অধ্যায় 43

43.1

ভীষ্ম উবাচ
তমাগতমভিপ্রেক্ষ্য শিষ্যং বাক্যমথাব্রবীৎ
দেবশর্মা মহাতেজা যত্তচ্ছৃণু নরাধিপ

43.2

দেবশর্মোবাচ
কিং তে বিপুল দৃষ্টং বৈ তস্মিন্নদ্য মহাবনে
তে ত্বা জানন্তি নিপুণ আত্মা চ রুচিরেব চ

43.3

বিপুল উবাচ
ব্রহ্মর্ষে মিথুনং কিং তত্কে চ তে পুরুষা বিভো
যে মাং জানন্তি তত্ত্বেন তাংশ্চ মে বক্তুমর্হসি

43.4

দেবশর্মোবাচ
যদ্বৈ তন্মিথুনং ব্রহ্মন্নহোরাত্রং হি বিদ্ধি তৎ
চক্রবত্পরিবর্তেত তত্তে জানাতি দুষ্কৃতম্

43.5

যে চ তে পুরুষা বিপ্র অক্ষৈর্দীব্যন্তি হৃষ্টবৎ
ঋতূংস্তানভিজানীহি তে তে জানন্তি দুষ্কৃতম্

43.6

ন মাং কশ্চিদ্বিজানীত ইতি কৃত্বা ন বিশ্বসেৎ
নরো রহসি পাপাত্মা পাপকং কর্ম বৈ দ্বিজ

43.7

কুর্বাণং হি নরং কর্ম পাপং রহসি সর্বদা
পশ্যন্তি ঋতবশ্চাপি তথা দিননিশেঽপ্যুত

43.8

তে ত্বাং হর্ষস্মিতং দৃষ্ট্বা গুরোঃ কর্মানিবেদকম্
স্মারয়ন্তস্তথা প্রাহুস্তে যথা শ্রুতবান্ভবান্

43.9

অহোরাত্রং বিজানাতি ঋতবশ্চাপি নিত্যশঃ
পুরুষে পাপকং কর্ম শুভং বা শুভকর্মণঃ

43.10

তত্ত্বয়া মম যত্কর্ম ব্যভিচারাদ্ভয়াত্মকম্
নাখ্যাতমিতি জানন্তস্তে ত্বামাহুস্তথা দ্বিজ

43.11

তে চৈব হি ভবেয়ুস্তে লোকাঃ পাপকৃতো যথা
কৃত্বা নাচক্ষতঃ কর্ম মম যচ্চ ত্বয়া কৃতম্

43.12

তথা শক্যা চ দুর্বৃত্তা রক্ষিতুং প্রমদা দ্বিজ
ন চ ত্বং কৃতবান্কিংচিদাগঃ প্রীতোঽস্মি তেন তে

43.13

যদি ত্বহং ত্বা দুর্বৃত্তমদ্রাক্ষং দ্বিজসত্তম
শপেয়ং ত্বামহং ক্রোধান্ন মেঽত্রাস্তি বিচারণা

43.14

সজ্জন্তি পুরুষে নার্যঃ পুংসাং সোঽর্থশ্চ পুষ্কলঃ
অন্যথা রক্ষতঃ শাপোঽভবিষ্যত্তে গতিশ্চ সা

43.15

রক্ষিতা সা ত্বয়া পুত্র মম চাপি নিবেদিতা
অহং তে প্রীতিমাংস্তাত স্বস্তি স্বর্গং গমিষ্যসি

43.16

ভীষ্ম উবাচ
ইত্যুক্ত্বা বিপুলং প্রীতো দেবশর্মা মহানৃষিঃ
মুমোদ স্বর্গমাস্থায় সহভার্যঃ সশিষ্যকঃ

43.17

ইদমাখ্যাতবাংশ্চাপি মমাখ্যানং মহামুনিঃ
মার্কণ্ডেয়ঃ পুরা রাজন্গঙ্গাকূলে কথান্তরে

43.18

তস্মাদ্ব্রবীমি পার্থ ত্বা স্ত্রিয়ঃ সর্বাঃ সদৈব চ
উভয়ং দৃশ্যতে তাসু সততং সাধ্বসাধু চ

43.19

স্ত্রিয়ঃ সাধ্ব্যো মহাভাগাঃ সংমতা লোকমাতরঃ
ধারয়ন্তি মহীং রাজন্নিমাং সবনকাননাম্

43.20

অসাধ্ব্যশ্চাপি দুর্বৃত্তাঃ কুলঘ্ন্যঃ পাপনিশ্চয়াঃ
বিজ্ঞেয়া লক্ষণৈর্দুষ্টৈঃ স্বগাত্রসহজৈর্নৃপ

43.21

এবমেতাসু রক্ষা বৈ শক্যা কর্তুং মহাত্মভিঃ
অন্যথা রাজশার্দূল ন শক্যা রক্ষিতুং স্ত্রিয়ঃ

43.22

এতা হি মনুজব্যাঘ্র তীক্ষ্ণাস্তীক্ষ্ণপরাক্রমাঃ
নাসামস্তি প্রিয়ো নাম মৈথুনে সংগমে নৃভিঃ

43.23

এতাঃ কৃত্যাশ্চ কার্যাশ্চ কৃতাশ্চ ভরতর্ষভ
ন চৈকস্মিন্রমন্ত্যেতাঃ পুরুষে পাণ্ডুনন্দন

43.24

নাসু স্নেহো নৃভিঃ কার্যস্তথৈবের্ষ্যা জনেশ্বর
খেদমাস্থায় ভুঞ্জীত ধর্মমাস্থায় চৈব হি

43.25

বিহন্যেতান্যথা কুর্বন্নরঃ কৌরবনন্দন
সর্বথা রাজশার্দূল যুক্তিঃ সর্বত্র পূজ্যতে

43.26

তেনৈকেন তু রক্ষা বৈ বিপুলেন কৃতা স্ত্রিয়াঃ
নান্যঃ শক্তো নৃলোকেঽস্মিন্রক্ষিতুং নৃপ যোষিতঃ

Contains text from DharmicData, made available under the Open Database License (ODbL). Simple meanings are written by AI and can contain mistakes.