Utshovঅধ্যায় 58
58.1
যুধিষ্ঠির উবাচ
যানীমানি বহির্বেদ্যাং দানানি পরিচক্ষতে
তেভ্যো বিশিষ্টং কিং দানং মতং তে কুরুপুংগব
58.2
কৌতূহলং হি পরমং তত্র মে বর্ততে প্রভো
দাতারং দত্তমন্বেতি যদ্দানং তত্প্রচক্ষ্ব মে
58.3
ভীষ্ম উবাচ
অভয়ং সর্বভূতেভ্যো ব্যসনে চাপ্যনুগ্রহম্
যচ্চাভিলষিতং দদ্যাত্তৃষিতায়াভিয়াচতে
58.4
দত্তং মন্যেত যদ্দত্ত্বা তদ্দানং শ্রেষ্ঠমুচ্যতে
দত্তং দাতারমন্বেতি যদ্দানং ভরতর্ষভ
58.5
হিরণ্যদানং গোদানং পৃথিবীদানমেব চ
এতানি বৈ পবিত্রাণি তারয়ন্ত্যপি দুষ্কৃতম্
58.6
এতানি পুরুষব্যাঘ্র সাধুভ্যো দেহি নিত্যদা
দানানি হি নরং পাপান্মোক্ষয়ন্তি ন সংশয়ঃ
58.7
যদ্যদিষ্টতমং লোকে যচ্চাস্য দয়িতং গৃহে
তত্তদ্গুণবতে দেয়ং তদেবাক্ষয়মিচ্ছতা
58.8
প্রিয়াণি লভতে লোকে প্রিয়দঃ প্রিয়কৃত্তথা
প্রিয়ো ভবতি ভূতানামিহ চৈব পরত্র চ
58.9
যাচমানমভীমানাদাশাবন্তমকিংচনম্
যো নার্চতি যথাশক্তি স নৃশংসো যুধিষ্ঠির
58.10
অমিত্রমপি চেদ্দীনং শরণৈষিণমাগতম্
ব্যসনে যোঽনুগৃহ্ণাতি স বৈ পুরুষসত্তমঃ
58.11
কৃশায় হ্রীমতে তাত বৃত্তিক্ষীণায় সীদতে
অপহন্যাত্ক্ষুধং যস্তু ন তেন পুরুষঃ সমঃ
58.12
হ্রিয়া তু নিয়তান্সাধূন্পুত্রদারৈশ্চ কর্শিতান্
অয়াচমানান্কৌন্তেয় সর্বোপায়ৈর্নিমন্ত্রয়
58.13
আশিষং যে ন দেবেষু ন মর্ত্যেষু চ কুর্বতে
অর্হন্তো নিত্যসত্ত্বস্থা যথালব্ধোপজীবিনঃ
58.14
আশীবিষসমেভ্যশ্চ তেভ্যো রক্ষস্ব ভারত
তান্যুক্তৈরুপজিজ্ঞাস্য তথা দ্বিজবরোত্তমান্
58.15
কৃতৈরাবসথৈর্নিত্যং সপ্রেষ্যৈঃ সপরিচ্ছদৈঃ
নিমন্ত্রয়েথাঃ কৌরব্য সর্বকামসুখাবহৈঃ
58.16
যদি তে প্রতিগৃহ্ণীয়ুঃ শ্রদ্ধাপূতং যুধিষ্ঠির
কার্যমিত্যেব মন্বানা ধার্মিকাঃ পুণ্যকর্মিণঃ
58.17
বিদ্যাস্নাতা ব্রতস্নাতা যে ব্যপাশ্রিত্যজীবিনঃ
গূঢস্বাধ্যায়তপসো ব্রাহ্মণাঃ সংশিতব্রতাঃ
58.18
তেষু শুদ্ধেষু দান্তেষু স্বদারনিরতেষু চ
যত্করিষ্যসি কল্যাণং তত্ত্বা লোকেষু ধাস্যতি
58.19
যথাগ্নিহোত্রং সুহুতং সায়ং প্রাতর্দ্বিজাতিনা
তথা ভবতি দত্তং বৈ দ্বিজেভ্যোঽথ কৃতাত্মনা
58.20
এষ তে বিততো যজ্ঞঃ শ্রদ্ধাপূতঃ সদক্ষিণঃ
বিশিষ্টঃ সর্বয়জ্ঞেভ্যো দদতস্তাত বর্ততাম্
58.21
নিবাপো দানসদৃশস্তাদৃশেষু যুধিষ্ঠির
