UtshovChapter 34
34.1
भीष्म उवाच
ब्राह्मणानेव सततं भृशं संप्रतिपूजयेत्
एते हि सोमराजान ईश्वराः सुखदुःखयोः
Bhishma uvacha
Brahmananeva satatam bhrisham sampratipujayet
Ete hi somarajana ishvarah sukhaduhkhayoh
34.2
एते भोगैरलंकारैरन्यैश्चैव किमिच्छकैः
सदा पूज्या नमस्कार्या रक्ष्याश्च पितृवन्नृपैः
अतो राष्ट्रस्य शान्तिर्हि भूतानामिव वासवात्
Ete bhogairalankarairanyaishchaiva kimichchhakaih
Sada pujya namaskarya rakshyashcha pitrivannripaih
Ato rashtrasya shantirhi bhutanamiva vasavat
34.3
जायतां ब्रह्मवर्चस्वी राष्ट्रे वै ब्राह्मणः शुचिः
महारथश्च राजन्य एष्टव्यः शत्रुतापनः
Jayatam brahmavarchasvi rashtre vai brahmanah shuchih
Maharathashcha rajanya eshtavyah shatrutapanah
34.4
ब्राह्मणं जातिसंपन्नं धर्मज्ञं संशितव्रतम्
वासयेत गृहे राजन्न तस्मात्परमस्ति वै
Brahmanam jatisampannam dharmagyam sanshitavratam
Vasayeta grihe rajanna tasmatparamasti vai
34.5
ब्राह्मणेभ्यो हविर्दत्तं प्रतिगृह्णन्ति देवताः
पितरः सर्वभूतानां नैतेभ्यो विद्यते परम्
Brahmanebhyo havirdattam pratigrihnanti devatah
Pitarah sarvabhutanam naitebhyo vidyate param
34.6
आदित्यश्चन्द्रमा वायुर्भूमिरापोऽम्बरं दिशः
सर्वे ब्राह्मणमाविश्य सदान्नमुपभुञ्जते
Adityashchandrama vayurbhumirapombaram dishah
Sarve brahmanamavishya sadannamupabhunjate
34.7
न तस्याश्नन्ति पितरो यस्य विप्रा न भुञ्जते
देवाश्चाप्यस्य नाश्नन्ति पापस्य ब्राह्मणद्विषः
Na tasyashnanti pitaro yasya vipra na bhunjate
Devashchapyasya nashnanti papasya brahmanadvishah
34.8
ब्राह्मणेषु तु तुष्टेषु प्रीयन्ते पितरः सदा
तथैव देवता राजन्नात्र कार्या विचारणा
Brahmaneshu tu tushteshu priyante pitarah sada
Tathaiva devata rajannatra karya vicharana
34.9
तथैव तेऽपि प्रीयन्ते येषां भवति तद्धविः
न च प्रेत्य विनश्यन्ति गच्छन्ति परमां गतिम्
Tathaiva tepi priyante yesham bhavati taddhavih
Na cha pretya vinashyanti gachchhanti paramam gatim
34.10
येन येनैव हविषा ब्राह्मणांस्तर्पयेन्नरः
तेन तेनैव प्रीयन्ते पितरो देवतास्तथा
Yena yenaiva havisha brahmananstarpayennarah
Tena tenaiva priyante pitaro devatastatha
34.11
ब्राह्मणादेव तद्भूतं प्रभवन्ति यतः प्रजाः
यतश्चायं प्रभवति प्रेत्य यत्र च गच्छति
Brahmanadeva tadbhutam prabhavanti yatah prajah
Yatashchayam prabhavati pretya yatra cha gachchhati
34.12
वेदैष मार्गं स्वर्गस्य तथैव नरकस्य च
आगतानागते चोभे ब्राह्मणो द्विपदां वरः
ब्राह्मणो भरतश्रेष्ठ स्वधर्मं वेद मेधया
Vedaisha margam svargasya tathaiva narakasya cha
Agatanagate chobhe brahmano dvipadam varah
Brahmano bharatashreshtha svadharmam veda medhaya
34.13
ये चैनमनुवर्तन्ते ते न यान्ति पराभवम्
न ते प्रेत्य विनश्यन्ति गच्छन्ति न पराभवम्
Ye chainamanuvartante te na yanti parabhavam
Na te pretya vinashyanti gachchhanti na parabhavam
34.14
ये ब्राह्मणमुखात्प्राप्तं प्रतिगृह्णन्ति वै वचः
कृतात्मानो महात्मानस्ते न यान्ति पराभवम्
Ye brahmanamukhatpraptam pratigrihnanti vai vachah
Kritatmano mahatmanaste na yanti parabhavam
