Utshovঅধ্যায় 44
44.1
যুধিষ্ঠির উবাচ
যন্মূলং সর্বধর্মাণাং প্রজনস্য গৃহস্য চ
পিতৃদেবাতিথীনাং চ তন্মে ব্রূহি পিতামহ
44.2
ভীষ্ম উবাচ
অয়ং হি সর্বধর্মাণাং ধর্মশ্চিন্ত্যতমো মতঃ
কীদৃশায় প্রদেয়া স্যাত্কন্যেতি বসুধাধিপ
44.3
শীলবৃত্তে সমাজ্ঞায় বিদ্যাং যোনিং চ কর্ম চ
অদ্ভিরেব প্রদাতব্যা কন্যা গুণবতে বরে
ব্রাহ্মণানাং সতামেষ ধর্মো নিত্যং যুধিষ্ঠির
44.4
আবাহ্যমাবহেদেবং যো দদ্যাদনুকূলতঃ
শিষ্টানাং ক্ষত্রিয়াণাং চ ধর্ম এষ সনাতনঃ
44.5
আত্মাভিপ্রেতমুত্সৃজ্য কন্যাভিপ্রেত এব যঃ
অভিপ্রেতা চ যা যস্য তস্মৈ দেয়া যুধিষ্ঠির
গান্ধর্বমিতি তং ধর্মং প্রাহুর্ধর্মবিদো জনাঃ
44.6
ধনেন বহুনা ক্রীত্বা সংপ্রলোভ্য চ বান্ধবান্
অসুরাণাং নৃপৈতং বৈ ধর্মমাহুর্মনীষিণঃ
44.7
হত্বা ছিত্ত্বা চ শীর্ষাণি রুদতাং রুদতীং গৃহাৎ
প্রসহ্য হরণং তাত রাক্ষসং ধর্মলক্ষণম্
44.8
পঞ্চানাং তু ত্রয়ো ধর্ম্যা দ্বাবধর্ম্যৌ যুধিষ্ঠির
পৈশাচ আসুরশ্চৈব ন কর্তব্যৌ কথংচন
44.9
ব্রাহ্মঃ ক্ষাত্রোঽথ গান্ধর্ব এতে ধর্ম্যা নরর্ষভ
পৃথগ্বা যদি বা মিশ্রাঃ কর্তব্যা নাত্র সংশয়ঃ
44.10
তিস্রো ভার্যা ব্রাহ্মণস্য দ্বে ভার্যে ক্ষত্রিয়স্য তু
বৈশ্যঃ স্বজাতিং বিন্দেত তাস্বপত্যং সমং ভবেৎ
44.11
ব্রাহ্মণী তু ভবেজ্জ্যেষ্ঠা ক্ষত্রিয়া ক্ষত্রিয়স্য তু
রত্যর্থমপি শূদ্রা স্যান্নেত্যাহুরপরে জনাঃ
44.12
অপত্যজন্ম শূদ্রায়াং ন প্রশংসন্তি সাধবঃ
শূদ্রায়াং জনয়ন্বিপ্রঃ প্রায়শ্চিত্তী বিধীয়তে
44.13
ত্রিংশদ্বর্ষো দশবর্ষাং ভার্যাং বিন্দেত নগ্নিকাম্
একবিংশতিবর্ষো বা সপ্তবর্ষামবাপ্নুয়াৎ
44.14
যস্যাস্তু ন ভবেদ্ভ্রাতা পিতা বা ভরতর্ষভ
নোপয়চ্ছেত তাং জাতু পুত্রিকাধর্মিণী হি সা
44.15
ত্রীণি বর্ষাণ্যুদীক্ষেত কন্যা ঋতুমতী সতী
চতুর্থে ত্বথ সংপ্রাপ্তে স্বয়ং ভর্তারমর্জয়েৎ
44.16
প্রজনো হীয়তে তস্যা রতিশ্চ ভরতর্ষভ
অতোঽন্যথা বর্তমানা ভবেদ্বাচ্যা প্রজাপতেঃ
44.17
অসপিণ্ডা চ যা মাতুরসগোত্রা চ যা পিতুঃ
ইত্যেতামনুগচ্ছেত তং ধর্মং মনুরব্রবীৎ
44.18
যুধিষ্ঠির উবাচ
শুল্কমন্যেন দত্তং স্যাদ্দদানীত্যাহ চাপরঃ
