Utshovঅধ্যায় 55
55.1
চ্যবন উবাচ
বরশ্চ গৃহ্যতাং মত্তো যশ্চ তে সংশয়ো হৃদি
তং চ ব্রূহি নরশ্রেষ্ঠ সর্বং সংপাদয়ামি তে
55.2
কুশিক উবাচ
যদি প্রীতোঽসি ভগবংস্ততো মে বদ ভার্গব
কারণং শ্রোতুমিচ্ছামি মদ্গৃহে বাসকারিতম্
55.3
শয়নং চৈকপার্শ্বেন দিবসানেকবিংশতিম্
অকিংচিদুক্ত্বা গমনং বহিশ্চ মুনিপুংগব
55.4
অন্তর্ধানমকস্মাচ্চ পুনরেব চ দর্শনম্
পুনশ্চ শয়নং বিপ্র দিবসানেকবিংশতিম্
55.5
তৈলাভ্যক্তস্য গমনং ভোজনং চ গৃহে মম
সমুপানীয় বিবিধং যদ্দগ্ধং জাতবেদসা
নির্যাণং চ রথেনাশু সহসা যত্কৃতং ত্বয়া
55.6
ধনানাং চ বিসর্গস্য বনস্যাপি চ দর্শনম্
প্রাসাদানাং বহূনাং চ কাঞ্চনানাং মহামুনে
55.7
মণিবিদ্রুমপাদানাং পর্যঙ্কানাং চ দর্শনম্
পুনশ্চাদর্শনং তস্য শ্রোতুমিচ্ছামি কারণম্
55.8
অতীব হ্যত্র মুহ্যামি চিন্তয়ানো দিবানিশম্
ন চৈবাত্রাধিগচ্ছামি সর্বস্যাস্য বিনিশ্চয়ম্
এতদিচ্ছামি কার্ত্স্ন্যেন সত্যং শ্রোতুং তপোধন
55.9
চ্যবন উবাচ
শৃণু সর্বমশেষেণ যদিদং যেন হেতুনা
ন হি শক্যমনাখ্যাতুমেবং পৃষ্টেন পার্থিব
55.10
পিতামহস্য বদতঃ পুরা দেবসমাগমে
শ্রুতবানস্মি যদ্রাজংস্তন্মে নিগদতঃ শৃণু
55.11
ব্রহ্মক্ষত্রবিরোধেন ভবিতা কুলসংকরঃ
পৌত্রস্তে ভবিতা রাজংস্তেজোবীর্যসমন্বিতঃ
55.12
ততঃ স্বকুলরক্ষার্থমহং ত্বা সমুপাগমম্
চিকীর্ষন্কুশিকোচ্ছেদং সংদিধক্ষুঃ কুলং তব
55.13
ততোঽহমাগম্য পুরা ত্বামবোচং মহীপতে
নিয়মং কংচিদারপ্স্যে শুশ্রূষা ক্রিয়তামিতি
55.14
ন চ তে দুষ্কৃতং কিংচিদহমাসাদয়ং গৃহে
তেন জীবসি রাজর্ষে ন ভবেথাস্ততোঽন্যথা
55.15
এতাং বুদ্ধিং সমাস্থায় দিবসানেকবিংশতিম্
সুপ্তোঽস্মি যদি মাং কশ্চিদ্বোধয়েদিতি পার্থিব
55.16
যদা ত্বয়া সভার্যেণ সংসুপ্তো ন প্রবোধিতঃ
অহং তদৈব তে প্রীতো মনসা রাজসত্তম
55.17
উত্থায় চাস্মি নিষ্ক্রান্তো যদি মাং ত্বং মহীপতে
পৃচ্ছেঃ ক্ব যাস্যসীত্যেবং শপেয়ং ত্বামিতি প্রভো
55.18
অন্তর্হিতশ্চাস্মি পুনঃ পুনরেব চ তে গৃহে
