Utshovঅধ্যায় 53
53.1
যুধিষ্ঠির উবাচ
তস্মিন্নন্তর্হিতে বিপ্রে রাজা কিমকরোত্তদা
ভার্যা চাস্য মহাভাগা তন্মে ব্রূহি পিতামহ
53.2
ভীষ্ম উবাচ
অদৃষ্ট্বা স মহীপালস্তমৃষিং সহ ভার্যয়া
পরিশ্রান্তো নিববৃতে ব্রীডিতো নষ্টচেতনঃ
53.3
স প্রবিশ্য পুরীং দীনো নাভ্যভাষত কিংচন
তদেব চিন্তয়ামাস চ্যবনস্য বিচেষ্টিতম্
53.4
অথ শূন্যেন মনসা প্রবিবেশ গৃহং নৃপঃ
দদর্শ শয়নে তস্মিঞ্শয়ানং ভৃগুনন্দনম্
53.5
বিস্মিতৌ তৌ তু দৃষ্ট্বা তং তদাশ্চর্যং বিচিন্ত্য চ
দর্শনাত্তস্য চ মুনের্বিশ্রান্তৌ সংবভূবতুঃ
53.6
যথাস্থানং তু তৌ স্থিত্বা ভূয়স্তং সংববাহতুঃ
অথাপরেণ পার্শ্বেন সুষ্বাপ স মহামুনিঃ
53.7
তেনৈব চ স কালেন প্রত্যবুধ্যত বীর্যবান্
ন চ তৌ চক্রতুঃ কিংচিদ্বিকারং ভয়শঙ্কিতৌ
53.8
প্রতিবুদ্ধস্তু স মুনিস্তৌ প্রোবাচ বিশাং পতে
তৈলাভ্যঙ্গো দীয়তাং মে স্নাস্যেঽহমিতি ভারত
53.9
তথেতি তৌ প্রতিশ্রুত্য ক্ষুধিতৌ শ্রমকর্শিতৌ
শতপাকেন তৈলেন মহার্হেণোপতস্থতুঃ
53.10
ততঃ সুখাসীনমৃষিং বাগ্যতৌ সংববাহতুঃ
ন চ পর্যাপ্তমিত্যাহ ভার্গবঃ সুমহাতপাঃ
53.11
যদা তৌ নির্বিকারৌ তু লক্ষয়ামাস ভার্গবঃ
তত উত্থায় সহসা স্নানশালাং বিবেশ হ
কৢপ্তমেব তু তত্রাসীত্স্নানীয়ং পার্থিবোচিতম্
53.12
অসত্কৃত্য তু তত্সর্বং তত্রৈবান্তরধীয়ত
স মুনিঃ পুনরেবাথ নৃপতেঃ পশ্যতস্তদা
নাসূয়াং চক্রতুস্তৌ চ দংপতী ভরতর্ষভ
53.13
অথ স্নাতঃ স ভগবান্সিংহাসনগতঃ প্রভুঃ
দর্শয়ামাস কুশিকং সভার্যং ভৃগুনন্দনঃ
53.14
সংহৃষ্টবদনো রাজা সভার্যঃ কুশিকো মুনিম্
সিদ্ধমন্নমিতি প্রহ্বো নির্বিকারো ন্যবেদয়ৎ
53.15
আনীয়তামিতি মুনিস্তং চোবাচ নরাধিপম্
রাজা চ সমুপাজহ্রে তদন্নং সহ ভার্যয়া
53.16
মাংসপ্রকারান্বিবিধাঞ্শাকানি বিবিধানি চ
বেসবারবিকারাংশ্চ পানকানি লঘূনি চ
53.17
রসালাপূপকাংশ্চিত্রান্মোদকানথ ষাডবান্
রসান্নানাপ্রকারাংশ্চ বন্যং চ মুনিভোজনম্