বলাদন্যঃ প্রভাষেত ধনমন্যঃ প্রদর্শয়েৎ
44.19
পাণিগ্রহীতা ত্বন্যঃ স্যাত্কস্য কন্যা পিতামহ
তত্ত্বং জিজ্ঞাসমানানাং চক্ষুর্ভবতু নো ভবান্
44.20
ভীষ্ম উবাচ
যত্কিংচিত্কর্ম মানুষ্যং সংস্থানায় প্রকৃষ্যতে
মন্ত্রবন্মন্ত্রিতং তস্য মৃষাবাদস্তু পাতকঃ
44.21
ভার্যাপত্যৃত্বিগাচার্যাঃ শিষ্যোপাধ্যায় এব চ
মৃষোক্তে দণ্ডমর্হন্তি নেত্যাহুরপরে জনাঃ
44.22
ন হ্যকামেন সংবাদং মনুরেবং প্রশংসতি
অয়শস্যমধর্ম্যং চ যন্মৃষা ধর্মকোপনম্
44.23
নৈকান্তদোষ একস্মিংস্তদ্দানং নোপলভ্যতে
ধর্মতো যাং প্রয়চ্ছন্তি যাং চ ক্রীণন্তি ভারত
44.24
বন্ধুভিঃ সমনুজ্ঞাতো মন্ত্রহোমৌ প্রয়োজয়েৎ
তথা সিধ্যন্তি তে মন্ত্রা নাদত্তায়াঃ কথংচন
44.25
যস্ত্বত্র মন্ত্রসময়ো ভার্যাপত্যোর্মিথঃ কৃতঃ
তমেবাহুর্গরীয়াংসং যশ্চাসৌ জ্ঞাতিভিঃ কৃতঃ
44.26
দেবদত্তাং পতির্ভার্যাং বেত্তি ধর্মস্য শাসনাৎ
সা দৈবীং মানুষীং বাচমনৃতাং পর্যুদস্যতি
44.27
যুধিষ্ঠির উবাচ
কন্যায়াং প্রাপ্তশুল্কায়াং জ্যায়াংশ্চেদাব্রজেদ্বরঃ
ধর্মকামার্থসংপন্নো বাচ্যমত্রানৃতং ন বা
44.28
তস্মিন্নুভয়তো দোষে কুর্বঞ্ছ্রেয়ঃ সমাচরেৎ
অয়ং নঃ সর্বধর্মাণাং ধর্মশ্চিন্ত্যতমো মতঃ
44.29
তত্ত্বং জিজ্ঞাসমানানাং চক্ষুর্ভবতু নো ভবান্
তদেতত্সর্বমাচক্ষ্ব ন হি তৃপ্যামি কথ্যতাম্
44.30
ভীষ্ম উবাচ
ন বৈ নিষ্ঠাকরং শুল্কং জ্ঞাত্বাসীত্তেন নাহৃতম্
ন হি শুল্কপরাঃ সন্তঃ কন্যাং দদতি কর্হিচিৎ
44.31
অন্যৈর্গুণৈরুপেতং তু শুল্কং যাচন্তি বান্ধবাঃ
অলংকৃত্বা বহস্বেতি যো দদ্যাদনুকূলতঃ
44.32
তচ্চ তাং চ দদাত্যেব ন শুল্কং বিক্রয়ো ন সঃ
প্রতিগৃহ্য ভবেদ্দেয়মেষ ধর্মঃ সনাতনঃ
44.33
দাস্যামি ভবতে কন্যামিতি পূর্বং নভাষিতম্
যে চৈবাহুর্যে চ নাহুর্যে চাবশ্যং বদন্ত্যুত
44.34
তস্মাদা গ্রহণাত্পাণের্যাচয়ন্তি পরস্পরম্
কন্যাবরঃ পুরা দত্তো মরুদ্ভিরিতি নঃ শ্রুতম্
44.35
নানিষ্টায় প্রদাতব্যা কন্যা ইত্যৃষিচোদিতম্
তন্মূলং কামমূলস্য প্রজনস্যেতি মে মতিঃ
44.36
সমীক্ষ্য চ বহূন্দোষান্সংবাসাদ্বিদ্বিষাণয়োঃ
যথা নিষ্ঠাকরং শুল্কং ন জাত্বাসীত্তথা শৃণু
44.37
