অধ্যায় 45

45.1

যুধিষ্ঠির উবাচ
কন্যায়াঃ প্রাপ্তশুল্কায়াঃ পতিশ্চেন্নাস্তি কশ্চন
তত্র কা প্রতিপত্তিঃ স্যাত্তন্মে ব্রূহি পিতামহ

45.2

ভীষ্ম উবাচ
যাপুত্রকস্যাপ্যরিক্থস্য প্রতিপত্সা তদা ভবেৎ

45.3

অথ চেত্সাহরেচ্ছুল্কং ক্রীতা শুল্কপ্রদস্য সা
তস্যার্থেঽপত্যমীহেত যেন ন্যায়েন শক্নুয়াৎ

45.4

ন তস্যা মন্ত্রবত্কার্যং কশ্চিত্কুর্বীত কিংচন

45.5

স্বয়ং বৃতেতি সাবিত্রী পিত্রা বৈ প্রত্যপদ্যত
তত্তস্যান্যে প্রশংসন্তি ধর্মজ্ঞা নেতরে জনাঃ

45.6

এতত্তু নাপরে চক্রুর্ন পরে জাতু সাধবঃ
সাধূনাং পুনরাচারো গরীয়ো ধর্মলক্ষণম্

45.7

অস্মিন্নেব প্রকরণে সুক্রতুর্বাক্যমব্রবীৎ
নপ্তা বিদেহরাজস্য জনকস্য মহাত্মনঃ

45.8

অসদাচরিতে মার্গে কথং স্যাদনুকীর্তনম্
অনুপ্রশ্নঃ সংশয়ো বা সতামেতদুপালভেৎ

45.9

অসদেব হি ধর্মস্য প্রমাদো ধর্ম আসুরঃ
নানুশুশ্রুম জাত্বেতামিমাং পূর্বেষু জন্মসু

45.10

ভার্যাপত্যোর্হি সংবন্ধঃ স্ত্রীপুংসোস্তুল্য এব সঃ
রতিঃ সাধারণো ধর্ম ইতি চাহ স পার্থিবঃ

45.11

যুধিষ্ঠির উবাচ
অথ কেন প্রমাণেন পুংসামাদীয়তে ধনম্
পুত্রবদ্ধি পিতুস্তস্য কন্যা ভবিতুমর্হতি

45.12

ভীষ্ম উবাচ
যথৈবাত্মা তথা পুত্রঃ পুত্রেণ দুহিতা সমা
তস্যামাত্মনি তিষ্ঠন্ত্যাং কথমন্যো ধনং হরেৎ

45.13

মাতুশ্চ যৌতকং যত্স্যাত্কুমারীভাগ এব সঃ
দৌহিত্র এব বা রিক্থমপুত্রস্য পিতুর্হরেৎ

45.14

দদাতি হি স পিণ্ডং বৈ পিতুর্মাতামহস্য চ
পুত্রদৌহিত্রয়োর্নেহ বিশেষো ধর্মতঃ স্মৃতঃ

45.15

অন্যত্র জাতয়া সা হি প্রজয়া পুত্র ঈহতে
দুহিতান্যত্র জাতেন পুত্রেণাপি বিশিষ্যতে

45.16

দৌহিত্রকেণ ধর্মেণ নাত্র পশ্যামি কারণম্
বিক্রীতাসু চ যে পুত্রা ভবন্তি পিতুরেব তে

45.17

অসূয়বস্ত্বধর্মিষ্ঠাঃ পরস্বাদায়িনঃ শঠাঃ
আসুরাদধিসংভূতা ধর্মাদ্বিষমবৃত্তয়ঃ

45.18

অত্র গাথা যমোদ্গীতাঃ কীর্তয়ন্তি পুরাবিদঃ
ধর্মজ্ঞা ধর্মশাস্ত্রেষু নিবদ্ধা ধর্মসেতুষু

45.19

যো মনুষ্যঃ স্বকং পুত্রং বিক্রীয় ধনমিচ্ছতি
কন্যাং বা জীবিতার্থায় যঃ শুল্কেন প্রয়চ্ছতি

45.20

সপ্তাবরে মহাঘোরে নিরয়ে কালসাহ্বয়ে
স্বেদং মূত্রং পুরীষং চ তস্মিন্প্রেত উপাশ্নুতে

45.21

আর্ষে গোমিথুনং শুল্কং কেচিদাহুর্মৃষৈব তৎ
অল্পং বা বহু বা রাজন্বিক্রয়স্তাবদেব সঃ

45.22

যদ্যপ্যাচরিতঃ কৈশ্চিন্নৈষ ধর্মঃ কথংচন
অন্যেষামপি দৃশ্যন্তে লোভতঃ সংপ্রবৃত্তয়ঃ

45.23

বশ্যাং কুমারীং বিহিতাং যে চ তামুপভুঞ্জতে
এতে পাপস্য কর্তারস্তমস্যন্ধেঽথ শেরতে

45.24

অন্যোঽপ্যথ ন বিক্রেয়ো মনুষ্যঃ কিং পুনঃ প্রজাঃ
অধর্মমূলৈর্হি ধনৈর্ন তৈরর্থোঽস্তি কশ্চন

Contains text from DharmicData, made available under the Open Database License (ODbL). Simple meanings are written by AI and can contain mistakes.