Utshovঅধ্যায় 51
51.1
ভীষ্ম উবাচ
নহুষস্তু ততঃ শ্রুত্বা চ্যবনং তং তথাগতম্
ত্বরিতঃ প্রয়য়ৌ তত্র সহামাত্যপুরোহিতঃ
51.2
শৌচং কৃত্বা যথান্যায়ং প্রাঞ্জলিঃ প্রয়তো নৃপঃ
আত্মানমাচচক্ষে চ চ্যবনায় মহাত্মনে
51.3
অর্চয়ামাস তং চাপি তস্য রাজ্ঞঃ পুরোহিতঃ
সত্যব্রতং মহাভাগং দেবকল্পং বিশাং পতে
51.4
নহুষ উবাচ
করবাণি প্রিয়ং কিং তে তন্মে ব্যাখ্যাতুমর্হসি
সর্বং কর্তাস্মি ভগবন্যদ্যপি স্যাত্সুদুষ্করম্
51.5
চ্যবন উবাচ
শ্রমেণ মহতা যুক্তাঃ কৈবর্তা মত্স্যজীবিনঃ
মম মূল্যং প্রয়চ্ছৈভ্যো মত্স্যানাং বিক্রয়ৈঃ সহ
51.6
নহুষ উবাচ
সহস্রং দীয়তাং মূল্যং নিষাদেভ্যঃ পুরোহিত
নিষ্ক্রয়ার্থং ভগবতো যথাহ ভৃগুনন্দনঃ
51.7
চ্যবন উবাচ
সহস্রং নাহমর্হামি কিং বা ত্বং মন্যসে নৃপ
সদৃশং দীয়তাং মূল্যং স্ববুদ্ধ্যা নিশ্চয়ং কুরু
51.8
নহুষ উবাচ
সহস্রাণাং শতং ক্ষিপ্রং নিষাদেভ্যঃ প্রদীয়তাম্
স্যাদেতত্তু ভবেন্মূল্যং কিং বান্যন্মন্যতে ভবান্
51.9
চ্যবন উবাচ
নাহং শতসহস্রেণ নিমেয়ঃ পার্থিবর্ষভ
দীয়তাং সদৃশং মূল্যমমাত্যৈঃ সহ চিন্তয়
51.10
নহুষ উবাচ
কোটিঃ প্রদীয়তাং মূল্যং নিষাদেভ্যঃ পুরোহিত
যদেতদপি নৌপম্যমতো ভূয়ঃ প্রদীয়তাম্
51.11
চ্যবন উবাচ
রাজন্নার্হাম্যহং কোটিং ভূয়ো বাপি মহাদ্যুতে
সদৃশং দীয়তাং মূল্যং ব্রাহ্মণৈঃ সহ চিন্তয়
51.12
নহুষ উবাচ
অর্ধরাজ্যং সমগ্রং বা নিষাদেভ্যঃ প্রদীয়তাম্
এতন্মূল্যমহং মন্যে কিং বান্যন্মন্যসে দ্বিজ
51.13
চ্যবন উবাচ
অর্ধরাজ্যং সমগ্রং বা নাহমর্হামি পার্থিব
সদৃশং দীয়তাং মূল্যমৃষিভিঃ সহ চিন্ত্যতাম্
51.14
ভীষ্ম উবাচ
মহর্ষের্বচনং শ্রুত্বা নহুষো দুঃখকর্শিতঃ
স চিন্তয়ামাস তদা সহামাত্যপুরোহিতঃ
51.15
তত্র ত্বন্যো বনচরঃ কশ্চিন্মূলফলাশনঃ
নহুষস্য সমীপস্থো গবিজাতোঽভবন্মুনিঃ
51.16
স সমাভাষ্য রাজানমব্রবীদ্দ্বিজসত্তমঃ
তোষয়িষ্যাম্যহং বিপ্রং যথা তুষ্টো ভবিষ্যতি
51.17
নাহং মিথ্যাবচো ব্রূয়াং স্বৈরেষ্বপি কুতোঽন্যথা
ভবতো যদহং ব্রূয়াং তত্কার্যমবিশঙ্কয়া
51.18
নহুষ উবাচ
ব্রবীতু ভগবান্মূল্যং মহর্ষেঃ সদৃশং ভৃগোঃ
পরিত্রায়স্ব মামস্মাদ্বিষয়ং চ কুলং চ মে
51.19
হন্যাদ্ধি ভগবান্ক্রুদ্ধস্ত্রৈলোক্যমপি কেবলম্
কিং পুনর্মাং তপোহীনং বাহুবীর্যপরায়ণম্
51.20
অগাধেঽম্ভসি মগ্নস্য সামাত্যস্য সহর্ত্বিজঃ
প্লবো ভব মহর্ষে ত্বং কুরু মূল্যবিনিশ্চয়ম্
51.21
ভীষ্ম উবাচ
নহুষস্য বচঃ শ্রুত্বা গবিজাতঃ প্রতাপবান্
উবাচ হর্ষয়ন্সর্বানমাত্যান্পার্থিবং চ তম্
51.22
অনর্ঘেয়া মহারাজ দ্বিজা বর্ণমহত্তমাঃ
গাবশ্চ পৃথিবীপাল গৌর্মূল্যং পরিকল্প্যতাম্
51.23
নহুষস্তু ততঃ শ্রুত্বা মহর্ষের্বচনং নৃপ
হর্ষেণ মহতা যুক্তঃ সহামাত্যপুরোহিতঃ
51.24
অভিগম্য ভৃগোঃ পুত্রং চ্যবনং সংশিতব্রতম্
