অধ্যায় 36

36.1

ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
শক্রশম্বরসংবাদং তন্নিবোধ যুধিষ্ঠির

শক্রো হ্যজ্ঞাতরূপেণ জটী ভূত্বা রজোরুণঃ
বিরূপং রূপমাস্থায় প্রশ্নং পপ্রচ্ছ শম্বরম্

কেন শম্বর বৃত্তেন স্বজাত্যানধিতিষ্ঠসি
শ্রেষ্ঠং ত্বাং কেন মন্যন্তে তন্মে প্রব্রূহি পৃচ্ছতঃ

শম্বর উবাচ
নাসূয়ামি সদা বিপ্রান্ব্রহ্মাণং চ পিতামহম্
শাস্ত্রাণি বদতো বিপ্রান্সংমন্যামি যথাসুখম্

শ্রুত্বা চ নাবজানামি নাপরাধ্যামি কর্হিচিৎ
অভ্যর্চ্যাননুপৃচ্ছামি পাদৌ গৃহ্ণামি ধীমতাম্

তে বিশ্রব্ধাঃ প্রভাষন্তে সংয়চ্ছন্তি চ মাং সদা
প্রমত্তেষ্বপ্রমত্তোঽস্মি সদা সুপ্তেষু জাগৃমি

তে মা শাস্ত্রপথে যুক্তং ব্রহ্মণ্যমনসূয়কম্
সমাসিঞ্চন্তি শাস্তারঃ ক্ষৌদ্রং মধ্বিব মক্ষিকাঃ

যচ্চ ভাষন্তি তে তুষ্টাস্তত্তদ্গৃহ্ণামি মেধয়া
সমাধিমাত্মনো নিত্যমনুলোমমচিন্তয়ন্

সোঽহং বাগগ্রসৃষ্টানাং রসানামবলেহকঃ
স্বজাত্যানধিতিষ্ঠামি নক্ষত্রাণীব চন্দ্রমাঃ

এতত্পৃথিব্যামমৃতমেতচ্চক্ষুরনুত্তমম্
যদ্ব্রাহ্মণমুখাচ্ছাস্ত্রমিহ শ্রুত্বা প্রবর্ততে

এতত্কারণমাজ্ঞায় দৃষ্ট্বা দেবাসুরং পুরা
যুদ্ধং পিতা মে হৃষ্টাত্মা বিস্মিতঃ প্রত্যপদ্যত

দৃষ্ট্বা চ ব্রাহ্মণানাং তু মহিমানং মহাত্মনাম্
পর্যপৃচ্ছত্কথমিমে সিদ্ধা ইতি নিশাকরম্

সোম উবাচ
ব্রাহ্মণাস্তপসা সর্বে সিধ্যন্তে বাগ্বলাঃ সদা
ভুজবীর্যা হি রাজানো বাগস্ত্রাশ্চ দ্বিজাতয়ঃ

প্রবসন্বাপ্যধীয়ীত বহ্বীর্দুর্বসতীর্বসন্
নির্মন্যুরপি নির্মানো যতিঃ স্যাত্সমদর্শনঃ

অপি চেজ্জাতিসংপন্নঃ সর্বান্বেদান্পিতুর্গৃহে
শ্লাঘমান ইবাধীয়েদ্গ্রাম্য ইত্যেব তং বিদুঃ

ভূমিরেতৌ নিগিরতি সর্পো বিলশয়ানিব
রাজানং চাপ্যয়োদ্ধারং ব্রাহ্মণং চাপ্রবাসিনম্

অতিমানঃ শ্রিয়ং হন্তি পুরুষস্যাল্পমেধসঃ
গর্ভেণ দুষ্যতে কন্যা গৃহবাসেন চ দ্বিজঃ

ইত্যেতন্মে পিতা শ্রুত্বা সোমাদদ্ভুতদর্শনাৎ
ব্রাহ্মণান্পূজয়ামাস তথৈবাহং মহাব্রতান্

ভীষ্ম উবাচ
শ্রুত্বৈতদ্বচনং শক্রো দানবেন্দ্রমুখাচ্চ্যুতম্
দ্বিজান্সংপূজয়ামাস মহেন্দ্রত্বমবাপ চ