Utshovঅধ্যায় 31
31.1
যুধিষ্ঠির উবাচ
শ্রুতং মে মহদাখ্যানমেতত্কুরুকুলোদ্বহ
সুদুষ্প্রাপং ব্রবীষি ত্বং ব্রাহ্মণ্যং বদতাং বর
31.2
বিশ্বামিত্রেণ চ পুরা ব্রাহ্মণ্যং প্রাপ্তমিত্যুত
শ্রূয়তে বদসে তচ্চ দুষ্প্রাপমিতি সত্তম
31.3
বীতহব্যশ্চ রাজর্ষিঃ শ্রুতো মে বিপ্রতাং গতঃ
তদেব তাবদ্গাঙ্গেয় শ্রোতুমিচ্ছাম্যহং বিভো
31.4
স কেন কর্মণা প্রাপ্তো ব্রাহ্মণ্যং রাজসত্তম
বরেণ তপসা বাপি তন্মে ব্যাখ্যাতুমর্হতি
31.5
ভীষ্ম উবাচ
শৃণু রাজন্যথা রাজা বীতহব্যো মহায়শাঃ
ক্ষত্রিয়ঃ সন্পুনঃ প্রাপ্তো ব্রাহ্মণ্যং লোকসত্কৃতম্
31.6
মনোর্মহাত্মনস্তাত প্রজাধর্মেণ শাসতঃ
বভূব পুত্রো ধর্মাত্মা শর্যাতিরিতি বিশ্রুতঃ
31.7
তস্যান্ববায়ে দ্বৌ রাজন্রাজানৌ সংবভূবতুঃ
হেহয়স্তালজঙ্ঘশ্চ বত্সেষু জয়তাং বর
31.8
হেহয়স্য তু পুত্রাণাং দশসু স্ত্রীষু ভারত
শতং বভূব প্রখ্যাতং শূরাণামনিবর্তিনাম্
31.9
তুল্যরূপপ্রভাবাণাং বিদুষাং যুদ্ধশালিনাম্
ধনুর্বেদে চ বেদে চ সর্বত্রৈব কৃতশ্রমাঃ
31.10
কাশিষ্বপি নৃপো রাজন্দিবোদাসপিতামহঃ
হর্যশ্ব ইতি বিখ্যাতো বভূব জয়তাং বরঃ
31.11
স বীতহব্যদায়াদৈরাগত্য পুরুষর্ষভ
গঙ্গায়মুনয়োর্মধ্যে সংগ্রামে বিনিপাতিতঃ
31.12
তং তু হত্বা নরবরং হেহয়াস্তে মহারথাঃ
প্রতিজগ্মুঃ পুরীং রম্যাং বত্সানামকুতোভয়াঃ
31.13
হর্যশ্বস্য তু দায়াদঃ কাশিরাজোঽভ্যষিচ্যত
সুদেবো দেবসংকাশঃ সাক্ষাদ্ধর্ম ইবাপরঃ
31.14
স পালয়ন্নেব মহীং ধর্মাত্মা কাশিনন্দনঃ
তৈর্বীতহব্যৈরাগত্য যুধি সর্বৈর্বিনির্জিতঃ
31.15
তমপ্যাজৌ বিনির্জিত্য প্রতিজগ্মুর্যথাগতম্
সৌদেবিস্ত্বথ কাশীশো দিবোদাসোঽভ্যষিচ্যত
31.16
দিবোদাসস্তু বিজ্ঞায় বীর্যং তেষাং মহাত্মনাম্
বারাণসীং মহাতেজা নির্মমে শক্রশাসনাৎ
31.17
বিপ্রক্ষত্রিয়সংবাধাং বৈশ্যশূদ্রসমাকুলাম্
নৈকদ্রব্যোচ্চয়বতীং সমৃদ্ধবিপণাপণাম্
31.18
গঙ্গায়া উত্তরে কূলে বপ্রান্তে রাজসত্তম
গোমত্যা দক্ষিণে চৈব শক্রস্যেবামরাবতীম্
31.19
তত্র তং রাজশার্দূলং নিবসন্তং মহীপতিম্
আগত্য হেহয়া ভূয়ঃ পর্যধাবন্ত ভারত
31.20
স নিষ্পত্য দদৌ যুদ্ধং তেভ্যো রাজা মহাবলঃ
দেবাসুরসমং ঘোরং দিবোদাসো মহাদ্যুতিঃ
31.21
স তু যুদ্ধে মহারাজ দিনানাং দশতীর্দশ
হতবাহনভূয়িষ্ঠস্ততো দৈন্যমুপাগমৎ
31.22
হতয়োধস্ততো রাজন্ক্ষীণকোশশ্চ ভূমিপঃ
