অধ্যায় 30

30.1

ভীষ্ম উবাচ
এবমুক্তো মতঙ্গস্তু ভৃশং শোকপরায়ণঃ
অতিষ্ঠত গয়াং গত্বা সোঽঙ্গুষ্ঠেন শতং সমাঃ

সুদুষ্করং বহন্যোগং কৃশো ধমনিসংততঃ
ত্বগস্থিভূতো ধর্মাত্মা স পপাতেতি নঃ শ্রুতম্

তং পতন্তমভিদ্রুত্য পরিজগ্রাহ বাসবঃ
বরাণামীশ্বরো দাতা সর্বভূতহিতে রতঃ

শক্র উবাচ
মতঙ্গ ব্রাহ্মণত্বং তে সংবৃতং পরিপন্থিভিঃ
পূজয়ন্সুখমাপ্নোতি দুঃখমাপ্নোত্যপূজয়ন্

ব্রাহ্মণে সর্বভূতানাং যোগক্ষেমঃ সমাহিতঃ
ব্রাহ্মণেভ্যোঽনুতৃপ্যন্তি পিতরো দেবতাস্তথা

ব্রাহ্মণঃ সর্বভূতানাং মতঙ্গ পর উচ্যতে
ব্রাহ্মণঃ কুরুতে তদ্ধি যথা যদ্যচ্চ বাঞ্ছতি

বহ্বীস্তু সংসরন্যোনীর্জায়মানঃ পুনঃ পুনঃ
পর্যায়ে তাত কস্মিংশ্চিদ্ব্রাহ্মণ্যমিহ বিন্দতি

মতঙ্গ উবাচ
কিং মাং তুদসি দুঃখার্তং মৃতং মারয়সে চ মাম্
তং তু শোচামি যো লব্ধ্বা ব্রাহ্মণ্যং ন বুভূষতে

ব্রাহ্মণ্যং যদি দুষ্প্রাপং ত্রিভির্বর্ণৈঃ শতক্রতো
সুদুর্লভং তদাবাপ্য নানুতিষ্ঠন্তি মানবাঃ

যঃ পাপেভ্যঃ পাপতমস্তেষামধম এব সঃ
ব্রাহ্মণ্যং যোঽবজানীতে ধনং লব্ধ্বেব দুর্লভম্

দুষ্প্রাপং খলু বিপ্রত্বং প্রাপ্তং দুরনুপালনম্
দুরবাপমবাপ্যৈতন্নানুতিষ্ঠন্তি মানবাঃ

একারামো হ্যহং শক্র নির্দ্বংদ্বো নিষ্পরিগ্রহঃ
অহিংসাদমদানস্থঃ কথং নার্হামি বিপ্রতাম্

যথাকামবিহারী স্যাং কামরূপী বিহংগমঃ
ব্রহ্মক্ষত্রাবিরোধেন পূজাং চ প্রাপ্নুয়ামহম্
যথা মমাক্ষয়া কীর্তির্ভবেচ্চাপি পুরংদর

ইন্দ্র উবাচ
ছন্দোদেব ইতি খ্যাতঃ স্ত্রীণাং পূজ্যো ভবিষ্যসি

ভীষ্ম উবাচ
এবং তস্মৈ বরং দত্ত্বা বাসবোঽন্তরধীয়ত
প্রাণাংস্ত্যক্ত্বা মতঙ্গোঽপি প্রাপ তত্স্থানমুত্তমম্

এবমেতত্পরং স্থানং ব্রাহ্মণ্যং নাম ভারত
তচ্চ দুষ্প্রাপমিহ বৈ মহেন্দ্রবচনং যথা