Utshovঅধ্যায় 24
24.1
যুধিষ্ঠির উবাচ
শ্রাদ্ধকালে চ দৈবে চ ধর্মে চাপি পিতামহ
ইচ্ছামীহ ত্বয়াখ্যাতং বিহিতং যত্সুরর্ষিভিঃ
24.2
ভীষ্ম উবাচ
দৈবং পূর্বাহ্ণিকে কুর্যাদপরাহ্ণে তু পৈতৃকম্
মঙ্গলাচারসংপন্নঃ কৃতশৌচঃ প্রয়ত্নবান্
24.3
মনুষ্যাণাং তু মধ্যাহ্নে প্রদদ্যাদুপপত্তিতঃ
কালহীনং তু যদ্দানং তং ভাগং রক্ষসাং বিদুঃ
24.4
লঙ্ঘিতং চাবলীঢং চ কলিপূর্বং চ যত্কৃতম্
রজস্বলাভির্দৃষ্টং চ তং ভাগং রক্ষসাং বিদুঃ
24.5
অবঘুষ্টং চ যদ্ভুক্তমব্রতেন চ ভারত
পরামৃষ্টং শুনা চৈব তং ভাগং রক্ষসাং বিদুঃ
24.6
কেশকীটাবপতিতং ক্ষুতং শ্বভিরবেক্ষিতম্
রুদিতং চাবধূতং চ তং ভাগং রক্ষসাং বিদুঃ
24.7
নিরোংকারেণ যদ্ভুক্তং সশস্ত্রেণ চ ভারত
দুরাত্মনা চ যদ্ভুক্তং তং ভাগং রক্ষসাং বিদুঃ
24.8
পরোচ্ছিষ্টং চ যদ্ভুক্তং পরিভুক্তং চ যদ্ভবেৎ
দৈবে পিত্র্যে চ সততং তং ভাগং রক্ষসাং বিদুঃ
24.9
গর্হিতং নিন্দিতং চৈব পরিবিষ্টং সমন্যুনা
দৈবং বাপ্যথ বা পৈত্র্যং তং ভাগং রক্ষসাং বিদুঃ
24.10
মন্ত্রহীনং ক্রিয়াহীনং যচ্ছ্রাদ্ধং পরিবিষ্যতে
ত্রিভির্বর্ণৈর্নরশ্রেষ্ঠ তং ভাগং রক্ষসাং বিদুঃ
24.11
আজ্যাহুতিং বিনা চৈব যত্কিংচিত্পরিবিষ্যতে
দুরাচারৈশ্চ যদ্ভুক্তং তং ভাগং রক্ষসাং বিদুঃ
24.12
যে ভাগা রক্ষসাং প্রোক্তাস্ত উক্তা ভরতর্ষভ
অত ঊর্ধ্বং বিসর্গস্য পরীক্ষাং ব্রাহ্মণে শৃণু
24.13
যাবন্তঃ পতিতা বিপ্রা জডোন্মত্তাস্তথৈব চ
দৈবে বাপ্যথ বা পিত্র্যে রাজন্নার্হন্তি কেতনম্
24.14
শ্বিত্রী কুষ্ঠী চ ক্লীবশ্চ তথা যক্ষ্মহতশ্চ যঃ
অপস্মারী চ যশ্চান্ধো রাজন্নার্হন্তি সত্কৃতিম্
24.15
চিকিত্সকা দেবলকা বৃথানিয়মধারিণঃ
সোমবিক্রয়িণশ্চৈব শ্রাদ্ধে নার্হন্তি কেতনম্
24.16
গায়না নর্তকাশ্চৈব প্লবকা বাদকাস্তথা
কথকা যোধকাশ্চৈব রাজন্নার্হন্তি কেতনম্
24.17
হোতারো বৃষলানাং চ বৃষলাধ্যাপকাস্তথা
তথা বৃষলশিষ্যাশ্চ রাজন্নার্হন্তি কেতনম্
24.18
অনুয়োক্তা চ যো বিপ্রো অনুয়ুক্তশ্চ ভারত
নার্হতস্তাবপি শ্রাদ্ধং ব্রহ্মবিক্রয়িণৌ হি তৌ
24.19
অগ্রণীর্যঃ কৃতঃ পূর্বং বর্ণাবরপরিগ্রহঃ
ব্রাহ্মণঃ সর্ববিদ্যোঽপি রাজন্নার্হতি কেতনম্
24.20
অনগ্নয়শ্চ যে বিপ্রা মৃতনির্যাতকাশ্চ যে
স্তেনাশ্চ পতিতাশ্চৈব রাজন্নার্হন্তি কেতনম্
24.21
অপরিজ্ঞাতপূর্বাশ্চ গণপূর্বাশ্চ ভারত
পুত্রিকাপূর্বপুত্রাশ্চ শ্রাদ্ধে নার্হন্তি কেতনম্
24.22
ঋণকর্তা চ যো রাজন্যশ্চ বার্ধুষিকো দ্বিজঃ
প্রাণিবিক্রয়বৃত্তিশ্চ রাজন্নার্হন্তি কেতনম্
