Utshovঅধ্যায় 48
48.1
যুধিষ্ঠির উবাচ
অর্থাশ্রয়াদ্বা কামাদ্বা বর্ণানাং বাপ্যনিশ্চয়াৎ
অজ্ঞানাদ্বাপি বর্ণানাং জায়তে বর্ণসংকরঃ
48.2
তেষামেতেন বিধিনা জাতানাং বর্ণসংকরে
কো ধর্মঃ কানি কর্মাণি তন্মে ব্রূহি পিতামহ
48.3
ভীষ্ম উবাচ
চাতুর্বর্ণ্যস্য কর্মাণি চাতুর্বর্ণ্যং চ কেবলম্
অসৃজত্স হ যজ্ঞার্থে পূর্বমেব প্রজাপতিঃ
48.4
ভার্যাশ্চতস্রো বিপ্রস্য দ্বয়োরাত্মাস্য জায়তে
আনুপূর্ব্যাদ্দ্বয়োর্হীনৌ মাতৃজাত্যৌ প্রসূয়তঃ
48.5
পরং শবাদ্ব্রাহ্মণস্যৈষ পুত্রঃ; শূদ্রাপুত্রং পারশবং তমাহুঃ
শুশ্রূষকঃ স্বস্য কুলস্য স স্যা;ত্স্বং চারিত্রং নিত্যমথো ন জহ্যাৎ
48.6
সর্বানুপায়ানপি সংপ্রধার্য; সমুদ্ধরেত্স্বস্য কুলস্য তন্তুম্
জ্যেষ্ঠো যবীয়ানপি যো দ্বিজস্য; শুশ্রূষবান্দানপরায়ণঃ স্যাৎ
48.7
তিস্রঃ ক্ষত্রিয়সংবন্ধাদ্দ্বয়োরাত্মাস্য জায়তে
হীনবর্ণস্তৃতীয়ায়াং শূদ্র উগ্র ইতি স্মৃতঃ
48.8
দ্বে চাপি ভার্যে বৈশ্যস্য দ্বয়োরাত্মাস্য জায়তে
শূদ্রা শূদ্রস্য চাপ্যেকা শূদ্রমেব প্রজায়তে
48.9
অতো বিশিষ্টস্ত্বধমো গুরুদারপ্রধর্ষকঃ
বাহ্যং বর্ণং জনয়তি চাতুর্বর্ণ্যবিগর্হিতম্
48.10
অয়াজ্যং ক্ষত্রিয়ো ব্রাত্যং সূতং স্তোমক্রিয়াপরম্
বৈশ্যো বৈদেহকং চাপি মৌদ্গল্যমপবর্জিতম্
48.11
শূদ্রশ্চণ্ডালমত্যুগ্রং বধ্যঘ্নং বাহ্যবাসিনম্
ব্রাহ্মণ্যাং সংপ্রজায়ন্ত ইত্যেতে কুলপাংসনাঃ
এতে মতিমতাং শ্রেষ্ঠ বর্ণসংকরজাঃ প্রভো
48.12
বন্দী তু জায়তে বৈশ্যান্মাগধো বাক্যজীবনঃ
শূদ্রান্নিষাদো মত্স্যঘ্নঃ ক্ষত্রিয়ায়াং ব্যতিক্রমাৎ
48.13
শূদ্রাদায়োগবশ্চাপি বৈশ্যায়াং গ্রামধর্মিণঃ
ব্রাহ্মণৈরপ্রতিগ্রাহ্যস্তক্ষা স বনজীবনঃ
48.14
এতেঽপি সদৃশং বর্ণং জনয়ন্তি স্বয়োনিষু
মাতৃজাত্যাং প্রসূয়ন্তে প্রবরা হীনয়োনিষু
48.15
যথা চতুর্ষু বর্ণেষু দ্বয়োরাত্মাস্য জায়তে
আনন্তর্যাত্তু জায়ন্তে তথা বাহ্যাঃ প্রধানতঃ
