Utshovঅধ্যায় 27
27.1
বৈশংপায়ন উবাচ
বৃহস্পতিসমং বুদ্ধ্যা ক্ষময়া ব্রহ্মণঃ সমম্
পরাক্রমে শক্রসমমাদিত্যসমতেজসম্
27.2
গাঙ্গেয়মর্জুনেনাজৌ নিহতং ভূরিবর্চসম্
ভ্রাতৃভিঃ সহিতোঽন্যৈশ্চ পর্যুপাস্তে যুধিষ্ঠিরঃ
27.3
শয়ানং বীরশয়নে কালাকাঙ্ক্ষিণমচ্যুতম্
আজগ্মুর্ভরতশ্রেষ্ঠং দ্রষ্টুকামা মহর্ষয়ঃ
27.4
অত্রির্বসিষ্ঠোঽথ ভৃগুঃ পুলস্ত্যঃ পুলহঃ ক্রতুঃ
অঙ্গিরা গৌতমোঽগস্ত্যঃ সুমতিঃ স্বায়ুরাত্মবান্
27.5
বিশ্বামিত্রঃ স্থূলশিরাঃ সংবর্তঃ প্রমতির্দমঃ
উশনা বৃহস্পতির্ব্যাসশ্চ্যবনঃ কাশ্যপো ধ্রুবঃ
27.6
দুর্বাসা জমদগ্নিশ্চ মার্কণ্ডেয়োঽথ গালবঃ
ভরদ্বাজশ্চ রৈভ্যশ্চ যবক্রীতস্ত্রিতস্তথা
27.7
স্থূলাক্ষঃ শকলাক্ষশ্চ কণ্বো মেধাতিথিঃ কৃশঃ
নারদঃ পর্বতশ্চৈব সুধন্বাথৈকতো দ্বিতঃ
27.8
নিতংভূর্ভুবনো ধৌম্যঃ শতানন্দোঽকৃতব্রণঃ
জামদগ্ন্যস্তথা রামঃ কাম্যশ্চেত্যেবমাদয়ঃ
সমাগতা মহাত্মানো ভীষ্মং দ্রষ্টুং মহর্ষয়ঃ
27.9
তেষাং মহাত্মনাং পূজামাগতানাং যুধিষ্ঠিরঃ
ভ্রাতৃভিঃ সহিতশ্চক্রে যথাবদনুপূর্বশঃ
27.10
তে পূজিতাঃ সুখাসীনাঃ কথাশ্চক্রুর্মহর্ষয়ঃ
ভীষ্মাশ্রিতাঃ সুমধুরাঃ সর্বেন্দ্রিয়মনোহরাঃ
27.11
ভীষ্মস্তেষাং কথাঃ শ্রুত্বা ঋষীণাং ভাবিতাত্মনাম্
মেনে দিবিস্থমাত্মানং তুষ্ট্যা পরময়া যুতঃ
27.12
ততস্তে ভীষ্মমামন্ত্র্য পাণ্ডবাংশ্চ মহর্ষয়ঃ
অন্তর্ধানং গতাঃ সর্বে সর্বেষামেব পশ্যতাম্
27.13
তানৃষীন্সুমহাভাগানন্তর্ধানগতানপি
পাণ্ডবাস্তুষ্টুবুঃ সর্বে প্রণেমুশ্চ মুহুর্মুহুঃ
27.14
প্রসন্নমনসঃ সর্বে গাঙ্গেয়ং কুরুসত্তমাঃ
উপতস্থুর্যথোদ্যন্তমাদিত্যং মন্ত্রকোবিদাঃ
27.15
প্রভাবাত্তপসস্তেষামৃষীণাং বীক্ষ্য পাণ্ডবাঃ
প্রকাশন্তো দিশঃ সর্বা বিস্ময়ং পরমং যয়ুঃ
27.16
মহাভাগ্যং পরং তেষামৃষীণামনুচিন্ত্য তে
পাণ্ডবাঃ সহ ভীষ্মেণ কথাশ্চক্রুস্তদাশ্রয়াঃ
27.17
কথান্তে শিরসা পাদৌ স্পৃষ্ট্বা ভীষ্মস্য পাণ্ডবঃ
ধর্ম্যং ধর্মসুতঃ প্রশ্নং পর্যপৃচ্ছদ্যুধিষ্ঠিরঃ
27.18
কে দেশাঃ কে জনপদা আশ্রমাঃ কে চ পর্বতাঃ
প্রকৃষ্টাঃ পুণ্যতঃ কাশ্চ জ্ঞেয়া নদ্যঃ পিতামহ
27.19
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
