Utshovঅধ্যায় 47
47.1
যুধিষ্ঠির উবাচ
সর্বশাস্ত্রবিধানজ্ঞ রাজধর্মার্থবিত্তম
অতীব সংশয়চ্ছেত্তা ভবান্বৈ প্রথিতঃ ক্ষিতৌ
47.2
কশ্চিত্তু সংশয়ো মেঽস্তি তন্মে ব্রূহি পিতামহ
অস্যামাপদি কষ্টায়ামন্যং পৃচ্ছাম কং বয়ম্
47.3
যথা নরেণ কর্তব্যং যশ্চ ধর্মঃ সনাতনঃ
এতত্সর্বং মহাবাহো ভবান্ব্যাখ্যাতুমর্হতি
47.4
চতস্রো বিহিতা ভার্যা ব্রাহ্মণস্য পিতামহ
ব্রাহ্মণী ক্ষত্রিয়া বৈশ্যা শূদ্রা চ রতিমিচ্ছতঃ
47.5
তত্র জাতেষু পুত্রেষু সর্বাসাং কুরুসত্তম
আনুপূর্ব্যেণ কস্তেষাং পিত্র্যং দায়াদ্যমর্হতি
47.6
কেন বা কিং ততো হার্যং পিতৃবিত্তাত্পিতামহ
এতদিচ্ছামি কথিতং বিভাগস্তেষু যঃ স্মৃতঃ
47.7
ভীষ্ম উবাচ
ব্রাহ্মণঃ ক্ষত্রিয়ো বৈশ্যস্ত্রয়ো বর্ণা দ্বিজাতয়ঃ
এতেষু বিহিতো ধর্মো ব্রাহ্মণস্য যুধিষ্ঠির
47.8
বৈষম্যাদথ বা লোভাত্কামাদ্বাপি পরংতপ
ব্রাহ্মণস্য ভবেচ্ছূদ্রা ন তু দৃষ্টান্ততঃ স্মৃতা
47.9
শূদ্রাং শয়নমারোপ্য ব্রাহ্মণঃ পীডিতো ভবেৎ
প্রায়শ্চিত্তীয়তে চাপি বিধিদৃষ্টেন হেতুনা
47.10
তত্র জাতেষ্বপত্যেষু দ্বিগুণং স্যাদ্যুধিষ্ঠির
অতস্তে নিয়মং বিত্তে সংপ্রবক্ষ্যামি ভারত
47.11
লক্ষণ্যো গোবৃষো যানং যত্প্রধানতমং ভবেৎ
ব্রাহ্মণ্যাস্তদ্ধরেত্পুত্র একাংশং বৈ পিতুর্ধনাৎ
47.12
শেষং তু দশধা কার্যং ব্রাহ্মণস্বং যুধিষ্ঠির
তত্র তেনৈব হর্তব্যাশ্চত্বারোংঽশাঃ পিতুর্ধনাৎ
47.13
ক্ষত্রিয়ায়াস্তু যঃ পুত্রো ব্রাহ্মণঃ সোঽপ্যসংশয়ঃ
স তু মাতৃবিশেষেণ ত্রীনংশান্হর্তুমর্হতি
47.14
বর্ণে তৃতীয়ে জাতস্তু বৈশ্যায়াং ব্রাহ্মণাদপি
দ্বিরংশস্তেন হর্তব্যো ব্রাহ্মণস্বাদ্যুধিষ্ঠির
47.15
শূদ্রায়াং ব্রাহ্মণাজ্জাতো নিত্যাদেয়ধনঃ স্মৃতঃ
অল্পং বাপি প্রদাতব্যং শূদ্রাপুত্রায় ভারত
47.16
দশধা প্রবিভক্তস্য ধনস্যৈষ ভবেত্ক্রমঃ
সবর্ণাসু তু জাতানাং সমান্ভাগান্প্রকল্পয়েৎ
47.17
অব্রাহ্মণং তু মন্যন্তে শূদ্রাপুত্রমনৈপুণাৎ
ত্রিষু বর্ণেষু জাতো হি ব্রাহ্মণাদ্ব্রাহ্মণো ভবেৎ
47.18
স্মৃতা বর্ণাশ্চ চত্বারঃ পঞ্চমো নাধিগম্যতে
হরেত্তু দশমং ভাগং শূদ্রাপুত্রঃ পিতুর্ধনাৎ
47.19
তত্তু দত্তং হরেত্পিত্রা নাদত্তং হর্তুমর্হতি
অবশ্যং হি ধনং দেয়ং শূদ্রাপুত্রায় ভারত
47.20
আনৃশংস্যং পরো ধর্ম ইতি তস্মৈ প্রদীয়তে
যত্র তত্র সমুত্পন্নো গুণায়ৈবোপকল্পতে
47.21
যদি বাপ্যেকপুত্রঃ স্যাদপুত্রো যদি বা ভবেৎ
নাধিকং দশমাদ্দদ্যাচ্ছূদ্রাপুত্রায় ভারত
