Utshovঅধ্যায় 57
57.1
যুধিষ্ঠির উবাচ
মুহ্যামীব নিশম্যাদ্য চিন্তয়ানঃ পুনঃ পুনঃ
হীনাং পার্থিবসংঘাতৈঃ শ্রীমদ্ভিঃ পৃথিবীমিমাম্
57.2
প্রাপ্য রাজ্যানি শতশো মহীং জিত্বাপি ভারত
কোটিশঃ পুরুষান্হত্বা পরিতপ্যে পিতামহ
57.3
কা নু তাসাং বরস্ত্রীণামবস্থাদ্য ভবিষ্যতি
যা হীনাঃ পতিভিঃ পুত্রৈর্মাতুলৈর্ভ্রাতৃভিস্তথা
57.4
বয়ং হি তান্গুরূন্হত্বা জ্ঞাতীংশ্চ সুহৃদোঽপি চ
অবাক্শীর্ষাঃ পতিষ্যামো নরকে নাত্র সংশয়ঃ
57.5
শরীরং যোক্তুমিচ্ছামি তপসোগ্রেণ ভারত
উপদিষ্টমিহেচ্ছামি তত্ত্বতোঽহং বিশাং পতে
57.6
বৈশংপায়ন উবাচ
যুধিষ্ঠিরস্য তদ্বাক্যং শ্রুত্বা ভীষ্মো মহামনাঃ
পরীক্ষ্য নিপুণং বুদ্ধ্যা যুধিষ্ঠিরমভাষত
57.7
রহস্যমদ্ভুতং চৈব শৃণু বক্ষ্যামি যত্ত্বয়ি
যা গতিঃ প্রাপ্যতে যেন প্রেত্যভাবেষু ভারত
57.8
তপসা প্রাপ্যতে স্বর্গস্তপসা প্রাপ্যতে যশঃ
আয়ুঃপ্রকর্ষো ভোগাশ্চ লভ্যন্তে তপসা বিভো
57.9
জ্ঞানং বিজ্ঞানমারোগ্যং রূপং সংপত্তথৈব চ
সৌভাগ্যং চৈব তপসা প্রাপ্যতে ভরতর্ষভ
57.10
ধনং প্রাপ্নোতি তপসা মৌনং জ্ঞানং প্রয়চ্ছতি
উপভোগাংস্তু দানেন ব্রহ্মচর্যেণ জীবিতম্
57.11
অহিংসায়াঃ ফলং রূপং দীক্ষায়া জন্ম বৈ কুলে
ফলমূলাশিনাং রাজ্যং স্বর্গঃ পর্ণাশিনাং ভবেৎ
57.12
পয়োভক্ষো দিবং যাতি স্নানেন দ্রবিণাধিকঃ
গুরুশুশ্রূষয়া বিদ্যা নিত্যশ্রাদ্ধেন সংততিঃ
57.13
গবাঢ্যঃ শাকদীক্ষাভিঃ স্বর্গমাহুস্তৃণাশনাৎ
স্ত্রিয়স্ত্রিষবণস্নানাদ্বায়ুং পীত্বা ক্রতুং লভেৎ
57.14
নিত্যস্নায়ী ভবেদ্দক্ষঃ সংধ্যে তু দ্বে জপন্দ্বিজঃ
মরুং সাধয়তো রাজ্যং নাকপৃষ্ঠমনাশকে
57.15
স্থণ্ডিলে শয়মানানাং গৃহাণি শয়নানি চ
চীরবল্কলবাসোভির্বাসাংস্যাভরণানি চ
57.16
শয্যাসনানি যানানি যোগয়ুক্তে তপোধনে
অগ্নিপ্রবেশে নিয়তং ব্রহ্মলোকো বিধীয়তে
57.17
রসানাং প্রতিসংহারাত্সৌভাগ্যমিহ বিন্দতি
আমিষপ্রতিসংহারাত্প্রজাস্যায়ুষ্মতী ভবেৎ
57.18
উদবাসং বসেদ্যস্তু স নরাধিপতির্ভবেৎ
সত্যবাদী নরশ্রেষ্ঠ দৈবতৈঃ সহ মোদতে
57.19
কীর্তির্ভবতি দানেন তথারোগ্যমহিংসয়া
দ্বিজশুশ্রূষয়া রাজ্যং দ্বিজত্বং বাপি পুষ্কলম্
57.20
পানীয়স্য প্রদানেন কীর্তির্ভবতি শাশ্বতী
অন্নপানপ্রদানেন তৃপ্যতে কামভোগতঃ
57.21
সান্ত্বদঃ সর্বভূতানাং সর্বশোকৈর্বিমুচ্যতে
দেবশুশ্রূষয়া রাজ্যং দিব্যং রূপং নিয়চ্ছতি
57.22
দীপালোকপ্রদানেন চক্ষুষ্মান্ভবতে নরঃ
প্রেক্ষণীয়প্রদানেন স্মৃতিং মেধাং চ বিন্দতি
57.23
গন্ধমাল্যনিবৃত্ত্যা তু কীর্তির্ভবতি পুষ্কলা
কেশশ্মশ্রূন্ধারয়তামগ্র্যা ভবতি সংততিঃ
57.24
উপবাসং চ দীক্ষাং চ অভিষেকং চ পার্থিব
কৃত্বা দ্বাদশ বর্ষাণি বীরস্থানাদ্বিশিষ্যতে
57.25
