UtshovChapter 33
33.1
युधिष्ठिर उवाच
किं राज्ञः सर्वकृत्यानां गरीयः स्यात्पितामह
किं कुर्वन्कर्म नृपतिरुभौ लोकौ समश्नुते
Yudhishthira uvacha
Kim ragyah sarvakrityanam gariyah syatpitamaha
Kim kurvankarma nripatirubhau lokau samashnute
33.2
भीष्म उवाच
एतद्राज्ञः कृत्यतममभिषिक्तस्य भारत
ब्राह्मणानामनुष्ठानमत्यन्तं सुखमिच्छता
श्रोत्रियान्ब्राह्मणान्वृद्धान्नित्यमेवाभिपूजयेत्
Bhishma uvacha
Etadragyah krityatamamabhishiktasya bharata
Brahmananamanushthanamatyantam sukhamichchhata
Shrotriyanbrahmananvriddhannityamevabhipujayet
33.3
पौरजानपदांश्चापि ब्राह्मणांश्च बहुश्रुतान्
सान्त्वेन भोगदानेन नमस्कारैस्तथार्चयेत्
Paurajanapadanshchapi brahmananshcha bahushrutan
Santvena bhogadanena namaskaraistatharchayet
33.4
एतत्कृत्यतमं राज्ञो नित्यमेवेति लक्षयेत्
यथात्मानं यथा पुत्रांस्तथैतान्परिपालयेत्
Etatkrityatamam ragyo nityameveti lakshayet
Yathatmanam yatha putranstathaitanparipalayet
33.5
ये चाप्येषां पूज्यतमास्तान्दृढं प्रतिपूजयेत्
तेषु शान्तेषु तद्राष्ट्रं सर्वमेव विराजते
Ye chapyesham pujyatamastandridham pratipujayet
Teshu shanteshu tadrashtram sarvameva virajate
33.6
ते पूज्यास्ते नमस्कार्यास्ते रक्ष्याः पितरो यथा
तेष्वेव यात्रा लोकस्य भूतानामिव वासवे
Te pujyaste namaskaryaste rakshyah pitaro yatha
Teshveva yatra lokasya bhutanamiva vasave
33.7
अभिचारैरुपायैश्च दहेयुरपि तेजसा
निःशेषं कुपिताः कुर्युरुग्राः सत्यपराक्रमाः
Abhicharairupayaishcha daheyurapi tejasa
Nihshesham kupitah kuryurugrah satyaparakramah
33.8
नान्तमेषां प्रपश्यामि न दिशश्चाप्यपावृताः
कुपिताः समुदीक्षन्ते दावेष्वग्निशिखा इव
Nantamesham prapashyami na dishashchapyapavritah
Kupitah samudikshante daveshvagnishikha iva
33.9
विद्यन्तेषां साहसिका गुणास्तेषामतीव हि
कूपा इव तृणच्छन्ना विशुद्धा द्यौरिवापरे
Vidyantesham sahasika gunasteshamativa hi
Kupa iva trinachchhanna vishuddha dyaurivapare
33.10
प्रसह्यकारिणः केचित्कार्पासमृदवोऽपरे
सन्ति चैषामतिशठास्तथान्येऽतितपस्विनः
Prasahyakarinah kechitkarpasamridavopare
Santi chaishamatishathastathanyetitapasvinah
33.11
कृषिगोरक्ष्यमप्यन्ये भैक्षमन्येऽप्यनुष्ठिताः
चोराश्चान्येऽनृताश्चान्ये तथान्ये नटनर्तकाः
Krishigorakshyamapyanye bhaikshamanyepyanushthitah
Chorashchanyenritashchanye tathanye natanartakah
33.12
सर्वकर्मसु दृश्यन्ते प्रशान्तेष्वितरेषु च
विविधाचारयुक्ताश्च ब्राह्मणा भरतर्षभ
Sarvakarmasu drishyante prashanteshvitareshu cha
Vividhacharayuktashcha brahmana bharatarshabha
33.13
नानाकर्मसु युक्तानां बहुकर्मोपजीविनाम्