24.23
স্ত্রীপূর্বাঃ কাণ্ডপৃষ্ঠাশ্চ যাবন্তো ভরতর্ষভ
অজপা ব্রাহ্মণাশ্চৈব শ্রাদ্ধে নার্হন্তি কেতনম্
24.24
শ্রাদ্ধে দৈবে চ নির্দিষ্টা ব্রাহ্মণা ভরতর্ষভ
দাতুঃ প্রতিগ্রহীতুশ্চ শৃণুষ্বানুগ্রহং পুনঃ
24.25
চীর্ণব্রতা গুণৈর্যুক্তা ভবেয়ুর্যেঽপি কর্ষকাঃ
সাবিত্রীজ্ঞাঃ ক্রিয়াবন্তস্তে রাজন্কেতনক্ষমাঃ
24.26
ক্ষাত্রধর্মিণমপ্যাজৌ কেতয়েত্কুলজং দ্বিজম্
ন ত্বেব বণিজং তাত শ্রাদ্ধেষু পরিকল্পয়েৎ
24.27
অগ্নিহোত্রী চ যো বিপ্রো গ্রামবাসী চ যো ভবেৎ
অস্তেনশ্চাতিথিজ্ঞশ্চ স রাজন্কেতনক্ষমঃ
24.28
সাবিত্রীং জপতে যস্তু ত্রিকালং ভরতর্ষভ
ভিক্ষাবৃত্তিঃ ক্রিয়াবাংশ্চ স রাজন্কেতনক্ষমঃ
24.29
উদিতাস্তমিতো যশ্চ তথৈবাস্তমিতোদিতঃ
অহিংস্রশ্চাল্পদোষশ্চ স রাজন্কেতনক্ষমঃ
24.30
অকল্ককো হ্যতর্কশ্চ ব্রাহ্মণো ভরতর্ষভ
সসংজ্ঞো ভৈক্ষ্যবৃত্তিশ্চ স রাজন্কেতনক্ষমঃ
24.31
অব্রতী কিতবঃ স্তেনঃ প্রাণিবিক্রয্যথো বণিক্
পশ্চাচ্চ পীতবান্সোমং স রাজন্কেতনক্ষমঃ
24.32
অর্জয়িত্বা ধনং পূর্বং দারুণৈঃ কৃষিকর্মভিঃ
ভবেত্সর্বাতিথিঃ পশ্চাত্স রাজন্কেতনক্ষমঃ
24.33
ব্রহ্মবিক্রয়নির্দিষ্টং স্ত্রিয়া যচ্চার্জিতং ধনম্
অদেয়ং পিতৃদেবেভ্যো যচ্চ ক্লৈব্যাদুপার্জিতম্
24.34
ক্রিয়মাণেঽপবর্গে তু যো দ্বিজো ভরতর্ষভ
ন ব্যাহরতি যদ্যুক্তং তস্যাধর্মো গবানৃতম্
24.35
শ্রাদ্ধস্য ব্রাহ্মণঃ কালঃ প্রাপ্তং দধি ঘৃতং তথা
সোমক্ষয়শ্চ মাংসং চ যদারণ্যং যুধিষ্ঠির
24.36
শ্রাদ্ধাপবর্গে বিপ্রস্য স্বধা বৈ স্বদিতা ভবেৎ
ক্ষত্রিয়স্যাপ্যথো ব্রূয়াত্প্রীয়ন্তাং পিতরস্ত্বিতি
24.37
অপবর্গে তু বৈশ্যস্য শ্রাদ্ধকর্মণি ভারত
অক্ষয্যমভিধাতব্যং স্বস্তি শূদ্রস্য ভারত
24.38
পুণ্যাহবাচনং দৈবে ব্রাহ্মণস্য বিধীয়তে
এতদেব নিরোংকারং ক্ষত্রিয়স্য বিধীয়তে
বৈশ্যস্য চৈব বক্তব্যং প্রীয়ন্তাং দেবতা ইতি
24.39
কর্মণামানুপূর্বীং চ বিধিপূর্বকৃতং শৃণু
জাতকর্মাদিকান্সর্বাংস্ত্রিষু বর্ণেষু ভারত
ব্রহ্মক্ষত্রে হি মন্ত্রোক্তা বৈশ্যস্য চ যুধিষ্ঠির
24.40
বিপ্রস্য রশনা মৌঞ্জী মৌর্বী রাজন্যগামিনী
বাল্বজীত্যেব বৈশ্যস্য ধর্ম এষ যুধিষ্ঠির
24.41
দাতুঃ প্রতিগ্রহীতুশ্চ ধর্মাধর্মাবিমৌ শৃণু
ব্রাহ্মণস্যানৃতেঽধর্মঃ প্রোক্তঃ পাতকসংজ্ঞিতঃ
চতুর্গুণঃ ক্ষত্রিয়স্য বৈশ্যস্যাষ্টগুণঃ স্মৃতঃ
24.42
নান্যত্র ব্রাহ্মণোঽশ্নীয়াত্পূর্বং বিপ্রেণ কেতিতঃ
যবীয়ান্পশুহিংসায়াং তুল্যধর্মো ভবেত্স হি
24.43
অথ রাজন্যবৈশ্যাভ্যাং যদ্যশ্নীয়াত্তু কেতিতঃ