শিলোঞ্ছবৃত্তেঃ সংবাদং সিদ্ধস্য চ যুধিষ্ঠির
27.20
ইমাং কশ্চিত্পরিক্রম্য পৃথিবীং শৈলভূষিতাম্
অসকৃদ্দ্বিপদাং শ্রেষ্ঠঃ শ্রেষ্ঠস্য গৃহমেধিনঃ
27.21
শিলবৃত্তের্গৃহং প্রাপ্তঃ স তেন বিধিনার্চিতঃ
কৃতকৃত্য উপাতিষ্ঠত্সিদ্ধং তমতিথিং তদা
27.22
তৌ সমেত্য মহাত্মানৌ সুখাসীনৌ কথাঃ শুভাঃ
চক্রতুর্বেদসংবদ্ধাস্তচ্ছেষকৃতলক্ষণাঃ
27.23
শিলবৃত্তিঃ কথান্তে তু সিদ্ধমামন্ত্র্য যত্নতঃ
প্রশ্নং পপ্রচ্ছ মেধাবী যন্মাং ত্বং পরিপৃচ্ছসি
27.24
শিলবৃত্তিরুবাচ
কে দেশাঃ কে জনপদাঃ কেঽঽশ্রমাঃ কে চ পর্বতাঃ
প্রকৃষ্টাঃ পুণ্যতঃ কাশ্চ জ্ঞেয়া নদ্যস্তদুচ্যতাম্
27.25
সিদ্ধ উবাচ
তে দেশাস্তে জনপদাস্তেঽঽশ্রমাস্তে চ পর্বতাঃ
যেষাং ভাগীরথী গঙ্গা মধ্যেনৈতি সরিদ্বরা
27.26
তপসা ব্রহ্মচর্যেণ যজ্ঞৈস্ত্যাগেন বা পুনঃ
গতিং তাং ন লভেজ্জন্তুর্গঙ্গাং সংসেব্য যাং লভেৎ
27.27
স্পৃষ্টানি যেষাং গাঙ্গেয়ৈস্তোয়ৈর্গাত্রাণি দেহিনাম্
ন্যস্তানি ন পুনস্তেষাং ত্যাগঃ স্বর্গাদ্বিধীয়তে
27.28
সর্বাণি যেষাং গাঙ্গেয়ৈস্তোয়ৈঃ কৃত্যানি দেহিনাম্
গাং ত্যক্ত্বা মানবা বিপ্র দিবি তিষ্ঠন্তি তেঽচলাঃ
27.29
পূর্বে বয়সি কর্মাণি কৃত্বা পাপানি যে নরাঃ
পশ্চাদ্গঙ্গাং নিষেবন্তে তেঽপি যান্ত্যুত্তমাং গতিম্
27.30
স্নাতানাং শুচিভিস্তোয়ৈর্গাঙ্গেয়ৈঃ প্রয়তাত্মনাম্
ব্যুষ্টির্ভবতি যা পুংসাং ন সা ক্রতুশতৈরপি
27.31
যাবদস্থি মনুষ্যস্য গঙ্গাতোয়েষু তিষ্ঠতি
তাবদ্বর্ষসহস্রাণি স্বর্গং প্রাপ্য মহীয়তে
27.32
অপহত্য তমস্তীব্রং যথা ভাত্যুদয়ে রবিঃ
তথাপহত্য পাপ্মানং ভাতি গঙ্গাজলোক্ষিতঃ
27.33
বিসোমা ইব শর্বর্যো বিপুষ্পাস্তরবো যথা
তদ্বদ্দেশা দিশশ্চৈব হীনা গঙ্গাজলৈঃ শুভৈঃ
27.34
বর্ণাশ্রমা যথা সর্বে স্বধর্মজ্ঞানবর্জিতাঃ
ক্রতবশ্চ যথাসোমাস্তথা গঙ্গাং বিনা জগৎ
27.35
যথা হীনং নভোঽর্কেণ ভূঃ শৈলৈঃ খং চ বায়ুনা
তথা দেশা দিশশ্চৈব গঙ্গাহীনা ন সংশয়ঃ
27.36
ত্রিষু লোকেষু যে কেচিত্প্রাণিনঃ সর্ব এব তে
তর্প্যমাণাঃ পরাং তৃপ্তিং যান্তি গঙ্গাজলৈঃ শুভৈঃ
27.37
যস্তু সূর্যেণ নিষ্টপ্তং গাঙ্গেয়ং পিবতে জলম্
গবাং নির্হারনির্মুক্তাদ্যাবকাত্তদ্বিশিষ্যতে
