Utshovঅধ্যায় 38
38.1
যুধিষ্ঠির উবাচ
স্ত্রীণাং স্বভাবমিচ্ছামি শ্রোতুং ভরতসত্তম
স্ত্রিয়ো হি মূলং দোষাণাং লঘুচিত্তাঃ পিতামহ
38.2
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
নারদস্য চ সংবাদং পুংশ্চল্যা পঞ্চচূডয়া
38.3
লোকাননুচরন্ধীমান্দেবর্ষির্নারদঃ পুরা
দদর্শাপ্সরসং ব্রাহ্মীং পঞ্চচূডামনিন্দিতাম্
38.4
তাং দৃষ্ট্বা চারুসর্বাঙ্গীং পপ্রচ্ছাপ্সরসং মুনিঃ
সংশয়ো হৃদি মে কশ্চিত্তন্মে ব্রূহি সুমধ্যমে
38.5
এবমুক্তা তু সা বিপ্রং প্রত্যুবাচাথ নারদম্
বিষয়ে সতি বক্ষ্যামি সমর্থাং মন্যসে চ মাম্
38.6
নারদ উবাচ
ন ত্বামবিষয়ে ভদ্রে নিয়োক্ষ্যামি কথংচন
স্ত্রীণাং স্বভাবমিচ্ছামি ত্বত্তঃ শ্রোতুং বরাননে
38.7
ভীষ্ম উবাচ
এতচ্ছ্রুত্বা বচস্তস্য দেবর্ষেরপ্সরোত্তমা
প্রত্যুবাচ ন শক্ষ্যামি স্ত্রী সতী নিন্দিতুং স্ত্রিয়ঃ
38.8
বিদিতাস্তে স্ত্রিয়ো যাশ্চ যাদৃশাশ্চ স্বভাবতঃ
ন মামর্হসি দেবর্ষে নিয়োক্তুং প্রশ্ন ঈদৃশে
38.9
তামুবাচ স দেবর্ষিঃ সত্যং বদ সুমধ্যমে
মৃষাবাদে ভবেদ্দোষঃ সত্যে দোষো ন বিদ্যতে
38.10
ইত্যুক্তা সা কৃতমতিরভবচ্চারুহাসিনী
স্ত্রীদোষাঞ্শাশ্বতান্সত্যান্ভাষিতুং সংপ্রচক্রমে
38.11
পঞ্চচূডোবাচ
কুলীনা রূপবত্যশ্চ নাথবত্যশ্চ যোষিতঃ
মর্যাদাসু ন তিষ্ঠন্তি স দোষঃ স্ত্রীষু নারদ
38.12
ন স্ত্রীভ্যঃ কিংচিদন্যদ্বৈ পাপীয়স্তরমস্তি বৈ
স্ত্রিয়ো হি মূলং দোষাণাং তথা ত্বমপি বেত্থ হ
38.13
সমাজ্ঞাতানৃদ্ধিমতঃ প্রতিরূপান্বশে স্থিতান্
পতীনন্তরমাসাদ্য নালং নার্যঃ প্রতীক্ষিতুম্
38.14
অসদ্ধর্মস্ত্বয়ং স্ত্রীণামস্মাকং ভবতি প্রভো
পাপীয়সো নরান্যদ্বৈ লজ্জাং ত্যক্ত্বা ভজামহে
38.15
স্ত্রিয়ং হি যঃ প্রার্থয়তে সংনিকর্ষং চ গচ্ছতি
ঈষচ্চ কুরুতে সেবাং তমেবেচ্ছন্তি যোষিতঃ
38.16
অনর্থিত্বান্মনুষ্যাণাং ভয়াত্পরিজনস্য চ
মর্যাদায়ামমর্যাদাঃ স্ত্রিয়স্তিষ্ঠন্তি ভর্তৃষু
38.17
নাসাং কশ্চিদগম্যোঽস্তি নাসাং বয়সি সংস্থিতিঃ
বিরূপং রূপবন্তং বা পুমানিত্যেব ভুঞ্জতে
38.18
ন ভয়ান্নাপ্যনুক্রোশান্নার্থহেতোঃ কথংচন
ন জ্ঞাতিকুলসংবন্ধাত্স্ত্রিয়স্তিষ্ঠন্তি ভর্তৃষু
38.19
যৌবনে বর্তমানানাং মৃষ্টাভরণবাসসাম্
নারীণাং স্বৈরবৃত্তানাং স্পৃহয়ন্তি কুলস্ত্রিয়ঃ
38.20
যাশ্চ শশ্বদ্বহুমতা রক্ষ্যন্তে দয়িতাঃ স্ত্রিয়ঃ
অপি তাঃ সংপ্রসজ্জন্তে কুব্জান্ধজডবামনৈঃ
38.21
পঙ্গুষ্বপি চ দেবর্ষে যে চান্যে কুত্সিতা নরাঃ
স্ত্রীণামগম্যো লোকেঽস্মিন্নাস্তি কশ্চিন্মহামুনে
38.22
যদি পুংসাং গতির্ব্রহ্ম কথংচিন্নোপপদ্যতে
অপ্যন্যোন্যং প্রবর্তন্তে ন হি তিষ্ঠন্তি ভর্তৃষু
38.23
অলাভাত্পুরুষাণাং হি ভয়াত্পরিজনস্য চ
বধবন্ধভয়াচ্চাপি স্বয়ং গুপ্তা ভবন্তি তাঃ
38.24
চলস্বভাবা দুঃসেব্যা দুর্গ্রাহ্যা ভাবতস্তথা
প্রাজ্ঞস্য পুরুষস্যেহ যথা বাচস্তথা স্ত্রিয়ঃ
38.25
নাগ্নিস্তৃপ্যতি কাষ্ঠানাং নাপগানাং মহোদধিঃ
নান্তকঃ সর্বভূতানাং ন পুংসাং বামলোচনাঃ
38.26
ইদমন্যচ্চ দেবর্ষে রহস্যং সর্বয়োষিতাম্
দৃষ্ট্বৈব পুরুষং হৃদ্যং যোনিঃ প্রক্লিদ্যতে স্ত্রিয়ঃ
38.27
কামানামপি দাতারং কর্তারং মানসান্ত্বয়োঃ
রক্ষিতারং ন মৃষ্যন্তি ভর্তারং পরমং স্ত্রিয়ঃ
38.28
ন কামভোগান্বহুলান্নালংকারার্থসংচয়ান্
তথৈব বহু মন্যন্তে যথা রত্যামনুগ্রহম্
38.29
অন্তকঃ শমনো মৃত্যুঃ পাতালং বডবামুখম্
ক্ষুরধারা বিষং সর্পো বহ্নিরিত্যেকতঃ স্ত্রিয়ঃ
38.30
যতশ্চ ভূতানি মহান্তি পঞ্চ; যতশ্চ লোকা বিহিতা বিধাত্রা
যতঃ পুমাংসঃ প্রমদাশ্চ নির্মিতা;স্তদৈব দোষাঃ প্রমদাসু নারদ