Utshovঅধ্যায় 49
49.1
যুধিষ্ঠির উবাচ
ব্রূহি পুত্রান্কুরুশ্রেষ্ঠ বর্ণানাং ত্বং পৃথক্পৃথক্
কীদৃশ্যাং কীদৃশাশ্চাপি পুত্রাঃ কস্য চ কে চ তে
49.2
বিপ্রবাদাঃ সুবহুশঃ শ্রূয়ন্তে পুত্রকারিতাঃ
অত্র নো মুহ্যতাং রাজন্সংশয়ং ছেত্তুমর্হসি
49.3
ভীষ্ম উবাচ
আত্মা পুত্রস্তু বিজ্ঞেয়স্তস্যানন্তরজশ্চ যঃ
নিয়ুক্তজশ্চ বিজ্ঞেয়ঃ সুতঃ প্রসৃতজস্তথা
49.4
পতিতস্য চ ভার্যায়াং ভর্ত্রা সুসমবেতয়া
তথা দত্তকৃতৌ পুত্রাবধ্যূঢশ্চ তথাপরঃ
49.5
ষডপধ্বংসজাশ্চাপি কানীনাপসদাস্তথা
ইত্যেতে তে সমাখ্যাতাস্তান্বিজানীহি ভারত
49.6
যুধিষ্ঠির উবাচ
ষডপধ্বংসজাঃ কে স্যুঃ কে বাপ্যপসদাস্তথা
এতত্সর্বং যথাতত্ত্বং ব্যাখ্যাতুং মে ত্বমর্হসি
49.7
ভীষ্ম উবাচ
ত্রিষু বর্ণেষু যে পুত্রা ব্রাহ্মণস্য যুধিষ্ঠির
বর্ণয়োশ্চ দ্বয়োঃ স্যাতাং যৌ রাজন্যস্য ভারত
49.8
একো দ্বিবর্ণ এবাথ তথাত্রৈবোপলক্ষিতঃ
ষডপধ্বংসজাস্তে হি তথৈবাপসদাঞ্শৃণু
49.9
চণ্ডালো ব্রাত্যবেনৌ চ ব্রাহ্মণ্যাং ক্ষত্রিয়াসু চ
বৈশ্যায়াং চৈব শূদ্রস্য লক্ষ্যন্তেঽপসদাস্ত্রয়ঃ
49.10
মাগধো বামকশ্চৈব দ্বৌ বৈশ্যস্যোপলক্ষিতৌ
ব্রাহ্মণ্যাং ক্ষত্রিয়ায়াং চ ক্ষত্রিয়স্যৈক এব তু
49.11
ব্রাহ্মণ্যাং লক্ষ্যতে সূত ইত্যেতেঽপসদাঃ স্মৃতাঃ
পুত্ররেতো ন শক্যং হি মিথ্যা কর্তুং নরাধিপ
49.12
যুধিষ্ঠির উবাচ
ক্ষেত্রজং কেচিদেবাহুঃ সুতং কেচিত্তু শুক্রজম্
তুল্যাবেতৌ সুতৌ কস্য তন্মে ব্রূহি পিতামহ
49.13
ভীষ্ম উবাচ
রেতজো বা ভবেত্পুত্রস্ত্যক্তো বা ক্ষেত্রজো ভবেৎ
অধ্যূঢঃ সময়ং ভিত্ত্বেত্যেতদেব নিবোধ মে
49.14
যুধিষ্ঠির উবাচ
রেতোজং বিদ্ম বৈ পুত্রং ক্ষেত্রজস্যাগমঃ কথম্
অধ্যূঢং বিদ্ম বৈ পুত্রং হিত্বা চ সময়ং কথম্
49.15
ভীষ্ম উবাচ
আত্মজং পুত্রমুত্পাদ্য যস্ত্যজেত্কারণান্তরে
ন তত্র কারণং রেতঃ স ক্ষেত্রস্বামিনো ভবেৎ
49.16
পুত্রকামো হি পুত্রার্থে যাং বৃণীতে বিশাং পতে
তত্র ক্ষেত্রং প্রমাণং স্যান্ন বৈ তত্রাত্মজঃ সুতঃ
49.17
অন্যত্র ক্ষেত্রজঃ পুত্রো লক্ষ্যতে ভরতর্ষভ
ন হ্যাত্মা শক্যতে হন্তুং দৃষ্টান্তোপগতো হ্যসৌ
49.18
কশ্চিচ্চ কৃতকঃ পুত্রঃ সংগ্রহাদেব লক্ষ্যতে
ন তত্র রেতঃ ক্ষেত্রং বা প্রমাণং স্যাদ্যুধিষ্ঠির
49.19
যুধিষ্ঠির উবাচ
কীদৃশঃ কৃতকঃ পুত্রঃ সংগ্রহাদেব লক্ষ্যতে
শুক্রং ক্ষেত্রং প্রমাণং বা যত্র লক্ষ্যেত ভারত
49.20
ভীষ্ম উবাচ
মাতাপিতৃভ্যাং সংত্যক্তং পথি যং তু প্রলক্ষয়েৎ
ন চাস্য মাতাপিতরৌ জ্ঞায়েতে স হি কৃত্রিমঃ
49.21
অস্বামিকস্য স্বামিত্বং যস্মিন্সংপ্রতিলক্ষয়েৎ
সবর্ণস্তং চ পোষেত সবর্ণস্তস্য জায়তে
49.22
যুধিষ্ঠির উবাচ
কথমস্য প্রয়োক্তব্যঃ সংস্কারঃ কস্য বা কথম্
দেয়া কন্যা কথং চেতি তন্মে ব্রূহি পিতামহ
49.23
ভীষ্ম উবাচ
আত্মবত্তস্য কুর্বীত সংস্কারং স্বামিবত্তথা
49.24
ত্যক্তো মাতাপিতৃভ্যাং যঃ সবর্ণং প্রতিপদ্যতে
তদ্গোত্রবর্ণতস্তস্য কুর্যাত্সংস্কারমচ্যুত
49.25
অথ দেয়া তু কন্যা স্যাত্তদ্বর্ণেন যুধিষ্ঠির
সংস্কর্তুং মাতৃগোত্রং চ মাতৃবর্ণবিনিশ্চয়ে
49.26
কানীনাধ্যূঢজৌ চাপি বিজ্ঞেয়ৌ পুত্রকিল্বিষৌ
তাবপি স্বাবিব সুতৌ সংস্কার্যাবিতি নিশ্চয়ঃ
49.27
ক্ষেত্রজো বাপ্যপসদো যেঽধ্যূঢাস্তেষু চাপ্যথ
আত্মবদ্বৈ প্রয়ুঞ্জীরন্সংস্কারং ব্রাহ্মণাদয়ঃ
49.28
ধর্মশাস্ত্রেষু বর্ণানাং নিশ্চয়োঽয়ং প্রদৃশ্যতে
এতত্তে সর্বমাখ্যাতং কিং ভূয়ঃ শ্রোতুমিচ্ছসি