Utshovঅধ্যায় 61
61.1
যুধিষ্ঠির উবাচ
ইদং দেয়মিদং দেয়মিতীয়ং শ্রুতিচোদনা
বহুদেয়াশ্চ রাজানঃ কিং স্বিদ্দেয়মনুত্তমম্
61.2
ভীষ্ম উবাচ
অতি দানানি সর্বাণি পৃথিবীদানমুচ্যতে
অচলা হ্যক্ষয়া ভূমির্দোগ্ধ্রী কামাননুত্তমান্
61.3
দোগ্ধ্রী বাসাংসি রত্নানি পশূন্ব্রীহিয়বাংস্তথা
ভূমিদঃ সর্বভূতেষু শাশ্বতীরেধতে সমাঃ
61.4
যাবদ্ভূমেরায়ুরিহ তাবদ্ভূমিদ এধতে
ন ভূমিদানাদস্তীহ পরং কিংচিদ্যুধিষ্ঠির
61.5
অপ্যল্পং প্রদদুঃ পূর্বে পৃথিব্যা ইতি নঃ শ্রুতম্
ভূমিমেতে দদুঃ সর্বে যে ভূমিং ভুঞ্জতে জনাঃ
61.6
স্বকর্মৈবোপজীবন্তি নরা ইহ পরত্র চ
ভূমির্ভূতির্মহাদেবী দাতারং কুরুতে প্রিয়ম্
61.7
য এতাং দক্ষিণাং দদ্যাদক্ষয়াং পৃথিবীপতিঃ
পুনর্নরত্বং সংপ্রাপ্য ভবেত্স পৃথিবীপতিঃ
61.8
যথা দানং তথা ভোগ ইতি ধর্মেষু নিশ্চয়ঃ
সংগ্রামে বা তনুং জহ্যাদ্দদ্যাদ্বা পৃথিবীমিমাম্
61.9
ইত্যেতাং ক্ষত্রবন্ধূনাং বদন্তি পরমাশিষম্
পুনাতি দত্তা পৃথিবী দাতারমিতি শুশ্রুম
61.10
অপি পাপসমাচারং ব্রহ্মঘ্নমপি বানৃতম্
সৈব পাপং পাবয়তি সৈব পাপাত্প্রমোচয়েৎ
61.11
অপি পাপকৃতাং রাজ্ঞাং প্রতিগৃহ্ণন্তি সাধবঃ
পৃথিবীং নান্যদিচ্ছন্তি পাবনং জননী যথা
61.12
নামাস্যাঃ প্রিয়দত্তেতি গুহ্যং দেব্যাঃ সনাতনম্
দানং বাপ্যথ বা জ্ঞানং নাম্নোঽস্যাঃ পরমং প্রিয়ম্
তস্মাত্প্রাপ্যৈব পৃথিবীং দদ্যাদ্বিপ্রায় পার্থিবঃ
61.13
নাভূমিপতিনা ভূমিরধিষ্ঠেয়া কথংচন
ন বা পাত্রেণ বা গূহেদন্তর্ধানেন বা চরেৎ
যে চান্যে ভূমিমিচ্ছেয়ুঃ কুর্যুরেবমসংশয়ম্
61.14
যঃ সাধোর্ভূমিমাদত্তে ন ভূমিং বিন্দতে তু সঃ
ভূমিং তু দত্ত্বা সাধুভ্যো বিন্দতে ভূমিমেব হি
প্রেত্যেহ চ স ধর্মাত্মা সংপ্রাপ্নোতি মহদ্যশঃ
61.15
যস্য বিপ্রানুশাসন্তি সাধোর্ভূমিং সদৈব হি
ন তস্য শত্রবো রাজন্প্রশাসন্তি বসুংধরাম্
61.16
যত্কিংচিত্পুরুষঃ পাপং কুরুতে বৃত্তিকর্শিতঃ
অপি গোচর্মমাত্রেণ ভূমিদানেন পূয়তে
61.17
যেঽপি সংকীর্ণকর্মাণো রাজানো রৌদ্রকর্মিণঃ
তেভ্যঃ পবিত্রমাখ্যেয়ং ভূমিদানমনুত্তমম্