धर्मज्ञानां सतां तेषां नित्यमेवानुकीर्तयेत्
Nanakarmasu yuktanam bahukarmopajivinam
Dharmagyanam satam tesham nityamevanukirtayet
33.14
पितॄणां देवतानां च मनुष्योरगरक्षसाम्
पुरोहिता महाभागा ब्राह्मणा वै नराधिप
Pitrinam devatanam cha manushyoragarakshasam
Purohita mahabhaga brahmana vai naradhipa
33.15
नैते देवैर्न पितृभिर्न गन्धर्वैर्न राक्षसैः
नासुरैर्न पिशाचैश्च शक्या जेतुं द्विजातयः
Naite devairna pitribhirna gandharvairna rakshasaih
Nasurairna pishachaishcha shakya jetum dvijatayah
33.16
अदैवं दैवतं कुर्युर्दैवतं चाप्यदैवतम्
यमिच्छेयुः स राजा स्याद्यं द्विष्युः स पराभवेत्
Adaivam daivatam kuryurdaivatam chapyadaivatam
Yamichchheyuh sa raja syadyam dvishyuh sa parabhavet
33.17
परिवादं च ये कुर्युर्ब्राह्मणानामचेतसः
निन्दाप्रशंसाकुशलाः कीर्त्यकीर्तिपरावराः
परिकुप्यन्ति ते राजन्सततं द्विषतां द्विजाः
Parivadam cha ye kuryurbrahmananamachetasah
Nindaprashansakushalah kirtyakirtiparavarah
Parikupyanti te rajansatatam dvishatam dvijah
33.18
ब्राह्मणा यं प्रशंसन्ति पुरुषः स प्रवर्धते
ब्राह्मणैर्यः पराक्रुष्टः पराभूयात्क्षणाद्धि सः
Brahmana yam prashansanti purushah sa pravardhate
Brahmanairyah parakrushtah parabhuyatkshanaddhi sah
33.19
शका यवनकाम्बोजास्तास्ताः क्षत्रियजातयः
वृषलत्वं परिगता ब्राह्मणानामदर्शनात्
Shaka yavanakambojastastah kshatriyajatayah
Vrishalatvam parigata brahmananamadarshanat
33.20
द्रमिळाश्च कलिङ्गाश्च पुलिन्दाश्चाप्युशीनराः
कौलाः सर्पा माहिषकास्तास्ताः क्षत्रियजातयः
Dramilashcha kalingashcha pulindashchapyushinarah
Kaulah sarpa mahishakastastah kshatriyajatayah
33.21
वृषलत्वं परिगता ब्राह्मणानामदर्शनात्
श्रेयान्पराजयस्तेभ्यो न जयो जयतां वर
Vrishalatvam parigata brahmananamadarshanat
Shreyanparajayastebhyo na jayo jayatam vara
33.22
यस्तु सर्वमिदं हन्याद्ब्राह्मणं च न तत्समम्
ब्रह्मवध्या महान्दोष इत्याहुः परमर्षयः
Yastu sarvamidam hanyadbrahmanam cha na tatsamam
Brahmavadhya mahandosha ityahuh paramarshayah
33.23
परिवादो द्विजातीनां न श्रोतव्यः कथंचन
आसीताधोमुखस्तूष्णीं समुत्थाय व्रजेत वा
Parivado dvijatinam na shrotavyah kathanchana
Asitadhomukhastushnim samutthaya vrajeta va
33.24
न स जातो जनिष्यो वा पृथिव्यामिह कश्चन
यो ब्राह्मणविरोधेन सुखं जीवितुमुत्सहेत्
Na sa jato janishyo va prithivyamiha kashchana
Yo brahmanavirodhena sukham jivitumutsahet
33.25
दुर्ग्रहो मुष्टिना वायुर्दुःस्पर्शः पाणिना शशी
दुर्धरा पृथिवी मूर्ध्ना दुर्जया ब्राह्मणा भुवि
Durgraho mushtina vayurduhsparshah panina shashi
Durdhara prithivi murdhna durjaya brahmana bhuvi