Utshovঅধ্যায় 42
42.1
ভীষ্ম উবাচ
বিপুলস্ত্বকরোত্তীব্রং তপঃ কৃত্বা গুরোর্বচঃ
তপোয়ুক্তমথাত্মানমমন্যত চ বীর্যবান্
42.2
স তেন কর্মণা স্পর্ধন্পৃথিবীং পৃথিবীপতে
চচার গতভীঃ প্রীতো লব্ধকীর্তির্বরো নৃষু
42.3
উভৌ লোকৌ জিতৌ চাপি তথৈবামন্যত প্রভুঃ
কর্মণা তেন কৌরব্য তপসা বিপুলেন চ
42.4
অথ কালে ব্যতিক্রান্তে কস্মিংশ্চিত্কুরুনন্দন
রুচ্যা ভগিন্যা দানং বৈ বভূব ধনধান্যবৎ
42.5
এতস্মিন্নেব কালে তু দিব্যা কাচিদ্বরাঙ্গনা
বিভ্রতী পরমং রূপং জগামাথ বিহায়সা
42.6
তস্যাঃ শরীরাত্পুষ্পাণি পতিতানি মহীতলে
তস্যাশ্রমস্যাবিদূরে দিব্যগন্ধানি ভারত
42.7
তান্যগৃহ্ণাত্ততো রাজন্রুচির্নলিনলোচনা
তদা নিমন্ত্রকস্তস্যা অঙ্গেভ্যঃ ক্ষিপ্রমাগমৎ
42.8
তস্যা হি ভগিনী তাত জ্যেষ্ঠা নাম্না প্রভাবতী
ভার্যা চিত্ররথস্যাথ বভূবাঙ্গেশ্বরস্য বৈ
42.9
পিনহ্য তানি পুষ্পাণি কেশেষু বরবর্ণিনী
আমন্ত্রিতা ততোঽগচ্ছদ্রুচিরঙ্গপতের্গৃহান্
42.10
পুষ্পাণি তানি দৃষ্ট্বাথ তদাঙ্গেন্দ্রবরাঙ্গনা
ভগিনীং চোদয়ামাস পুষ্পার্থে চারুলোচনা
42.11
সা ভর্ত্রে সর্বমাচষ্ট রুচিঃ সুরুচিরাননা
ভগিন্যা ভাষিতং সর্বমৃষিস্তচ্চাভ্যনন্দত
42.12
ততো বিপুলমানায্য দেবশর্মা মহাতপাঃ
পুষ্পার্থে চোদয়ামাস গচ্ছ গচ্ছেতি ভারত
42.13
বিপুলস্তু গুরোর্বাক্যমবিচার্য মহাতপাঃ
স তথেত্যব্রবীদ্রাজংস্তং চ দেশং জগাম হ
42.14
যস্মিন্দেশে তু তান্যাসন্পতিতানি নভস্তলাৎ
অম্লানান্যপি তত্রাসন্কুসুমান্যপরাণ্যপি
42.15
ততঃ স তানি জগ্রাহ দিব্যানি রুচিরাণি চ
প্রাপ্তানি স্বেন তপসা দিব্যগন্ধানি ভারত
42.16
সংপ্রাপ্য তানি প্রীতাত্মা গুরোর্বচনকারকঃ
ততো জগাম তূর্ণং চ চম্পাং চম্পকমালিনীম্
42.17
স বনে বিজনে তাত দদর্শ মিথুনং নৃণাম্
চক্রবত্পরিবর্তন্তং গৃহীত্বা পাণিনা করম্
42.18
তত্রৈকস্তূর্ণমগমত্তত্পদে পরিবর্তয়ন্
একস্তু ন তথা রাজংশ্চক্রতুঃ কলহং ততঃ
42.19
ত্বং শীঘ্রং গচ্ছসীত্যেকোঽব্রবীন্নেতি তথাপরঃ
নেতি নেতি চ তৌ তাত পরস্পরমথোচতুঃ
42.20
তয়োর্বিস্পর্ধতোরেবং শপথোঽয়মভূত্তদা
মনসোদ্দিশ্য বিপুলং ততো বাক্যমথোচতুঃ
42.21
আবয়োরনৃতং প্রাহ যস্তস্যাথ দ্বিজস্য বৈ
বিপুলস্য পরে লোকে যা গতিঃ সা ভবেদিতি
42.22
এতচ্ছ্রুত্বা তু বিপুলো বিষণ্ণবদনোঽভবৎ
এবং তীব্রতপাশ্চাহং কষ্টশ্চায়ং পরিগ্রহঃ
42.23
মিথুনস্যাস্য কিং মে স্যাত্কৃতং পাপং যতো গতিঃ
অনিষ্টা সর্বভূতানাং কীর্তিতানেন মেঽদ্য বৈ
42.24
এবং সংচিন্তয়ন্নেব বিপুলো রাজসত্তম
অবাঙ্মুখো ন্যস্তশিরা দধ্যৌ দুষ্কৃতমাত্মনঃ
42.25
ততঃ ষডন্যান্পুরুষানক্ষৈঃ কাঞ্চনরাজতৈঃ
অপশ্যদ্দীব্যমানান্বৈ লোভহর্ষান্বিতাংস্তথা
42.26
কুর্বতঃ শপথং তং বৈ যঃ কৃতো মিথুনেন বৈ
বিপুলং বৈ সমুদ্দিশ্য তেঽপি বাক্যমথাব্রুবন্
42.27
যো লোভমাস্থায়াস্মাকং বিষমং কর্তুমুত্সহেৎ
বিপুলস্য পরে লোকে যা গতিস্তামবাপ্নুয়াৎ
42.28
এতচ্ছ্রুত্বা তু বিপুলো নাপশ্যদ্ধর্মসংকরম্
জন্মপ্রভৃতি কৌরব্য কৃতপূর্বমথাত্মনঃ
42.29
স প্রদধ্যৌ তদা রাজন্নগ্নাবগ্নিরিবাহিতঃ
দহ্যমানেন মনসা শাপং শ্রুত্বা তথাবিধম্
42.30
তস্য চিন্তয়তস্তাত বহ্ব্যো দিননিশা যয়ুঃ
ইদমাসীন্মনসি চ রুচ্যা রক্ষণকারিতম্
42.31
লক্ষণং লক্ষণেনৈব বদনং বদনেন চ
বিধায় ন ময়া চোক্তং সত্যমেতদ্গুরোস্তদা
42.32
এতদাত্মনি কৌরব্য দুষ্কৃতং বিপুলস্তদা
অমন্যত মহাভাগ তথা তচ্চ ন সংশয়ঃ
42.33
স চম্পাং নগরীমেত্য পুষ্পাণি গুরবে দদৌ
পূজয়ামাস চ গুরুং বিধিবত্স গুরুপ্রিয়ঃ