47.22
ত্রৈবার্ষিকাদ্যদা ভক্তাদধিকং স্যাদ্দ্বিজস্য তু
যজেত তেন দ্রব্যেণ ন বৃথা সাধয়েদ্ধনম্
47.23
ত্রিসাহস্রপরো দায়ঃ স্ত্রিয়ো দেয়ো ধনস্য বৈ
তচ্চ ভর্ত্রা ধনং দত্তং নাদত্তং ভোক্তুমর্হতি
47.24
স্ত্রীণাং তু পতিদায়াদ্যমুপভোগফলং স্মৃতম্
নাপহারং স্ত্রিয়ঃ কুর্যুঃ পতিবিত্তাত্কথংচন
47.25
স্ত্রিয়াস্তু যদ্ভবেদ্বিত্তং পিত্রা দত্তং যুধিষ্ঠির
ব্রাহ্মণ্যাস্তদ্ধরেত্কন্যা যথা পুত্রস্তথা হি সা
সা হি পুত্রসমা রাজন্বিহিতা কুরুনন্দন
47.26
এবমেতত্সমুদ্দিষ্টং ধর্মেষু ভরতর্ষভ
এতদ্ধর্মমনুস্মৃত্য ন বৃথা সাধয়েদ্ধনম্
47.27
যুধিষ্ঠির উবাচ
শূদ্রায়াং ব্রাহ্মণাজ্জাতো যদ্যদেয়ধনঃ স্মৃতঃ
কেন প্রতিবিশেষেণ দশমোঽপ্যস্য দীয়তে
47.28
ব্রাহ্মণ্যাং ব্রাহ্মণাজ্জাতো ব্রাহ্মণঃ স্যান্ন সংশয়ঃ
ক্ষত্রিয়ায়াং তথৈব স্যাদ্বৈশ্যায়ামপি চৈব হি
47.29
কস্মাত্তে বিষমং ভাগং ভজেরন্নৃপসত্তম
যদা সর্বে ত্রয়ো বর্ণাস্ত্বয়োক্তা ব্রাহ্মণা ইতি
47.30
ভীষ্ম উবাচ
দারা ইত্যুচ্যতে লোকে নাম্নৈকেন পরংতপ
প্রোক্তেন চৈকনাম্নায়ং বিশেষঃ সুমহান্ভবেৎ
47.31
তিস্রঃ কৃত্বা পুরো ভার্যাঃ পশ্চাদ্বিন্দেত ব্রাহ্মণীম্
সা জ্যেষ্ঠা সা চ পূজ্যা স্যাত্সা চ তাভ্যো গরীয়সী
47.32
স্নানং প্রসাধনং ভর্তুর্দন্তধাবনমঞ্জনম্
হব্যং কব্যং চ যচ্চান্যদ্ধর্ময়ুক্তং ভবেদ্গৃহে
47.33
ন তস্যাং জাতু তিষ্ঠন্ত্যামন্যা তত্কর্তুমর্হতি
ব্রাহ্মণী ত্বেব তত্কুর্যাদ্ব্রাহ্মণস্য যুধিষ্ঠির
47.34
অন্নং পানং চ মাল্যং চ বাসাংস্যাভরণানি চ
ব্রাহ্মণ্যৈ তানি দেয়ানি ভর্তুঃ সা হি গরীয়সী
47.35
মনুনাভিহিতং শাস্ত্রং যচ্চাপি কুরুনন্দন
তত্রাপ্যেষ মহারাজ দৃষ্টো ধর্মঃ সনাতনঃ
47.36
অথ চেদন্যথা কুর্যাদ্যদি কামাদ্যুধিষ্ঠির
যথা ব্রাহ্মণচণ্ডালঃ পূর্বদৃষ্টস্তথৈব সঃ
47.37
ব্রাহ্মণ্যাঃ সদৃশঃ পুত্রঃ ক্ষত্রিয়ায়াশ্চ যো ভবেৎ
রাজন্বিশেষো নাস্ত্যত্র বর্ণয়োরুভয়োরপি
47.38
ন তু জাত্যা সমা লোকে ব্রাহ্মণ্যাঃ ক্ষত্রিয়া ভবেৎ
ব্রাহ্মণ্যাঃ প্রথমঃ পুত্রো ভূয়ান্স্যাদ্রাজসত্তম
ভূয়োঽপি ভূয়সা হার্যং পিতৃবিত্তাদ্যুধিষ্ঠির
47.39
যথা ন সদৃশী জাতু ব্রাহ্মণ্যাঃ ক্ষত্রিয়া ভবেৎ
ক্ষত্রিয়ায়াস্তথা বৈশ্যা ন জাতু সদৃশী ভবেৎ
47.40
শ্রীশ্চ রাজ্যং চ কোশশ্চ ক্ষত্রিয়াণাং যুধিষ্ঠির
বিহিতং দৃশ্যতে রাজন্সাগরান্তা চ মেদিনী
47.41
