UtshovChapter 44
44.1
युधिष्ठिर उवाच
यन्मूलं सर्वधर्माणां प्रजनस्य गृहस्य च
पितृदेवातिथीनां च तन्मे ब्रूहि पितामह
Yudhishthira uvacha
Yanmulam sarvadharmanam prajanasya grihasya cha
Pitridevatithinam cha tanme bruhi pitamaha
44.2
भीष्म उवाच
अयं हि सर्वधर्माणां धर्मश्चिन्त्यतमो मतः
कीदृशाय प्रदेया स्यात्कन्येति वसुधाधिप
Bhishma uvacha
Ayam hi sarvadharmanam dharmashchintyatamo matah
Kidrishaya pradeya syatkanyeti vasudhadhipa
44.3
शीलवृत्ते समाज्ञाय विद्यां योनिं च कर्म च
अद्भिरेव प्रदातव्या कन्या गुणवते वरे
ब्राह्मणानां सतामेष धर्मो नित्यं युधिष्ठिर
Shilavritte samagyaya vidyam yonim cha karma cha
Adbhireva pradatavya kanya gunavate vare
Brahmananam satamesha dharmo nityam yudhishthira
44.4
आवाह्यमावहेदेवं यो दद्यादनुकूलतः
शिष्टानां क्षत्रियाणां च धर्म एष सनातनः
Avahyamavahedevam yo dadyadanukulatah
Shishtanam kshatriyanam cha dharma esha sanatanah
44.5
आत्माभिप्रेतमुत्सृज्य कन्याभिप्रेत एव यः
अभिप्रेता च या यस्य तस्मै देया युधिष्ठिर
गान्धर्वमिति तं धर्मं प्राहुर्धर्मविदो जनाः
Atmabhipretamutsrijya kanyabhipreta eva yah
Abhipreta cha ya yasya tasmai deya yudhishthira
Gandharvamiti tam dharmam prahurdharmavido janah
44.6
धनेन बहुना क्रीत्वा संप्रलोभ्य च बान्धवान्
असुराणां नृपैतं वै धर्ममाहुर्मनीषिणः
Dhanena bahuna kritva sampralobhya cha bandhavan
Asuranam nripaitam vai dharmamahurmanishinah
44.7
हत्वा छित्त्वा च शीर्षाणि रुदतां रुदतीं गृहात्
प्रसह्य हरणं तात राक्षसं धर्मलक्षणम्
Hatva chhittva cha shirshani rudatam rudatim grihat
Prasahya haranam tata rakshasam dharmalakshanam
44.8
पञ्चानां तु त्रयो धर्म्या द्वावधर्म्यौ युधिष्ठिर
पैशाच आसुरश्चैव न कर्तव्यौ कथंचन
Panchanam tu trayo dharmya dvavadharmyau yudhishthira
Paishacha asurashchaiva na kartavyau kathanchana
44.9
ब्राह्मः क्षात्रोऽथ गान्धर्व एते धर्म्या नरर्षभ
पृथग्वा यदि वा मिश्राः कर्तव्या नात्र संशयः
Brahmah kshatrotha gandharva ete dharmya nararshabha
Prithagva yadi va mishrah kartavya natra sanshayah
44.10
तिस्रो भार्या ब्राह्मणस्य द्वे भार्ये क्षत्रियस्य तु
वैश्यः स्वजातिं विन्देत तास्वपत्यं समं भवेत्
Tisro bharya brahmanasya dve bharye kshatriyasya tu
Vaishyah svajatim vindeta tasvapatyam samam bhavet
44.11
ब्राह्मणी तु भवेज्ज्येष्ठा क्षत्रिया क्षत्रियस्य तु
रत्यर्थमपि शूद्रा स्यान्नेत्याहुरपरे जनाः
Brahmani tu bhavejjyeshtha kshatriya kshatriyasya tu
Ratyarthamapi shudra syannetyahurapare janah
44.12
अपत्यजन्म शूद्रायां न प्रशंसन्ति साधवः
शूद्रायां जनयन्विप्रः प्रायश्चित्ती विधीयते
Apatyajanma shudrayam na prashansanti sadhavah
Shudrayam janayanviprah prayashchitti vidhiyate
44.13
त्रिंशद्वर्षो दशवर्षां भार्यां विन्देत नग्निकाम्
एकविंशतिवर्षो वा सप्तवर्षामवाप्नुयात्
Trinshadvarsho dashavarsham bharyam vindeta nagnikam
