Utshovঅধ্যায় 54
54.1
ভীষ্ম উবাচ
ততঃ স রাজা রাত্র্যন্তে প্রতিবুদ্ধো মহামনাঃ
কৃতপূর্বাহ্ণিকঃ প্রায়াত্সভার্যস্তদ্বনং প্রতি
54.2
ততো দদর্শ নৃপতিঃ প্রাসাদং সর্বকাঞ্চনম্
মণিস্তম্ভসহস্রাঢ্যং গন্ধর্বনগরোপমম্
তত্র দিব্যানভিপ্রায়ান্দদর্শ কুশিকস্তদা
54.3
পর্বতান্রম্যসানূংশ্চ নলিনীশ্চ সপঙ্কজাঃ
চিত্রশালাশ্চ বিবিধাস্তোরণানি চ ভারত
শাদ্বলোপচিতাং ভূমিং তথা কাঞ্চনকুট্টিমাম্
54.4
সহকারান্প্রফুল্লাংশ্চ কেতকোদ্দালকান্ধবান্
অশোকান্মুচুকুন্দাংশ্চ ফুল্লাংশ্চৈবাতিমুক্তকান্
54.5
চম্পকাংস্তিলকান্ভব্যান্পনসান্বঞ্জুলানপি
পুষ্পিতান্কর্ণিকারাংশ্চ তত্র তত্র দদর্শ হ
54.6
শ্যামাং বারণপুষ্পীং চ তথাষ্টাপদিকাং লতাম্
তত্র তত্র পরিকৢপ্তা দদর্শ স মহীপতিঃ
54.7
বৃক্ষান্পদ্মোত্পলধরান্সর্বর্তুকুসুমাংস্তথা
বিমানচ্ছন্দকাংশ্চাপি প্রাসাদান্পদ্মসংনিভান্
54.8
শীতলানি চ তোয়ানি ক্বচিদুষ্ণানি ভারত
আসনানি বিচিত্রাণি শয়নপ্রবরাণি চ
54.9
পর্যঙ্কান্সর্বসৌবর্ণান্পরার্ধ্যাস্তরণাস্তৃতান্
ভক্ষ্যভোজ্যমনন্তং চ তত্র তত্রোপকল্পিতম্
54.10
বাণীবাদাঞ্ছুকাংশ্চাপি শারিকাভৃঙ্গরাজকান্
কোকিলাঞ্ছতপত্রাংশ্চ কোয়ষ্টিমককুক্কুটান্
54.11
ময়ূরান্কুক্কুটাংশ্চাপি পুত্রকাঞ্জীবজীবকান্
চকোরান্বানরান্হংসান্সারসাংশ্চক্রসাহ্বয়ান্
54.12
সমন্ততঃ প্রণদিতান্দদর্শ সুমনোহরান্
ক্বচিদপ্সরসাং সংঘান্গন্ধর্বাণাং চ পার্থিব
54.13
কান্তাভিরপরাংস্তত্র পরিষ্বক্তান্দদর্শ হ
ন দদর্শ চ তান্ভূয়ো দদর্শ চ পুনর্নৃপঃ
54.14
গীতধ্বনিং সুমধুরং তথৈবাধ্যয়নধ্বনিম্
হংসান্সুমধুরাংশ্চাপি তত্র শুশ্রাব পার্থিবঃ
54.15
তং দৃষ্ট্বাত্যদ্ভুতং রাজা মনসাচিন্তয়ত্তদা
স্বপ্নোঽয়ং চিত্তবিভ্রংশ উতাহো সত্যমেব তু
54.16
অহো সহ শরীরেণ প্রাপ্তোঽস্মি পরমাং গতিম্
উত্তরান্বা কুরূন্পুণ্যানথ বাপ্যমরাবতীম্
54.17
কিং ত্বিদং মহদাশ্চর্যং সংপশ্যামীত্যচিন্তয়ৎ
এবং সংচিন্তয়ন্নেব দদর্শ মুনিপুংগবম্
54.18
তস্মিন্বিমানে সৌবর্ণে মণিস্তম্ভসমাকুলে
মহার্হে শয়নে দিব্যে শয়ানং ভৃগুনন্দনম্
54.19
তমভ্যয়াত্প্রহর্ষেণ নরেন্দ্রঃ সহ ভার্যয়া
অন্তর্হিতস্ততো ভূয়শ্চ্যবনঃ শয়নং চ তৎ
54.20
ততোঽন্যস্মিন্বনোদ্দেশে পুনরেব দদর্শ তম্