61.18
অল্পান্তরমিদং শশ্বত্পুরাণা মেনিরে জনাঃ
যো যজেদশ্বমেধেন দদ্যাদ্বা সাধবে মহীম্
61.19
অপি চেত্সুকৃতং কৃত্বা শঙ্কেরন্নপি পণ্ডিতাঃ
অশক্যমেকমেবৈতদ্ভূমিদানমনুত্তমম্
61.20
সুবর্ণং রজতং বস্ত্রং মণিমুক্তাবসূনি চ
সর্বমেতন্মহাপ্রাজ্ঞ দদাতি বসুধাং দদৎ
61.21
তপো যজ্ঞঃ শ্রুতং শীলমলোভঃ সত্যসংধতা
গুরুদৈবতপূজা চ নাতিবর্তন্তি ভূমিদম্
61.22
ভর্তুর্নিঃশ্রেয়সে যুক্তাস্ত্যক্তাত্মানো রণে হতাঃ
ব্রহ্মলোকগতাঃ সিদ্ধা নাতিক্রামন্তি ভূমিদম্
61.23
যথা জনিত্রী ক্ষীরেণ স্বপুত্রং ভরতে সদা
অনুগৃহ্ণাতি দাতারং তথা সর্বরসৈর্মহী
61.24
মৃত্যোর্বৈ কিংকরো দণ্ডস্তাপো বহ্নেঃ সুদারুণঃ
ঘোরাশ্চ বারুণাঃ পাশা নোপসর্পন্তি ভূমিদম্
61.25
পিতৄংশ্চ পিতৃলোকস্থান্দেবলোকে চ দেবতাঃ
সংতর্পয়তি শান্তাত্মা যো দদাতি বসুংধরাম্
61.26
কৃশায় ম্রিয়মাণায় বৃত্তিম্লানায় সীদতে
ভূমিং বৃত্তিকরীং দত্ত্বা সত্রী ভবতি মানবঃ
61.27
যথা ধাবতি গৌর্বত্সং ক্ষীরমভ্যুত্সৃজন্ত্যুত
এবমেব মহাভাগ ভূমির্ভবতি ভূমিদম্
61.28
হলকৃষ্টাং মহীং দত্ত্বা সবীজাং সফলামপি
উদীর্ণং বাপি শরণং তথা ভবতি কামদঃ
61.29
ব্রাহ্মণং বৃত্তসংপন্নমাহিতাগ্নিং শুচিব্রতম্
নরঃ প্রতিগ্রাহ্য মহীং ন যাতি যমসাদনম্
61.30
যথা চন্দ্রমসো বৃদ্ধিরহন্যহনি জায়তে
তথা ভূমিকৃতং দানং সস্যে সস্যে বিবর্ধতে
61.31
অত্র গাথা ভূমিগীতাঃ কীর্তয়ন্তি পুরাবিদঃ
যাঃ শ্রুত্বা জামদগ্ন্যেন দত্তা ভূঃ কাশ্যপায় বৈ
61.32
মামেবাদত্ত মাং দত্ত মাং দত্ত্বা মামবাপ্স্যথ
অস্মিঁল্লোকে পরে চৈব ততশ্চাজননে পুনঃ
61.33
য ইমাং ব্যাহৃতিং বেদ ব্রাহ্মণো ব্রহ্মসংশ্রিতঃ
শ্রাদ্ধস্য হূয়মানস্য ব্রহ্মভূয়ং স গচ্ছতি
61.34
কৃত্যানামভিশস্তানাং দুরিষ্টশমনং মহৎ
প্রায়শ্চিত্তমহং কৃত্বা পুনাত্যুভয়তো দশ
61.35
পুনাতি য ইদং বেদ বেদ চাহং তথৈব চ
প্রকৃতিঃ সর্বভূতানাং ভূমির্বৈ শাশ্বতী মতা
61.36
অভিষিচ্যৈব নৃপতিং শ্রাবয়েদিমমাগমম্
যথা শ্রুত্বা মহীং দদ্যান্নাদদ্যাত্সাধুতশ্চ তাম্
61.37
