অধ্যায় 46

46.1

ভীষ্ম উবাচ
প্রাচেতসস্য বচনং কীর্তয়ন্তি পুরাবিদঃ
যস্যাঃ কিংচিন্নাদদতে জ্ঞাতয়ো ন স বিক্রয়ঃ

অর্হণং তত্কুমারীণামানৃশংস্যতমং চ তৎ
সর্বং চ প্রতিদেয়ং স্যাত্কন্যায়ৈ তদশেষতঃ

পিতৃভির্ভ্রাতৃভিশ্চৈব শ্বশুরৈরথ দেবরৈঃ
পূজ্যা লালয়িতব্যাশ্চ বহুকল্যাণমীপ্সুভিঃ

যদি বৈ স্ত্রী ন রোচেত পুমাংসং ন প্রমোদয়েৎ
অমোদনাত্পুনঃ পুংসঃ প্রজনং ন প্রবর্ধতে

পূজ্যা লালয়িতব্যাশ্চ স্ত্রিয়ো নিত্যং জনাধিপ
অপূজিতাশ্চ যত্রৈতাঃ সর্বাস্তত্রাফলাঃ ক্রিয়াঃ
তদৈব তত্কুলং নাস্তি যদা শোচন্তি জাময়ঃ

জামীশপ্তানি গেহানি নিকৃত্তানীব কৃত্যয়া
নৈব ভান্তি ন বর্ধন্তে শ্রিয়া হীনানি পার্থিব

স্ত্রিয়ঃ পুংসাং পরিদদে মনুর্জিগমিষুর্দিবম্
অবলাঃ স্বল্পকৌপীনাঃ সুহৃদঃ সত্যজিষ্ণবঃ

ঈর্ষ্যবো মানকামাশ্চ চণ্ডা অসুহৃদোঽবুধাঃ
স্ত্রিয়ো মাননমর্হন্তি তা মানয়ত মানবাঃ

স্ত্রীপ্রত্যয়ো হি বো ধর্মো রতিভোগাশ্চ কেবলাঃ
পরিচর্যান্নসংস্কারাস্তদায়ত্তা ভবন্তু বঃ

উত্পাদনমপত্যস্য জাতস্য পরিপালনম্
প্রীত্যর্থং লোকয়াত্রা চ পশ্যত স্ত্রীনিবন্ধনম্

সংমান্যমানাশ্চৈতাভিঃ সর্বকার্যাণ্যবাপ্স্যথ
বিদেহরাজদুহিতা চাত্র শ্লোকমগায়ত

নাস্তি যজ্ঞঃ স্ত্রিয়ঃ কশ্চিন্ন শ্রাদ্ধং নোপবাসকম্
ধর্মস্তু ভর্তৃশুশ্রূষা তয়া স্বর্গং জয়ত্যুত

পিতা রক্ষতি কৌমারে ভর্তা রক্ষতি যৌবনে
পুত্রাস্তু স্থবিরীভাবে ন স্ত্রী স্বাতন্ত্র্যমর্হতি

শ্রিয় এতাঃ স্ত্রিয়ো নাম সত্কার্যা ভূতিমিচ্ছতা
লালিতা নিগৃহীতা চ স্ত্রী শ্রীর্ভবতি ভারত