari
Tasya nama vrishadarbhiryatudhanityathakarot
94.41
सा कृत्या कालरात्रीव कृताञ्जलिरुपस्थिता
वृषादर्भिं नरपतिं किं करोमीति चाब्रवीत्
Sa kritya kalaratriva kritanjalirupasthita
Vrishadarbhim narapatim kim karomiti chabravit
94.42
वृषादर्भिरुवाच
ऋषीणां गच्छ सप्तानामरुन्धत्यास्तथैव च
दासीभर्तुश्च दास्याश्च मनसा नाम धारय
Vrishadarbhiruvacha
Rishinam gachchha saptanamarundhatyastathaiva cha
Dasibhartushcha dasyashcha manasa nama dharaya
94.43
ज्ञात्वा नामानि चैतेषां सर्वानेतान्विनाशय
विनष्टेषु यथा स्वैरं गच्छ यत्रेप्सितं तव
Gyatva namani chaitesham sarvanetanvinashaya
Vinashteshu yatha svairam gachchha yatrepsitam tava
94.44
सा तथेति प्रतिश्रुत्य यातुधानी स्वरूपिणी
जगाम तद्वनं यत्र विचेरुस्ते महर्षयः
Sa tatheti pratishrutya yatudhani svarupini
Jagama tadvanam yatra vicheruste maharshayah