অধ্যায় 37

37.1

যুধিষ্ঠির উবাচ
অপূর্বং বা ভবেত্পাত্রমথ বাপি চিরোষিতম্
দূরাদভ্যাগতং বাপি কিং পাত্রং স্যাত্পিতামহ

ভীষ্ম উবাচ
ক্রিয়া ভবতি কেষাংচিদুপাংশুব্রতমুত্তমম্
যো যো যাচেত যত্কিংচিত্সর্বং দদ্যাম ইত্যুত

অপীডয়ন্ভৃত্যবর্গমিত্যেবমনুশুশ্রুম
পীডয়ন্ভৃত্যবর্গং হি আত্মানমপকর্ষতি

অপূর্বং বাপি যত্পাত্রং যচ্চাপি স্যাচ্চিরোষিতম্
দূরাদভ্যাগতং চাপি তত্পাত্রং চ বিদুর্বুধাঃ

যুধিষ্ঠির উবাচ
অপীডয়া চ ভৃত্যানাং ধর্মস্যাহিংসয়া তথা
পাত্রং বিদ্যাম তত্ত্বেন যস্মৈ দত্তং ন সংতপেৎ

ভীষ্ম উবাচ
ঋত্বিক্পুরোহিতাচার্যাঃ শিষ্যাঃ সংবন্ধিবান্ধবাঃ
সর্বে পূজ্যাশ্চ মান্যাশ্চ শ্রুতবৃত্তোপসংহিতাঃ

অতোঽন্যথা বর্তমানাঃ সর্বে নার্হন্তি সত্ক্রিয়াম্
তস্মান্নিত্যং পরীক্ষেত পুরুষান্প্রণিধায় বৈ

অক্রোধঃ সত্যবচনমহিংসা দম আর্জবম্
অদ্রোহো নাতিমানশ্চ হ্রীস্তিতিক্ষা তপঃ শমঃ

যস্মিন্নেতানি দৃশ্যন্তে ন চাকার্যাণি ভারত
ভাবতো বিনিবিষ্টানি তত্পাত্রং মানমর্হতি

তথা চিরোষিতং চাপি সংপ্রত্যাগতমেব চ
অপূর্বং চৈব পূর্বং চ তত্পাত্রং মানমর্হতি

অপ্রামাণ্যং চ বেদানাং শাস্ত্রাণাং চাতিলঙ্ঘনম্
সর্বত্র চানবস্থানমেতন্নাশনমাত্মনঃ

ভবেত্পণ্ডিতমানী যো ব্রাহ্মণো বেদনিন্দকঃ
আন্বীক্ষিকীং তর্কবিদ্যামনুরক্তো নিরর্থিকাম্

হেতুবাদান্ব্রুবন্সত্সু বিজেতাহেতুবাদিকঃ
আক্রোষ্টা চাতিবক্তা চ ব্রাহ্মণানাং সদৈব হি

সর্বাভিশঙ্কী মূঢশ্চ বালঃ কটুকবাগপি
বোদ্ধব্যস্তাদৃশস্তাত নরশ্বানং হি তং বিদুঃ

যথা শ্বা ভষিতুং চৈব হন্তুং চৈবাবসৃজ্যতে
এবং সংভাষণার্থায় সর্বশাস্ত্রবধায় চ
অল্পশ্রুতাঃ কুতর্কাশ্চ দৃষ্টাঃ স্পৃষ্টাঃ কুপণ্ডিতাঃ

শ্রুতিস্মৃতীতিহাসাদিপুরাণারণ্যবেদিনঃ
অনুরুন্ধ্যাদ্বহুজ্ঞাংশ্চ সারজ্ঞাংশ্চৈব পণ্ডিতান্

লোকয়াত্রা চ দ্রষ্টব্যা ধর্মশ্চাত্মহিতানি চ
এবং নরো বর্তমানঃ শাশ্বতীরেধতে সমাঃ

ঋণমুন্মুচ্য দেবানামৃষীণাং চ তথৈব চ
পিতৄণামথ বিপ্রাণামতিথীনাং চ পঞ্চমম্

পর্যায়েণ বিশুদ্ধেন সুনির্ণিক্তেন কর্মণা
এবং গৃহস্থঃ কর্মাণি কুর্বন্ধর্মান্ন হীয়তে