Utshovঅধ্যায় 52
52.1
যুধিষ্ঠির উবাচ
সংশয়ো মে মহাপ্রাজ্ঞ সুমহান্সাগরোপমঃ
তন্মে শৃণু মহাবাহো শ্রুত্বা চাখ্যাতুমর্হসি
52.2
কৌতূহলং মে সুমহজ্জামদগ্ন্যং প্রতি প্রভো
রামং ধর্মভৃতাং শ্রেষ্ঠং তন্মে ব্যাখ্যাতুমর্হসি
52.3
কথমেষ সমুত্পন্নো রামঃ সত্যপরাক্রমঃ
কথং ব্রহ্মর্ষিবংশে চ ক্ষত্রধর্মা ব্যজায়ত
52.4
তদস্য সংভবং রাজন্নিখিলেনানুকীর্তয়
কৌশিকাচ্চ কথং বংশাত্ক্ষত্রাদ্বৈ ব্রাহ্মণোঽভবৎ
52.5
অহো প্রভাবঃ সুমহানাসীদ্বৈ সুমহাত্মনোঃ
রামস্য চ নরব্যাঘ্র বিশ্বামিত্রস্য চৈব হ
52.6
কথং পুত্রানতিক্রম্য তেষাং নপ্তৃষ্বথাভবৎ
এষ দোষঃ সুতান্হিত্বা তন্মে ব্যাখ্যাতুমর্হসি
52.7
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
চ্যবনস্য চ সংবাদং কুশিকস্য চ ভারত
52.8
এতং দোষং পুরা দৃষ্ট্বা ভার্গবশ্চ্যবনস্তদা
আগামিনং মহাবুদ্ধিঃ স্ববংশে মুনিপুংগবঃ
52.9
সংচিন্ত্য মনসা সর্বং গুণদোষবলাবলম্
দগ্ধুকামঃ কুলং সর্বং কুশিকানাং তপোধনঃ
52.10
চ্যবনস্তমনুপ্রাপ্য কুশিকং বাক্যমব্রবীৎ
বস্তুমিচ্ছা সমুত্পন্না ত্বয়া সহ মমানঘ
52.11
কুশিক উবাচ
ভগবন্সহধর্মোঽয়ং পণ্ডিতৈরিহ ধার্যতে
প্রদানকালে কন্যানামুচ্যতে চ সদা বুধৈঃ
52.12
যত্তু তাবদতিক্রান্তং ধর্মদ্বারং তপোধন
তত্কার্যং প্রকরিষ্যামি তদনুজ্ঞাতুমর্হসি
52.13
ভীষ্ম উবাচ
অথাসনমুপাদায় চ্যবনস্য মহামুনেঃ
কুশিকো ভার্যয়া সার্ধমাজগাম যতো মুনিঃ
52.14
প্রগৃহ্য রাজা ভৃঙ্গারং পাদ্যমস্মৈ ন্যবেদয়ৎ
কারয়ামাস সর্বাশ্চ ক্রিয়াস্তস্য মহাত্মনঃ
52.15
ততঃ স রাজা চ্যবনং মধুপর্কং যথাবিধি
প্রত্যগ্রাহয়দব্যগ্রো মহাত্মা নিয়তব্রতঃ
52.16
সত্কৃত্য স তথা বিপ্রমিদং বচনমব্রবীৎ
ভগবন্পরবন্তৌ স্বো ব্রূহি কিং করবাবহে
52.17
যদি রাজ্যং যদি ধনং যদি গাঃ সংশিতব্রত
যজ্ঞদানানি চ তথা ব্রূহি সর্বং দদামি তে
52.18
ইদং গৃহমিদং রাজ্যমিদং ধর্মাসনং চ তে
রাজা ত্বমসি শাধ্যুর্বীং ভৃত্যোঽহং পরবাংস্ত্বয়ি
52.19
এবমুক্তে ততো বাক্যে চ্যবনো ভার্গবস্তদা
কুশিকং প্রত্যুবাচেদং মুদা পরময়া যুতঃ
52.20
