Utshovঅধ্যায় 41
41.1
ভীষ্ম উবাচ
ততঃ কদাচিদ্দেবেন্দ্রো দিব্যরূপবপুর্ধরঃ
ইদমন্তরমিত্যেবং ততোঽভ্যাগাদথাশ্রমম্
41.2
রূপমপ্রতিমং কৃত্বা লোভনীয়ং জনাধিপ
দর্শনীয়তমো ভূত্বা প্রবিবেশ তমাশ্রমম্
41.3
স দদর্শ তমাসীনং বিপুলস্য কলেবরম্
নিশ্চেষ্টং স্তব্ধনয়নং যথালেখ্যগতং তথা
41.4
রুচিং চ রুচিরাপাঙ্গীং পীনশ্রোণিপয়োধরাম্
পদ্মপত্রবিশালাক্ষীং সংপূর্ণেন্দুনিভাননাম্
41.5
সা তমালোক্য সহসা প্রত্যুত্থাতুমিয়েষ হ
রূপেণ বিস্মিতা কোঽসীত্যথ বক্তুমিহেচ্ছতী
41.6
উত্থাতুকামাপি সতী ব্যতিষ্ঠদ্বিপুলেন সা
নিগৃহীতা মনুষ্যেন্দ্র ন শশাক বিচেষ্টিতুম্
41.7
তামাবভাষে দেবেন্দ্রঃ সাম্না পরমবল্গুনা
ত্বদর্থমাগতং বিদ্ধি দেবেন্দ্রং মাং শুচিস্মিতে
41.8
ক্লিশ্যমানমনঙ্গেন ত্বত্সংকল্পোদ্ভবেন বৈ
তত্পর্যাপ্নুহি মাং সুভ্রু পুরা কালোঽতিবর্ততে
41.9
তমেবংবাদিনং শক্রং শুশ্রাব বিপুলো মুনিঃ
গুরুপত্ন্যাঃ শরীরস্থো দদর্শ চ সুরাধিপম্
41.10
ন শশাক চ সা রাজন্প্রত্যুত্থাতুমনিন্দিতা
বক্তুং চ নাশকদ্রাজন্বিষ্টব্ধা বিপুলেন সা
41.11
আকারং গুরুপত্ন্যাস্তু বিজ্ঞায় স ভৃগূদ্বহঃ
নিজগ্রাহ মহাতেজা যোগেন বলবত্প্রভো
ববন্ধ যোগবন্ধৈশ্চ তস্যাঃ সর্বেন্দ্রিয়াণি সঃ
41.12
তাং নির্বিকারাং দৃষ্ট্বা তু পুনরেব শচীপতিঃ
উবাচ ব্রীডিতো রাজংস্তাং যোগবলমোহিতাম্
41.13
এহ্যেহীতি ততঃ সা তং প্রতিবক্তুমিয়েষ চ
স তাং বাচং গুরোঃ পত্ন্যা বিপুলঃ পর্যবর্তয়ৎ
41.14
ভোঃ কিমাগমনে কৃত্যমিতি তস্যাশ্চ নিঃসৃতা
বক্ত্রাচ্ছশাঙ্কপ্রতিমাদ্বাণী সংস্কারভূষিতা
41.15
ব্রীডিতা সা তু তদ্বাক্যমুক্ত্বা পরবশা তদা
পুরংদরশ্চ সংত্রস্তো বভূব বিমনাস্তদা
41.16
স তদ্বৈকৃতমালক্ষ্য দেবরাজো বিশাং পতে
অবৈক্ষত সহস্রাক্ষস্তদা দিব্যেন চক্ষুষা
41.17
দদর্শ চ মুনিং তস্যাঃ শরীরান্তরগোচরম্
প্রতিবিম্বমিবাদর্শে গুরুপত্ন্যাঃ শরীরগম্
41.18
স তং ঘোরেণ তপসা যুক্তং দৃষ্ট্বা পুরংদরঃ
