Utshovঅধ্যায় 32
32.1
যুধিষ্ঠির উবাচ
কে পূজ্যাঃ কে নমস্কার্যা মানবৈর্ভরতর্ষভ
বিস্তরেণ তদাচক্ষ্ব ন হি তৃপ্যামি কথ্যতাম্
32.2
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
নারদস্য চ সংবাদং বাসুদেবস্য চোভয়োঃ
32.3
নারদং প্রাঞ্জলিং দৃষ্ট্বা পূজয়ানং দ্বিজর্ষভান্
কেশবঃ পরিপপ্রচ্ছ ভগবন্কান্নমস্যসি
32.4
বহুমানঃ পরঃ কেষু ভবতো যান্নমস্যসি
শক্যং চেচ্ছ্রোতুমিচ্ছামি ব্রূহ্যেতদ্ধর্মবিত্তম
32.5
নারদ উবাচ
শৃণু গোবিন্দ যানেতান্পূজয়াম্যরিমর্দন
ত্বত্তোঽন্যঃ কঃ পুমাঁল্লোকে শ্রোতুমেতদিহার্হতি
32.6
বরুণং বায়ুমাদিত্যং পর্জন্যং জাতবেদসম্
স্থাণুং স্কন্দং তথা লক্ষ্মীং বিষ্ণুং ব্রহ্মাণমেব চ
32.7
বাচস্পতিং চন্দ্রমসমপঃ পৃথ্বীং সরস্বতীম্
সততং যে নমস্যন্তি তান্নমস্যাম্যহং বিভো
32.8
তপোধনান্বেদবিদো নিত্যং বেদপরায়ণান্
মহার্হান্বৃষ্ণিশার্দূল সদা সংপূজয়াম্যহম্
32.9
অভুক্ত্বা দেবকার্যাণি কুর্বতে যেঽবিকত্থনাঃ
সংতুষ্টাশ্চ ক্ষমায়ুক্তাস্তান্নমস্যাম্যহং বিভো
32.10
সম্যগ্দদতি যে চেষ্টান্ক্ষান্তা দান্তা জিতেন্দ্রিয়াঃ
সস্যং ধনং ক্ষিতিং গাশ্চ তান্নমস্যামি যাদব
32.11
যে তে তপসি বর্তন্তে বনে মূলফলাশনাঃ
অসংচয়াঃ ক্রিয়াবন্তস্তান্নমস্যামি যাদব
32.12
যে ভৃত্যভরণে সক্তাঃ সততং চাতিথিপ্রিয়াঃ
ভুঞ্জন্তে দেবশেষাণি তান্নমস্যামি যাদব
32.13
যে বেদং প্রাপ্য দুর্ধর্ষা বাগ্মিনো ব্রহ্মবাদিনঃ
যাজনাধ্যাপনে যুক্তা নিত্যং তান্পূজয়াম্যহম্
32.14
প্রসন্নহৃদয়াশ্চৈব সর্বসত্ত্বেষু নিত্যশঃ
আ পৃষ্ঠতাপাত্স্বাধ্যায়ে যুক্তাস্তান্পূজয়াম্যহম্
32.15
গুরুপ্রসাদে স্বাধ্যায়ে যতন্তে যে স্থিরব্রতাঃ
শুশ্রূষবোঽনসূয়ন্তস্তান্নমস্যামি যাদব
32.16
সুব্রতা মুনয়ো যে চ ব্রহ্মণ্যাঃ সত্যসংগরাঃ
বোঢারো হব্যকব্যানাং তান্নমস্যামি যাদব
32.17
ভৈক্ষ্যচর্যাসু নিরতাঃ কৃশা গুরুকুলাশ্রয়াঃ
নিঃসুখা নির্ধনা যে চ তান্নমস্যামি যাদব
32.18
নির্মমা নিষ্প্রতিদ্বংদ্বা নির্হ্রীকা নিষ্প্রয়োজনাঃ
অহিংসানিরতা যে চ যে চ সত্যব্রতা নরাঃ
দান্তাঃ শমপরাশ্চৈব তান্নমস্যামি কেশব
32.19
দেবতাতিথিপূজায়াং প্রসক্তা গৃহমেধিনঃ
কপোতবৃত্তয়ো নিত্যং তান্নমস্যামি যাদব
32.20
যেষাং ত্রিবর্গঃ কৃত্যেষু বর্ততে নোপহীয়তে
শিষ্টাচারপ্রবৃত্তাশ্চ তান্নমস্যাম্যহং সদা
32.21
ব্রাহ্মণাস্ত্রিষু লোকেষু যে ত্রিবর্গমনুষ্ঠিতাঃ
অলোলুপাঃ পুণ্যশীলাস্তান্নমস্যামি কেশব
32.22
অব্ভক্ষা বায়ুভক্ষাশ্চ সুধাভক্ষাশ্চ যে সদা
ব্রতৈশ্চ বিবিধৈর্যুক্তাস্তান্নমস্যামি মাধব
32.23
অয়োনীনগ্নিয়োনীংশ্চ ব্রহ্ময়োনীংস্তথৈব চ
সর্বভূতাত্ময়োনীংশ্চ তান্নমস্যাম্যহং দ্বিজান্
32.24
নিত্যমেতান্নমস্যামি কৃষ্ণ লোককরানৃষীন্
লোকজ্যেষ্ঠাঞ্জ্ঞাননিষ্ঠাংস্তমোঘ্নাঁল্লোকভাস্করান্
32.25
তস্মাত্ত্বমপি বার্ষ্ণেয় দ্বিজান্পূজয় নিত্যদা
পূজিতাঃ পূজনার্হা হি সুখং দাস্যন্তি তেঽনঘ
32.26
অস্মিঁল্লোকে সদা হ্যেতে পরত্র চ সুখপ্রদাঃ
ত এতে মান্যমানা বৈ প্রদাস্যন্তি সুখং তব
32.27
যে সর্বাতিথয়ো নিত্যং গোষু চ ব্রাহ্মণেষু চ
নিত্যং সত্যে চ নিরতা দুর্গাণ্যতিতরন্তি তে
32.28
নিত্যং শমপরা যে চ তথা যে চানসূয়কাঃ
নিত্যং স্বাধ্যায়িনো যে চ দুর্গাণ্যতিতরন্তি তে
32.29
সর্বান্দেবান্নমস্যন্তি যে চৈকং দেবমাশ্রিতাঃ
শ্রদ্দধানাশ্চ দান্তাশ্চ দুর্গাণ্যতিতরন্তি তে
32.30
তথৈব বিপ্রপ্রবরান্নমস্কৃত্য যতব্রতান্
ভবন্তি যে দানরতা দুর্গাণ্যতিতরন্তি তে
32.31
অগ্নীনাধায় বিধিবত্প্রয়তা ধারয়ন্তি যে
প্রাপ্তাঃ সোমাহুতিং চৈব দুর্গাণ্যতিতরন্তি তে
32.32
মাতাপিত্রোর্গুরুষু চ সম্যগ্বর্তন্তি যে সদা
যথা ত্বং বৃষ্ণিশার্দূলেত্যুক্ত্বৈবং বিররাম সঃ
32.33
তস্মাত্ত্বমপি কৌন্তেয় পিতৃদেবদ্বিজাতিথীন্
সম্যক্পূজয় যেন ত্বং গতিমিষ্টামবাপ্স্যসি