Utshovঅধ্যায় 40
40.1
ভীষ্ম উবাচ
এবমেতন্মহাবাহো নাত্র মিথ্যাস্তি কিংচন
যথা ব্রবীষি কৌরব্য নারীং প্রতি জনাধিপ
40.2
অত্র তে বর্তয়িষ্যামি ইতিহাসং পুরাতনম্
যথা রক্ষা কৃতা পূর্বং বিপুলেন মহাত্মনা
40.3
প্রমদাশ্চ যথা সৃষ্টা ব্রহ্মণা ভরতর্ষভ
যদর্থং তচ্চ তে তাত প্রবক্ষ্যে বসুধাধিপ
40.4
ন হি স্ত্রীভ্য পরং পুত্র পাপীয়ঃ কিংচিদস্তি বৈ
অগ্নির্হি প্রমদা দীপ্তো মায়াশ্চ ময়জা বিভো
ক্ষুরধারা বিষং সর্পো মৃত্যুরিত্যেকতঃ স্ত্রিয়ঃ
40.5
ইমাঃ প্রজা মহাবাহো ধার্মিকা ইতি নঃ শ্রুতম্
স্বয়ং গচ্ছন্তি দেবত্বং ততো দেবানিয়াদ্ভয়ম্
40.6
অথাভ্যগচ্ছন্দেবাস্তে পিতামহমরিংদম
নিবেদ্য মানসং চাপি তূষ্ণীমাসন্নবাঙ্মুখাঃ
40.7
তেষামন্তর্গতং জ্ঞাত্বা দেবানাং স পিতামহঃ
মানবানাং প্রমোহার্থং কৃত্যা নার্যোঽসৃজত্প্রভুঃ
40.8
পূর্বসর্গে তু কৌন্তেয় সাধ্ব্যো নার্য ইহাভবন্
অসাধ্ব্যস্তু সমুত্পন্না কৃত্যা সর্গাত্প্রজাপতেঃ
40.9
তাভ্যঃ কামান্যথাকামং প্রাদাদ্ধি স পিতামহঃ
তাঃ কামলুব্ধাঃ প্রমদাঃ প্রামথ্নন্ত নরাংস্তদা
40.10
ক্রোধং কামস্য দেবেশঃ সহায়ং চাসৃজত্প্রভুঃ
অসজ্জন্ত প্রজাঃ সর্বাঃ কামক্রোধবশং গতাঃ
40.11
ন চ স্ত্রীণাং ক্রিয়া কাচিদিতি ধর্মো ব্যবস্থিতঃ
নিরিন্দ্রিয়া অমন্ত্রাশ্চ স্ত্রিয়োঽনৃতমিতি শ্রুতিঃ
40.12
শয্যাসনমলংকারমন্নপানমনার্যতাম্
দুর্বাগ্ভাবং রতিং চৈব দদৌ স্ত্রীভ্যঃ প্রজাপতিঃ
40.13
ন তাসাং রক্ষণং কর্তুং শক্যং পুংসা কথংচন
অপি বিশ্বকৃতা তাত কুতস্তু পুরুষৈরিহ
40.14
বাচা বা বধবন্ধৈর্বা ক্লেশৈর্বা বিবিধৈস্তথা
ন শক্যা রক্ষিতুং নার্যস্তা হি নিত্যমসংয়তাঃ
40.15
ইদং তু পুরুষব্যাঘ্র পুরস্তাচ্ছ্রুতবানহম্
যথা রক্ষা কৃতা পূর্বং বিপুলেন গুরুস্ত্রিয়ঃ
40.16
ঋষিরাসীন্মহাভাগো দেবশর্মেতি বিশ্রুতঃ
তস্য ভার্যা রুচির্নাম রূপেণাসদৃশী ভুবি
40.17
তস্য রূপেণ সংমত্তা দেবগন্ধর্বদানবাঃ
বিশেষতস্তু রাজেন্দ্র বৃত্রহা পাকশাসনঃ
40.18
নারীণাং চরিতজ্ঞশ্চ দেবশর্মা মহামুনিঃ
যথাশক্তি যথোত্সাহং ভার্যাং তামভ্যরক্ষত
40.19
পুরংদরং চ জানীতে পরস্ত্রীকামচারিণম্
তস্মাদ্যত্নেন ভার্যায়া রক্ষণং স চকার হ