27.38
ইন্দুব্রতসহস্রং তু চরেদ্যঃ কায়শোধনম্
পিবেদ্যশ্চাপি গঙ্গাম্ভঃ সমৌ স্যাতাং ন বা সমৌ
27.39
তিষ্ঠেদ্যুগসহস্রং তু পাদেনৈকেন যঃ পুমান্
মাসমেকং তু গঙ্গায়াং সমৌ স্যাতাং ন বা সমৌ
27.40
লম্বেতাবাক্শিরা যস্তু যুগানাময়ুতং পুমান্
তিষ্ঠেদ্যথেষ্টং যশ্চাপি গঙ্গায়াং স বিশিষ্যতে
27.41
অগ্নৌ প্রাপ্তং প্রধূয়েত যথা তূলং দ্বিজোত্তম
তথা গঙ্গাবগাঢস্য সর্বং পাপং প্রধূয়তে
27.42
ভূতানামিহ সর্বেষাং দুঃখোপহতচেতসাম্
গতিমন্বেষমাণানাং ন গঙ্গাসদৃশী গতিঃ
27.43
ভবন্তি নির্বিষাঃ সর্পা যথা তার্ক্ষ্যস্য দর্শনাৎ
গঙ্গায়া দর্শনাত্তদ্বত্সর্বপাপৈঃ প্রমুচ্যতে
27.44
অপ্রতিষ্ঠাশ্চ যে কেচিদধর্মশরণাশ্চ যে
তেষাং প্রতিষ্ঠা গঙ্গেহ শরণং শর্ম বর্ম চ
27.45
প্রকৃষ্টৈরশুভৈর্গ্রস্তাননেকৈঃ পুরুষাধমান্
পততো নরকে গঙ্গা সংশ্রিতান্প্রেত্য তারয়েৎ
27.46
তে সংবিভক্তা মুনিভির্নূনং দেবৈঃ সবাসবৈঃ
যেঽভিগচ্ছন্তি সততং গঙ্গামভিগতাং সুরৈঃ
27.47
বিনয়াচারহীনাশ্চ অশিবাশ্চ নরাধমাঃ
তে ভবন্তি শিবা বিপ্র যে বৈ গঙ্গাং সমাশ্রিতাঃ
27.48
যথা সুরাণামমৃতং পিতৄণাং চ যথা স্বধা
সুধা যথা চ নাগানাং তথা গঙ্গাজলং নৃণাম্
27.49
উপাসতে যথা বালা মাতরং ক্ষুধয়ার্দিতাঃ
শ্রেয়স্কামাস্তথা গঙ্গামুপাসন্তীহ দেহিনঃ
27.50
স্বায়ংভুবং যথা স্থানং সর্বেষাং শ্রেষ্ঠমুচ্যতে
স্নাতানাং সরিতাং শ্রেষ্ঠা গঙ্গা তদ্বদিহোচ্যতে
27.51
যথোপজীবিনাং ধেনুর্দেবাদীনাং ধরা স্মৃতা
তথোপজীবিনাং গঙ্গা সর্বপ্রাণভৃতামিহ
27.52
দেবাঃ সোমার্কসংস্থানি যথা সত্রাদিভির্মখৈঃ
অমৃতান্যুপজীবন্তি তথা গঙ্গাজলং নরাঃ
27.53
জাহ্নবীপুলিনোত্থাভিঃ সিকতাভিঃ সমুক্ষিতঃ
মন্যতে পুরুষোঽঽত্মানং দিবিষ্ঠমিব শোভিতম্
27.54
জাহ্নবীতীরসংভূতাং মৃদং মূর্ধ্না বিভর্তি যঃ
বিভর্তি রূপং সোঽর্কস্য তমোনাশাত্সুনির্মলম্
27.55
গঙ্গোর্মিভিরথো দিগ্ধঃ পুরুষং পবনো যদা
স্পৃশতে সোঽপি পাপ্মানং সদ্য এবাপমার্জতি
27.56
ব্যসনৈরভিতপ্তস্য নরস্য বিনশিষ্যতঃ
গঙ্গাদর্শনজা প্রীতির্ব্যসনান্যপকর্ষতি
27.57
হংসারাবৈঃ কোকরবৈ রবৈরন্যৈশ্চ পক্ষিণাম্
পস্পর্ধ গঙ্গা গন্ধর্বান্পুলিনৈশ্চ শিলোচ্চয়ান্
