অধ্যায় 25

25.1

যুধিষ্ঠির উবাচ
ইদং মে তত্ত্বতো রাজন্বক্তুমর্হসি ভারত
অহিংসয়িত্বা কেনেহ ব্রহ্মহত্যা বিধীয়তে

ভীষ্ম উবাচ
ব্যাসমামন্ত্র্য রাজেন্দ্র পুরা যত্পৃষ্টবানহম্
তত্তেঽহং সংপ্রবক্ষ্যামি তদিহৈকমনাঃ শৃণু

চতুর্থস্ত্বং বসিষ্ঠস্য তত্ত্বমাখ্যাহি মে মুনে
অহিংসয়িত্বা কেনেহ ব্রহ্মহত্যা বিধীয়তে

ইতি পৃষ্টো মহারাজ পরাশরশরীরজঃ
অব্রবীন্নিপুণো ধর্মে নিঃসংশয়মনুত্তমম্

ব্রাহ্মণং স্বয়মাহূয় ভিক্ষার্থে কৃশবৃত্তিনম্
ব্রূয়ান্নাস্তীতি যঃ পশ্চাত্তং বিদ্যাদ্ব্রহ্মঘাতিনম্

মধ্যস্থস্যেহ বিপ্রস্য যোঽনূচানস্য ভারত
বৃত্তিং হরতি দুর্বুদ্ধিস্তং বিদ্যাদ্ব্রহ্মঘাতিনম্

গোকুলস্য তৃষার্তস্য জলার্থে বসুধাধিপ
উত্পাদয়তি যো বিঘ্নং তং বিদ্যাদ্ব্রহ্মঘাতিনম্

যঃ প্রবৃত্তাং শ্রুতিং সম্যক্শাস্ত্রং বা মুনিভিঃ কৃতম্
দূষয়ত্যনভিজ্ঞায় তং বিদ্যাদ্ব্রহ্মঘাতিনম্

আত্মজাং রূপসংপন্নাং মহতীং সদৃশে বরে
ন প্রয়চ্ছতি যঃ কন্যাং তং বিদ্যাদ্ব্রহ্মঘাতিনম্

অধর্মনিরতো মূঢো মিথ্যা যো বৈ দ্বিজাতিষু
দদ্যান্মর্মাতিগং শোকং তং বিদ্যাদ্ব্রহ্মঘাতিনম্

চক্ষুষা বিপ্রহীনস্য পঙ্গুলস্য জডস্য বা
হরেত যো বৈ সর্বস্বং তং বিদ্যাদ্ব্রহ্মঘাতিনম্

আশ্রমে বা বনে বা যো গ্রামে বা যদি বা পুরে
অগ্নিং সমুত্সৃজেন্মোহাত্তং বিদ্যাদ্ব্রহ্মঘাতিনম্