কৌশ্যাং বৃস্যাং সমাসীনং জপমানং মহাব্রতম্
এবং যোগবলাদ্বিপ্রো মোহয়ামাস পার্থিবম্
54.21
ক্ষণেন তদ্বনং চৈব তে চৈবাপ্সরসাং গণাঃ
গন্ধর্বাঃ পাদপাশ্চৈব সর্বমন্তরধীয়ত
54.22
নিঃশব্দমভবচ্চাপি গঙ্গাকূলং পুনর্নৃপ
কুশবল্মীকভূয়িষ্ঠং বভূব চ যথা পুরা
54.23
ততঃ স রাজা কুশিকঃ সভার্যস্তেন কর্মণা
বিস্ময়ং পরমং প্রাপ্তস্তদ্দৃষ্ট্বা মহদদ্ভুতম্
54.24
ততঃ প্রোবাচ কুশিকো ভার্যাং হর্ষসমন্বিতঃ
পশ্য ভদ্রে যথা ভাবাশ্চিত্রা দৃষ্টাঃ সুদুর্লভাঃ
54.25
প্রসাদাদ্ভৃগুমুখ্যস্য কিমন্যত্র তপোবলাৎ
তপসা তদবাপ্যং হি যন্ন শক্যং মনোরথৈঃ
54.26
ত্রৈলোক্যরাজ্যাদপি হি তপ এব বিশিষ্যতে
তপসা হি সুতপ্তেন ক্রীডত্যেষ তপোধনঃ
54.27
অহো প্রভাবো ব্রহ্মর্ষেশ্চ্যবনস্য মহাত্মনঃ
ইচ্ছন্নেষ তপোবীর্যাদন্যাঁল্লোকান্সৃজেদপি
54.28
ব্রাহ্মণা এব জায়েরন্পুণ্যবাগ্বুদ্ধিকর্মণঃ
উত্সহেদিহ কর্তুং হি কোঽন্যো বৈ চ্যবনাদৃতে
54.29
ব্রাহ্মণ্যং দুর্লভং লোকে রাজ্যং হি সুলভং নরৈঃ
ব্রাহ্মণ্যস্য প্রভাবাদ্ধি রথে যুক্তৌ স্বধুর্যবৎ
54.30
ইত্যেবং চিন্তয়ানঃ স বিদিতশ্চ্যবনস্য বৈ
সংপ্রেক্ষ্যোবাচ স নৃপং ক্ষিপ্রমাগম্যতামিতি
54.31
ইত্যুক্তঃ সহভার্যস্তমভ্যগচ্ছন্মহামুনিম্
শিরসা বন্দনীয়ং তমবন্দত স পার্থিবঃ
54.32
তস্যাশিষঃ প্রয়ুজ্যাথ স মুনিস্তং নরাধিপম্
নিষীদেত্যব্রবীদ্ধীমান্সান্ত্বয়ন্পুরুষর্ষভ
54.33
ততঃ প্রকৃতিমাপন্নো ভার্গবো নৃপতে নৃপম্
উবাচ শ্লক্ষ্ণয়া বাচা তর্পয়ন্নিব ভারত
54.34
রাজন্সম্যগ্জিতানীহ পঞ্চ পঞ্চসু যত্ত্বয়া
মনঃষষ্ঠানীন্দ্রিয়াণি কৃচ্ছ্রান্মুক্তোঽসি তেন বৈ
54.35
সম্যগারাধিতঃ পুত্র ত্বয়াহং বদতাং বর
ন হি তে বৃজিনং কিংচিত্সুসূক্ষ্মমপি বিদ্যতে
54.36
অনুজানীহি মাং রাজন্গমিষ্যামি যথাগতম্
প্রীতোঽস্মি তব রাজেন্দ্র বরশ্চ প্রতিগৃহ্যতাম্
54.37
কুশিক উবাচ
অগ্নিমধ্যগতেনেদং ভগবন্সংনিধৌ ময়া
বর্তিতং ভৃগুশার্দূল যন্ন দগ্ধোঽস্মি তদ্বহু
54.38
এষ এব বরো মুখ্যঃ প্রাপ্তো মে ভৃগুনন্দন
যত্প্রীতোঽসি সমাচারাত্কুলং পূতং মমানঘ
54.39
এষ মেঽনুগ্রহো বিপ্র জীবিতে চ প্রয়োজনম্
এতদ্রাজ্যফলং চৈব তপশ্চৈতত্পরং মম
54.40
যদি তু প্রীতিমান্বিপ্র ময়ি ত্বং ভৃগুনন্দন
অস্তি মে সংশয়ঃ কশ্চিত্তন্মে ব্যাখ্যাতুমর্হসি