যোগমাস্থায় সংবিষ্টো দিবসানেকবিংশতিম্
55.19
ক্ষুধিতো মামসূয়েথাঃ শ্রমাদ্বেতি নরাধিপ
এতাং বুদ্ধিং সমাস্থায় কর্শিতৌ বাং ময়া ক্ষুধা
55.20
ন চ তেঽভূত্সুসূক্ষ্মোঽপি মন্যুর্মনসি পার্থিব
সভার্যস্য নরশ্রেষ্ঠ তেন তে প্রীতিমানহম্
55.21
ভোজনং চ সমানায্য যত্তদাদীপিতং ময়া
ক্রুধ্যেথা যদি মাত্সর্যাদিতি তন্মর্ষিতং চ তে
55.22
ততোঽহং রথমারুহ্য ত্বামবোচং নরাধিপ
সভার্যো মাং বহস্বেতি তচ্চ ত্বং কৃতবাংস্তথা
55.23
অবিশঙ্কো নরপতে প্রীতোঽহং চাপি তেন তে
ধনোত্সর্গেঽপি চ কৃতে ন ত্বাং ক্রোধঃ প্রধর্ষয়ৎ
55.24
ততঃ প্রীতেন তে রাজন্পুনরেতত্কৃতং তব
সভার্যস্য বনং ভূয়স্তদ্বিদ্ধি মনুজাধিপ
55.25
প্রীত্যর্থং তব চৈতন্মে স্বর্গসংদর্শনং কৃতম্
যত্তে বনেঽস্মিন্নৃপতে দৃষ্টং দিব্যং নিদর্শনম্
55.26
স্বর্গোদ্দেশস্ত্বয়া রাজন্সশরীরেণ পার্থিব
মুহূর্তমনুভূতোঽসৌ সভার্যেণ নৃপোত্তম
55.27
নিদর্শনার্থং তপসো ধর্মস্য চ নরাধিপ
তত্র যাসীত্স্পৃহা রাজংস্তচ্চাপি বিদিতং মম
55.28
ব্রাহ্মণ্যং কাঙ্ক্ষসে হি ত্বং তপশ্চ পৃথিবীপতে
অবমন্য নরেন্দ্রত্বং দেবেন্দ্রত্বং চ পার্থিব
55.29
এবমেতদ্যথাত্থ ত্বং ব্রাহ্মণ্যং তাত দুর্লভম্
ব্রাহ্মণ্যে সতি চর্ষিত্বমৃষিত্বে চ তপস্বিতা
55.30
ভবিষ্যত্যেষ তে কামঃ কুশিকাত্কৌশিকো দ্বিজঃ
তৃতীয়ং পুরুষং প্রাপ্য ব্রাহ্মণত্বং গমিষ্যতি
55.31
বংশস্তে পার্থিবশ্রেষ্ঠ ভৃগূণামেব তেজসা
পৌত্রস্তে ভবিতা বিপ্র তপস্বী পাবকদ্যুতিঃ
55.32
যঃ স দেবমনুষ্যাণাং ভয়মুত্পাদয়িষ্যতি
ত্রয়াণাং চৈব লোকানাং সত্যমেতদ্ব্রবীমি তে
55.33
বরং গৃহাণ রাজর্ষে যস্তে মনসি বর্ততে
তীর্থয়াত্রাং গমিষ্যামি পুরা কালোঽতিবর্ততে
55.34
কুশিক উবাচ
এষ এব বরো মেঽদ্য যত্ত্বং প্রীতো মহামুনে
ভবত্বেতদ্যথাত্থ ত্বং তপঃ পৌত্রে মমানঘ
ব্রাহ্মণ্যং মে কুলস্যাস্তু ভগবন্নেষ মে বরঃ
55.35
পুনশ্চাখ্যাতুমিচ্ছামি ভগবন্বিস্তরেণ বৈ
কথমেষ্যতি বিপ্রত্বং কুলং মে ভৃগুনন্দন
কশ্চাসৌ ভবিতা বন্ধুর্মম কশ্চাপি সংমতঃ