Utshovঅধ্যায় 33
33.1
যুধিষ্ঠির উবাচ
কিং রাজ্ঞঃ সর্বকৃত্যানাং গরীয়ঃ স্যাত্পিতামহ
কিং কুর্বন্কর্ম নৃপতিরুভৌ লোকৌ সমশ্নুতে
33.2
ভীষ্ম উবাচ
এতদ্রাজ্ঞঃ কৃত্যতমমভিষিক্তস্য ভারত
ব্রাহ্মণানামনুষ্ঠানমত্যন্তং সুখমিচ্ছতা
শ্রোত্রিয়ান্ব্রাহ্মণান্বৃদ্ধান্নিত্যমেবাভিপূজয়েৎ
33.3
পৌরজানপদাংশ্চাপি ব্রাহ্মণাংশ্চ বহুশ্রুতান্
সান্ত্বেন ভোগদানেন নমস্কারৈস্তথার্চয়েৎ
33.4
এতত্কৃত্যতমং রাজ্ঞো নিত্যমেবেতি লক্ষয়েৎ
যথাত্মানং যথা পুত্রাংস্তথৈতান্পরিপালয়েৎ
33.5
যে চাপ্যেষাং পূজ্যতমাস্তান্দৃঢং প্রতিপূজয়েৎ
তেষু শান্তেষু তদ্রাষ্ট্রং সর্বমেব বিরাজতে
33.6
তে পূজ্যাস্তে নমস্কার্যাস্তে রক্ষ্যাঃ পিতরো যথা
তেষ্বেব যাত্রা লোকস্য ভূতানামিব বাসবে
33.7
অভিচারৈরুপায়ৈশ্চ দহেয়ুরপি তেজসা
নিঃশেষং কুপিতাঃ কুর্যুরুগ্রাঃ সত্যপরাক্রমাঃ
33.8
নান্তমেষাং প্রপশ্যামি ন দিশশ্চাপ্যপাবৃতাঃ
কুপিতাঃ সমুদীক্ষন্তে দাবেষ্বগ্নিশিখা ইব
33.9
বিদ্যন্তেষাং সাহসিকা গুণাস্তেষামতীব হি
কূপা ইব তৃণচ্ছন্না বিশুদ্ধা দ্যৌরিবাপরে
33.10
প্রসহ্যকারিণঃ কেচিত্কার্পাসমৃদবোঽপরে
সন্তি চৈষামতিশঠাস্তথান্যেঽতিতপস্বিনঃ
33.11
কৃষিগোরক্ষ্যমপ্যন্যে ভৈক্ষমন্যেঽপ্যনুষ্ঠিতাঃ
চোরাশ্চান্যেঽনৃতাশ্চান্যে তথান্যে নটনর্তকাঃ
33.12
সর্বকর্মসু দৃশ্যন্তে প্রশান্তেষ্বিতরেষু চ
বিবিধাচারয়ুক্তাশ্চ ব্রাহ্মণা ভরতর্ষভ
33.13
নানাকর্মসু যুক্তানাং বহুকর্মোপজীবিনাম্
ধর্মজ্ঞানাং সতাং তেষাং নিত্যমেবানুকীর্তয়েৎ
33.14
পিতৄণাং দেবতানাং চ মনুষ্যোরগরক্ষসাম্
পুরোহিতা মহাভাগা ব্রাহ্মণা বৈ নরাধিপ
33.15
নৈতে দেবৈর্ন পিতৃভির্ন গন্ধর্বৈর্ন রাক্ষসৈঃ
নাসুরৈর্ন পিশাচৈশ্চ শক্যা জেতুং দ্বিজাতয়ঃ
33.16
অদৈবং দৈবতং কুর্যুর্দৈবতং চাপ্যদৈবতম্
যমিচ্ছেয়ুঃ স রাজা স্যাদ্যং দ্বিষ্যুঃ স পরাভবেৎ
33.17
পরিবাদং চ যে কুর্যুর্ব্রাহ্মণানামচেতসঃ
নিন্দাপ্রশংসাকুশলাঃ কীর্ত্যকীর্তিপরাবরাঃ
পরিকুপ্যন্তি তে রাজন্সততং দ্বিষতাং দ্বিজাঃ
33.18
ব্রাহ্মণা যং প্রশংসন্তি পুরুষঃ স প্রবর্ধতে
ব্রাহ্মণৈর্যঃ পরাক্রুষ্টঃ পরাভূয়াত্ক্ষণাদ্ধি সঃ
33.19
শকা যবনকাম্বোজাস্তাস্তাঃ ক্ষত্রিয়জাতয়ঃ
বৃষলত্বং পরিগতা ব্রাহ্মণানামদর্শনাৎ
33.20
দ্রমিলাশ্চ কলিঙ্গাশ্চ পুলিন্দাশ্চাপ্যুশীনরাঃ
কৌলাঃ সর্পা মাহিষকাস্তাস্তাঃ ক্ষত্রিয়জাতয়ঃ
33.21
বৃষলত্বং পরিগতা ব্রাহ্মণানামদর্শনাৎ
শ্রেয়ান্পরাজয়স্তেভ্যো ন জয়ো জয়তাং বর
33.22
যস্তু সর্বমিদং হন্যাদ্ব্রাহ্মণং চ ন তত্সমম্
ব্রহ্মবধ্যা মহান্দোষ ইত্যাহুঃ পরমর্ষয়ঃ
33.23
পরিবাদো দ্বিজাতীনাং ন শ্রোতব্যঃ কথংচন
আসীতাধোমুখস্তূষ্ণীং সমুত্থায় ব্রজেত বা
33.24
ন স জাতো জনিষ্যো বা পৃথিব্যামিহ কশ্চন
যো ব্রাহ্মণবিরোধেন সুখং জীবিতুমুত্সহেৎ
33.25
দুর্গ্রহো মুষ্টিনা বায়ুর্দুঃস্পর্শঃ পাণিনা শশী
দুর্ধরা পৃথিবী মূর্ধ্না দুর্জয়া ব্রাহ্মণা ভুবি