দিবোদাসঃ পুরীং হিত্বা পলায়নপরোঽভবৎ
31.23
স ত্বাশ্রমমুপাগম্য ভরদ্বাজস্য ধীমতঃ
জগাম শরণং রাজা কৃতাঞ্জলিররিংদম
31.24
রাজোবাচ
ভগবন্বৈতহব্যৈর্মে যুদ্ধে বংশঃ প্রণাশিতঃ
অহমেকঃ পরিদ্যূনো ভবন্তং শরণং গতঃ
31.25
শিষ্যস্নেহেন ভগবন্স মাং রক্ষিতুমর্হসি
নিঃশেষো হি কৃতো বংশো মম তৈঃ পাপকর্মভিঃ
31.26
তমুবাচ মহাভাগো ভরদ্বাজঃ প্রতাপবান্
ন ভেতব্যং ন ভেতব্যং সৌদেব ব্যেতু তে ভয়ম্
31.27
অহমিষ্টিং করোম্যদ্য পুত্রার্থং তে বিশাং পতে
বৈতহব্যসহস্রাণি যথা ত্বং প্রসহিষ্যসি
31.28
তত ইষ্টিং চকারর্ষিস্তস্য বৈ পুত্রকামিকীম্
অথাস্য তনয়ো জজ্ঞে প্রতর্দন ইতি শ্রুতঃ
31.29
স জাতমাত্রো ববৃধে সমাঃ সদ্যস্ত্রয়োদশ
বেদং চাধিজগে কৃত্স্নং ধনুর্বেদং চ ভারত
31.30
যোগেন চ সমাবিষ্টো ভরদ্বাজেন ধীমতা
তেজো লৌক্যং স সংগৃহ্য তস্মিন্দেশে সমাবিশৎ
31.31
ততঃ স কবচী ধন্বী বাণী দীপ্ত ইবানলঃ
প্রয়য়ৌ স ধনুর্ধুন্বন্বিবর্ষুরিব তোয়দঃ
31.32
তং দৃষ্ট্বা পরমং হর্ষং সুদেবতনয়ো যয়ৌ
মেনে চ মনসা দগ্ধান্বৈতহব্যান্স পার্থিবঃ
31.33
ততস্তং যৌবরাজ্যেন স্থাপয়িত্বা প্রতর্দনম্
কৃতকৃত্যং তদাত্মানং স রাজা অভ্যনন্দত
31.34
ততস্তু বৈতহব্যানাং বধায় স মহীপতিঃ
পুত্রং প্রস্থাপয়ামাস প্রতর্দনমরিংদমম্
31.35
সরথঃ স তু সংতীর্য গঙ্গামাশু পরাক্রমী
প্রয়য়ৌ বীতহব্যানাং পুরীং পরপুরংজয়ঃ
31.36
বৈতহব্যাস্তু সংশ্রুত্য রথঘোষং সমুদ্ধতম্
নির্যয়ুর্নগরাকারৈ রথৈঃ পররথারুজৈঃ
31.37
নিষ্ক্রম্য তে নরব্যাঘ্রা দংশিতাশ্চিত্রয়োধিনঃ
প্রতর্দনং সমাজঘ্নুঃ শরবর্ষৈরুদায়ুধাঃ
31.38
অস্ত্রৈশ্চ বিবিধাকারৈ রথৌঘৈশ্চ যুধিষ্ঠির
অভ্যবর্ষন্ত রাজানং হিমবন্তমিবাম্বুদাঃ
31.39
অস্ত্রৈরস্ত্রাণি সংবার্য তেষাং রাজা প্রতর্দনঃ
জঘান তান্মহাতেজা বজ্রানলসমৈঃ শরৈঃ
31.40
কৃত্তোত্তমাঙ্গাস্তে রাজন্ভল্লৈঃ শতসহস্রশঃ
অপতন্রুধিরার্দ্রাঙ্গা নিকৃত্তা ইব কিংশুকাঃ
31.41
হতেষু তেষু সর্বেষু বীতহব্যঃ সুতেষ্বথ
প্রাদ্রবন্নগরং হিত্বা ভৃগোরাশ্রমমপ্যুত
31.42
যয়ৌ ভৃগুং চ শরণং বীতহব্যো নরাধিপঃ
অভয়ং চ দদৌ তস্মৈ রাজ্ঞে রাজন্ভৃগুস্তথা
ততো দদাবাসনং চ তস্মৈ শিষ্যো ভৃগোস্তদা
31.43
অথানুপদমেবাশু তত্রাগচ্ছত্প্রতর্দনঃ
স প্রাপ্য চাশ্রমপদং দিবোদাসাত্মজোঽব্রবীৎ
31.44