53.18
ফলানি চ বিচিত্রাণি তথা ভোজ্যানি ভূরিশঃ
বদরেঙ্গুদকাশ্মর্যভল্লাতকবটানি চ
53.19
গৃহস্থানাং চ যদ্ভোজ্যং যচ্চাপি বনবাসিনাম্
সর্বমাহারয়ামাস রাজা শাপভয়ান্মুনেঃ
53.20
অথ সর্বমুপন্যস্তমগ্রতশ্চ্যবনস্য তৎ
ততঃ সর্বং সমানীয় তচ্চ শয্যাসনং মুনিঃ
53.21
বস্ত্রৈঃ শুভৈরবচ্ছাদ্য ভোজনোপস্করৈঃ সহ
সর্বমাদীপয়ামাস চ্যবনো ভৃগুনন্দনঃ
53.22
ন চ তৌ চক্রতুঃ কোপং দংপতী সুমহাব্রতৌ
তয়োঃ সংপ্রেক্ষতোরেব পুনরন্তর্হিতোঽভবৎ
53.23
তত্রৈব চ স রাজর্ষিস্তস্থৌ তাং রজনীং তদা
সভার্যো বাগ্যতঃ শ্রীমান্ন চ তং কোপ আবিশৎ
53.24
নিত্যং সংস্কৃতমন্নং তু বিবিধং রাজবেশ্মনি
শয়নানি চ মুখ্যানি পরিষেকাশ্চ পুষ্কলাঃ
53.25
বস্ত্রং চ বিবিধাকারমভবত্সমুপার্জিতম্
ন শশাক ততো দ্রষ্টুমন্তরং চ্যবনস্তদা
53.26
পুনরেব চ বিপ্রর্ষিঃ প্রোবাচ কুশিকং নৃপম্
সভার্যো মাং রথেনাশু বহ যত্র ব্রবীম্যহম্
53.27
তথেতি চ প্রাহ নৃপো নির্বিশঙ্কস্তপোধনম্
ক্রীডারথোঽস্তু ভগবন্নুত সাংগ্রামিকো রথঃ
53.28
ইত্যুক্তঃ স মুনিস্তেন রাজ্ঞা হৃষ্টেন তদ্বচঃ
চ্যবনঃ প্রত্যুবাচেদং হৃষ্টঃ পরপুরংজয়ম্
53.29
সজ্জীকুরু রথং ক্ষিপ্রং যস্তে সাংগ্রামিকো মতঃ
সায়ুধঃ সপতাকশ্চ সশক্তিঃ কণয়ষ্টিমান্
53.30
কিঙ্কিণীশতনির্ঘোষো যুক্তস্তোমরকল্পনৈঃ
গদাখড্গনিবদ্ধশ্চ পরমেষুশতান্বিতঃ
53.31
ততঃ স তং তথেত্যুক্ত্বা কল্পয়িত্বা মহারথম্
ভার্যাং বামে ধুরি তদা চাত্মানং দক্ষিণে তথা
53.32
ত্রিদংষ্ট্রং বজ্রসূচ্যগ্রং প্রতোদং তত্র চাদধৎ
সর্বমেতত্ততো দত্ত্বা নৃপো বাক্যমথাব্রবীৎ
53.33
ভগবন্ক্ব রথো যাতু ব্রবীতু ভৃগুনন্দনঃ
যত্র বক্ষ্যসি বিপ্রর্ষে তত্র যাস্যতি তে রথঃ
53.34
এবমুক্তস্তু ভগবান্প্রত্যুবাচাথ তং নৃপম্
ইতঃপ্রভৃতি যাতব্যং পদকং পদকং শনৈঃ
53.35
শ্রমো মম যথা ন স্যাত্তথা মে ছন্দচারিণৌ
সুখং চৈবাস্মি বোঢব্যো জনঃ সর্বশ্চ পশ্যতু
