UtshovChapter 77
77.1
भीष्म उवाच
एतस्मिन्नेव काले तु वसिष्ठमृषिसत्तमम्
इक्ष्वाकुवंशजो राजा सौदासो ददतां वरः
Bhishma uvacha
Etasminneva kale tu vasishthamrishisattamam
Ikshvakuvanshajo raja saudaso dadatam varah
77.2
सर्वलोकचरं सिद्धं ब्रह्मकोशं सनातनम्
पुरोहितमिदं प्रष्टुमभिवाद्योपचक्रमे
Sarvalokacharam siddham brahmakosham sanatanam
Purohitamidam prashtumabhivadyopachakrame
77.3
सौदास उवाच
त्रैलोक्ये भगवन्किं स्वित्पवित्रं कथ्यतेऽनघ
यत्कीर्तयन्सदा मर्त्यः प्राप्नुयात्पुण्यमुत्तमम्
Saudasa uvacha
Trailokye bhagavankim svitpavitram kathyatenagha
Yatkirtayansada martyah prapnuyatpunyamuttamam
77.4
भीष्म उवाच
तस्मै प्रोवाच वचनं प्रणताय हितं तदा
गवामुपनिषद्विद्वान्नमस्कृत्य गवां शुचिः
Bhishma uvacha
Tasmai provacha vachanam pranataya hitam tada
Gavamupanishadvidvannamaskritya gavam shuchih
77.5
गावः सुरभिगन्धिन्यस्तथा गुग्गुलुगन्धिकाः
गावः प्रतिष्ठा भूतानां गावः स्वस्त्ययनं महत्
Gavah surabhigandhinyastatha guggulugandhikah
Gavah pratishtha bhutanam gavah svastyayanam mahat
77.6
गावो भूतं भविष्यच्च गावः पुष्टिः सनातनी
गावो लक्ष्म्यास्तथा मूलं गोषु दत्तं न नश्यति
अन्नं हि सततं गावो देवानां परमं हविः
Gavo bhutam bhavishyachcha gavah pushtih sanatani
Gavo lakshmyastatha mulam goshu dattam na nashyati
Annam hi satatam gavo devanam paramam havih
77.7
स्वाहाकारवषट्कारौ गोषु नित्यं प्रतिष्ठितौ
गावो यज्ञस्य हि फलं गोषु यज्ञाः प्रतिष्ठिताः
Svahakaravashatkarau goshu nityam pratishthitau
Gavo yagyasya hi phalam goshu yagyah pratishthitah
77.8
सायं प्रातश्च सततं होमकाले महामते
गावो ददति वै होम्यमृषिभ्यः पुरुषर्षभ
Sayam pratashcha satatam homakale mahamate
Gavo dadati vai homyamrishibhyah purusharshabha
77.9
कानिचिद्यानि दुर्गाणि दुष्कृतानि कृतानि च
तरन्ति चैव पाप्मानं धेनुं ये ददति प्रभो
Kanichidyani durgani dushkritani kritani cha
Taranti chaiva papmanam dhenum ye dadati prabho
77.10
एकां च दशगुर्दद्याद्दश दद्याच्च गोशती
शतं सहस्रगुर्दद्यात्सर्वे तुल्यफला हि ते
Ekam cha dashagurdadyaddasha dadyachcha goshati
Shatam sahasragurdadyatsarve tulyaphala hi te
77.11
अनाहिताग्निः शतगुरयज्वा च सहस्रगुः
समृद्धो यश्च कीनाशो नार्घ्यमर्हन्ति ते त्रयः
Anahitagnih shatagurayajva cha sahasraguh
Samriddho yashcha kinasho narghyamarhanti te trayah
77.12
कपिलां ये प्रयच्छन्ति सवत्सां कांस्यदोहनाम्
सुव्रतां वस्त्रसंवीतामुभौ लोकौ जयन्ति ते
Kapilam ye prayachchhanti savatsam kansyadohanam