ভো ভোঃ কেঽত্রাশ্রমে সন্তি ভৃগোঃ শিষ্যা মহাত্মনঃ
দ্রষ্টুমিচ্ছে মুনিমহং তস্যাচক্ষত মামিতি
31.45
স তং বিদিত্বা তু ভৃগুর্নিশ্চক্রামাশ্রমাত্তদা
পূজয়ামাস চ ততো বিধিনা পরমেণ হ
31.46
উবাচ চৈনং রাজেন্দ্র কিং কার্যমিতি পার্থিবম্
স চোবাচ নৃপস্তস্মৈ যদাগমনকারণম্
31.47
অয়ং ব্রহ্মন্নিতো রাজা বীতহব্যো বিসর্জ্যতাম্
অস্য পুত্রৈর্হি মে ব্রহ্মন্কৃত্স্নো বংশঃ প্রণাশিতঃ
উত্সাদিতশ্চ বিষয়ঃ কাশীনাং রত্নসংচয়ঃ
31.48
এতস্য বীর্যদৃপ্তস্য হতং পুত্রশতং ময়া
অস্যেদানীং বধাদ্ব্রহ্মন্ভবিষ্যাম্যনৃণঃ পিতুঃ
31.49
তমুবাচ কৃপাবিষ্টো ভৃগুর্ধর্মভৃতাং বরঃ
নেহাস্তি ক্ষত্রিয়ঃ কশ্চিত্সর্বে হীমে দ্বিজাতয়ঃ
31.50
এবং তু বচনং শ্রুত্বা ভৃগোস্তথ্যং প্রতর্দনঃ
পাদাবুপস্পৃশ্য শনৈঃ প্রহসন্বাক্যমব্রবীৎ
31.51
এবমপ্যস্মি ভগবন্কৃতকৃত্যো ন সংশয়ঃ
যদেষ রাজা বীর্যেণ স্বজাতিং ত্যাজিতো ময়া
31.52
অনুজানীহি মাং ব্রহ্মন্ধ্যায়স্ব চ শিবেন মাম্
ত্যাজিতো হি ময়া জাতিমেষ রাজা ভৃগূদ্বহ
31.53
ততস্তেনাভ্যনুজ্ঞাতো যয়ৌ রাজা প্রতর্দনঃ
যথাগতং মহারাজ মুক্ত্বা বিষমিবোরগঃ
31.54
ভৃগোর্বচনমাত্রেণ স চ ব্রহ্মর্ষিতাং গতঃ
বীতহব্যো মহারাজ ব্রহ্মবাদিত্বমেব চ
31.55
তস্য গৃত্সমদঃ পুত্রো রূপেণেন্দ্র ইবাপরঃ
শক্রস্ত্বমিতি যো দৈত্যৈর্নিগৃহীতঃ কিলাভবৎ
31.56
ঋগ্বেদে বর্ততে চাগ্র্যা শ্রুতিরত্র বিশাং পতে
যত্র গৃত্সমদো ব্রহ্মন্ব্রাহ্মণৈঃ স মহীয়তে
31.57
স ব্রহ্মচারী বিপ্রর্ষিঃ শ্রীমান্গৃত্সমদোঽভবৎ
পুত্রো গৃত্সমদস্যাপি সুচেতা অভবদ্দ্বিজঃ
31.58
বর্চাঃ সুতেজসঃ পুত্রো বিহব্যস্তস্য চাত্মজঃ
বিহব্যস্য তু পুত্রস্তু বিতত্যস্তস্য চাত্মজঃ
31.59
বিতত্যস্য সুতঃ সত্যঃ সন্তঃ সত্যস্য চাত্মজঃ
শ্রবাস্তস্য সুতশ্চর্ষিঃ শ্রবসশ্চাভবত্তমঃ
31.60
তমসশ্চ প্রকাশোঽভূত্তনয়ো দ্বিজসত্তমঃ
প্রকাশস্য চ বাগিন্দ্রো বভূব জয়তাং বরঃ
31.61
তস্যাত্মজশ্চ প্রমতির্বেদবেদাঙ্গপারগঃ
ঘৃতাচ্যাং তস্য পুত্রস্তু রুরুর্নামোদপদ্যত
31.62
প্রমদ্বরায়াং তু রুরোঃ পুত্রঃ সমুদপদ্যত
শুনকো নাম বিপ্রর্ষির্যস্য পুত্রোঽথ শৌনকঃ
31.63
এবং বিপ্রত্বমগমদ্বীতহব্যো নরাধিপঃ
ভৃগোঃ প্রসাদাদ্রাজেন্দ্র ক্ষত্রিয়ঃ ক্ষত্রিয়র্ষভ
31.64
তথৈব কথিতো বংশো ময়া গার্ত্সমদস্তব
বিস্তরেণ মহারাজ কিমন্যদনুপৃচ্ছসি