ক্ষত্রিয়ো হি স্বধর্মেণ শ্রিয়ং প্রাপ্নোতি ভূয়সীম্
রাজা দণ্ডধরো রাজন্রক্ষা নান্যত্র ক্ষত্রিয়াৎ
47.42
ব্রাহ্মণা হি মহাভাগা দেবানামপি দেবতাঃ
তেষু রাজা প্রবর্তেত পূজয়া বিধিপূর্বকম্
47.43
প্রণীতমৃষিভির্জ্ঞাত্বা ধর্মং শাশ্বতমব্যয়ম্
লুপ্যমানাঃ স্বধর্মেণ ক্ষত্রিয়ো রক্ষতি প্রজাঃ
47.44
দস্যুভির্হ্রিয়মাণং চ ধনং দারাশ্চ সর্বশঃ
সর্বেষামেব বর্ণানাং ত্রাতা ভবতি পার্থিবঃ
47.45
ভূয়ান্স্যাত্ক্ষত্রিয়াপুত্রো বৈশ্যাপুত্রান্ন সংশয়ঃ
ভূয়স্তেনাপি হর্তব্যং পিতৃবিত্তাদ্যুধিষ্ঠির
47.46
যুধিষ্ঠির উবাচ
উক্তং তে বিধিবদ্রাজন্ব্রাহ্মণস্বে পিতামহ
ইতরেষাং তু বর্ণানাং কথং বিনিয়মো ভবেৎ
47.47
ভীষ্ম উবাচ
ক্ষত্রিয়স্যাপি ভার্যে দ্বে বিহিতে কুরুনন্দন
তৃতীয়া চ ভবেচ্ছূদ্রা ন তু দৃষ্টান্ততঃ স্মৃতা
47.48
এষ এব ক্রমো হি স্যাত্ক্ষত্রিয়াণাং যুধিষ্ঠির
অষ্টধা তু ভবেত্কার্যং ক্ষত্রিয়স্বং যুধিষ্ঠির
47.49
ক্ষত্রিয়ায়া হরেত্পুত্রশ্চতুরোংঽশান্পিতুর্ধনাৎ
যুদ্ধাবহারিকং যচ্চ পিতুঃ স্যাত্স হরেচ্চ তৎ
47.50
বৈশ্যাপুত্রস্তু ভাগাংস্ত্রীন্শূদ্রাপুত্রস্তথাষ্টমম্
সোঽপি দত্তং হরেত্পিত্রা নাদত্তং হর্তুমর্হতি
47.51
একৈব হি ভবেদ্ভার্যা বৈশ্যস্য কুরুনন্দন
দ্বিতীয়া বা ভবেচ্ছূদ্রা ন তু দৃষ্টান্ততঃ স্মৃতা
47.52
বৈশ্যস্য বর্তমানস্য বৈশ্যায়াং ভরতর্ষভ
শূদ্রায়াং চৈব কৌন্তেয় তয়োর্বিনিয়মঃ স্মৃতঃ
47.53
পঞ্চধা তু ভবেত্কার্যং বৈশ্যস্বং ভরতর্ষভ
তয়োরপত্যে বক্ষ্যামি বিভাগং চ জনাধিপ
47.54
বৈশ্যাপুত্রেণ হর্তব্যাশ্চত্বারোংঽশাঃ পিতুর্ধনাৎ
পঞ্চমস্তু ভবেদ্ভাগঃ শূদ্রাপুত্রায় ভারত
47.55
সোঽপি দত্তং হরেত্পিত্রা নাদত্তং হর্তুমর্হতি
ত্রিভির্বর্ণৈস্তথা জাতঃ শূদ্রো দেয়ধনো ভবেৎ
47.56
শূদ্রস্য স্যাত্সবর্ণৈব ভার্যা নান্যা কথংচন
শূদ্রস্য সমভাগঃ স্যাদ্যদি পুত্রশতং ভবেৎ
47.57
জাতানাং সমবর্ণাসু পুত্রাণামবিশেষতঃ
সর্বেষামেব বর্ণানাং সমভাগো ধনে স্মৃতঃ
47.58
জ্যেষ্ঠস্য ভাগো জ্যেষ্ঠঃ স্যাদেকাংশো যঃ প্রধানতঃ
এষ দায়বিধিঃ পার্থ পূর্বমুক্তঃ স্বয়ংভুবা
47.59
সমবর্ণাসু জাতানাং বিশেষোঽস্ত্যপরো নৃপ
বিবাহবৈশেষ্যকৃতঃ পূর্বঃ পূর্বো বিশিষ্যতে
47.60
হরেজ্জ্যেষ্ঠঃ প্রধানাংশমেকং তুল্যাসুতেষ্বপি
মধ্যমো মধ্যমং চৈব কনীয়াংস্তু কনীয়সম্
47.61
এবং জাতিষু সর্বাসু সবর্ণাঃ শ্রেষ্ঠতাং গতাঃ
মহর্ষিরপি চৈতদ্বৈ মারীচঃ কাশ্যপোঽব্রবীৎ