Suvratam vastrasanvitamubhau lokau jayanti te
77.13
युवानमिन्द्रियोपेतं शतेन सह यूथपम्
गवेन्द्रं ब्राह्मणेन्द्राय भूरिशृङ्गमलंकृतम्
Yuvanamindriyopetam shatena saha yuthapam
Gavendram brahmanendraya bhurishringamalankritam
77.14
वृषभं ये प्रयच्छन्ति श्रोत्रियाय परंतप
ऐश्वर्यं तेऽभिजायन्ते जायमानाः पुनः पुनः
Vrishabham ye prayachchhanti shrotriyaya parantapa
Aishvaryam tebhijayante jayamanah punah punah
77.15
नाकीर्तयित्वा गाः सुप्यान्नास्मृत्य पुनरुत्पतेत्
सायं प्रातर्नमस्येच्च गास्ततः पुष्टिमाप्नुयात्
Nakirtayitva gah supyannasmritya punarutpatet
Sayam pratarnamasyechcha gastatah pushtimapnuyat
77.16
गवां मूत्रपुरीषस्य नोद्विजेत कदाचन
न चासां मांसमश्नीयाद्गवां व्युष्टिं तथाश्नुते
Gavam mutrapurishasya nodvijeta kadachana
Na chasam mansamashniyadgavam vyushtim tathashnute
77.17
गाश्च संकीर्तयेन्नित्यं नावमन्येत गास्तथा
अनिष्टं स्वप्नमालक्ष्य गां नरः संप्रकीर्तयेत्
Gashcha sankirtayennityam navamanyeta gastatha
Anishtam svapnamalakshya gam narah samprakirtayet
77.18
गोमयेन सदा स्नायाद्गोकरीषे च संविशेत्
श्लेष्ममूत्रपुरीषाणि प्रतिघातं च वर्जयेत्
Gomayena sada snayadgokarishe cha sanvishet
Shleshmamutrapurishani pratighatam cha varjayet
77.19
सार्द्रचर्मणि भुञ्जीत निरीक्षन्वारुणीं दिशम्
वाग्यतः सर्पिषा भूमौ गवां व्युष्टिं तथाश्नुते
Sardracharmani bhunjita nirikshanvarunim disham
Vagyatah sarpisha bhumau gavam vyushtim tathashnute
77.20
घृतेन जुहुयादग्निं घृतेन स्वस्ति वाचयेत्
घृतं दद्याद्घृतं प्राशेद्गवां व्युष्टिं तथाश्नुते
Ghritena juhuyadagnim ghritena svasti vachayet
Ghritam dadyadghritam prashedgavam vyushtim tathashnute
77.21
गोमत्या विद्यया धेनुं तिलानामभिमन्त्र्य यः
रसरत्नमयीं दद्यान्न स शोचेत्कृताकृते
Gomatya vidyaya dhenum tilanamabhimantrya yah
Rasaratnamayim dadyanna sa shochetkritakrite
77.22
गावो मामुपतिष्ठन्तु हेमशृङ्गाः पयोमुचः
सुरभ्यः सौरभेयाश्च सरितः सागरं यथा
Gavo mamupatishthantu hemashringah payomuchah
Surabhyah saurabheyashcha saritah sagaram yatha
77.23
गावः पश्यन्तु मां नित्यं गावः पश्याम्यहं तदा
गावोऽस्माकं वयं तासां यतो गावस्ततो वयम्
Gavah pashyantu mam nityam gavah pashyamyaham tada
Gavosmakam vayam tasam yato gavastato vayam
77.24
एवं रात्रौ दिवा चैव समेषु विषमेषु च
महाभयेषु च नरः कीर्तयन्मुच्यते भयात्
Evam ratrau diva chaiva sameshu vishameshu cha
Mahabhayeshu cha narah kirtayanmuchyate bhayat