Utshovঅধ্যায় 28
28.1
যুধিষ্ঠির উবাচ
প্রজ্ঞাশ্রুতাভ্যাং বৃত্তেন শীলেন চ যথা ভবান্
গুণৈঃ সমুদিতঃ সর্বৈর্বয়সা চ সমন্বিতঃ
তস্মাদ্ভবন্তং পৃচ্ছামি ধর্মং ধর্মভৃতাং বর
28.2
ক্ষত্রিয়ো যদি বা বৈশ্যঃ শূদ্রো বা রাজসত্তম
ব্রাহ্মণ্যং প্রাপ্নুয়াত্কেন তন্মে ব্যাখ্যাতুমর্হসি
28.3
তপসা বা সুমহতা কর্মণা বা শ্রুতেন বা
ব্রাহ্মণ্যমথ চেদিচ্ছেত্তন্মে ব্রূহি পিতামহ
28.4
ভীষ্ম উবাচ
ব্রাহ্মণ্যং তাত দুষ্প্রাপং বর্ণৈঃ ক্ষত্রাদিভিস্ত্রিভিঃ
পরং হি সর্বভূতানাং স্থানমেতদ্যুধিষ্ঠির
28.5
বহ্বীস্তু সংসরন্যোনীর্জায়মানঃ পুনঃ পুনঃ
পর্যায়ে তাত কস্মিংশ্চিদ্ব্রাহ্মণো নাম জায়তে
28.6
অত্রাপ্যুদাহরন্তীমমিতিহাসং পুরাতনম্
মতঙ্গস্য চ সংবাদং গর্দভ্যাশ্চ যুধিষ্ঠির
28.7
দ্বিজাতেঃ কস্যচিত্তাত তুল্যবর্ণঃ সুতঃ প্রভুঃ
মতঙ্গো নাম নাম্নাভূত্সর্বৈঃ সমুদিতো গুণৈঃ
28.8
স যজ্ঞকারঃ কৌন্তেয় পিত্রা সৃষ্টঃ পরংতপ
প্রায়াদ্গর্দভয়ুক্তেন রথেনেহাশুগামিনা
28.9
স বালং গর্দভং রাজন্বহন্তং মাতুরন্তিকে
নিরবিধ্যত্প্রতোদেন নাসিকায়াং পুনঃ পুনঃ
28.10
তং তু তীব্রব্রণং দৃষ্ট্বা গর্দভী পুত্রগৃদ্ধিনী
উবাচ মা শুচঃ পুত্র চণ্ডালস্ত্বাধিতিষ্ঠতি
28.11
ব্রাহ্মণে দারুণং নাস্তি মৈত্রো ব্রাহ্মণ উচ্যতে
আচার্যঃ সর্বভূতানাং শাস্তা কিং প্রহরিষ্যতি
28.12
অয়ং তু পাপপ্রকৃতির্বালে ন কুরুতে দয়াম্
স্বয়োনিং মানয়ত্যেষ ভাবো ভাবং নিগচ্ছতি
28.13
এতচ্ছ্রুত্বা মতঙ্গস্তু দারুণং রাসভীবচঃ
অবতীর্য রথাত্তূর্ণং রাসভীং প্রত্যভাষত
28.14
ব্রূহি রাসভি কল্যাণি মাতা মে যেন দূষিতা
কথং মাং বেত্সি চণ্ডালং ক্ষিপ্রং রাসভি শংস মে
28.15
কেন জাতোঽস্মি চণ্ডালো ব্রাহ্মণ্যং যেন মেঽনশৎ
তত্ত্বেনৈতন্মহাপ্রাজ্ঞে ব্রূহি সর্বমশেষতঃ
28.16
গর্দভ্যুবাচ
ব্রাহ্মণ্যাং বৃষলেন ত্বং মত্তায়াং নাপিতেন হ
জাতস্ত্বমসি চণ্ডালো ব্রাহ্মণ্যং তেন তেঽনশৎ
28.17
এবমুক্তো মতঙ্গস্তু প্রত্যুপায়াদ্গৃহং প্রতি
তমাগতমভিপ্রেক্ষ্য পিতা বাক্যমথাব্রবীৎ
28.18
ময়া ত্বং যজ্ঞসংসিদ্ধৌ নিয়ুক্তো গুরুকর্মণি
কস্মাত্প্রতিনিবৃত্তোঽসি কচ্চিন্ন কুশলং তব
28.19
মতঙ্গ উবাচ
অয়োনিরগ্র্যয়োনির্বা যঃ স্যাত্স কুশলী ভবেৎ
কুশলং তু কুতস্তস্য যস্যেয়ং জননী পিতঃ
28.20
ব্রাহ্মণ্যাং বৃষলাজ্জাতং পিতর্বেদয়তীহ মাম্
অমানুষী গর্দভীয়ং তস্মাত্তপ্স্যে তপো মহৎ
28.21
এবমুক্ত্বা স পিতরং প্রতস্থে কৃতনিশ্চয়ঃ
ততো গত্বা মহারণ্যমতপ্যত মহত্তপঃ
28.22
ততঃ সংতাপয়ামাস বিবুধাংস্তপসান্বিতঃ
মতঙ্গঃ সুসুখং প্রেপ্সুঃ স্থানং সুচরিতাদপি
28.23
তং তথা তপসা যুক্তমুবাচ হরিবাহনঃ
মতঙ্গ তপ্যসে কিং ত্বং ভোগানুত্সৃজ্য মানুষান্
28.24
বরং দদানি তে হন্ত বৃণীষ্ব ত্বং যদিচ্ছসি
যচ্চাপ্যবাপ্যমন্যত্তে সর্বং প্রব্রূহি মাচিরম্
28.25
মতঙ্গ উবাচ
ব্রাহ্মণ্যং কাময়ানোঽহমিদমারব্ধবাংস্তপঃ
গচ্ছেয়ং তদবাপ্যেহ বর এষ বৃতো ময়া
28.26
এতচ্ছ্রুত্বা তু বচনং তমুবাচ পুরংদরঃ
ব্রাহ্মণ্যং প্রার্থয়ানস্ত্বমপ্রাপ্যমকৃতাত্মভিঃ
28.27
শ্রেষ্ঠং যত্সর্বভূতেষু তপো যন্নাতিবর্ততে
তদগ্র্যং প্রার্থয়ানস্ত্বমচিরাদ্বিনশিষ্যসি
28.28
দেবতাসুরমর্ত্যেষু যত্পবিত্রং পরং স্মৃতম্
চণ্ডালয়োনৌ জাতেন ন তত্প্রাপ্যং কথংচন