সোঽয়ং কৃত্স্নো ব্রাহ্মণার্থো রাজার্থশ্চাপ্যসংশয়ম্
রাজা হি ধর্মকুশলঃ প্রথমং ভূতিলক্ষণম্
61.38
অথ যেষামধর্মজ্ঞো রাজা ভবতি নাস্তিকঃ
ন তে সুখং প্রবুধ্যন্তে ন সুখং প্রস্বপন্তি চ
61.39
সদা ভবন্তি চোদ্বিগ্নাস্তস্য দুশ্চরিতৈর্নরাঃ
যোগক্ষেমা হি বহবো রাষ্ট্রং নাস্যাবিশন্তি তৎ
61.40
অথ যেষাং পুনঃ প্রাজ্ঞো রাজা ভবতি ধার্মিকঃ
সুখং তে প্রতিবুধ্যন্তে সুসুখং প্রস্বপন্তি চ
61.41
তস্য রাজ্ঞঃ শুভৈরার্যৈঃ কর্মভির্নির্বৃতাঃ প্রজাঃ
যোগক্ষেমেণ বৃষ্ট্যা চ বিবর্ধন্তে স্বকর্মভিঃ
61.42
স কুলীনঃ স পুরুষঃ স বন্ধুঃ স চ পুণ্যকৃৎ
স দাতা স চ বিক্রান্তো যো দদাতি বসুংধরাম্
61.43
আদিত্যা ইব দীপ্যন্তে তেজসা ভুবি মানবাঃ
দদন্তি বসুধাং স্ফীতাং যে বেদবিদুষি দ্বিজে
61.44
যথা বীজানি রোহন্তি প্রকীর্ণানি মহীতলে
তথা কামাঃ প্ররোহন্তি ভূমিদানসমার্জিতাঃ
61.45
আদিত্যো বরুণো বিষ্ণুর্ব্রহ্মা সোমো হুতাশনঃ
শূলপাণিশ্চ ভগবান্প্রতিনন্দন্তি ভূমিদম্
61.46
ভূমৌ জায়ন্তি পুরুষা ভূমৌ নিষ্ঠাং ব্রজন্তি চ
চতুর্বিধো হি লোকোঽয়ং যোঽয়ং ভূমিগুণাত্মকঃ
61.47
এষা মাতা পিতা চৈব জগতঃ পৃথিবীপতে
নানয়া সদৃশং ভূতং কিংচিদস্তি জনাধিপ
61.48
অত্রাপ্যুদাহরন্তীমমিতিহাসং পুরাতনম্
বৃহস্পতেশ্চ সংবাদমিন্দ্রস্য চ যুধিষ্ঠির
61.49
ইষ্ট্বা ক্রতুশতেনাথ মহতা দক্ষিণাবতা
মঘবা বাগ্বিদাং শ্রেষ্ঠং পপ্রচ্ছেদং বৃহস্পতিম্
61.50
ভগবন্কেন দানেন স্বর্গতঃ সুখমেধতে
যদক্ষয়ং মহার্ঘং চ তদ্ব্রূহি বদতাং বর
61.51
ইত্যুক্তঃ স সুরেন্দ্রেণ ততো দেবপুরোহিতঃ
বৃহস্পতির্মহাতেজাঃ প্রত্যুবাচ শতক্রতুম্
61.52
সুবর্ণদানং গোদানং ভূমিদানং চ বৃত্রহন্
দদদেতান্মহাপ্রাজ্ঞঃ সর্বপাপৈঃ প্রমুচ্যতে
61.53
ন ভূমিদানাদ্দেবেন্দ্র পরং কিংচিদিতি প্রভো
বিশিষ্টমিতি মন্যামি যথা প্রাহুর্মনীষিণঃ
61.54
যে শূরা নিহতা যুদ্ধে স্বর্যাতা দানগৃদ্ধিনঃ
সর্বে তে বিবুধশ্রেষ্ঠ নাতিক্রামন্তি ভূমিদম্
61.55
ভর্তুর্নিঃশ্রেয়সে যুক্তাস্ত্যক্তাত্মানো রণে হতাঃ