40.20
স কদাচিদৃষিস্তাত যজ্ঞং কর্তুমনাস্তদা
ভার্যাসংরক্ষণং কার্যং কথং স্যাদিত্যচিন্তয়ৎ
40.21
রক্ষাবিধানং মনসা স বিচিন্ত্য মহাতপাঃ
আহূয় দয়িতং শিষ্যং বিপুলং প্রাহ ভার্গবম্
40.22
যজ্ঞকারো গমিষ্যামি রুচিং চেমাং সুরেশ্বরঃ
পুত্র প্রার্থয়তে নিত্যং তাং রক্ষস্ব যথাবলম্
40.23
অপ্রমত্তেন তে ভাব্যং সদা প্রতি পুরংদরম্
স হি রূপাণি কুরুতে বিবিধানি ভৃগূদ্বহ
40.24
ইত্যুক্তো বিপুলস্তেন তপস্বী নিয়তেন্দ্রিয়ঃ
সদৈবোগ্রতপা রাজন্নগ্ন্যর্কসদৃশদ্যুতিঃ
40.25
ধর্মজ্ঞঃ সত্যবাদী চ তথেতি প্রত্যভাষত
পুনশ্চেদং মহারাজ পপ্রচ্ছ প্রস্থিতং গুরুম্
40.26
কানি রূপাণি শক্রস্য ভবন্ত্যাগচ্ছতো মুনে
বপুস্তেজশ্চ কীদৃগ্বৈ তন্মে ব্যাখ্যাতুমর্হসি
40.27
ততঃ স ভগবাংস্তস্মৈ বিপুলায় মহাত্মনে
আচচক্ষে যথাতত্ত্বং মায়াং শক্রস্য ভারত
40.28
বহুমায়ঃ স বিপ্রর্ষে বলহা পাকশাসনঃ
তাংস্তান্বিকুরুতে ভাবান্বহূনথ মুহুর্মুহুঃ
40.29
কিরীটী বজ্রভৃদ্ধন্বী মুকুটী বদ্ধকুণ্ডলঃ
ভবত্যথ মুহূর্তেন চণ্ডালসমদর্শনঃ
40.30
শিখী জটী চীরবাসাঃ পুনর্ভবতি পুত্রক
বৃহচ্ছরীরশ্চ পুনঃ পীবরোঽথ পুনঃ কৃশঃ
40.31
গৌরং শ্যামং চ কৃষ্ণং চ বর্ণং বিকুরুতে পুনঃ
বিরূপো রূপবাংশ্চৈব যুবা বৃদ্ধস্তথৈব চ
40.32
প্রাজ্ঞো জডশ্চ মূকশ্চ হ্রস্বো দীর্ঘস্তথৈব চ
ব্রাহ্মণঃ ক্ষত্রিয়শ্চৈব বৈশ্যঃ শূদ্রস্তথৈব চ
প্রতিলোমানুলোমশ্চ ভবত্যথ শতক্রতুঃ
40.33
শুকবায়সরূপী চ হংসকোকিলরূপবান্
সিংহব্যাঘ্রগজানাং চ রূপং ধারয়তে পুনঃ
40.34
দৈবং দৈত্যমথো রাজ্ঞাং বপুর্ধারয়তেঽপি চ
সুকৃশো বায়ুভগ্নাঙ্গঃ শকুনির্বিকৃতস্তথা
40.35
চতুষ্পাদ্বহুরূপশ্চ পুনর্ভবতি বালিশঃ
মক্ষিকামশকাদীনাং বপুর্ধারয়তেঽপি চ
40.36
ন শক্যমস্য গ্রহণং কর্তুং বিপুল কেনচিৎ
অপি বিশ্বকৃতা তাত যেন সৃষ্টমিদং জগৎ
40.37
পুনরন্তর্হিতঃ শক্রো দৃশ্যতে জ্ঞানচক্ষুষা
বায়ুভূতশ্চ স পুনর্দেবরাজো ভবত্যুত
40.38
এবং রূপাণি সততং কুরুতে পাকশাসনঃ
তস্মাদ্বিপুল যত্নেন রক্ষেমাং তনুমধ্যমাম্
40.39
যথা রুচিং নাবলিহেদ্দেবেন্দ্রো ভৃগুসত্তম
ক্রতাবুপহিতং ন্যস্তং হবিঃ শ্বেব দুরাত্মবান্