34.15
क्षत्रियाणां प्रतपतां तेजसा च बलेन च
ब्राह्मणेष्वेव शाम्यन्ति तेजांसि च बलानि च
Kshatriyanam pratapatam tejasa cha balena cha
Brahmaneshveva shamyanti tejansi cha balani cha
34.16
भृगवोऽजयंस्तालजङ्घान्नीपानङ्गिरसोऽजयन्
भरद्वाजो वैतहव्यानैलांश्च भरतर्षभ
Bhrigavojayanstalajanghannipanangirasojayan
Bharadvajo vaitahavyanailanshcha bharatarshabha
34.17
चित्रायुधांश्चाप्यजयन्नेते कृष्णाजिनध्वजाः
प्रक्षिप्याथ च कुम्भान्वै पारगामिनमारभेत्
Chitrayudhanshchapyajayannete krishnajinadhvajah
Prakshipyatha cha kumbhanvai paragaminamarabhet
34.18
यत्किंचित्कथ्यते लोके श्रूयते पश्यतेऽपि वा
सर्वं तद्ब्राह्मणेष्वेव गूढोऽग्निरिव दारुषु
Yatkinchitkathyate loke shruyate pashyatepi va
Sarvam tadbrahmaneshveva gudhogniriva darushu
34.19
अत्राप्युदाहरन्तीममितिहासं पुरातनम्
संवादं वासुदेवस्य पृथ्व्याश्च भरतर्षभ
Atrapyudaharantimamitihasam puratanam
Sanvadam vasudevasya prithvyashcha bharatarshabha
34.20
वासुदेव उवाच
मातरं सर्वभूतानां पृच्छे त्वा संशयं शुभे
केन स्वित्कर्मणा पापं व्यपोहति नरो गृही
Vasudeva uvacha
Mataram sarvabhutanam prichchhe tva sanshayam shubhe
Kena svitkarmana papam vyapohati naro grihi
34.21
पृथिव्युवाच
ब्राह्मणानेव सेवेत पवित्रं ह्येतदुत्तमम्
ब्राह्मणान्सेवमानस्य रजः सर्वं प्रणश्यति
Prithivyuvacha
Brahmananeva seveta pavitram hyetaduttamam
Brahmanansevamanasya rajah sarvam pranashyati
34.22
अतो भूतिरतः कीर्तिरतो बुद्धिः प्रजायते
अपरेषां परेषां च परेभ्यश्चैव ये परे
Ato bhutiratah kirtirato buddhih prajayate
Aparesham paresham cha parebhyashchaiva ye pare
34.23
ब्राह्मणा यं प्रशंसन्ति पुरुषः स प्रवर्धते
अथ यो ब्राह्मणाक्रुष्टः पराभवति सोऽचिरात्
Brahmana yam prashansanti purushah sa pravardhate
Atha yo brahmanakrushtah parabhavati sochirat
34.24
यथा महार्णवे क्षिप्त आमलोष्टो विनश्यति
तथा दुश्चरितं कर्म पराभावाय कल्पते
Yatha maharnave kshipta amaloshto vinashyati
Tatha dushcharitam karma parabhavaya kalpate
34.25
पश्य चन्द्रे कृतं लक्ष्म समुद्रे लवणोदकम्
तथा भगसहस्रेण महेन्द्रं परिचिह्नितम्
Pashya chandre kritam lakshma samudre lavanodakam
Tatha bhagasahasrena mahendram parichihnitam
34.26
तेषामेव प्रभावेन सहस्रनयनो ह्यसौ
शतक्रतुः समभवत्पश्य माधव यादृशम्
Teshameva prabhavena sahasranayano hyasau
Shatakratuh samabhavatpashya madhava yadrisham
34.27
इच्छन्भूतिं च कीर्तिं च लोकांश्च मधुसूदन
ब्राह्मणानुमते तिष्ठेत्पुरुषः शुचिरात्मवान्
Ichchhanbhutim cha kirtim cha lokanshcha madhusudana
Brahmananumate tishthetpurushah shuchiratmavan
34.28
इत्येतद्वचनं श्रुत्वा मेदिन्या मधुसूदनः
साधु साध्वित्यथेत्युक्त्वा मेदिनीं प्रत्यपूजयत्
Ityetadvachanam shrutva medinya madhusudanah
Sadhu sadhvityathetyuktva medinim pratyapujayat
34.29
एतां श्रुत्वोपमां पार्थ प्रयतो ब्राह्मणर्षभान्
सततं पूजयेथास्त्वं ततः श्रेयोऽभिपत्स्यसे
Etam shrutvopamam partha prayato brahmanarshabhan
Satatam pujayethastvam tatah shreyobhipatsyase