53.36
নোত্সার্যঃ পথিকঃ কশ্চিত্তেভ্যো দাস্যাম্যহং বসু
ব্রাহ্মণেভ্যশ্চ যে কামানর্থয়িষ্যন্তি মাং পথি
53.37
সর্বং দাস্যাম্যশেষেণ ধনং রত্নানি চৈব হি
ক্রিয়তাং নিখিলেনৈতন্মা বিচারয় পার্থিব
53.38
তস্য তদ্বচনং শ্রুত্বা রাজা ভৃত্যানথাব্রবীৎ
যদ্যদ্ব্রূয়ান্মুনিস্তত্তত্সর্বং দেয়মশঙ্কিতৈঃ
53.39
ততো রত্নান্যনেকানি স্ত্রিয়ো যুগ্যমজাবিকম্
কৃতাকৃতং চ কনকং গজেন্দ্রাশ্চাচলোপমাঃ
53.40
অন্বগচ্ছন্ত তমৃষিং রাজামাত্যাশ্চ সর্বশঃ
হাহাভূতং চ তত্সর্বমাসীন্নগরমার্তিমৎ
53.41
তৌ তীক্ষ্ণাগ্রেণ সহসা প্রতোদেন প্রচোদিতৌ
পৃষ্ঠে বিদ্ধৌ কটে চৈব নির্বিকারৌ তমূহতুঃ
53.42
বেপমানৌ বিরাহারৌ পঞ্চাশদ্রাত্রকর্শিতৌ
কথংচিদূহতুর্বীরৌ দংপতী তং রথোত্তমম্
53.43
বহুশো ভৃশবিদ্ধৌ তৌ ক্ষরমাণৌ ক্ষতোদ্ভবম্
দদৃশাতে মহারাজ পুষ্পিতাবিব কিংশুকৌ
53.44
তৌ দৃষ্ট্বা পৌরবর্গস্তু ভৃশং শোকপরায়ণঃ
অভিশাপভয়াত্ত্রস্তো ন চ কিংচিদুবাচ হ
53.45
দ্বন্দ্বশশ্চাব্রুবন্সর্বে পশ্যধ্বং তপসো বলম্
ক্রুদ্ধা অপি মুনিশ্রেষ্ঠং বীক্ষিতুং নৈব শক্নুমঃ
53.46
অহো ভগবতো বীর্যং মহর্ষের্ভাবিতাত্মনঃ
রাজ্ঞশ্চাপি সভার্যস্য ধৈর্যং পশ্যত যাদৃশম্
53.47
শ্রান্তাবপি হি কৃচ্ছ্রেণ রথমেতং সমূহতুঃ
ন চৈতয়োর্বিকারং বৈ দদর্শ ভৃগুনন্দনঃ
53.48
ভীষ্ম উবাচ
ততঃ স নির্বিকারৌ তৌ দৃষ্ট্বা ভৃগুকুলোদ্বহঃ
বসু বিশ্রাণয়ামাস যথা বৈশ্রবণস্তথা
53.49
তত্রাপি রাজা প্রীতাত্মা যথাজ্ঞপ্তমথাকরোৎ
ততোঽস্য ভগবান্প্রীতো বভূব মুনিসত্তমঃ
53.50
অবতীর্য রথশ্রেষ্ঠাদ্দংপতী তৌ মুমোচ হ
বিমোচ্য চৈতৌ বিধিবত্ততো বাক্যমুবাচ হ
53.51
স্নিগ্ধগম্ভীরয়া বাচা ভার্গবঃ সুপ্রসন্নয়া
দদানি বাং বরং শ্রেষ্ঠং তদ্ব্রূতামিতি ভারত
53.52
সুকুমারৌ চ তৌ বিদ্বান্করাভ্যাং মুনিসত্তমঃ
পস্পর্শামৃতকল্পাভ্যাং স্নেহাদ্ভরতসত্তম
53.53
অথাব্রবীন্নৃপো বাক্যং শ্রমো নাস্ত্যাবয়োরিহ