প্রাবেপত সুসংত্রস্তঃ শাপভীতস্তদা বিভো
41.19
বিমুচ্য গুরুপত্নীং তু বিপুলঃ সুমহাতপাঃ
স্বং কলেবরমাবিশ্য শক্রং ভীতমথাব্রবীৎ
41.20
অজিতেন্দ্রিয় পাপাত্মন্কামাত্মক পুরংদর
ন চিরং পূজয়িষ্যন্তি দেবাস্ত্বাং মানুষাস্তথা
41.21
কিং নু তদ্বিস্মৃতং শক্র ন তন্মনসি তে স্থিতম্
গৌতমেনাসি যন্মুক্তো ভগাঙ্কপরিচিহ্নিতঃ
41.22
জানে ত্বাং বালিশমতিমকৃতাত্মানমস্থিরম্
ময়েয়ং রক্ষ্যতে মূঢ গচ্ছ পাপ যথাগতম্
41.23
নাহং ত্বামদ্য মূঢাত্মন্দহেয়ং হি স্বতেজসা
কৃপায়মাণস্তু ন তে দগ্ধুমিচ্ছামি বাসব
41.24
স চ ঘোরতপা ধীমান্গুরুর্মে পাপচেতসম্
দৃষ্ট্বা ত্বাং নির্দহেদদ্য ক্রোধদীপ্তেন চক্ষুষা
41.25
নৈবং তু শক্র কর্তব্যং পুনর্মান্যাশ্চ তে দ্বিজাঃ
মা গমঃ সসুতামাত্যোঽত্যয়ং ব্রহ্মবলার্দিতঃ
41.26
অমরোঽস্মীতি যদ্বুদ্ধিমেতামাস্থায় বর্তসে
মাবমংস্থা ন তপসামসাধ্যং নাম কিংচন
41.27
তচ্ছ্রুত্বা বচনং শক্রো বিপুলস্য মহাত্মনঃ
অকিংচিদুক্ত্বা ব্রীডিতস্তত্রৈবান্তরধীয়ত
41.28
মুহূর্তয়াতে শক্রে তু দেবশর্মা মহাতপাঃ
কৃত্বা যজ্ঞং যথাকামমাজগাম স্বমাশ্রমম্
41.29
আগতেঽথ গুরৌ রাজন্বিপুলঃ প্রিয়কর্মকৃৎ
রক্ষিতাং গুরবে ভার্যাং ন্যবেদয়দনিন্দিতাম্
41.30
অভিবাদ্য চ শান্তাত্মা স গুরুং গুরুবত্সলঃ
বিপুলঃ পর্যুপাতিষ্ঠদ্যথাপূর্বমশঙ্কিতঃ
41.31
বিশ্রান্তায় ততস্তস্মৈ সহাসীনায় ভার্যয়া
নিবেদয়ামাস তদা বিপুলঃ শক্রকর্ম তৎ
41.32
তচ্ছ্রুত্বা স মুনিস্তুষ্টো বিপুলস্য প্রতাপবান্
বভূব শীলবৃত্তাভ্যাং তপসা নিয়মেন চ
41.33
বিপুলস্য গুরৌ বৃত্তিং ভক্তিমাত্মনি চ প্রভুঃ
ধর্মে চ স্থিরতাং দৃষ্ট্বা সাধু সাধ্বিত্যুবাচ হ
41.34
প্রতিনন্দ্য চ ধর্মাত্মা শিষ্যং ধর্মপরায়ণম্
বরেণ চ্ছন্দয়ামাস স তস্মাদ্গুরুবত্সলঃ
অনুজ্ঞাতশ্চ গুরুণা চচারানুত্তমং তপঃ
41.35
তথৈব দেবশর্মাপি সভার্যঃ স মহাতপাঃ
নির্ভয়ো বলবৃত্রঘ্নাচ্চচার বিজনে বনে