নিবপন্পূজয়ংশ্চৈব তেষ্বানৃণ্যং নিগচ্ছতি
58.22
য এব নো ন কুপ্যন্তি ন লুভ্যন্তি তৃণেষ্বপি
ত এব নঃ পূজ্যতমা যে চান্যে প্রিয়বাদিনঃ
58.23
যে নো ন বহু মন্যন্তে ন প্রবর্তন্তি চাপরে
পুত্রবত্পরিপাল্যাস্তে নমস্তেভ্যস্তথাভয়ম্
58.24
ঋত্বিক্পুরোহিতাচার্যা মৃদুব্রহ্মধরা হি তে
ক্ষত্রেণাপি হি সংসৃষ্টং তেজঃ শাম্যতি বৈ দ্বিজে
58.25
অস্তি মে বলবানস্মি রাজাস্মীতি যুধিষ্ঠির
ব্রাহ্মণান্মা স্ম পর্যশ্নীর্বাসোভিরশনেন চ
58.26
যচ্ছোভার্থং বলার্থং বা বিত্তমস্তি তবানঘ
তেন তে ব্রাহ্মণাঃ পূজ্যাঃ স্বধর্মমনুতিষ্ঠতা
58.27
নমস্কার্যাস্ত্বয়া বিপ্রা বর্তমানা যথাতথম্
যথাসুখং যথোত্সাহং ললন্তু ত্বয়ি পুত্রবৎ
58.28
কো হ্যন্যঃ সুপ্রসাদানাং সুহৃদামল্পতোষিণাম্
বৃত্তিমর্হত্যুপক্ষেপ্তুং ত্বদন্যঃ কুরুসত্তম
58.29
যথা পত্যাশ্রয়ো ধর্মঃ স্ত্রীণাং লোকে সনাতনঃ
স দেবঃ সা গতির্নান্যা তথাস্মাকং দ্বিজাতয়ঃ
58.30
যদি নো ব্রাহ্মণাস্তাত সংত্যজেয়ুরপূজিতাঃ
পশ্যন্তো দারুণং কর্ম সততং ক্ষত্রিয়ে স্থিতম্
58.31
অবেদানামকীর্তীনামলোকানাময়জ্বনাম্
কোঽস্মাকং জীবিতেনার্থস্তদ্ধি নো ব্রাহ্মণাশ্রয়ম্
58.32
অত্র তে বর্তয়িষ্যামি যথা ধর্মঃ সনাতনঃ
রাজন্যো ব্রাহ্মণং রাজন্পুরা পরিচচার হ
বৈশ্যো রাজন্যমিত্যেব শূদ্রো বৈশ্যমিতি শ্রুতিঃ
58.33
দূরাচ্ছূদ্রেণোপচর্যো ব্রাহ্মণোঽগ্নিরিব জ্বলন্
সংস্পর্শপরিচর্যস্তু বৈশ্যেন ক্ষত্রিয়েণ চ
58.34
মৃদুভাবান্সত্যশীলান্সত্যধর্মানুপালকান্
আশীবিষানিব ক্রুদ্ধাংস্তানুপাচরত দ্বিজান্
58.35
অপরেষাং পরেষাং চ পরেভ্যশ্চৈব যে পরে
ক্ষত্রিয়াণাং প্রতপতাং তেজসা চ বলেন চ
ব্রাহ্মণেষ্বেব শাম্যন্তি তেজাংসি চ তপাংসি চ
58.36
ন মে পিতা প্রিয়তরো ন ত্বং তাত তথা প্রিয়ঃ
ন মে পিতুঃ পিতা রাজন্ন চাত্মা ন চ জীবিতম্
58.37
ত্বত্তশ্চ মে প্রিয়তরঃ পৃথিব্যাং নাস্তি কশ্চন
ত্বত্তোঽপি মে প্রিয়তরা ব্রাহ্মণা ভরতর্ষভ
58.38
ব্রবীমি সত্যমেতচ্চ যথাহং পাণ্ডুনন্দন
তেন সত্যেন গচ্ছেয়ং লোকান্যত্র স শংতনুঃ
58.39
পশ্যেয়ং চ সতাং লোকাঞ্ছুচীন্ব্রহ্মপুরস্কৃতান্
তত্র মে তাত গন্তব্যমহ্নায় চ চিরায় চ
58.40
সোঽহমেতাদৃশাঁল্লোকান্দৃষ্ট্বা ভরতসত্তম
যন্মে কৃতং ব্রাহ্মণেষু ন তপ্যে তেন পার্থিব