দাসীদাসমলংকারান্ক্ষেত্রাণি চ গৃহাণি চ
ব্রহ্মদেয়াং সুতাং দত্ত্বা প্রাপ্নোতি মনুজর্ষভ
57.26
ক্রতুভিশ্চোপবাসৈশ্চ ত্রিদিবং যাতি ভারত
লভতে চ চিরং স্থানং বলিপুষ্পপ্রদো নরঃ
57.27
সুবর্ণশৃঙ্গৈস্তু বিভূষিতানাং; গবাং সহস্রস্য নরঃ প্রদাতা
প্রাপ্নোতি পুণ্যং দিবি দেবলোক;মিত্যেবমাহুর্মুনিদেবসংঘাঃ
57.28
প্রয়চ্ছতে যঃ কপিলাং সচৈলাং; কাংস্যোপদোহাং কনকাগ্রশৃঙ্গীম্
তৈস্তৈর্গুণৈঃ কামদুঘাস্য ভূত্বা; নরং প্রদাতারমুপৈতি সা গৌঃ
57.29
যাবন্তি লোমানি ভবন্তি ধেন্বা;স্তাবত্ফলং প্রাপ্নুতে গোপ্রদাতা
পুত্রাংশ্চ পৌত্রাংশ্চ কুলং চ সর্ব;মাসপ্তমং তারয়তে পরত্র
57.30
সদক্ষিণাং কাঞ্চনচারুশৃঙ্গীং; কাংস্যোপদোহাং দ্রবিণোত্তরীয়াম্
ধেনুং তিলানাং দদতো দ্বিজায়; লোকা বসূনাং সুলভা ভবন্তি
57.31
স্বকর্মভির্মানবং সংনিবদ্ধং; তীব্রান্ধকারে নরকে পতন্তম্
মহার্ণবে নৌরিব বায়ুয়ুক্তা; দানং গবাং তারয়তে পরত্র
57.32
যো ব্রহ্মদেয়াং তু দদাতি কন্যাং; ভূমিপ্রদানং চ করোতি বিপ্রে
দদাতি চান্নং বিধিবচ্চ যশ্চ; স লোকমাপ্নোতি পুরংদরস্য
57.33
নৈবেশিকং সর্বগুণোপপন্নং; দদাতি বৈ যস্তু নরো দ্বিজায়
স্বাধ্যায়চারিত্রগুণান্বিতায়; তস্যাপি লোকাঃ কুরুষূত্তরেষু
57.34
ধুর্যপ্রদানেন গবাং তথাশ্বৈ;র্লোকানবাপ্নোতি নরো বসূনাম্
স্বর্গায় চাহুর্হি হিরণ্যদানং; ততো বিশিষ্টং কনকপ্রদানম্
57.35
ছত্রপ্রদানেন গৃহং বরিষ্ঠং; যানং তথোপানহসংপ্রদানে
বস্ত্রপ্রদানেন ফলং সুরূপং; গন্ধপ্রদানে সুরভির্নরঃ স্যাৎ
57.36
পুষ্পোপগং বাথ ফলোপগং বা; যঃ পাদপং স্পর্শয়তে দ্বিজায়
স স্ত্রীসমৃদ্ধং বহুরত্নপূর্ণং; লভত্যয়ত্নোপগতং গৃহং বৈ
57.37
ভক্ষান্নপানীয়রসপ্রদাতা; সর্বানবাপ্নোতি রসান্প্রকামম্
প্রতিশ্রয়াচ্ছাদনসংপ্রদাতা; প্রাপ্নোতি তানেব ন সংশয়োঽত্র
57.38
স্রগ্ধূপগন্ধান্যনুলেপনানি; স্নানানি মাল্যানি চ মানবো যঃ
দদ্যাদ্দ্বিজেভ্যঃ স ভবেদরোগ;স্তথাভিরূপশ্চ নরেন্দ্রলোকে
57.39
বীজৈরশূন্যং শয়নৈরুপেতং; দদ্যাদ্গৃহং যঃ পুরুষো দ্বিজায়
পুণ্যাভিরামং বহুরত্নপূর্ণং; লভত্যধিষ্ঠানবরং স রাজন্
57.40
সুগন্ধচিত্রাস্তরণোপপন্নং; দদ্যান্নরো যঃ শয়নং দ্বিজায়
রূপান্বিতাং পক্ষবতীং মনোজ্ঞাং; ভার্যাময়ত্নোপগতাং লভেত্সঃ
57.41
পিতামহস্যানুচরো বীরশায়ী ভবেন্নরঃ
নাধিকং বিদ্যতে তস্মাদিত্যাহুঃ পরমর্ষয়ঃ
57.42
বৈশংপায়ন উবাচ
তস্য তদ্বচনং শ্রুত্বা প্রীতাত্মা কুরুনন্দনঃ
নাশ্রমেঽরোচয়দ্বাসং বীরমার্গাভিকাঙ্ক্ষয়া
57.43
ততো যুধিষ্ঠিরঃ প্রাহ পাণ্ডবান্ভরতর্ষভ
পিতামহস্য যদ্বাক্যং তদ্বো রোচত্বিতি প্রভুঃ
57.44
ততস্তু পাণ্ডবাঃ সর্বে দ্রৌপদী চ যশস্বিনী
যুধিষ্ঠিরস্য তদ্বাক্যং বাঢমিত্যভ্যপূজয়ন্