UtshovChapter 38
38.1
युधिष्ठिर उवाच
स्त्रीणां स्वभावमिच्छामि श्रोतुं भरतसत्तम
स्त्रियो हि मूलं दोषाणां लघुचित्ताः पितामह
Yudhishthira uvacha
Strinam svabhavamichchhami shrotum bharatasattama
Striyo hi mulam doshanam laghuchittah pitamaha
38.2
भीष्म उवाच
अत्राप्युदाहरन्तीममितिहासं पुरातनम्
नारदस्य च संवादं पुंश्चल्या पञ्चचूडया
Bhishma uvacha
Atrapyudaharantimamitihasam puratanam
Naradasya cha sanvadam punshchalya panchachudaya
38.3
लोकाननुचरन्धीमान्देवर्षिर्नारदः पुरा
ददर्शाप्सरसं ब्राह्मीं पञ्चचूडामनिन्दिताम्
Lokananucharandhimandevarshirnaradah pura
Dadarshapsarasam brahmim panchachudamaninditam
38.4
तां दृष्ट्वा चारुसर्वाङ्गीं पप्रच्छाप्सरसं मुनिः
संशयो हृदि मे कश्चित्तन्मे ब्रूहि सुमध्यमे
Tam drishtva charusarvangim paprachchhapsarasam munih
Sanshayo hridi me kashchittanme bruhi sumadhyame
38.5
एवमुक्ता तु सा विप्रं प्रत्युवाचाथ नारदम्
विषये सति वक्ष्यामि समर्थां मन्यसे च माम्
Evamukta tu sa vipram pratyuvachatha naradam
Vishaye sati vakshyami samartham manyase cha mam
38.6
नारद उवाच
न त्वामविषये भद्रे नियोक्ष्यामि कथंचन
स्त्रीणां स्वभावमिच्छामि त्वत्तः श्रोतुं वरानने
Narada uvacha
Na tvamavishaye bhadre niyokshyami kathanchana
Strinam svabhavamichchhami tvattah shrotum varanane
38.7
भीष्म उवाच
एतच्छ्रुत्वा वचस्तस्य देवर्षेरप्सरोत्तमा
प्रत्युवाच न शक्ष्यामि स्त्री सती निन्दितुं स्त्रियः
Bhishma uvacha
Etachchhrutva vachastasya devarsherapsarottama
Pratyuvacha na shakshyami stri sati ninditum striyah
38.8
विदितास्ते स्त्रियो याश्च यादृशाश्च स्वभावतः
न मामर्हसि देवर्षे नियोक्तुं प्रश्न ईदृशे
Viditaste striyo yashcha yadrishashcha svabhavatah
Na mamarhasi devarshe niyoktum prashna idrishe
38.9
तामुवाच स देवर्षिः सत्यं वद सुमध्यमे
मृषावादे भवेद्दोषः सत्ये दोषो न विद्यते
Tamuvacha sa devarshih satyam vada sumadhyame
Mrishavade bhaveddoshah satye dosho na vidyate
38.10
इत्युक्ता सा कृतमतिरभवच्चारुहासिनी
स्त्रीदोषाञ्शाश्वतान्सत्यान्भाषितुं संप्रचक्रमे
Ityukta sa kritamatirabhavachcharuhasini
Stridoshanshashvatansatyanbhashitum samprachakrame
38.11
पञ्चचूडोवाच
कुलीना रूपवत्यश्च नाथवत्यश्च योषितः
मर्यादासु न तिष्ठन्ति स दोषः स्त्रीषु नारद
Panchachudovacha
Kulina rupavatyashcha nathavatyashcha yoshitah
Maryadasu na tishthanti sa doshah strishu narada
38.12
न स्त्रीभ्यः किंचिदन्यद्वै पापीयस्तरमस्ति वै
स्त्रियो हि मूलं दोषाणां तथा त्वमपि वेत्थ ह
Na stribhyah kinchidanyadvai papiyastaramasti vai
Striyo hi mulam doshanam tatha tvamapi vettha ha
38.13
समाज्ञातानृद्धिमतः प्रतिरूपान्वशे स्थितान्
पतीनन्तरमासाद्य नालं नार्यः प्रतीक्षितुम्
Samagyatanriddhimatah pratirupanvashe sthitan
Patinantaramasadya nalam naryah pratikshitum
38.14
असद्धर्मस्त्वयं स्त्रीणामस्माकं भवति प्रभो
पापीयसो नरान्यद्वै लज्जां त्यक्त्वा भजामहे
Asaddharmastvayam strinamasmakam bhavati prabho
Papiyaso naranyadvai lajjam tyaktva bhajamahe
38.15
स्त्रियं हि यः प्रार्थयते संनिकर्षं च गच्छति
ईषच्च कुरुते सेवां तमेवेच्छन्ति योषितः
Striyam hi yah prarthayate sannikarsham cha gachchhati
