অধ্যায় 39

39.1

যুধিষ্ঠির উবাচ
ইমে বৈ মানবা লোকে স্ত্রীষু সজ্জন্ত্যভীক্ষ্ণশঃ
মোহেন পরমাবিষ্টা দৈবাদিষ্টেন পার্থিব
স্ত্রিয়শ্চ পুরুষেষ্বেব প্রত্যক্ষং লোকসাক্ষিকম্

অত্র মে সংশয়স্তীব্রো হৃদি সংপরিবর্ততে
কথমাসাং নরাঃ সঙ্গং কুর্বতে কুরুনন্দন
স্ত্রিয়ো বা তেষু রজ্যন্তে বিরজ্যন্তেঽথ বা পুনঃ

ইতি তাঃ পুরুষব্যাঘ্র কথং শক্যাঃ স্ম রক্ষিতুম্
প্রমদাঃ পুরুষেণেহ তন্মে ব্যাখ্যাতুমর্হসি

এতা হি ময়মায়াভির্বঞ্চয়ন্তীহ মানবান্
ন চাসাং মুচ্যতে কশ্চিত্পুরুষো হস্তমাগতঃ
গাবো নবতৃণানীব গৃহ্ণন্ত্যেব নবান্নবান্

শম্বরস্য চ যা মায়া যা মায়া নমুচেরপি
বলেঃ কুম্ভীনসেশ্চৈব সর্বাস্তা যোষিতো বিদুঃ

হসন্তং প্রহসন্ত্যেতা রুদন্তং প্ররুদন্তি চ
অপ্রিয়ং প্রিয়বাক্যৈশ্চ গৃহ্ণতে কালয়োগতঃ

উশনা বেদ যচ্ছাস্ত্রং যচ্চ বেদ বৃহস্পতিঃ
স্ত্রীবুদ্ধ্যা ন বিশিষ্যেতে তাঃ স্ম রক্ষ্যাঃ কথং নরৈঃ

অনৃতং সত্যমিত্যাহুঃ সত্যং চাপি তথানৃতম্
ইতি যাস্তাঃ কথং বীর সংরক্ষ্যাঃ পুরুষৈরিহ

স্ত্রীণাং বুদ্ধ্যুপনিষ্কর্ষাদর্থশাস্ত্রাণি শত্রুহন্
বৃহস্পতিপ্রভৃতিভির্মন্যে সদ্ভিঃ কৃতানি বৈ

সংপূজ্যমানাঃ পুরুষৈর্বিকুর্বন্তি মনো নৃষু
অপাস্তাশ্চ তথা রাজন্বিকুর্বন্তি মনঃ স্ত্রিয়ঃ

কস্তাঃ শক্তো রক্ষিতুং স্যাদিতি মে সংশয়ো মহান্
তন্মে ব্রূহি মহাবাহো কুরূণাং বংশবর্ধন

যদি শক্যা কুরুশ্রেষ্ঠ রক্ষা তাসাং কথংচন
কর্তুং বা কৃতপূর্বা বা তন্মে ব্যাখ্যাতুমর্হসি