Utshovঅধ্যায় 59
59.1
যুধিষ্ঠির উবাচ
যৌ তু স্যাতাং চরণেনোপপন্নৌ; যৌ বিদ্যয়া সদৃশৌ জন্মনা চ
তাভ্যাং দানং কতরস্মৈ বিশিষ্ট;ময়াচমানায় চ যাচতে চ
59.2
ভীষ্ম উবাচ
শ্রেয়ো বৈ যাচতঃ পার্থ দত্তমাহুরয়াচতে
অর্হত্তমো বৈ ধৃতিমান্কৃপণাদধৃতাত্মনঃ
59.3
ক্ষত্রিয়ো রক্ষণধৃতির্ব্রাহ্মণোঽনর্থনাধৃতিঃ
ব্রাহ্মণো ধৃতিমান্বিদ্বান্দেবান্প্রীণাতি তুষ্টিমান্
59.4
যাচ্ঞামাহুরনীশস্য অভিহারং চ ভারত
উদ্বেজয়তি যাচন্হি সদা ভূতানি দস্যুবৎ
59.5
ম্রিয়তে যাচমানো বৈ তমনু ম্রিয়তে দদৎ
দদত্সংজীবয়ত্যেনমাত্মানং চ যুধিষ্ঠির
59.6
আনৃশংস্যং পরো ধর্মো যাচতে যত্প্রদীয়তে
অয়াচতঃ সীদমানান্সর্বোপায়ৈর্নিমন্ত্রয়
59.7
যদি বৈ তাদৃশা রাষ্ট্রে বসেয়ুস্তে দ্বিজোত্তমাঃ
ভস্মচ্ছন্নানিবাগ্নীংস্তান্বুধ্যেথাস্ত্বং প্রয়ত্নতঃ
59.8
তপসা দীপ্যমানাস্তে দহেয়ুঃ পৃথিবীমপি
পূজ্যা হি জ্ঞানবিজ্ঞানতপোয়োগসমন্বিতাঃ
59.9
তেভ্যঃ পূজাং প্রয়ুঞ্জীথা ব্রাহ্মণেভ্যঃ পরংতপ
দদদ্বহুবিধান্দায়ানুপচ্ছন্দানয়াচতাম্
59.10
যদগ্নিহোত্রে সুহুতে সায়ংপ্রাতর্ভবেত্ফলম্
বিদ্যাবেদব্রতবতি তদ্দানফলমুচ্যতে
59.11
বিদ্যাবেদব্রতস্নাতানব্যপাশ্রয়জীবিনঃ
গূঢস্বাধ্যায়তপসো ব্রাহ্মণান্সংশিতব্রতান্
59.12
কৃতৈরাবসথৈর্হৃদ্যৈঃ সপ্রেষ্যৈঃ সপরিচ্ছদৈঃ
নিমন্ত্রয়েথাঃ কৌন্তেয় কামৈশ্চান্যৈর্দ্বিজোত্তমান্
59.13
অপি তে প্রতিগৃহ্ণীয়ুঃ শ্রদ্ধাপূতং যুধিষ্ঠির
কার্যমিত্যেব মন্বানা ধর্মজ্ঞাঃ সূক্ষ্মদর্শিনঃ
59.14
অপি তে ব্রাহ্মণা ভুক্ত্বা গতাঃ সোদ্ধরণান্গৃহান্
যেষাং দারাঃ প্রতীক্ষন্তে পর্জন্যমিব কর্ষকাঃ
59.15
অন্নানি প্রাতঃসবনে নিয়তা ব্রহ্মচারিণঃ
ব্রাহ্মণাস্তাত ভুঞ্জানাস্ত্রেতাগ্নীন্প্রীণয়ন্তু তে
59.16
মাধ্যংদিনং তে সবনং দদতস্তাত বর্ততাম্
গা হিরণ্যানি বাসাংসি তেনেন্দ্রঃ প্রীয়তাং তব
59.17
তৃতীয়ং সবনং তত্তে বৈশ্বদেবং যুধিষ্ঠির
যদ্দেবেভ্যঃ পিতৃভ্যশ্চ বিপ্রেভ্যশ্চ প্রয়চ্ছসি
59.18
অহিংসা সর্বভূতেভ্যঃ সংবিভাগশ্চ সর্বশঃ
দমস্ত্যাগো ধৃতিঃ সত্যং ভবত্ববভৃথায় তে
59.19
এষ তে বিততো যজ্ঞঃ শ্রদ্ধাপূতঃ সদক্ষিণঃ
বিশিষ্টঃ সর্বয়জ্ঞেভ্যো নিত্যং তাত প্রবর্ততাম্