অধ্যায় 35

35.1

ভীষ্ম উবাচ
জন্মনৈব মহাভাগো ব্রাহ্মণো নাম জায়তে
নমস্যঃ সর্বভূতানামতিথিঃ প্রসৃতাগ্রভুক্

সর্বান্নঃ সুহৃদস্তাত ব্রাহ্মণাঃ সুমনোমুখাঃ
গীর্ভির্মঙ্গলয়ুক্তাভিরনুধ্যায়ন্তি পূজিতাঃ

সর্বান্নো দ্বিষতস্তাত ব্রাহ্মণা জাতমন্যবঃ
গীর্ভির্দারুণয়ুক্তাভিরভিহন্যুরপূজিতাঃ

অত্র গাথা ব্রহ্মগীতাঃ কীর্তয়ন্তি পুরাবিদঃ
সৃষ্ট্বা দ্বিজাতীন্ধাতা হি যথাপূর্বং সমাদধৎ

ন বোঽন্যদিহ কর্তব্যং কিংচিদূর্ধ্বং যথাবিধি
গুপ্তা গোপায়ত ব্রহ্ম শ্রেয়ো বস্তেন শোভনম্

স্বমেব কুর্বতাং কর্ম শ্রীর্বো ব্রাহ্মী ভবিষ্যতি
প্রমাণং সর্বভূতানাং প্রগ্রহং চ গমিষ্যথ

ন শৌদ্রং কর্ম কর্তব্যং ব্রাহ্মণেন বিপশ্চিতা
শৌদ্রং হি কুর্বতঃ কর্ম ধর্মঃ সমুপরুধ্যতে

শ্রীশ্চ বুদ্ধিশ্চ তেজশ্চ বিভূতিশ্চ প্রতাপিনী
স্বাধ্যায়েনৈব মাহাত্ম্যং বিমলং প্রতিপত্স্যথ

হুত্বা চাহবনীয়স্থং মহাভাগ্যে প্রতিষ্ঠিতাঃ
অগ্রভোজ্যাঃ প্রসূতীনাং শ্রিয়া ব্রাহ্ম্যানুকল্পিতাঃ

শ্রদ্ধয়া পরয়া যুক্তা হ্যনভিদ্রোহলব্ধয়া
দমস্বাধ্যায়নিরতাঃ সর্বান্কামানবাপ্স্যথ

যচ্চৈব মানুষে লোকে যচ্চ দেবেষু কিংচন
সর্বং তত্তপসা সাধ্যং জ্ঞানেন বিনয়েন চ

ইত্যেতা ব্রহ্মগীতাস্তে সমাখ্যাতা ময়ানঘ
বিপ্রানুকম্পার্থমিদং তেন প্রোক্তং হি ধীমতা

ভূয়স্তেষাং বলং মন্যে যথা রাজ্ঞস্তপস্বিনঃ
দুরাসদাশ্চ চণ্ডাশ্চ রভসাঃ ক্ষিপ্রকারিণঃ

সন্ত্যেষাং সিংহসত্ত্বাশ্চ ব্যাঘ্রসত্ত্বাস্তথাপরে
বরাহমৃগসত্ত্বাশ্চ গজসত্ত্বাস্তথাপরে

কর্পাসমৃদবঃ কেচিত্তথান্যে মকরস্পৃশঃ
বিভাষ্যঘাতিনঃ কেচিত্তথা চক্ষুর্হণোঽপরে

সন্তি চাশীবিষনিভাঃ সন্তি মন্দাস্তথাপরে
বিবিধানীহ বৃত্তানি ব্রাহ্মণানাং যুধিষ্ঠির

মেকলা দ্রমিডাঃ কাশাঃ পৌণ্ড্রাঃ কোল্লগিরাস্তথা
শৌণ্ডিকা দরদা দর্বাশ্চৌরাঃ শবরবর্বরাঃ

কিরাতা যবনাশ্চৈব তাস্তাঃ ক্ষত্রিয়জাতয়ঃ
বৃষলত্বমনুপ্রাপ্তা ব্রাহ্মণানামদর্শনাৎ

ব্রাহ্মণানাং পরিভবাদসুরাঃ সলিলেশয়াঃ
ব্রাহ্মণানাং প্রসাদাচ্চ দেবাঃ স্বর্গনিবাসিনঃ

অশক্যং স্প্রষ্টুমাকাশমচাল্যো হিমবান্গিরিঃ
অবার্যা সেতুনা গঙ্গা দুর্জয়া ব্রাহ্মণা ভুবি

ন ব্রাহ্মণবিরোধেন শক্যা শাস্তুং বসুংধরা
ব্রাহ্মণা হি মহাত্মানো দেবানামপি দেবতাঃ

তান্পূজয়স্ব সততং দানেন পরিচর্যয়া
যদীচ্ছসি মহীং ভোক্তুমিমাং সাগরমেখলাম্

প্রতিগ্রহেণ তেজো হি বিপ্রাণাং শাম্যতেঽনঘ
প্রতিগ্রহং যে নেচ্ছেয়ুস্তেঽপি রক্ষ্যাস্ত্বয়ানঘ