Utshovঅধ্যায় 26
26.1
যুধিষ্ঠির উবাচ
তীর্থানাং দর্শনং শ্রেয়ঃ স্নানং চ ভরতর্ষভ
শ্রবণং চ মহাপ্রাজ্ঞ শ্রোতুমিচ্ছামি তত্ত্বতঃ
26.2
পৃথিব্যাং যানি তীর্থানি পুণ্যানি ভরতর্ষভ
বক্তুমর্হসি মে তানি শ্রোতাস্মি নিয়তঃ প্রভো
26.3
ভীষ্ম উবাচ
ইমমঙ্গিরসা প্রোক্তং তীর্থবংশং মহাদ্যুতে
শ্রোতুমর্হসি ভদ্রং তে প্রাপ্স্যসে ধর্মমুত্তমম্
26.4
তপোবনগতং বিপ্রমভিগম্য মহামুনিম্
পপ্রচ্ছাঙ্গিরসং বীর গৌতমঃ সংশিতব্রতঃ
26.5
অস্তি মে ভগবন্কশ্চিত্তীর্থেভ্যো ধর্মসংশয়ঃ
তত্সর্বং শ্রোতুমিচ্ছামি তন্মে শংস মহামুনে
26.6
উপস্পৃশ্য ফলং কিং স্যাত্তেষু তীর্থেষু বৈ মুনে
প্রেত্যভাবে মহাপ্রাজ্ঞ তদ্যথাস্তি তথা বদ
26.7
অঙ্গিরা উবাচ
সপ্তাহং চন্দ্রভাগাং বৈ বিতস্তামূর্মিমালিনীম্
বিগাহ্য বৈ নিরাহারো নির্মমো মুনিবদ্ভবেৎ
26.8
কাশ্মীরমণ্ডলে নদ্যো যাঃ পতন্তি মহানদম্
তা নদীঃ সিন্ধুমাসাদ্য শীলবান্স্বর্গমাপ্নুয়াৎ
26.9
পুষ্করং চ প্রভাসং চ নৈমিষং সাগরোদকম্
দেবিকামিন্দ্রমার্গং চ স্বর্ণবিন্দুং বিগাহ্য চ
বিবোধ্যতে বিমানস্থঃ সোঽপ্সরোভিরভিষ্টুতঃ
26.10
হিরণ্যবিন্দুং বিক্ষোভ্য প্রয়তশ্চাভিবাদ্য তম্
কুশেশয়ং চ দেবত্বং পূয়তে তস্য কিল্বিষম্
26.11
ইন্দ্রতোয়াং সমাসাদ্য গন্ধমাদনসংনিধৌ
করতোয়াং কুরঙ্গেষু ত্রিরাত্রোপোষিতো নরঃ
অশ্বমেধমবাপ্নোতি বিগাহ্য নিয়তঃ শুচিঃ
26.12
গঙ্গাদ্বারে কুশাবর্তে বিল্বকে নেমিপর্বতে
তথা কনখলে স্নাত্বা ধূতপাপ্মা দিবং ব্রজেৎ
26.13
অপাং হ্রদ উপস্পৃশ্য বাজপেয়ফলং লভেৎ
ব্রহ্মচারী জিতক্রোধঃ সত্যসংধস্ত্বহিংসকঃ
26.14
যত্র ভাগীরথী গঙ্গা ভজতে দিশমুত্তরাম্
মহেশ্বরস্য নিষ্ঠানে যো নরস্ত্বভিষিচ্যতে
একমাসং নিরাহারঃ স্বয়ং পশ্যতি দেবতাঃ
26.15
সপ্তগঙ্গে ত্রিগঙ্গে চ ইন্দ্রমার্গে চ তর্পয়ন্
সুধাং বৈ লভতে ভোক্তুং যো নরো জায়তে পুনঃ
26.16
মহাশ্রম উপস্পৃশ্য যোঽগ্নিহোত্রপরঃ শুচিঃ
একমাসং নিরাহারঃ সিদ্ধিং মাসেন স ব্রজেৎ
26.17
মহাহ্রদ উপস্পৃশ্য ভৃগুতুঙ্গে ত্বলোলুপঃ
ত্রিরাত্রোপোষিতো ভূত্বা মুচ্যতে ব্রহ্মহত্যয়া
26.18
কন্যাকূপ উপস্পৃশ্য বলাকায়াং কৃতোদকঃ
দেবেষু কীর্তিং লভতে যশসা চ বিরাজতে
26.19
দেশকাল উপস্পৃশ্য তথা সুন্দরিকাহ্রদে
অশ্বিভ্যাং রূপবর্চস্যং প্রেত্য বৈ লভতে নরঃ
26.20
মহাগঙ্গামুপস্পৃশ্য কৃত্তিকাঙ্গারকে তথা
পক্ষমেকং নিরাহারঃ স্বর্গমাপ্নোতি নির্মলঃ
26.21
বৈমানিক উপস্পৃশ্য কিঙ্কিণীকাশ্রমে তথা
