Utshovঅধ্যায় 50
50.1
যুধিষ্ঠির উবাচ
দর্শনে কীদৃশঃ স্নেহঃ সংবাসে চ পিতামহ
মহাভাগ্যং গবাং চৈব তন্মে ব্রূহি পিতামহ
50.2
ভীষ্ম উবাচ
হন্ত তে কথয়িষ্যামি পুরাবৃত্তং মহাদ্যুতে
নহুষস্য চ সংবাদং মহর্ষেশ্চ্যবনস্য চ
50.3
পুরা মহর্ষিশ্চ্যবনো ভার্গবো ভরতর্ষভ
উদবাসকৃতারম্ভো বভূব সুমহাব্রতঃ
50.4
নিহত্য মানং ক্রোধং চ প্রহর্ষং শোকমেব চ
বর্ষাণি দ্বাদশ মুনির্জলবাসে ধৃতব্রতঃ
50.5
আদধত্সর্বভূতেষু বিস্রম্ভং পরমং শুভম্
জলেচরেষু সত্ত্বেষু শীতরশ্মিরিব প্রভুঃ
50.6
স্থাণুভূতঃ শুচির্ভূত্বা দৈবতেভ্যঃ প্রণম্য চ
গঙ্গায়মুনয়োর্মধ্যে জলং সংপ্রবিবেশ হ
50.7
গঙ্গায়মুনয়োর্বেগং সুভীমং ভীমনিঃস্বনম্
প্রতিজগ্রাহ শিরসা বাতবেগসমং জবে
50.8
গঙ্গা চ যমুনা চৈব সরিতশ্চানুগাস্তয়োঃ
প্রদক্ষিণমৃষিং চক্রুর্ন চৈনং পর্যপীডয়ন্
50.9
অন্তর্জলে স সুষ্বাপ কাষ্ঠভূতো মহামুনিঃ
ততশ্চোর্ধ্বস্থিতো ধীমানভবদ্ভরতর্ষভ
50.10
জলৌকসাং স সত্ত্বানাং বভূব প্রিয়দর্শনঃ
উপাজিঘ্রন্ত চ তদা মত্স্যাস্তং হৃষ্টমানসাঃ
তত্র তস্যাসতঃ কালঃ সমতীতোঽভবন্মহান্
50.11
ততঃ কদাচিত্সময়ে কস্মিংশ্চিন্মত্স্যজীবিনঃ
তং দেশং সমুপাজগ্মুর্জালহস্তা মহাদ্যুতে
50.12
নিষাদা বহবস্তত্র মত্স্যোদ্ধরণনিশ্চিতাঃ
ব্যায়তা বলিনঃ শূরাঃ সলিলেষ্বনিবর্তিনঃ
অভ্যায়য়ুশ্চ তং দেশং নিশ্চিতা জালকর্মণি
50.13
জালং চ যোজয়ামাসুর্বিশেষেণ জনাধিপ
মত্স্যোদকং সমাসাদ্য তদা ভরতসত্তম
50.14
ততস্তে বহুভির্যোগৈঃ কৈবর্তা মত্স্যকাঙ্ক্ষিণঃ
গঙ্গায়মুনয়োর্বারি জালৈরভ্যকিরংস্ততঃ
50.15
জালং সুবিততং তেষাং নবসূত্রকৃতং তথা
বিস্তারায়ামসংপন্নং যত্তত্র সলিলে ক্ষমম্
50.16
ততস্তে সুমহচ্চৈব বলবচ্চ সুবর্তিতম্
প্রকীর্য সর্বতঃ সর্বে জালং চকৃষিরে তদা
50.17
অভীতরূপাঃ সংহৃষ্টাস্তেঽন্যোন্যবশবর্তিনঃ
ববন্ধুস্তত্র মত্স্যাংশ্চ তথান্যাঞ্জলচারিণঃ
50.18
তথা মত্স্যৈঃ পরিবৃতং চ্যবনং ভৃগুনন্দনম্
আকর্ষন্ত মহারাজ জালেনাথ যদৃচ্ছয়া
50.19
নদীশৈবলদিগ্ধাঙ্গং হরিশ্মশ্রুজটাধরম্
লগ্নৈঃ শঙ্খগণৈর্গাত্রৈঃ কোষ্ঠৈশ্চিত্রৈরিবাবৃতম্
50.20
তং জালেনোদ্ধৃতং দৃষ্ট্বা তে তদা বেদপারগম্
সর্বে প্রাঞ্জলয়ো দাশাঃ শিরোভিঃ প্রাপতন্ভুবি
50.21
পরিখেদপরিত্রাসাজ্জালস্যাকর্ষণেন চ
মত্স্যা বভূবুর্ব্যাপন্নাঃ স্থলসংকর্ষণেন চ
50.22
স মুনিস্তত্তদা দৃষ্ট্বা মত্স্যানাং কদনং কৃতম্
বভূব কৃপয়াবিষ্টো নিঃশ্বসংশ্চ পুনঃ পুনঃ
50.23
নিষাদা ঊচুঃ
অজ্ঞানাদ্যত্কৃতং পাপং প্রসাদং তত্র নঃ কুরু
করবাম প্রিয়ং কিং তে তন্নো ব্রূহি মহামুনে
50.24
ভীষ্ম উবাচ
ইত্যুক্তো মত্স্যমধ্যস্থশ্চ্যবনো বাক্যমব্রবীৎ
যো মেঽদ্য পরমঃ কামস্তং শৃণুধ্বং সমাহিতাঃ
50.25
প্রাণোত্সর্গং বিক্রয়ং বা মত্স্যৈর্যাস্যাম্যহং সহ
সংবাসান্নোত্সহে ত্যক্তুং সলিলাধ্যুষিতানিমান্
50.26
ইত্যুক্তাস্তে নিষাদাস্তু সুভৃশং ভয়কম্পিতাঃ
সর্বে বিষণ্ণবদনা নহুষায় ন্যবেদয়ন্