27.58
হংসাদিভিঃ সুবহুভির্বিবিধৈঃ পক্ষিভির্বৃতাম্
গঙ্গাং গোকুলসংবাধাং দৃষ্ট্বা স্বর্গোঽপি বিস্মৃতঃ
27.59
ন সা প্রীতির্দিবিষ্ঠস্য সর্বকামানুপাশ্নতঃ
অভবদ্যা পরা প্রীতির্গঙ্গায়াঃ পুলিনে নৃণাম্
27.60
বাঙ্মনঃকর্মজৈর্গ্রস্তঃ পাপৈরপি পুমানিহ
বীক্ষ্য গঙ্গাং ভবেত্পূতস্তত্র মে নাস্তি সংশয়ঃ
27.61
সপ্তাবরান্সপ্ত পরান্পিতৄংস্তেভ্যশ্চ যে পরে
পুমাংস্তারয়তে গঙ্গাং বীক্ষ্য স্পৃষ্ট্বাবগাহ্য চ
27.62
শ্রুতাভিলষিতা দৃষ্টা স্পৃষ্টা পীতাবগাহিতা
গঙ্গা তারয়তে নৄণামুভৌ বংশৌ বিশেষতঃ
27.63
দর্শনাত্স্পর্শনাত্পানাত্তথা গঙ্গেতি কীর্তনাৎ
পুনাত্যপুণ্যান্পুরুষাঞ্শতশোঽথ সহস্রশঃ
27.64
য ইচ্ছেত্সফলং জন্ম জীবিতং শ্রুতমেব চ
স পিতৄংস্তর্পয়েদ্গঙ্গামভিগম্য সুরাংস্তথা
27.65
ন সুতৈর্ন চ বিত্তেন কর্মণা ন চ তত্ফলম্
প্রাপ্নুয়াত্পুরুষোঽত্যন্তং গঙ্গাং প্রাপ্য যদাপ্নুয়াৎ
27.66
জাত্যন্ধৈরিহ তুল্যাস্তে মৃতৈঃ পঙ্গুভিরেব চ
সমর্থা যে ন পশ্যন্তি গঙ্গাং পুণ্যজলাং শিবাম্
27.67
ভূতভব্যভবিষ্যজ্ঞৈর্মহর্ষিভিরুপস্থিতাম্
দেবৈঃ সেন্দ্রৈশ্চ কো গঙ্গাং নোপসেবেত মানবঃ
27.68
বানপ্রস্থৈর্গৃহস্থৈশ্চ যতিভির্ব্রহ্মচারিভিঃ
বিদ্যাবদ্ভিঃ শ্রিতাং গঙ্গাং পুমান্কো নাম নাশ্রয়েৎ
27.69
উত্ক্রামদ্ভিশ্চ যঃ প্রাণৈঃ প্রয়তঃ শিষ্টসংমতঃ
চিন্তয়েন্মনসা গঙ্গাং স গতিং পরমাং লভেৎ
27.70
ন ভয়েভ্যো ভয়ং তস্য ন পাপেভ্যো ন রাজতঃ
আ দেহপতনাদ্গঙ্গামুপাস্তে যঃ পুমানিহ
27.71
গগনাদ্যাং মহাপুণ্যাং পতন্তীং বৈ মহেশ্বরঃ
দধার শিরসা দেবীং তামেব দিবি সেবতে
27.72
অলংকৃতাস্ত্রয়ো লোকাঃ পথিভির্বিমলৈস্ত্রিভিঃ
যস্তু তস্যা জলং সেবেত্কৃতকৃত্যঃ পুমান্ভবেৎ
27.73
দিবি জ্যোতির্যথাদিত্যঃ পিতৄণাং চৈব চন্দ্রমাঃ
দেবেশশ্চ যথা নৄণাং গঙ্গেহ সরিতাং তথা
27.74
মাত্রা পিত্রা সুতৈর্দারৈর্বিয়ুক্তস্য ধনেন বা
ন ভবেদ্ধি তথা দুঃখং যথা গঙ্গাবিয়োগজম্
27.75
নারণ্যৈর্নেষ্টবিষয়ৈর্ন সুতৈর্ন ধনাগমৈঃ
তথা প্রসাদো ভবতি গঙ্গাং বীক্ষ্য যথা নৃণাম্
27.76
পূর্ণমিন্দুং যথা দৃষ্ট্বা নৃণাং দৃষ্টিঃ প্রসীদতি