40.40
এবমাখ্যায় স মুনির্যজ্ঞকারোঽগমত্তদা
দেবশর্মা মহাভাগস্ততো ভরতসত্তম
40.41
বিপুলস্তু বচঃ শ্রুত্বা গুরোশ্চিন্তাপরোঽভবৎ
রক্ষাং চ পরমাং চক্রে দেবরাজান্মহাবলাৎ
40.42
কিং নু শক্যং ময়া কর্তুং গুরুদারাভিরক্ষণে
মায়াবী হি সুরেন্দ্রোঽসৌ দুর্ধর্ষশ্চাপি বীর্যবান্
40.43
নাপিধায়াশ্রমং শক্যো রক্ষিতুং পাকশাসনঃ
উটজং বা তথা হ্যস্য নানাবিধসরূপতা
40.44
বায়ুরূপেণ বা শক্রো গুরুপত্নীং প্রধর্ষয়েৎ
তস্মাদিমাং সংপ্রবিশ্য রুচিং স্থাস্যেঽহমদ্য বৈ
40.45
অথ বা পৌরুষেণেয়মশক্যা রক্ষিতুং ময়া
বহুরূপো হি ভগবাঞ্ছ্রূয়তে হরিবাহনঃ
40.46
সোঽহং যোগবলাদেনাং রক্ষিষ্যে পাকশাসনাৎ
গাত্রাণি গাত্রৈরস্যাহং সংপ্রবেক্ষ্যেঽভিরক্ষিতুম্
40.47
যদ্যুচ্ছিষ্টামিমাং পত্নীং রুচিং পশ্যেত মে গুরুঃ
শপ্স্যত্যসংশয়ং কোপাদ্দিব্যজ্ঞানো মহাতপাঃ
40.48
ন চেয়ং রক্ষিতুং শক্যা যথান্যা প্রমদা নৃভিঃ
মায়াবী হি সুরেন্দ্রোঽসাবহো প্রাপ্তোঽস্মি সংশয়ম্
40.49
অবশ্যকরণীয়ং হি গুরোরিহ হি শাসনম্
যদি ত্বেতদহং কুর্যামাশ্চর্যং স্যাত্কৃতং ময়া
40.50
যোগেনানুপ্রবিশ্যেহ গুরুপত্ন্যাঃ কলেবরম্
নির্মুক্তস্য রজোরূপান্নাপরাধো ভবেন্মম
40.51
যথা হি শূন্যাং পথিকঃ সভামধ্যাবসেত্পথি
তথাদ্যাবাসয়িষ্যামি গুরুপত্ন্যাঃ কলেবরম্
40.52
অসক্তঃ পদ্মপত্রস্থো জলবিন্দুর্যথা চলঃ
এবমেব শরীরেঽস্যা নিবত্স্যামি সমাহিতঃ
40.53
ইত্যেবং ধর্মমালোক্য বেদবেদাংশ্চ সর্বশঃ
তপশ্চ বিপুলং দৃষ্ট্বা গুরোরাত্মন এব চ
40.54
ইতি নিশ্চিত্য মনসা রক্ষাং প্রতি স ভার্গবঃ
আতিষ্ঠত্পরমং যত্নং যথা তচ্ছৃণু পার্থিব
40.55
গুরুপত্নীমুপাসীনো বিপুলঃ স মহাতপাঃ
উপাসীনামনিন্দ্যাঙ্গীং কথাভিঃ সমলোভয়ৎ
40.56
নেত্রাভ্যাং নেত্রয়োরস্যা রশ্মীন্সংয়োজ্য রশ্মিভিঃ
বিবেশ বিপুলঃ কায়মাকাশং পবনো যথা
40.57
লক্ষণং লক্ষণেনৈব বদনং বদনেন চ
অবিচেষ্টন্নতিষ্ঠদ্বৈ ছায়েবান্তর্গতো মুনিঃ
40.58
ততো বিষ্টভ্য বিপুলো গুরুপত্ন্যাঃ কলেবরম্
উবাস রক্ষণে যুক্তো ন চ সা তমবুধ্যত
40.59
যং কালং নাগতো রাজন্গুরুস্তস্য মহাত্মনঃ
ক্রতুং সমাপ্য স্বগৃহং তং কালং সোঽভ্যরক্ষত