48.16
তে চাপি সদৃশং বর্ণং জনয়ন্তি স্বয়োনিষু
পরস্পরস্য বর্তন্তো জনয়ন্তি বিগর্হিতান্
48.17
যথা চ শূদ্রো ব্রাহ্মণ্যাং জন্তুং বাহ্যং প্রসূয়তে
এবং বাহ্যতরাদ্বাহ্যশ্চাতুর্বর্ণ্যাত্প্রসূয়তে
48.18
প্রতিলোমং তু বর্তন্তো বাহ্যাদ্বাহ্যতরং পুনঃ
হীনা হীনাত্প্রসূয়ন্তে বর্ণাঃ পঞ্চদশৈব তে
48.19
অগম্যাগমনাচ্চৈব বর্ততে বর্ণসংকরঃ
ব্রাত্যানামত্র জায়ন্তে সৈরন্ধ্রা মাগধেষু চ
প্রসাধনোপচারজ্ঞমদাসং দাসজীবনম্
48.20
অতশ্চায়োগবং সূতে বাগুরাবনজীবনম্
মৈরেয়কং চ বৈদেহঃ সংপ্রসূতেঽথ মাধুকম্
48.21
নিষাদো মুদ্গরং সূতে দাশং নাবোপজীবিনম্
মৃতপং চাপি চণ্ডালঃ শ্বপাকমতিকুত্সিতম্
48.22
চতুরো মাগধী সূতে ক্রূরান্মায়োপজীবিনঃ
মাংসস্বাদুকরং সূদং সৌগন্ধমিতি সংজ্ঞিতম্
48.23
বৈদেহকাচ্চ পাপিষ্ঠং ক্রূরং ভার্যোপজীবিনম্
নিষাদান্মদ্রনাভং চ খরয়ানপ্রয়ায়িনম্
48.24
চণ্ডালাত্পুল্কসং চাপি খরাশ্বগজভোজিনম্
মৃতচেলপ্রতিচ্ছন্নং ভিন্নভাজনভোজিনম্
48.25
আয়োগবীষু জায়ন্তে হীনবর্ণাসু তে ত্রয়ঃ
ক্ষুদ্রো বৈদেহকাদন্ধ্রো বহির্গ্রামপ্রতিশ্রয়ঃ
48.26
কারাবরো নিষাদ্যাং তু চর্মকারাত্প্রজায়তে
চণ্ডালাত্পাণ্ডুসৌপাকস্ত্বক্সারব্যবহারবান্
48.27
আহিণ্ডিকো নিষাদেন বৈদেহ্যাং সংপ্রজায়তে
চণ্ডালেন তু সৌপাকো মৌদ্গল্যসমবৃত্তিমান্
48.28
নিষাদী চাপি চণ্ডালাত্পুত্রমন্তাবসায়িনম্
শ্মশানগোচরং সূতে বাহ্যৈরপি বহিষ্কৃতম্
48.29
ইত্যেতাঃ সংকরে জাত্যঃ পিতৃমাতৃব্যতিক্রমাৎ
প্রচ্ছন্না বা প্রকাশা বা বেদিতব্যাঃ স্বকর্মভিঃ
48.30
চতুর্ণামেব বর্ণানাং ধর্মো নান্যস্য বিদ্যতে
বর্ণানাং ধর্মহীনেষু সংজ্ঞা নাস্তীহ কস্যচিৎ
48.31
যদৃচ্ছয়োপসংপন্নৈর্যজ্ঞসাধুবহিষ্কৃতৈঃ
বাহ্যা বাহ্যৈস্তু জায়ন্তে যথাবৃত্তি যথাশ্রয়ম্
48.32
চতুষ্পথশ্মশানানি শৈলাংশ্চান্যান্বনস্পতীন্
যুঞ্জন্তে চাপ্যলংকারাংস্তথোপকরণানি চ
48.33