গঙ্গাং ত্রিপথগাং দৃষ্ট্বা তথা দৃষ্টিঃ প্রসীদতি
27.77
তদ্ভাবস্তদ্গতমনাস্তন্নিষ্ঠস্তত্পরায়ণঃ
গঙ্গাং যোঽনুগতো ভক্ত্যা স তস্যাঃ প্রিয়তাং ব্রজেৎ
27.78
ভূঃস্থৈঃ খস্থৈর্দিবিষ্ঠৈশ্চ ভূতৈরুচ্চাবচৈরপি
গঙ্গা বিগাহ্যা সততমেতত্কার্যতমং সতাম্
27.79
ত্রিষু লোকেষু পুণ্যত্বাদ্গঙ্গায়াঃ প্রথিতং যশঃ
যত্পুত্রান্সগরস্যৈষা ভস্মাখ্যাননয়দ্দিবম্
27.80
বায্বীরিতাভিঃ সুমহাস্বনাভি;র্দ্রুতাভিরত্যর্থসমুচ্ছ্রিতাভিঃ
গঙ্গোর্মিভির্ভানুমতীভিরিদ্ধঃ; সহস্ররশ্মিপ্রতিমো বিভাতি
27.81
পয়স্বিনীং ঘৃতিনীমত্যুদারাং; সমৃদ্ধিনীং বেগিনীং দুর্বিগাহ্যাম্
গঙ্গাং গত্বা যৈঃ শরীরং বিসৃষ্টং; গতা ধীরাস্তে বিবুধৈঃ সমত্বম্
27.82
অন্ধাঞ্জডান্দ্রব্যহীনাংশ্চ গঙ্গা; যশস্বিনী বৃহতী বিশ্বরূপা
দেবৈঃ সেন্দ্রৈর্মুনিভির্মানবৈশ্চ; নিষেবিতা সর্বকামৈর্যুনক্তি
27.83
ঊর্জাবতীং মধুমতীং মহাপুণ্যাং ত্রিবর্ত্মগাম্
ত্রিলোকগোপ্ত্রীং যে গঙ্গাং সংশ্রিতাস্তে দিবং গতাঃ
27.84
যো বত্স্যতি দ্রক্ষ্যতি বাপি মর্ত্য;স্তস্মৈ প্রয়চ্ছন্তি সুখানি দেবাঃ
তদ্ভাবিতাঃ স্পর্শনে দর্শনে য;স্তস্মৈ দেবা গতিমিষ্টাং দিশন্তি
27.85
দক্ষাং পৃথ্বীং বৃহতীং বিপ্রকৃষ্টাং; শিবামৃতাং সুরসাং সুপ্রসন্নাম্
বিভাবরীং সর্বভূতপ্রতিষ্ঠাং; গঙ্গাং গতা যে ত্রিদিবং গতাস্তে
27.86
খ্যাতির্যস্যাঃ খং দিবং গাং চ নিত্যং; পুরা দিশো বিদিশশ্চাবতস্থে
তস্যা জলং সেব্য সরিদ্বরায়া; মর্ত্যাঃ সর্বে কৃতকৃত্যা ভবন্তি
27.87
ইয়ং গঙ্গেতি নিয়তং প্রতিষ্ঠা; গুহস্য রুক্মস্য চ গর্ভয়োষা
প্রাতস্ত্রিমার্গা ঘৃতবহা বিপাপ্মা; গঙ্গাবতীর্ণা বিয়তো বিশ্বতোয়া
27.88
সুতাবনীধ্রস্য হরস্য ভার্যা; দিবো ভুবশ্চাপি কক্ষ্যানুরূপা
ভব্যা পৃথিব্যা ভাবিনী ভাতি রাজ;ন্গঙ্গা লোকানাং পুণ্যদা বৈ ত্রয়াণাম্
27.89
মধুপ্রবাহা ঘৃতরাগোদ্ধৃতাভি;র্মহোর্মিভিঃ শোভিতা ব্রাহ্মণৈশ্চ
দিবশ্চ্যুতা শিরসাত্তা ভবেন; গঙ্গাবনীধ্রাস্ত্রিদিবস্য মালা
27.90
যোনির্বরিষ্ঠা বিরজা বিতন্বী; শুষ্মা ইরা বারিবহা যশোদা
বিশ্বাবতী চাকৃতিরিষ্টিরিদ্ধা; গঙ্গোক্ষিতানাং ভুবনস্য পন্থাঃ
27.91
ক্ষান্ত্যা মহ্যা গোপনে ধারণে চ; দীপ্ত্যা কৃশানোস্তপনস্য চৈব