বিশ্রান্তৌ স্বঃ প্রভাবাত্তে ধ্যানেনৈবেতি ভার্গব
53.54
অথ তৌ ভগবান্প্রাহ প্রহৃষ্টশ্চ্যবনস্তদা
ন বৃথা ব্যাহৃতং পূর্বং যন্ময়া তদ্ভবিষ্যতি
53.55
রমণীয়ঃ সমুদ্দেশো গঙ্গাতীরমিদং শুভম্
কংচিত্কালং ব্রতপরো নিবত্স্যামীহ পার্থিব
53.56
গম্যতাং স্বপুরং পুত্র বিশ্রান্তঃ পুনরেষ্যসি
ইহস্থং মাং সভার্যস্ত্বং দ্রষ্টাসি শ্বো নরাধিপ
53.57
ন চ মন্যুস্ত্বয়া কার্যঃ শ্রেয়স্তে সমুপস্থিতম্
যত্কাঙ্ক্ষিতং হৃদিস্থং তে তত্সর্বং সংভবিষ্যতি
53.58
ইত্যেবমুক্তঃ কুশিকঃ প্রহৃষ্টেনান্তরাত্মনা
প্রোবাচ মুনিশার্দূলমিদং বচনমর্থবৎ
53.59
ন মে মন্যুর্মহাভাগ পূতোঽস্মি ভগবংস্ত্বয়া
সংবৃত্তৌ যৌবনস্থৌ স্বো বপুষ্মন্তৌ বলান্বিতৌ
53.60
প্রতোদেন ব্রণা যে মে সভার্যস্য কৃতাস্ত্বয়া
তান্ন পশ্যামি গাত্রেষু স্বস্থোঽস্মি সহ ভার্যয়া
53.61
ইমাং চ দেবীং পশ্যামি মুনে দিব্যাপ্সরোপমাম্
শ্রিয়া পরময়া যুক্তাং যথাদৃষ্টাং ময়া পুরা
53.62
তব প্রসাদাত্সংবৃত্তমিদং সর্বং মহামুনে
নৈতচ্চিত্রং তু ভগবংস্ত্বয়ি সত্যপরাক্রম
53.63
ইত্যুক্তঃ প্রত্যুবাচেদং চ্যবনঃ কুশিকং তদা
আগচ্ছেথাঃ সভার্যশ্চ ত্বমিহেতি নরাধিপ
53.64
ইত্যুক্তঃ সমনুজ্ঞাতো রাজর্ষিরভিবাদ্য তম্
প্রয়য়ৌ বপুষা যুক্তো নগরং দেবরাজবৎ
53.65
তত এনমুপাজগ্মুরমাত্যাঃ সপুরোহিতাঃ
বলস্থা গণিকায়ুক্তাঃ সর্বাঃ প্রকৃতয়স্তথা
53.66
তৈর্বৃতঃ কুশিকো রাজা শ্রিয়া পরময়া জ্বলন্
প্রবিবেশ পুরং হৃষ্টঃ পূজ্যমানোঽথ বন্দিভিঃ
53.67
ততঃ প্রবিশ্য নগরং কৃত্বা সর্বাহ্ণিকক্রিয়াঃ
ভুক্ত্বা সভার্যো রজনীমুবাস স মহীপতিঃ
53.68
ততস্তু তৌ নবমভিবীক্ষ্য যৌবনং; পরস্পরং বিগতজরাবিবামরৌ
ননন্দতুঃ শয়নগতৌ বপুর্ধরৌ; শ্রিয়া যুতৌ দ্বিজবরদত্তয়া তয়া
53.69
স চাপ্যৃষির্ভৃগুকুলকীর্তিবর্ধন;স্তপোধনো বনমভিরামমৃদ্ধিমৎ
মনীষয়া বহুবিধরত্নভূষিতং; সসর্জ যন্নাস্তি শতক্রতোরপি