ন রাজ্যং কাময়ে রাজন্ন ধনং ন চ যোষিতঃ
ন চ গা ন চ তে দেশান্ন যজ্ঞাঞ্শ্রূয়তামিদম্
52.21
নিয়মং কংচিদারপ্স্যে যুবয়োর্যদি রোচতে
পরিচর্যোঽস্মি যত্তাভ্যাং যুবাভ্যামবিশঙ্কয়া
52.22
এবমুক্তে তদা তেন দংপতী তৌ জহর্ষতুঃ
প্রত্যব্রূতাং চ তমৃষিমেবমস্ত্বিতি ভারত
52.23
অথ তং কুশিকো হৃষ্টঃ প্রাবেশয়দনুত্তমম্
গৃহোদ্দেশং ততস্তত্র দর্শনীয়মদর্শয়ৎ
52.24
ইয়ং শয্যা ভগবতো যথাকামমিহোষ্যতাম্
প্রয়তিষ্যাবহে প্রীতিমাহর্তুং তে তপোধন
52.25
অথ সূর্যোঽতিচক্রাম তেষাং সংবদতাং তথা
অথর্ষিশ্চোদয়ামাস পানমন্নং তথৈব চ
52.26
তমপৃচ্ছত্ততো রাজা কুশিকঃ প্রণতস্তদা
কিমন্নজাতমিষ্টং তে কিমুপস্থাপয়াম্যহম্
52.27
ততঃ স পরয়া প্রীত্যা প্রত্যুবাচ জনাধিপম্
ঔপপত্তিকমাহারং প্রয়চ্ছস্বেতি ভারত
52.28
তদ্বচঃ পূজয়িত্বা তু তথেত্যাহ স পার্থিবঃ
যথোপপন্নং চাহারং তস্মৈ প্রাদাজ্জনাধিপঃ
52.29
ততঃ স ভগবান্ভুক্ত্বা দংপতী প্রাহ ধর্মবিৎ
স্বপ্তুমিচ্ছাম্যহং নিদ্রা বাধতে মামিতি প্রভো
52.30
ততঃ শয্যাগৃহং প্রাপ্য ভগবানৃষিসত্তমঃ
সংবিবেশ নরেন্দ্রস্তু সপত্নীকঃ স্থিতোঽভবৎ
52.31
ন প্রবোধ্যোঽস্মি সংসুপ্ত ইত্যুবাচাথ ভার্গবঃ
সংবাহিতব্যৌ পাদৌ মে জাগর্তব্যং চ বাং নিশি
52.32
অবিশঙ্কশ্চ কুশিকস্তথেত্যাহ স ধর্মবিৎ
ন প্রবোধয়তাং তং চ তৌ তদা রজনীক্ষয়ে
52.33
যথাদেশং মহর্ষেস্তু শুশ্রূষাপরমৌ তদা
বভূবতুর্মহারাজ প্রয়তাবথ দংপতী
52.34
ততঃ স ভগবান্বিপ্রঃ সমাদিশ্য নরাধিপম্
সুষ্বাপৈকেন পার্শ্বেন দিবসানেকবিংশতিম্
52.35
স তু রাজা নিরাহারঃ সভার্যঃ কুরুনন্দন
পর্যুপাসত তং হৃষ্টশ্চ্যবনারাধনে রতঃ
52.36
ভার্গবস্তু সমুত্তস্থৌ স্বয়মেব তপোধনঃ
অকিংচিদুক্ত্বা তু গৃহান্নিশ্চক্রাম মহাতপাঃ
52.37
তমন্বগচ্ছতাং তৌ তু ক্ষুধিতৌ শ্রমকর্শিতৌ
ভার্যাপতী মুনিশ্রেষ্ঠো ন চ তাববলোকয়ৎ
52.38
তয়োস্তু প্রেক্ষতোরেব ভার্গবাণাং কুলোদ্বহঃ
অন্তর্হিতোঽভূদ্রাজেন্দ্র ততো রাজাপতত্ক্ষিতৌ
52.39
স মুহূর্তং সমাশ্বস্য সহ দেব্যা মহাদ্যুতিঃ
পুনরন্বেষণে যত্নমকরোত্পরমং তদা