অধ্যায় 56

56.1

চ্যবন উবাচ
অবশ্যং কথনীয়ং মে তবৈতন্নরপুংগব
যদর্থং ত্বাহমুচ্ছেত্তুং সংপ্রাপ্তো মনুজাধিপ

ভৃগূণাং ক্ষত্রিয়া যাজ্যা নিত্যমেব জনাধিপ
তে চ ভেদং গমিষ্যন্তি দৈবয়ুক্তেন হেতুনা

ক্ষত্রিয়াশ্চ ভৃগূন্সর্বান্বধিষ্যন্তি নরাধিপ
আ গর্ভাদনুকৃন্তন্তো দৈবদণ্ডনিপীডিতাঃ

তত উত্পত্স্যতেঽস্মাকং কুলে গোত্রবিবর্ধনঃ
ঔর্বো নাম মহাতেজা জ্বলনার্কসমদ্যুতিঃ

স ত্রৈলোক্যবিনাশায় কোপাগ্নিং জনয়িষ্যতি
মহীং সপর্বতবনাং যঃ করিষ্যতি ভস্মসাৎ

কংচিত্কালং তু তং বহ্নিং স এব শময়িষ্যতি
সমুদ্রে বডবাবক্ত্রে প্রক্ষিপ্য মুনিসত্তমঃ

পুত্রং তস্য মহাভাগমৃচীকং ভৃগুনন্দনম্
সাক্ষাত্কৃত্স্নো ধনুর্বেদঃ সমুপস্থাস্যতেঽনঘ

ক্ষত্রিয়াণামভাবায় দৈবয়ুক্তেন হেতুনা
স তু তং প্রতিগৃহ্যৈব পুত্রে সংক্রাময়িষ্যতি

জমদগ্নৌ মহাভাগে তপসা ভাবিতাত্মনি
স চাপি ভৃগুশার্দূলস্তং বেদং ধারয়িষ্যতি

কুলাত্তু তব ধর্মাত্মন্কন্যাং সোঽধিগমিষ্যতি
উদ্ভাবনার্থং ভবতো বংশস্য নৃপসত্তম

গাধের্দুহিতরং প্রাপ্য পৌত্রীং তব মহাতপাঃ
ব্রাহ্মণং ক্ষত্রধর্মাণং রামমুত্পাদয়িষ্যতি

ক্ষত্রিয়ং বিপ্রকর্মাণং বৃহস্পতিমিবৌজসা
বিশ্বামিত্রং তব কুলে গাধেঃ পুত্রং সুধার্মিকম্
তপসা মহতা যুক্তং প্রদাস্যতি মহাদ্যুতে

স্ত্রিয়ৌ তু কারণং তত্র পরিবর্তে ভবিষ্যতঃ
পিতামহনিয়োগাদ্বৈ নান্যথৈতদ্ভবিষ্যতি

তৃতীয়ে পুরুষে তুভ্যং ব্রাহ্মণত্বমুপৈষ্যতি
ভবিতা ত্বং চ সংবন্ধী ভৃগূণাং ভাবিতাত্মনাম্

ভীষ্ম উবাচ
কুশিকস্তু মুনের্বাক্যং চ্যবনস্য মহাত্মনঃ
শ্রুত্বা হৃষ্টোঽভবদ্রাজা বাক্যং চেদমুবাচ হ
এবমস্ত্বিতি ধর্মাত্মা তদা ভরতসত্তম

চ্যবনস্তু মহাতেজাঃ পুনরেব নরাধিপম্
বরার্থং চোদয়ামাস তমুবাচ স পার্থিবঃ

বাঢমেবং গ্রহীষ্যামি কামং ত্বত্তো মহামুনে
ব্রহ্মভূতং কুলং মেঽস্তু ধর্মে চাস্য মনো ভবেৎ

এবমুক্তস্তথেত্যেবং প্রত্যুক্ত্বা চ্যবনো মুনিঃ
অভ্যনুজ্ঞায় নৃপতিং তীর্থয়াত্রাং যয়ৌ তদা

এতত্তে কথিতং সর্বমশেষেণ ময়া নৃপ
ভৃগূণাং কুশিকানাং চ প্রতি সংবন্ধকারণম্

যথোক্তং মুনিনা চাপি তথা তদভবন্নৃপ
জন্ম রামস্য চ মুনের্বিশ্বামিত্রস্য চৈব হ