নিবাসেঽপ্সরসাং দিব্যে কামচারী মহীয়তে
26.22
কালিকাশ্রমমাসাদ্য বিপাশায়াং কৃতোদকঃ
ব্রহ্মচারী জিতক্রোধস্ত্রিরাত্রান্মুচ্যতে ভবাৎ
26.23
আশ্রমে কৃত্তিকানাং তু স্নাত্বা যস্তর্পয়েত্পিতৄন্
তোষয়িত্বা মহাদেবং নির্মলঃ স্বর্গমাপ্নুয়াৎ
26.24
মহাপুর উপস্পৃশ্য ত্রিরাত্রোপোষিতো নরঃ
ত্রসানাং স্থাবরাণাং চ দ্বিপদানাং ভয়ং ত্যজেৎ
26.25
দেবদারুবনে স্নাত্বা ধূতপাপ্মা কৃতোদকঃ
দেবলোকমবাপ্নোতি সপ্তরাত্রোষিতঃ শুচিঃ
26.26
কৌশন্তে চ কুশস্তম্বে দ্রোণশর্মপদে তথা
আপঃপ্রপতনে স্নাতঃ সেব্যতে সোঽপ্সরোগণৈঃ
26.27
চিত্রকূটে জনস্থানে তথা মন্দাকিনীজলে
বিগাহ্য বৈ নিরাহারো রাজলক্ষ্মীং নিগচ্ছতি
26.28
শ্যামায়াস্ত্বাশ্রমং গত্বা উষ্য চৈবাভিষিচ্য চ
ত্রীংস্ত্রিরাত্রান্স সংধায় গন্ধর্বনগরে বসেৎ
26.29
রমণ্যাং চ উপস্পৃশ্য তথা বৈ গন্ধতারিকে
একমাসং নিরাহারস্ত্বন্তর্ধানফলং লভেৎ
26.30
কৌশিকীদ্বারমাসাদ্য বায়ুভক্ষস্ত্বলোলুপঃ
একবিংশতিরাত্রেণ স্বর্গমারোহতে নরঃ
26.31
মতঙ্গবাপ্যাং যঃ স্নায়াদেকরাত্রেণ সিধ্যতি
বিগাহতি হ্যনালম্বমন্ধকং বৈ সনাতনম্
26.32
নৈমিষে স্বর্গতীর্থে চ উপস্পৃশ্য জিতেন্দ্রিয়ঃ
ফলং পুরুষমেধস্য লভেন্মাসং কৃতোদকঃ
26.33
গঙ্গাহ্রদ উপস্পৃশ্য তথা চৈবোত্পলাবনে
অশ্বমেধমবাপ্নোতি তত্র মাসং কৃতোদকঃ
26.34
গঙ্গায়মুনয়োস্তীর্থে তথা কালংজরে গিরৌ
ষষ্টিহ্রদ উপস্পৃশ্য দানং নান্যদ্বিশিষ্যতে
26.35
দশ তীর্থসহস্রাণি তিস্রঃ কোট্যস্তথাপরাঃ
সমাগচ্ছন্তি মাঘ্যাং তু প্রয়াগে ভরতর্ষভ
26.36
মাঘমাসং প্রয়াগে তু নিয়তঃ সংশিতব্রতঃ
স্নাত্বা তু ভরতশ্রেষ্ঠ নির্মলঃ স্বর্গমাপ্নুয়াৎ
26.37
মরুদ্গণ উপস্পৃশ্য পিতৄণামাশ্রমে শুচিঃ
বৈবস্বতস্য তীর্থে চ তীর্থভূতো ভবেন্নরঃ
26.38
তথা ব্রহ্মশিরো গত্বা ভাগীরথ্যাং কৃতোদকঃ
একমাসং নিরাহারঃ সোমলোকমবাপ্নুয়াৎ
26.39
কপোতকে নরঃ স্নাত্বা অষ্টাবক্রে কৃতোদকঃ
দ্বাদশাহং নিরাহারো নরমেধফলং লভেৎ
26.40
মুঞ্জপৃষ্ঠং গয়াং চৈব নিরৃতিং দেবপর্বতম্
তৃতীয়াং ক্রৌঞ্চপাদীং চ ব্রহ্মহত্যা বিশুধ্যতি
26.41
কলশ্যাং বাপ্যুপস্পৃশ্য বেদ্যাং চ বহুশোজলাম্
অগ্নেঃ পুরে নরঃ স্নাত্বা বিশালায়াং কৃতোদকঃ
দেবহ্রদ উপস্পৃশ্য ব্রহ্মভূতো বিরাজতে
26.42
পুরাপবর্তনং নন্দাং মহানন্দাং চ সেব্য বৈ
নন্দনে সেব্যতে দান্তস্ত্বপ্সরোভিরহিংসকঃ
26.43
উর্বশীকৃত্তিকায়োগে গত্বা যঃ সুসমাহিতঃ
লৌহিত্যে বিধিবত্স্নাত্বা পুণ্ডরীকফলং লভেৎ