Ekavinshativarsho va saptavarshamavapnuyat
44.14
यस्यास्तु न भवेद्भ्राता पिता वा भरतर्षभ
नोपयच्छेत तां जातु पुत्रिकाधर्मिणी हि सा
Yasyastu na bhavedbhrata pita va bharatarshabha
Nopayachchheta tam jatu putrikadharmini hi sa
44.15
त्रीणि वर्षाण्युदीक्षेत कन्या ऋतुमती सती
चतुर्थे त्वथ संप्राप्ते स्वयं भर्तारमर्जयेत्
Trini varshanyudiksheta kanya ritumati sati
Chaturthe tvatha samprapte svayam bhartaramarjayet
44.16
प्रजनो हीयते तस्या रतिश्च भरतर्षभ
अतोऽन्यथा वर्तमाना भवेद्वाच्या प्रजापतेः
Prajano hiyate tasya ratishcha bharatarshabha
Atonyatha vartamana bhavedvachya prajapateh
44.17
असपिण्डा च या मातुरसगोत्रा च या पितुः
इत्येतामनुगच्छेत तं धर्मं मनुरब्रवीत्
Asapinda cha ya maturasagotra cha ya pituh
Ityetamanugachchheta tam dharmam manurabravit
44.18
युधिष्ठिर उवाच
शुल्कमन्येन दत्तं स्याद्ददानीत्याह चापरः
बलादन्यः प्रभाषेत धनमन्यः प्रदर्शयेत्
Yudhishthira uvacha
Shulkamanyena dattam syaddadanityaha chaparah
Baladanyah prabhasheta dhanamanyah pradarshayet
44.19
पाणिग्रहीता त्वन्यः स्यात्कस्य कन्या पितामह
तत्त्वं जिज्ञासमानानां चक्षुर्भवतु नो भवान्
Panigrahita tvanyah syatkasya kanya pitamaha
Tattvam jigyasamananam chakshurbhavatu no bhavan
44.20
भीष्म उवाच
यत्किंचित्कर्म मानुष्यं संस्थानाय प्रकृष्यते
मन्त्रवन्मन्त्रितं तस्य मृषावादस्तु पातकः
Bhishma uvacha
Yatkinchitkarma manushyam sansthanaya prakrishyate
Mantravanmantritam tasya mrishavadastu patakah
44.21
भार्यापत्यृत्विगाचार्याः शिष्योपाध्याय एव च
मृषोक्ते दण्डमर्हन्ति नेत्याहुरपरे जनाः
Bharyapatyritvigacharyah shishyopadhyaya eva cha
Mrishokte dandamarhanti netyahurapare janah
44.22
न ह्यकामेन संवादं मनुरेवं प्रशंसति
अयशस्यमधर्म्यं च यन्मृषा धर्मकोपनम्
Na hyakamena sanvadam manurevam prashansati
Ayashasyamadharmyam cha yanmrisha dharmakopanam
44.23
नैकान्तदोष एकस्मिंस्तद्दानं नोपलभ्यते
धर्मतो यां प्रयच्छन्ति यां च क्रीणन्ति भारत
Naikantadosha ekasminstaddanam nopalabhyate
Dharmato yam prayachchhanti yam cha krinanti bharata
44.24
बन्धुभिः समनुज्ञातो मन्त्रहोमौ प्रयोजयेत्
तथा सिध्यन्ति ते मन्त्रा नादत्तायाः कथंचन
Bandhubhih samanugyato mantrahomau prayojayet
Tatha sidhyanti te mantra nadattayah kathanchana
44.25
यस्त्वत्र मन्त्रसमयो भार्यापत्योर्मिथः कृतः
तमेवाहुर्गरीयांसं यश्चासौ ज्ञातिभिः कृतः
Yastvatra mantrasamayo bharyapatyormithah kritah
Tamevahurgariyansam yashchasau gyatibhih kritah
44.26
देवदत्तां पतिर्भार्यां वेत्ति धर्मस्य शासनात्
सा दैवीं मानुषीं वाचमनृतां पर्युदस्यति
Devadattam patirbharyam vetti dharmasya shasanat
Sa daivim manushim vachamanritam paryudasyati
44.27
युधिष्ठिर उवाच
कन्यायां प्राप्तशुल्कायां ज्यायांश्चेदाव्रजेद्वरः
धर्मकामार्थसंपन्नो वाच्यमत्रानृतं न वा
Yudhishthira uvacha
Kanyayam praptashulkayam jyayanshchedavrajedvarah