গোব্রাহ্মণার্থে সাহায্যং কুর্বাণা বৈ ন সংশয়ঃ
আনৃশংস্যমনুক্রোশঃ সত্যবাক্যমথ ক্ষমা
48.34
স্বশরীরৈঃ পরিত্রাণং বাহ্যানাং সিদ্ধিকারকম্
মনুজব্যাঘ্র ভবতি তত্র মে নাস্তি সংশয়ঃ
48.35
যথোপদেশং পরিকীর্তিতাসু; নরঃ প্রজায়েত বিচার্য বুদ্ধিমান্
বিহীনয়োনির্হি সুতোঽবসাদয়ে;ত্তিতীর্ষমাণং সলিলে যথোপলম্
48.36
অবিদ্বাংসমলং লোকে বিদ্বাংসমপি বা পুনঃ
নয়ন্তে হ্যুত্পথং নার্যঃ কামক্রোধবশানুগম্
48.37
স্বভাবশ্চৈব নারীণাং নরাণামিহ দূষণম্
ইত্যর্থং ন প্রসজ্জন্তে প্রমদাসু বিপশ্চিতঃ
48.38
যুধিষ্ঠির উবাচ
বর্ণাপেতমবিজ্ঞাতং নরং কলুষয়োনিজম্
আর্যরূপমিবানার্যং কথং বিদ্যামহে নৃপ
48.39
ভীষ্ম উবাচ
যোনিসংকলুষে জাতং নানাচারসমাহিতম্
কর্মভিঃ সজ্জনাচীর্ণৈর্বিজ্ঞেয়া যোনিশুদ্ধতা
48.40
অনার্যত্বমনাচারঃ ক্রূরত্বং নিষ্ক্রিয়াত্মতা
পুরুষং ব্যঞ্জয়ন্তীহ লোকে কলুষয়োনিজম্
48.41
পিত্র্যং বা ভজতে শীলং মাতৃজং বা তথোভয়ম্
ন কথংচন সংকীর্ণঃ প্রকৃতিং স্বাং নিয়চ্ছতি
48.42
যথৈব সদৃশো রূপে মাতাপিত্রোর্হি জায়তে
ব্যাঘ্রশ্চিত্রৈস্তথা যোনিং পুরুষঃ স্বাং নিয়চ্ছতি
48.43
কুলস্রোতসি সংছন্নে যস্য স্যাদ্যোনিসংকরঃ
সংশ্রয়ত্যেব তচ্ছীলং নরোঽল্পমপি বা বহু
48.44
আর্যরূপসমাচারং চরন্তং কৃতকে পথি
স্ববর্ণমন্যবর্ণং বা স্বশীলং শাস্তি নিশ্চয়ে
48.45
নানাবৃত্তেষু ভূতেষু নানাকর্মরতেষু চ
জন্মবৃত্তসমং লোকে সুশ্লিষ্টং ন বিরজ্যতে
48.46
শরীরমিহ সত্ত্বেন নরস্য পরিকৃষ্যতে
জ্যেষ্ঠমধ্যাবরং সত্ত্বং তুল্যসত্ত্বং প্রমোদতে
48.47
জ্যায়াংসমপি শীলেন বিহীনং নৈব পূজয়েৎ
অপি শূদ্রং তু সদ্বৃত্তং ধর্মজ্ঞমভিপূজয়েৎ
48.48
আত্মানমাখ্যাতি হি কর্মভির্নরঃ; স্বশীলচারিত্রকৃতৈঃ শুভাশুভৈঃ
প্রনষ্টমপ্যাত্মকুলং তথা নরঃ; পুনঃ প্রকাশং কুরুতে স্বকর্মভিঃ
48.49
যোনিষ্বেতাসু সর্বাসু সংকীর্ণাস্বিতরাসু চ
যত্রাত্মানং ন জনয়েদ্বুধস্তাঃ পরিবর্জয়েৎ