তুল্যা গঙ্গা সংমতা ব্রাহ্মণানাং; গুহস্য ব্রহ্মণ্যতয়া চ নিত্যম্
27.92
ঋষিষ্টুতাং বিষ্ণুপদীং পুরাণীং; সুপুণ্যতোয়াং মনসাপি লোকে
সর্বাত্মনা জাহ্নবীং যে প্রপন্না;স্তে ব্রহ্মণঃ সদনং সংপ্রয়াতাঃ
27.93
লোকানিমান্নয়তি যা জননীব পুত্রা;ন্সর্বাত্মনা সর্বগুণোপপন্না
স্বস্থানমিষ্টমিহ ব্রাহ্মমভীপ্সমানৈ;র্গঙ্গা সদৈবাত্মবশৈরুপাস্যা
27.94
উস্রাং জুষ্টাং মিষতীং বিশ্বতোয়া;মিরাং বজ্রীং রেবতীং ভূধরাণাম্
শিষ্টাশ্রয়ামমৃতাং ব্রহ্মকান্তাং; গঙ্গাং শ্রয়েদাত্মবান্সিদ্ধিকামঃ
27.95
প্রসাদ্য দেবান্সবিভূন্সমস্তা;ন্ভগীরথস্তপসোগ্রেণ গঙ্গাম্
গামানয়ত্তামভিগম্য শশ্ব;ন্পুমান্ভয়ং নেহ নামুত্র বিদ্যাৎ
27.96
উদাহৃতঃ সর্বথা তে গুণানাং; ময়ৈকদেশঃ প্রসমীক্ষ্য বুদ্ধ্যা
শক্তির্ন মে কাচিদিহাস্তি বক্তুং; গুণান্সর্বান্পরিমাতুং তথৈব
27.97
মেরোঃ সমুদ্রস্য চ সর্বরত্নৈঃ; সংখ্যোপলানামুদকস্য বাপি
বক্তুং শক্যং নেহ গঙ্গাজলানাং; গুণাখ্যানং পরিমাতুং তথৈব
27.98
তস্মাদিমান্পরয়া শ্রদ্ধয়োক্তা;ন্গুণান্সর্বাঞ্জাহ্নবীজাংস্তথৈব
ভজেদ্বাচা মনসা কর্মণা চ; ভক্ত্যা যুক্তঃ পরয়া শ্রদ্দধানঃ
27.99
লোকানিমাংস্ত্রীন্যশসা বিতত্য; সিদ্ধিং প্রাপ্য মহতীং তাং দুরাপাম্
গঙ্গাকৃতানচিরেণৈব লোকা;ন্যথেষ্টমিষ্টান্বিচরিষ্যসি ত্বম্
27.100
তব মম চ গুণৈর্মহানুভাবা; জুষতু মতিং সততং স্বধর্ময়ুক্তৈঃ
অভিগতজনবত্সলা হি গঙ্গা; ভজতি যুনক্তি সুখৈশ্চ ভক্তিমন্তম্
27.101
ভীষ্ম উবাচ
ইতি পরমমতির্গুণাননেকা;ঞ্শিলরতয়ে ত্রিপথানুয়োগরূপান্
বহুবিধমনুশাস্য তথ্যরূপা;ন্গগনতলং দ্যুতিমান্বিবেশ সিদ্ধঃ
27.102
শিলবৃত্তিস্তু সিদ্ধস্য বাক্যৈঃ সংবোধিতস্তদা
গঙ্গামুপাস্য বিধিবত্সিদ্ধিং প্রাপ্তঃ সুদুর্লভাম্
27.103
তস্মাত্ত্বমপি কৌন্তেয় ভক্ত্যা পরময়া যুতঃ
গঙ্গামভ্যেহি সততং প্রাপ্স্যসে সিদ্ধিমুত্তমাম্
27.104
বৈশংপায়ন উবাচ
শ্রুত্বেতিহাসং ভীষ্মোক্তং গঙ্গায়াঃ স্তবসংয়ুতম্
যুধিষ্ঠিরঃ পরাং প্রীতিমগচ্ছদ্ভ্রাতৃভিঃ সহ
27.105
ইতিহাসমিমং পুণ্যং শৃণুয়াদ্যঃ পঠেত বা
গঙ্গায়াঃ স্তবসংয়ুক্তং স মুচ্যেত্সর্বকিল্বিষৈঃ