Dharmakamarthasampanno vachyamatranritam na va
44.28
तस्मिन्नुभयतो दोषे कुर्वञ्छ्रेयः समाचरेत्
अयं नः सर्वधर्माणां धर्मश्चिन्त्यतमो मतः
Tasminnubhayato doshe kurvanchhreyah samacharet
Ayam nah sarvadharmanam dharmashchintyatamo matah
44.29
तत्त्वं जिज्ञासमानानां चक्षुर्भवतु नो भवान्
तदेतत्सर्वमाचक्ष्व न हि तृप्यामि कथ्यताम्
Tattvam jigyasamananam chakshurbhavatu no bhavan
Tadetatsarvamachakshva na hi tripyami kathyatam
44.30
भीष्म उवाच
न वै निष्ठाकरं शुल्कं ज्ञात्वासीत्तेन नाहृतम्
न हि शुल्कपराः सन्तः कन्यां ददति कर्हिचित्
Bhishma uvacha
Na vai nishthakaram shulkam gyatvasittena nahritam
Na hi shulkaparah santah kanyam dadati karhichit
44.31
अन्यैर्गुणैरुपेतं तु शुल्कं याचन्ति बान्धवाः
अलंकृत्वा वहस्वेति यो दद्यादनुकूलतः
Anyairgunairupetam tu shulkam yachanti bandhavah
Alankritva vahasveti yo dadyadanukulatah
44.32
तच्च तां च ददात्येव न शुल्कं विक्रयो न सः
प्रतिगृह्य भवेद्देयमेष धर्मः सनातनः
Tachcha tam cha dadatyeva na shulkam vikrayo na sah
Pratigrihya bhaveddeyamesha dharmah sanatanah
44.33
दास्यामि भवते कन्यामिति पूर्वं नभाषितम्
ये चैवाहुर्ये च नाहुर्ये चावश्यं वदन्त्युत
Dasyami bhavate kanyamiti purvam nabhashitam
Ye chaivahurye cha nahurye chavashyam vadantyuta
44.34
तस्मादा ग्रहणात्पाणेर्याचयन्ति परस्परम्
कन्यावरः पुरा दत्तो मरुद्भिरिति नः श्रुतम्
Tasmada grahanatpaneryachayanti parasparam
Kanyavarah pura datto marudbhiriti nah shrutam
44.35
नानिष्टाय प्रदातव्या कन्या इत्यृषिचोदितम्
तन्मूलं काममूलस्य प्रजनस्येति मे मतिः
Nanishtaya pradatavya kanya ityrishichoditam
Tanmulam kamamulasya prajanasyeti me matih
44.36
समीक्ष्य च बहून्दोषान्संवासाद्विद्विषाणयोः
यथा निष्ठाकरं शुल्कं न जात्वासीत्तथा शृणु
Samikshya cha bahundoshansanvasadvidvishanayoh
Yatha nishthakaram shulkam na jatvasittatha shrinu
44.37
अहं विचित्रवीर्याय द्वे कन्ये समुदावहम्
जित्वा च मागधान्सर्वान्काशीनथ च कोसलान्
गृहीतपाणिरेकासीत्प्राप्तशुल्कापराभवत्
Aham vichitraviryaya dve kanye samudavaham
Jitva cha magadhansarvankashinatha cha kosalan
Grihitapanirekasitpraptashulkaparabhavat
44.38
पाणौ गृहीता तत्रैव विसृज्या इति मे पिता
अब्रवीदितरां कन्यामावहत्स तु कौरवः
Panau grihita tatraiva visrijya iti me pita
Abraviditaram kanyamavahatsa tu kauravah
44.39
अप्यन्यामनुपप्रच्छ शङ्कमानः पितुर्वचः
अतीव ह्यस्य धर्मेप्सा पितुर्मेऽभ्यधिकाभवत्
Apyanyamanupaprachchha shankamanah piturvachah
Ativa hyasya dharmepsa piturmebhyadhikabhavat
44.40
ततोऽहमब्रुवं राजन्नाचारेप्सुरिदं वचः
आचारं तत्त्वतो वेत्तुमिच्छामीति पुनः पुनः
Tatohamabruvam rajannacharepsuridam vachah
Acharam tattvato vettumichchhamiti punah punah
44.41
ततो मयैवमुक्ते तु वाक्ये धर्मभृतां वरः
पिता मम महाराज बाह्लीको वाक्यमब्रवीत्
Tato mayaivamukte tu vakye dharmabhritam varah
