Utshovঅধ্যায় 34
34.1
ভীষ্ম উবাচ
ব্রাহ্মণানেব সততং ভৃশং সংপ্রতিপূজয়েৎ
এতে হি সোমরাজান ঈশ্বরাঃ সুখদুঃখয়োঃ
34.2
এতে ভোগৈরলংকারৈরন্যৈশ্চৈব কিমিচ্ছকৈঃ
সদা পূজ্যা নমস্কার্যা রক্ষ্যাশ্চ পিতৃবন্নৃপৈঃ
অতো রাষ্ট্রস্য শান্তির্হি ভূতানামিব বাসবাৎ
34.3
জায়তাং ব্রহ্মবর্চস্বী রাষ্ট্রে বৈ ব্রাহ্মণঃ শুচিঃ
মহারথশ্চ রাজন্য এষ্টব্যঃ শত্রুতাপনঃ
34.4
ব্রাহ্মণং জাতিসংপন্নং ধর্মজ্ঞং সংশিতব্রতম্
বাসয়েত গৃহে রাজন্ন তস্মাত্পরমস্তি বৈ
34.5
ব্রাহ্মণেভ্যো হবির্দত্তং প্রতিগৃহ্ণন্তি দেবতাঃ
পিতরঃ সর্বভূতানাং নৈতেভ্যো বিদ্যতে পরম্
34.6
আদিত্যশ্চন্দ্রমা বায়ুর্ভূমিরাপোঽম্বরং দিশঃ
সর্বে ব্রাহ্মণমাবিশ্য সদান্নমুপভুঞ্জতে
34.7
ন তস্যাশ্নন্তি পিতরো যস্য বিপ্রা ন ভুঞ্জতে
দেবাশ্চাপ্যস্য নাশ্নন্তি পাপস্য ব্রাহ্মণদ্বিষঃ
34.8
ব্রাহ্মণেষু তু তুষ্টেষু প্রীয়ন্তে পিতরঃ সদা
তথৈব দেবতা রাজন্নাত্র কার্যা বিচারণা
34.9
তথৈব তেঽপি প্রীয়ন্তে যেষাং ভবতি তদ্ধবিঃ
ন চ প্রেত্য বিনশ্যন্তি গচ্ছন্তি পরমাং গতিম্
34.10
যেন যেনৈব হবিষা ব্রাহ্মণাংস্তর্পয়েন্নরঃ
তেন তেনৈব প্রীয়ন্তে পিতরো দেবতাস্তথা
34.11
ব্রাহ্মণাদেব তদ্ভূতং প্রভবন্তি যতঃ প্রজাঃ
যতশ্চায়ং প্রভবতি প্রেত্য যত্র চ গচ্ছতি
34.12
বেদৈষ মার্গং স্বর্গস্য তথৈব নরকস্য চ
আগতানাগতে চোভে ব্রাহ্মণো দ্বিপদাং বরঃ
ব্রাহ্মণো ভরতশ্রেষ্ঠ স্বধর্মং বেদ মেধয়া
34.13
যে চৈনমনুবর্তন্তে তে ন যান্তি পরাভবম্
ন তে প্রেত্য বিনশ্যন্তি গচ্ছন্তি ন পরাভবম্
34.14
যে ব্রাহ্মণমুখাত্প্রাপ্তং প্রতিগৃহ্ণন্তি বৈ বচঃ
কৃতাত্মানো মহাত্মানস্তে ন যান্তি পরাভবম্
34.15
ক্ষত্রিয়াণাং প্রতপতাং তেজসা চ বলেন চ
ব্রাহ্মণেষ্বেব শাম্যন্তি তেজাংসি চ বলানি চ
34.16
ভৃগবোঽজয়ংস্তালজঙ্ঘান্নীপানঙ্গিরসোঽজয়ন্
ভরদ্বাজো বৈতহব্যানৈলাংশ্চ ভরতর্ষভ
34.17
চিত্রায়ুধাংশ্চাপ্যজয়ন্নেতে কৃষ্ণাজিনধ্বজাঃ
প্রক্ষিপ্যাথ চ কুম্ভান্বৈ পারগামিনমারভেৎ
34.18
যত্কিংচিত্কথ্যতে লোকে শ্রূয়তে পশ্যতেঽপি বা
সর্বং তদ্ব্রাহ্মণেষ্বেব গূঢোঽগ্নিরিব দারুষু
34.19
অত্রাপ্যুদাহরন্তীমমিতিহাসং পুরাতনম্
সংবাদং বাসুদেবস্য পৃথ্ব্যাশ্চ ভরতর্ষভ
34.20
বাসুদেব উবাচ
মাতরং সর্বভূতানাং পৃচ্ছে ত্বা সংশয়ং শুভে
কেন স্বিত্কর্মণা পাপং ব্যপোহতি নরো গৃহী
34.21
পৃথিব্যুবাচ
ব্রাহ্মণানেব সেবেত পবিত্রং হ্যেতদুত্তমম্
ব্রাহ্মণান্সেবমানস্য রজঃ সর্বং প্রণশ্যতি
34.22
অতো ভূতিরতঃ কীর্তিরতো বুদ্ধিঃ প্রজায়তে
অপরেষাং পরেষাং চ পরেভ্যশ্চৈব যে পরে
34.23
ব্রাহ্মণা যং প্রশংসন্তি পুরুষঃ স প্রবর্ধতে
অথ যো ব্রাহ্মণাক্রুষ্টঃ পরাভবতি সোঽচিরাৎ
34.24
যথা মহার্ণবে ক্ষিপ্ত আমলোষ্টো বিনশ্যতি
তথা দুশ্চরিতং কর্ম পরাভাবায় কল্পতে
34.25
পশ্য চন্দ্রে কৃতং লক্ষ্ম সমুদ্রে লবণোদকম্
তথা ভগসহস্রেণ মহেন্দ্রং পরিচিহ্নিতম্
34.26
তেষামেব প্রভাবেন সহস্রনয়নো হ্যসৌ
শতক্রতুঃ সমভবত্পশ্য মাধব যাদৃশম্
34.27
ইচ্ছন্ভূতিং চ কীর্তিং চ লোকাংশ্চ মধুসূদন
ব্রাহ্মণানুমতে তিষ্ঠেত্পুরুষঃ শুচিরাত্মবান্
34.28
ইত্যেতদ্বচনং শ্রুত্বা মেদিন্যা মধুসূদনঃ
সাধু সাধ্বিত্যথেত্যুক্ত্বা মেদিনীং প্রত্যপূজয়ৎ
34.29
এতাং শ্রুত্বোপমাং পার্থ প্রয়তো ব্রাহ্মণর্ষভান্
সততং পূজয়েথাস্ত্বং ততঃ শ্রেয়োঽভিপত্স্যসে