ব্রহ্মলোকগতাঃ শূরা নাতিক্রামন্তি ভূমিদম্
61.56
পঞ্চ পূর্বাদিপুরুষাঃ ষট্চ যে বসুধাং গতাঃ
একাদশ দদদ্ভূমিং পরিত্রাতীহ মানবঃ
61.57
রত্নোপকীর্ণাং বসুধাং যো দদাতি পুরংদর
স মুক্তঃ সর্বকলুষৈঃ স্বর্গলোকে মহীয়তে
61.58
মহীং স্ফীতাং দদদ্রাজা সর্বকামগুণান্বিতাম্
রাজাধিরাজো ভবতি তদ্ধি দানমনুত্তমম্
61.59
সর্বকামসমায়ুক্তাং কাশ্যপীং যঃ প্রয়চ্ছতি
সর্বভূতানি মন্যন্তে মাং দদাতীতি বাসব
61.60
সর্বকামদুঘাং ধেনুং সর্বকামপুরোগমাম্
দদাতি যঃ সহস্রাক্ষ স স্বর্গং যাতি মানবঃ
61.61
মধুসর্পিঃপ্রবাহিন্যঃ পয়োদধিবহাস্তথা
সরিতস্তর্পয়ন্তীহ সুরেন্দ্র বসুধাপ্রদম্
61.62
ভূমিপ্রদানান্নৃপতির্মুচ্যতে রাজকিল্বিষাৎ
ন হি ভূমিপ্রদানেন দানমন্যদ্বিশিষ্যতে
61.63
দদাতি যঃ সমুদ্রান্তাং পৃথিবীং শস্ত্রনির্জিতাম্
তং জনাঃ কথয়ন্তীহ যাবদ্ধরতি গৌরিয়ম্
61.64
পুণ্যামৃদ্ধরসাং ভূমিং যো দদাতি পুরংদর
ন তস্য লোকাঃ ক্ষীয়ন্তে ভূমিদানগুণার্জিতাঃ
61.65
সর্বথা পার্থিবেনেহ সততং ভূতিমিচ্ছতা
ভূর্দেয়া বিধিবচ্ছক্র পাত্রে সুখমভীপ্সতা
61.66
অপি কৃত্বা নরঃ পাপং ভূমিং দত্ত্বা দ্বিজাতয়ে
সমুত্সৃজতি তত্পাপং জীর্ণাং ত্বচমিবোরগঃ
61.67
সাগরান্সরিতঃ শৈলান্কাননানি চ সর্বশঃ
সর্বমেতন্নরঃ শক্র দদাতি বসুধাং দদৎ
61.68
তডাগান্যুদপানানি স্রোতাংসি চ সরাংসি চ
স্নেহান্সর্বরসাংশ্চৈব দদাতি বসুধাং দদৎ
61.69
ওষধীঃ ক্ষীরসংপন্না নগান্পুষ্পফলান্বিতান্
কাননোপলশৈলাংশ্চ দদাতি বসুধাং দদৎ
61.70
অগ্নিষ্টোমপ্রভৃতিভিরিষ্ট্বা চ স্বাপ্তদক্ষিণৈঃ
ন তত্ফলমবাপ্নোতি ভূমিদানাদ্যদশ্নুতে
61.71
দাতা দশানুগৃহ্ণাতি দশ হন্তি তথা ক্ষিপন্
পূর্বদত্তাং হরন্ভূমিং নরকায়োপগচ্ছতি
61.72
ন দদাতি প্রতিশ্রুত্য দত্ত্বা বা হরতে তু যঃ
স বদ্ধো বারুণৈঃ পাশৈস্তপ্যতে মৃত্যুশাসনাৎ
61.73
আহিতাগ্নিং সদায়জ্ঞং কৃশভৃত্যং প্রিয়াতিথিম্
যে ভরন্তি দ্বিজশ্রেষ্ঠং নোপসর্পন্তি তে যমম্
61.74
ব্রাহ্মণেষ্বৃণভূতং স্যাত্পার্থিবস্য পুরংদর
ইতরেষাং তু বর্ণানাং তারয়েত্কৃশদুর্বলান্
61.75
