Utshovঅধ্যায় 60
60.1
যুধিষ্ঠির উবাচ
দানং যজ্ঞক্রিয়া চেহ কিং স্বিত্প্রেত্য মহাফলম্
কস্য জ্যায়ঃ ফলং প্রোক্তং কীদৃশেভ্যঃ কথং কদা
60.2
এতদিচ্ছামি বিজ্ঞাতুং যাথাতথ্যেন ভারত
বিদ্বঞ্জিজ্ঞাসমানায় দানধর্মান্প্রচক্ষ্ব মে
60.3
অন্তর্বেদ্যাং চ যদ্দত্তং শ্রদ্ধয়া চানৃশংস্যতঃ
কিং স্বিন্নিঃশ্রেয়সং তাত তন্মে ব্রূহি পিতামহ
60.4
ভীষ্ম উবাচ
রৌদ্রং কর্ম ক্ষত্রিয়স্য সততং তাত বর্ততে
তস্য বৈতানিকং কর্ম দানং চৈবেহ পাবনম্
60.5
ন তু পাপকৃতাং রাজ্ঞাং প্রতিগৃহ্ণন্তি সাধবঃ
এতস্মাত্কারণাদ্যজ্ঞৈর্যজেদ্রাজাপ্তদক্ষিণৈঃ
60.6
অথ চেত্প্রতিগৃহ্ণীয়ুর্দদ্যাদহরহর্নৃপঃ
শ্রদ্ধামাস্থায় পরমাং পাবনং হ্যেতদুত্তমম্
60.7
ব্রাহ্মণাংস্তর্পয়েদ্দ্রব্যৈস্ততো যজ্ঞে যতব্রতঃ
মৈত্রান্সাধূন্বেদবিদঃ শীলবৃত্ততপোন্বিতান্
60.8
যত্তে তেন করিষ্যন্তি কৃতং তেন ভবিষ্যতি
যজ্ঞান্সাধয় সাধুভ্যঃ স্বাদ্বন্নান্দক্ষিণাবতঃ
60.9
ইষ্টং দত্তং চ মন্যেথা আত্মানং দানকর্মণা
পূজয়েথা যায়জূকাংস্তবাপ্যংশো ভবেদ্যথা
60.10
প্রজাবতো ভরেথাশ্চ ব্রাহ্মণান্বহুভারিণঃ
প্রজাবাংস্তেন ভবতি যথা জনয়িতা তথা
60.11
যাবতো বৈ সাধুধর্মান্সন্তঃ সংবর্তয়ন্ত্যুত
সর্বে তে চাপি ভর্তব্যা নরা যে বহুভারিণঃ
60.12
সমৃদ্ধঃ সংপ্রয়চ্ছস্ব ব্রাহ্মণেভ্যো যুধিষ্ঠির
ধেনূরনডুহোঽন্নানি চ্ছত্রং বাসাংস্যুপানহৌ
60.13
আজ্যানি যজমানেভ্যস্তথান্নাদ্যানি ভারত
অশ্ববন্তি চ যানানি বেশ্মানি শয়নানি চ
60.14
এতে দেয়া ব্যুষ্টিমন্তো লঘূপায়াশ্চ ভারত
অজুগুপ্সাংশ্চ বিজ্ঞায় ব্রাহ্মণান্বৃত্তিকর্শিতান্
60.15
উপচ্ছন্নং প্রকাশং বা বৃত্ত্যা তান্প্রতিপাদয়
রাজসূয়াশ্বমেধাভ্যাং শ্রেয়স্তত্ক্ষত্রিয়ান্প্রতি
60.16
এবং পাপৈর্বিমুক্তস্ত্বং পূতঃ স্বর্গমবাপ্স্যসি
স্রংসয়িত্বা পুনঃ কোশং যদ্রাষ্ট্রং পালয়িষ্যসি
60.17
ততশ্চ ব্রহ্মভূয়স্ত্বমবাপ্স্যসি ধনানি চ
আত্মনশ্চ পরেষাং চ বৃত্তিং সংরক্ষ ভারত
60.18
পুত্রবচ্চাপি ভৃত্যান্স্বান্প্রজাশ্চ পরিপালয়
যোগক্ষেমশ্চ তে নিত্যং ব্রাহ্মণেষ্বস্তু ভারত
60.19
অরক্ষিতারং হর্তারং বিলোপ্তারমদায়কম্
তং স্ম রাজকলিং হন্যুঃ প্রজাঃ সংভূয় নির্ঘৃণম্
60.20
অহং বো রক্ষিতেত্যুক্ত্বা যো ন রক্ষতি ভূমিপঃ
স সংহত্য নিহন্তব্যঃ শ্বেব সোন্মাদ আতুরঃ
60.21
পাপং কুর্বন্তি যত্কিংচিত্প্রজা রাজ্ঞা হ্যরক্ষিতাঃ
চতুর্থং তস্য পাপস্য রাজা ভারত বিন্দতি
60.22
অপ্যাহুঃ সর্বমেবেতি ভূয়োঽর্ধমিতি নিশ্চয়ঃ
চতুর্থং মতমস্মাকং মনোঃ শ্রুত্বানুশাসনম্
60.23
শুভং বা যত্প্রকুর্বন্তি প্রজা রাজ্ঞা সুরক্ষিতাঃ
চতুর্থং তস্য পুণ্যস্য রাজা চাপ্নোতি ভারত
60.24
জীবন্তং ত্বানুজীবন্তু প্রজাঃ সর্বা যুধিষ্ঠির
পর্জন্যমিব ভূতানি মহাদ্রুমমিব দ্বিজাঃ
60.25
কুবেরমিব রক্ষাংসি শতক্রতুমিবামরাঃ
জ্ঞাতয়স্ত্বানুজীবন্তু সুহৃদশ্চ পরংতপ