অহং বিচিত্রবীর্যায় দ্বে কন্যে সমুদাবহম্
জিত্বা চ মাগধান্সর্বান্কাশীনথ চ কোসলান্
গৃহীতপাণিরেকাসীত্প্রাপ্তশুল্কাপরাভবৎ
44.38
পাণৌ গৃহীতা তত্রৈব বিসৃজ্যা ইতি মে পিতা
অব্রবীদিতরাং কন্যামাবহত্স তু কৌরবঃ
44.39
অপ্যন্যামনুপপ্রচ্ছ শঙ্কমানঃ পিতুর্বচঃ
অতীব হ্যস্য ধর্মেপ্সা পিতুর্মেঽভ্যধিকাভবৎ
44.40
ততোঽহমব্রুবং রাজন্নাচারেপ্সুরিদং বচঃ
আচারং তত্ত্বতো বেত্তুমিচ্ছামীতি পুনঃ পুনঃ
44.41
ততো ময়ৈবমুক্তে তু বাক্যে ধর্মভৃতাং বরঃ
পিতা মম মহারাজ বাহ্লীকো বাক্যমব্রবীৎ
44.42
যদি বঃ শুল্কতো নিষ্ঠা ন পাণিগ্রহণং তথা
লাজান্তরমুপাসীত প্রাপ্তশুল্কা পতিং বৃতম্
44.43
ন হি ধর্মবিদঃ প্রাহুঃ প্রমাণং বাক্যতঃ স্মৃতম্
যেষাং বৈ শুল্কতো নিষ্ঠা ন পাণিগ্রহণাত্তথা
44.44
প্রসিদ্ধং ভাষিতং দানে তেষাং প্রত্যসনং পুনঃ
যে মন্যন্তে ক্রয়ং শুল্কং ন তে ধর্মবিদো জনাঃ
44.45
ন চৈতেভ্যঃ প্রদাতব্যা ন বোঢব্যা তথাবিধা
ন হ্যেব ভার্যা ক্রেতব্যা ন বিক্রেয়া কথংচন
44.46
যে চ ক্রীণন্তি দাসীবদ্যে চ বিক্রীণতে জনাঃ
ভবেত্তেষাং তথা নিষ্ঠা লুব্ধানাং পাপচেতসাম্
44.47
অস্মিন্ধর্মে সত্যবন্তং পর্যপৃচ্ছন্ত বৈ জনাঃ
কন্যায়াঃ প্রাপ্তশুল্কায়াঃ শুল্কদঃ প্রশমং গতঃ
44.48
পাণিগ্রহীতা চান্যঃ স্যাদত্র নো ধর্মসংশয়ঃ
তন্নশ্ছিন্ধি মহাপ্রাজ্ঞ ত্বং হি বৈ প্রাজ্ঞসংমতঃ
তত্ত্বং জিজ্ঞাসমানানাং চক্ষুর্ভবতু নো ভবান্
44.49
তানেবং ব্রুবতঃ সর্বান্সত্যবান্বাক্যমব্রবীৎ
যত্রেষ্টং তত্র দেয়া স্যান্নাত্র কার্যা বিচারণা
কুর্বতে জীবতোঽপ্যেবং মৃতে নৈবাস্তি সংশয়ঃ
44.50
দেবরং প্রবিশেত্কন্যা তপ্যেদ্বাপি মহত্তপঃ
তমেবানুব্রতা ভূত্বা পাণিগ্রাহস্য নাম সা
44.51
লিখন্ত্যেব তু কেষাংচিদপরেষাং শনৈরপি
ইতি যে সংবদন্ত্যত্র ত এতং নিশ্চয়ং বিদুঃ
44.52
তত্পাণিগ্রহণাত্পূর্বমুত্তরং যত্র বর্ততে
সর্বমঙ্গলমন্ত্রং বৈ মৃষাবাদস্তু পাতকঃ
44.53
পাণিগ্রহণমন্ত্রাণাং নিষ্ঠা স্যাত্সপ্তমে পদে
পাণিগ্রাহস্য ভার্যা স্যাদ্যস্য চাদ্ভিঃ প্রদীয়তে
44.54
অনুকূলামনুবংশাং ভ্রাত্রা দত্তামুপাগ্নিকাম্
পরিক্রম্য যথান্যায়ং ভার্যাং বিন্দেদ্দ্বিজোত্তমঃ