Pita mama maharaja bahliko vakyamabravit
44.42
यदि वः शुल्कतो निष्ठा न पाणिग्रहणं तथा
लाजान्तरमुपासीत प्राप्तशुल्का पतिं वृतम्
Yadi vah shulkato nishtha na panigrahanam tatha
Lajantaramupasita praptashulka patim vritam
44.43
न हि धर्मविदः प्राहुः प्रमाणं वाक्यतः स्मृतम्
येषां वै शुल्कतो निष्ठा न पाणिग्रहणात्तथा
Na hi dharmavidah prahuh pramanam vakyatah smritam
Yesham vai shulkato nishtha na panigrahanattatha
44.44
प्रसिद्धं भाषितं दाने तेषां प्रत्यसनं पुनः
ये मन्यन्ते क्रयं शुल्कं न ते धर्मविदो जनाः
Prasiddham bhashitam dane tesham pratyasanam punah
Ye manyante krayam shulkam na te dharmavido janah
44.45
न चैतेभ्यः प्रदातव्या न वोढव्या तथाविधा
न ह्येव भार्या क्रेतव्या न विक्रेया कथंचन
Na chaitebhyah pradatavya na vodhavya tathavidha
Na hyeva bharya kretavya na vikreya kathanchana
44.46
ये च क्रीणन्ति दासीवद्ये च विक्रीणते जनाः
भवेत्तेषां तथा निष्ठा लुब्धानां पापचेतसाम्
Ye cha krinanti dasivadye cha vikrinate janah
Bhavettesham tatha nishtha lubdhanam papachetasam
44.47
अस्मिन्धर्मे सत्यवन्तं पर्यपृच्छन्त वै जनाः
कन्यायाः प्राप्तशुल्कायाः शुल्कदः प्रशमं गतः
Asmindharme satyavantam paryaprichchhanta vai janah
Kanyayah praptashulkayah shulkadah prashamam gatah
44.48
पाणिग्रहीता चान्यः स्यादत्र नो धर्मसंशयः
तन्नश्छिन्धि महाप्राज्ञ त्वं हि वै प्राज्ञसंमतः
तत्त्वं जिज्ञासमानानां चक्षुर्भवतु नो भवान्
Panigrahita chanyah syadatra no dharmasanshayah
Tannashchhindhi mahapragya tvam hi vai pragyasammatah
Tattvam jigyasamananam chakshurbhavatu no bhavan
44.49
तानेवं ब्रुवतः सर्वान्सत्यवान्वाक्यमब्रवीत्
यत्रेष्टं तत्र देया स्यान्नात्र कार्या विचारणा
कुर्वते जीवतोऽप्येवं मृते नैवास्ति संशयः
Tanevam bruvatah sarvansatyavanvakyamabravit
Yatreshtam tatra deya syannatra karya vicharana
Kurvate jivatopyevam mrite naivasti sanshayah
44.50
देवरं प्रविशेत्कन्या तप्येद्वापि महत्तपः
तमेवानुव्रता भूत्वा पाणिग्राहस्य नाम सा
Devaram pravishetkanya tapyedvapi mahattapah
Tamevanuvrata bhutva panigrahasya nama sa
44.51
लिखन्त्येव तु केषांचिदपरेषां शनैरपि
इति ये संवदन्त्यत्र त एतं निश्चयं विदुः
Likhantyeva tu keshanchidaparesham shanairapi
Iti ye sanvadantyatra ta etam nishchayam viduh
44.52
तत्पाणिग्रहणात्पूर्वमुत्तरं यत्र वर्तते
सर्वमङ्गलमन्त्रं वै मृषावादस्तु पातकः
Tatpanigrahanatpurvamuttaram yatra vartate
Sarvamangalamantram vai mrishavadastu patakah
44.53
पाणिग्रहणमन्त्राणां निष्ठा स्यात्सप्तमे पदे
पाणिग्राहस्य भार्या स्याद्यस्य चाद्भिः प्रदीयते
Panigrahanamantranam nishtha syatsaptame pade
Panigrahasya bharya syadyasya chadbhih pradiyate
44.54
अनुकूलामनुवंशां भ्रात्रा दत्तामुपाग्निकाम्
परिक्रम्य यथान्यायं भार्यां विन्देद्द्विजोत्तमः
Anukulamanuvansham bhratra dattamupagnikam
Parikramya yathanyayam bharyam vindeddvijottamah