নাচ্ছিন্দ্যাত্স্পর্শিতাং ভূমিং পরেণ ত্রিদশাধিপ
ব্রাহ্মণায় সুরশ্রেষ্ঠ কৃশভৃত্যায় কশ্চন
61.76
অথাশ্রু পতিতং তেষাং দীনানামবসীদতাম্
ব্রাহ্মণানাং হৃতে ক্ষেত্রে হন্যাত্ত্রিপুরুষং কুলম্
61.77
ভূমিপালং চ্যুতং রাষ্ট্রাদ্যস্তু সংস্থাপয়েত্পুনঃ
তস্য বাসঃ সহস্রাক্ষ নাকপৃষ্ঠে মহীয়তে
61.78
ইক্ষুভিঃ সংততাং ভূমিং যবগোধূমসংকুলাম্
গোশ্ববাহনসংপূর্ণাং বাহুবীর্যসমার্জিতাম্
61.79
নিধিগর্ভাং দদদ্ভূমিং সর্বরত্নপরিচ্ছদাম্
অক্ষয়াঁল্লভতে লোকান্ভূমিসত্রং হি তস্য তৎ
61.80
বিধূয় কলুষং সর্বং বিরজাঃ সংমতঃ সতাম্
লোকে মহীয়তে সদ্ভির্যো দদাতি বসুংধরাম্
61.81
যথাপ্সু পতিতঃ শক্র তৈলবিন্দুর্বিসর্পতি
তথা ভূমিকৃতং দানং সস্যে সস্যে বিসর্পতি
61.82
যে রণাগ্রে মহীপালাঃ শূরাঃ সমিতিশোভনাঃ
বধ্যন্তেঽভিমুখাঃ শক্র ব্রহ্মলোকং ব্রজন্তি তে
61.83
নৃত্যগীতপরা নার্যো দিব্যমাল্যবিভূষিতাঃ
উপতিষ্ঠন্তি দেবেন্দ্র সদা ভূমিপ্রদং দিবি
61.84
মোদতে চ সুখং স্বর্গে দেবগন্ধর্বপূজিতঃ
যো দদাতি মহীং সম্যগ্বিধিনেহ দ্বিজাতয়ে
61.85
শতমপ্সরসশ্চৈব দিব্যমাল্যবিভূষিতাঃ
উপতিষ্ঠন্তি দেবেন্দ্র সদা ভূমিপ্রদং নরম্
61.86
শঙ্খং ভদ্রাসনং ছত্রং বরাশ্বা বরবারণাঃ
ভূমিপ্রদানাত্পুষ্পাণি হিরণ্যনিচয়াস্তথা
61.87
আজ্ঞা সদাপ্রতিহতা জয়শব্দো ভবত্যথ
ভূমিদানস্য পুষ্পাণি ফলং স্বর্গঃ পুরংদর
61.88
হিরণ্যপুষ্পাশ্চৌষধ্যঃ কুশকাঞ্চনশাড্বলাঃ
অমৃতপ্রসবাং ভূমিং প্রাপ্নোতি পুরুষো দদৎ
61.89
নাস্তি ভূমিসমং দানং নাস্তি মাতৃসমো গুরুঃ
নাস্তি সত্যসমো ধর্মো নাস্তি দানসমো নিধিঃ
61.90
এতদাঙ্গিরসাচ্ছ্রুত্বা বাসবো বসুধামিমাম্
বসুরত্নসমাকীর্ণাং দদাবাঙ্গিরসে তদা
61.91
য ইমং শ্রাবয়েচ্ছ্রাদ্ধে ভূমিদানস্য সংস্তবম্
ন তস্য রক্ষসাং ভাগো নাসুরাণাং ভবত্যুত
61.92
অক্ষয়ং চ ভবেদ্দত্তং পিতৃভ্যস্তন্ন সংশয়ঃ
তস্মাচ্ছ্রাদ্ধেষ্বিদং বিপ্রো ভুঞ্জতঃ শ্রাবয়েদ্দ্বিজান্
61.93
ইত্যেতত্সর্বদানানাং শ্রেষ্ঠমুক্তং তবানঘ
ময়া ভরতশার্দূল কিং ভূয়ঃ শ্রোতুমিচ্ছসি