ইদং প্রোবাচ নৃপতে বাচা সংতর্পয়ন্নিব
51.25
উত্তিষ্ঠোত্তিষ্ঠ বিপ্রর্ষে গবা ক্রীতোঽসি ভার্গব
এতন্মূল্যমহং মন্যে তব ধর্মভৃতাং বর
51.26
চ্যবন উবাচ
উত্তিষ্ঠাম্যেষ রাজেন্দ্র সম্যক্ক্রীতোঽস্মি তেঽনঘ
গোভিস্তুল্যং ন পশ্যামি ধনং কিংচিদিহাচ্যুত
51.27
কীর্তনং শ্রবণং দানং দর্শনং চাপি পার্থিব
গবাং প্রশস্যতে বীর সর্বপাপহরং শিবম্
51.28
গাবো লক্ষ্ম্যাঃ সদা মূলং গোষু পাপ্মা ন বিদ্যতে
অন্নমেব সদা গাবো দেবানাং পরমং হবিঃ
51.29
স্বাহাকারবষট্কারৌ গোষু নিত্যং প্রতিষ্ঠিতৌ
গাবো যজ্ঞপ্রণেত্র্যো বৈ তথা যজ্ঞস্য তা মুখম্
51.30
অমৃতং হ্যক্ষয়ং দিব্যং ক্ষরন্তি চ বহন্তি চ
অমৃতায়তনং চৈতাঃ সর্বলোকনমস্কৃতাঃ
51.31
তেজসা বপুষা চৈব গাবো বহ্নিসমা ভুবি
গাবো হি সুমহত্তেজঃ প্রাণিনাং চ সুখপ্রদাঃ
51.32
নিবিষ্টং গোকুলং যত্র শ্বাসং মুঞ্চতি নির্ভয়ম্
বিরাজয়তি তং দেশং পাপ্মানং চাপকর্ষতি
51.33
গাবঃ স্বর্গস্য সোপানং গাবঃ স্বর্গেঽপি পূজিতাঃ
গাবঃ কামদুঘা দেব্যো নান্যত্কিংচিত্পরং স্মৃতম্
51.34
ইত্যেতদ্গোষু মে প্রোক্তং মাহাত্ম্যং পার্থিবর্ষভ
গুণৈকদেশবচনং শক্যং পারায়ণং ন তু
51.35
নিষাদা ঊচুঃ
দর্শনং কথনং চৈব সহাস্মাভিঃ কৃতং মুনে
সতাং সপ্তপদং মিত্রং প্রসাদং নঃ কুরু প্রভো
51.36
হবীংষি সর্বাণি যথা হ্যুপভুঙ্ক্তে হুতাশনঃ
এবং ত্বমপি ধর্মাত্মন্পুরুষাগ্নিঃ প্রতাপবান্
51.37
প্রসাদয়ামহে বিদ্বন্ভবন্তং প্রণতা বয়ম্
অনুগ্রহার্থমস্মাকমিয়ং গৌঃ প্রতিগৃহ্যতাম্
51.38
চ্যবন উবাচ
কৃপণস্য চ যচ্চক্ষুর্মুনেরাশীবিষস্য চ
নরং সমূলং দহতি কক্ষমগ্নিরিব জ্বলন্
51.39
প্রতিগৃহ্ণামি বো ধেনুং কৈবর্তা মুক্তকিল্বিষাঃ
দিবং গচ্ছত বৈ ক্ষিপ্রং মত্স্যৈর্জালোদ্ধৃতৈঃ সহ
51.40
ভীষ্ম উবাচ
ততস্তস্য প্রসাদাত্তে মহর্ষের্ভাবিতাত্মনঃ
নিষাদাস্তেন বাক্যেন সহ মত্স্যৈর্দিবং যয়ুঃ
51.41
ততঃ স রাজা নহুষো বিস্মিতঃ প্রেক্ষ্য ধীবরান্
আরোহমাণাংস্ত্রিদিবং মত্স্যাংশ্চ ভরতর্ষভ
51.42
ততস্তৌ গবিজশ্চৈব চ্যবনশ্চ ভৃগূদ্বহঃ
বরাভ্যামনুরূপাভ্যাং ছন্দয়ামাসতুর্নৃপম্
51.43
ততো রাজা মহাবীর্যো নহুষঃ পৃথিবীপতিঃ
পরমিত্যব্রবীত্প্রীতস্তদা ভরতসত্তম
51.44
ততো জগ্রাহ ধর্মে স স্থিতিমিন্দ্রনিভো নৃপঃ
তথেতি চোদিতঃ প্রীতস্তাবৃষী প্রত্যপূজয়ৎ
51.45
সমাপ্তদীক্ষশ্চ্যবনস্ততোঽগচ্ছত্স্বমাশ্রমম্
গবিজশ্চ মহাতেজাঃ স্বমাশ্রমপদং যয়ৌ
51.46
নিষাদাশ্চ দিবং জগ্মুস্তে চ মত্স্যা জনাধিপ
নহুষোঽপি বরং লব্ধ্বা প্রবিবেশ পুরং স্বকম্
51.47
এতত্তে কথিতং তাত যন্মাং ত্বং পরিপৃচ্ছসি
দর্শনে যাদৃশঃ স্নেহঃ সংবাসে চ যুধিষ্ঠির
51.48
মহাভাগ্যং গবাং চৈব তথা ধর্মবিনিশ্চয়ম্
কিং ভূয়ঃ কথ্যতাং বীর কিং তে হৃদি বিবক্ষিতম্