Ishachcha kurute sevam tamevechchhanti yoshitah
38.16
अनर्थित्वान्मनुष्याणां भयात्परिजनस्य च
मर्यादायाममर्यादाः स्त्रियस्तिष्ठन्ति भर्तृषु
Anarthitvanmanushyanam bhayatparijanasya cha
Maryadayamamaryadah striyastishthanti bhartrishu
38.17
नासां कश्चिदगम्योऽस्ति नासां वयसि संस्थितिः
विरूपं रूपवन्तं वा पुमानित्येव भुञ्जते
Nasam kashchidagamyosti nasam vayasi sansthitih
Virupam rupavantam va pumanityeva bhunjate
38.18
न भयान्नाप्यनुक्रोशान्नार्थहेतोः कथंचन
न ज्ञातिकुलसंबन्धात्स्त्रियस्तिष्ठन्ति भर्तृषु
Na bhayannapyanukroshannarthahetoh kathanchana
Na gyatikulasambandhatstriyastishthanti bhartrishu
38.19
यौवने वर्तमानानां मृष्टाभरणवाससाम्
नारीणां स्वैरवृत्तानां स्पृहयन्ति कुलस्त्रियः
Yauvane vartamananam mrishtabharanavasasam
Narinam svairavrittanam sprihayanti kulastriyah
38.20
याश्च शश्वद्बहुमता रक्ष्यन्ते दयिताः स्त्रियः
अपि ताः संप्रसज्जन्ते कुब्जान्धजडवामनैः
Yashcha shashvadbahumata rakshyante dayitah striyah
Api tah samprasajjante kubjandhajadavamanaih
38.21
पङ्गुष्वपि च देवर्षे ये चान्ये कुत्सिता नराः
स्त्रीणामगम्यो लोकेऽस्मिन्नास्ति कश्चिन्महामुने
Pangushvapi cha devarshe ye chanye kutsita narah
Strinamagamyo lokesminnasti kashchinmahamune
38.22
यदि पुंसां गतिर्ब्रह्म कथंचिन्नोपपद्यते
अप्यन्योन्यं प्रवर्तन्ते न हि तिष्ठन्ति भर्तृषु
Yadi punsam gatirbrahma kathanchinnopapadyate
Apyanyonyam pravartante na hi tishthanti bhartrishu
38.23
अलाभात्पुरुषाणां हि भयात्परिजनस्य च
वधबन्धभयाच्चापि स्वयं गुप्ता भवन्ति ताः
Alabhatpurushanam hi bhayatparijanasya cha
Vadhabandhabhayachchapi svayam gupta bhavanti tah
38.24
चलस्वभावा दुःसेव्या दुर्ग्राह्या भावतस्तथा
प्राज्ञस्य पुरुषस्येह यथा वाचस्तथा स्त्रियः
Chalasvabhava duhsevya durgrahya bhavatastatha
Pragyasya purushasyeha yatha vachastatha striyah
38.25
नाग्निस्तृप्यति काष्ठानां नापगानां महोदधिः
नान्तकः सर्वभूतानां न पुंसां वामलोचनाः
Nagnistripyati kashthanam napaganam mahodadhih
Nantakah sarvabhutanam na punsam vamalochanah
38.26
इदमन्यच्च देवर्षे रहस्यं सर्वयोषिताम्
दृष्ट्वैव पुरुषं हृद्यं योनिः प्रक्लिद्यते स्त्रियः
Idamanyachcha devarshe rahasyam sarvayoshitam
Drishtvaiva purusham hridyam yonih praklidyate striyah
38.27
कामानामपि दातारं कर्तारं मानसान्त्वयोः
रक्षितारं न मृष्यन्ति भर्तारं परमं स्त्रियः
Kamanamapi dataram kartaram manasantvayoh
Rakshitaram na mrishyanti bhartaram paramam striyah
38.28
न कामभोगान्बहुलान्नालंकारार्थसंचयान्
तथैव बहु मन्यन्ते यथा रत्यामनुग्रहम्
Na kamabhoganbahulannalankararthasanchayan
Tathaiva bahu manyante yatha ratyamanugraham
38.29
अन्तकः शमनो मृत्युः पातालं वडवामुखम्
क्षुरधारा विषं सर्पो वह्निरित्येकतः स्त्रियः
Antakah shamano mrityuh patalam vadavamukham
Kshuradhara visham sarpo vahnirityekatah striyah
38.30
यतश्च भूतानि महान्ति पञ्च; यतश्च लोका विहिता विधात्रा
यतः पुमांसः प्रमदाश्च निर्मिता;स्तदैव दोषाः प्रमदासु नारद
Yatashcha bhutani mahanti pancha; yatashcha loka vihita vidhatra
Yatah pumansah pramadashcha nirmita;stadaiva doshah pramadasu narada