26.44
রামহ্রদ উপস্পৃশ্য বিশালায়াং কৃতোদকঃ
দ্বাদশাহং নিরাহারঃ কল্মষাদ্বিপ্রমুচ্যতে
26.45
মহাহ্রদ উপস্পৃশ্য শুদ্ধেন মনসা নরঃ
একমাসং নিরাহারো জমদগ্নিগতিং লভেৎ
26.46
বিন্ধ্যে সংতাপ্য চাত্মানং সত্যসংধস্ত্বহিংসকঃ
ষণ্মাসং পদমাস্থায় মাসেনৈকেন শুধ্যতি
26.47
নর্মদায়ামুপস্পৃশ্য তথা সূর্পারকোদকে
একপক্ষং নিরাহারো রাজপুত্রো বিধীয়তে
26.48
জম্বূমার্গে ত্রিভির্মাসৈঃ সংয়তঃ সুসমাহিতঃ
অহোরাত্রেণ চৈকেন সিদ্ধিং সমধিগচ্ছতি
26.49
কোকামুখে বিগাহ্যাপো গত্বা চণ্ডালিকাশ্রমম্
শাকভক্ষশ্চীরবাসাঃ কুমারীর্বিন্দতে দশ
26.50
বৈবস্বতস্য সদনং ন স গচ্ছেত্কদাচন
যস্য কন্যাহ্রদে বাসো দেবলোকং স গচ্ছতি
26.51
প্রভাসে ত্বেকরাত্রেণ অমাবাস্যাং সমাহিতঃ
সিধ্যতেঽত্র মহাবাহো যো নরো জায়তে পুনঃ
26.52
উজ্জানক উপস্পৃশ্য আর্ষ্টিষেণস্য চাশ্রমে
পিঙ্গায়াশ্চাশ্রমে স্নাত্বা সর্বপাপৈঃ প্রমুচ্যতে
26.53
কুল্যায়াং সমুপস্পৃশ্য জপ্ত্বা চৈবাঘমর্ষণম্
অশ্বমেধমবাপ্নোতি ত্রিরাত্রোপোষিতঃ শুচিঃ
26.54
পিণ্ডারক উপস্পৃশ্য একরাত্রোষিতো নরঃ
অগ্নিষ্টোমমবাপ্নোতি প্রভাতাং শর্বরীং শুচিঃ
26.55
তথা ব্রহ্মসরো গত্বা ধর্মারণ্যোপশোভিতম্
পুণ্ডরীকমবাপ্নোতি প্রভাতাং শর্বরীং শুচিঃ
26.56
মৈনাকে পর্বতে স্নাত্বা তথা সংধ্যামুপাস্য চ
কামং জিত্বা চ বৈ মাসং সর্বমেধফলং লভেৎ
26.57
বিখ্যাতো হিমবান্পুণ্যঃ শংকরশ্বশুরো গিরিঃ
আকরঃ সর্বরত্নানাং সিদ্ধচারণসেবিতঃ
26.58
শরীরমুত্সৃজেত্তত্র বিধিপূর্বমনাশকে
অধ্রুবং জীবিতং জ্ঞাত্বা যো বৈ বেদান্তগো দ্বিজঃ
26.59
অভ্যর্চ্য দেবতাস্তত্র নমস্কৃত্য মুনীংস্তথা
ততঃ সিদ্ধো দিবং গচ্ছেদ্ব্রহ্মলোকং সনাতনম্
26.60
কামং ক্রোধং চ লোভং চ যো জিত্বা তীর্থমাবসেৎ
ন তেন কিংচিন্ন প্রাপ্তং তীর্থাভিগমনাদ্ভবেৎ
26.61
যান্যগম্যানি তীর্থানি দুর্গাণি বিষমাণি চ
মনসা তানি গম্যানি সর্বতীর্থসমাসতঃ
26.62
ইদং মেধ্যমিদং ধন্যমিদং স্বর্গ্যমিদং সুখম্
ইদং রহস্যং দেবানামাপ্লাব্যানাং চ পাবনম্
26.63
ইদং দদ্যাদ্দ্বিজাতীনাং সাধূনামাত্মজস্য বা
সুহৃদাং চ জপেত্কর্ণে শিষ্যস্যানুগতস্য বা
26.64
দত্তবান্গৌতমস্যেদমঙ্গিরা বৈ মহাতপাঃ
গুরুভিঃ সমনুজ্ঞাতঃ কাশ্যপেন চ ধীমতা
26.65
মহর্ষীণামিদং জপ্যং পাবনানাং তথোত্তমম্
জপংশ্চাভ্যুত্থিতঃ শশ্বন্নির্মলঃ স্বর্গমাপ্নুয়াৎ
26.66
ইদং যশ্চাপি শৃণুয়াদ্রহস্যং ত্বঙ্গিরোমতম্
উত্তমে চ কুলে জন্ম লভেজ্জাতিং চ সংস্মরেৎ