অধ্যায় 29

29.1

ভীষ্ম উবাচ
এবমুক্তো মতঙ্গস্তু সংশিতাত্মা যতব্রতঃ
অতিষ্ঠদেকপাদেন বর্ষাণাং শতমচ্যুত

তমুবাচ ততঃ শক্রঃ পুনরেব মহায়শাঃ
মতঙ্গ পরমং স্থানং প্রার্থয়ন্নতিদুর্লভম্

মা কৃথাঃ সাহসং পুত্র নৈষ ধর্মপথস্তব
অপ্রাপ্যং প্রার্থয়ানো হি নচিরাদ্বিনশিষ্যসি

মতঙ্গ পরমং স্থানং বার্যমাণো ময়া সকৃৎ
চিকীর্ষস্যেব তপসা সর্বথা ন ভবিষ্যসি

তির্যগ্যোনিগতঃ সর্বো মানুষ্যং যদি গচ্ছতি
স জায়তে পুল্কসো বা চণ্ডালো বা কদাচন

পুংশ্চলঃ পাপয়োনির্বা যঃ কশ্চিদিহ লক্ষ্যতে
স তস্যামেব সুচিরং মতঙ্গ পরিবর্ততে

ততো দশগুণে কালে লভতে শূদ্রতামপি
শূদ্রয়োনাবপি ততো বহুশঃ পরিবর্ততে

ততস্ত্রিংশদ্গুণে কালে লভতে বৈশ্যতামপি
বৈশ্যতায়াং চিরং কালং তত্রৈব পরিবর্ততে

ততঃ ষষ্টিগুণে কালে রাজন্যো নাম জায়তে
রাজন্যত্বে চিরং কালং তত্রৈব পরিবর্ততে

ততঃ ষষ্টিগুণে কালে লভতে ব্রহ্মবন্ধুতাম্
ব্রহ্মবন্ধুশ্চিরং কালং তত্রৈব পরিবর্ততে

ততস্তু দ্বিশতে কালে লভতে কাণ্ডপৃষ্ঠতাম্
কাণ্ডপৃষ্ঠশ্চিরং কালং তত্রৈব পরিবর্ততে

ততস্তু ত্রিশতে কালে লভতে দ্বিজতামপি
তাং চ প্রাপ্য চিরং কালং তত্রৈব পরিবর্ততে

ততশ্চতুঃশতে কালে শ্রোত্রিয়ো নাম জায়তে
শ্রোত্রিয়ত্বে চিরং কালং তত্রৈব পরিবর্ততে

তদৈব ক্রোধহর্ষৌ চ কামদ্বেষৌ চ পুত্রক
অতিমানাতিবাদৌ তমাবিশন্তি দ্বিজাধমম্

তাংশ্চেজ্জয়তি শত্রূন্স তদা প্রাপ্নোতি সদ্গতিম্
অথ তে বৈ জয়ন্ত্যেনং তালাগ্রাদিব পাত্যতে

মতঙ্গ সংপ্রধার্যৈতদ্যদহং ত্বামচূচুদম্
বৃণীষ্ব কামমন্যং ত্বং ব্রাহ্মণ্যং হি সুদুর্লভম্