যবীয়ান্পশুহিংসায়াং ভাগার্ধং সমবাপ্নুয়াৎ
24.44
দৈবং বাপ্যথ বা পিত্র্যং যোঽশ্নীয়াদ্ব্রাহ্মণাদিষু
অস্নাতো ব্রাহ্মণো রাজংস্তস্যাধর্মো গবানৃতম্
24.45
আশৌচো ব্রাহ্মণো রাজন্যোঽশ্নীয়াদ্ব্রাহ্মণাদিষু
জ্ঞানপূর্বমথো লোভাত্তস্যাধর্মো গবানৃতম্
24.46
অন্নেনান্নং চ যো লিপ্সেত্কর্মার্থং চৈব ভারত
আমন্ত্রয়তি রাজেন্দ্র তস্যাধর্মোঽনৃতং স্মৃতম্
24.47
অবেদব্রতচারিত্রাস্ত্রিভির্বর্ণৈর্যুধিষ্ঠির
মন্ত্রবত্পরিবিষ্যন্তে তেষ্বধর্মো গবানৃতম্
24.48
যুধিষ্ঠির উবাচ
পিত্র্যং বাপ্যথ বা দৈবং দীয়তে যত্পিতামহ
এতদিচ্ছাম্যহং শ্রোতুং দত্তং যেষু মহাফলম্
24.49
ভীষ্ম উবাচ
যেষাং দারাঃ প্রতীক্ষন্তে সুবৃষ্টিমিব কর্ষকাঃ
উচ্ছেষপরিশেষং হি তান্ভোজয় যুধিষ্ঠির
24.50
চারিত্রনিয়তা রাজন্যে কৃশাঃ কৃশবৃত্তয়ঃ
অর্থিনশ্চোপগচ্ছন্তি তেষু দত্তং মহাফলম্
24.51
তদ্ভক্তাস্তদ্গৃহা রাজংস্তদ্ধনাস্তদপাশ্রয়াঃ
অর্থিনশ্চ ভবন্ত্যর্থে তেষু দত্তং মহাফলম্
24.52
তস্করেভ্যঃ পরেভ্যো বা যে ভয়ার্তা যুধিষ্ঠির
অর্থিনো ভোক্তুমিচ্ছন্তি তেষু দত্তং মহাফলম্
24.53
অকল্ককস্য বিপ্রস্য ভৈক্ষোত্করকৃতাত্মনঃ
বটবো যস্য ভিক্ষন্তি তেভ্যো দত্তং মহাফলম্
24.54
হৃতস্বা হৃতদারাশ্চ যে বিপ্রা দেশসংপ্লবে
অর্থার্থমভিগচ্ছন্তি তেভ্যো দত্তং মহাফলম্
24.55
ব্রতিনো নিয়মস্থাশ্চ যে বিপ্রাঃ শ্রুতসংমতাঃ
তত্সমাপ্ত্যর্থমিচ্ছন্তি তেষু দত্তং মহাফলম্
24.56
অব্যুত্ক্রান্তাশ্চ ধর্মেষু পাষণ্ডসময়েষু চ
কৃশপ্রাণাঃ কৃশধনাস্তেষু দত্তং মহাফলম্
24.57
কৃতসর্বস্বহরণা নির্দোষাঃ প্রভবিষ্ণুভিঃ
স্পৃহয়ন্তি চ ভুক্তান্নং তেষু দত্তং মহাফলম্
24.58
তপস্বিনস্তপোনিষ্ঠাস্তেষাং ভৈক্ষচরাশ্চ যে
অর্থিনঃ কিংচিদিচ্ছন্তি তেষু দত্তং মহাফলম্
24.59
মহাফলবিধির্দানে শ্রুতস্তে ভরতর্ষভ
নিরয়ং যেন গচ্ছন্তি স্বর্গং চৈব হি তচ্ছৃণু
24.60
গুর্বর্থং বাভয়ার্থং বা বর্জয়িত্বা যুধিষ্ঠির
যেঽনৃতং কথয়ন্তি স্ম তে বৈ নিরয়গামিনঃ
24.61
পরদারাভিহর্তারঃ পরদারাভিমর্শিনঃ
পরদারপ্রয়োক্তারস্তে বৈ নিরয়গামিনঃ
24.62
যে পরস্বাপহর্তারঃ পরস্বানাং চ নাশকাঃ
সূচকাশ্চ পরেষাং যে তে বৈ নিরয়গামিনঃ
24.63
প্রপাণাং চ সভানাং চ সংক্রমাণাং চ ভারত
অগারাণাং চ ভেত্তারো নরা নিরয়গামিনঃ
24.64
অনাথাং প্রমদাং বালাং বৃদ্ধাং ভীতাং তপস্বিনীম্
বঞ্চয়ন্তি নরা যে চ তে বৈ নিরয়গামিনঃ
24.65
বৃত্তিচ্ছেদং গৃহচ্ছেদং দারচ্ছেদং চ ভারত
মিত্রচ্ছেদং তথাশায়াস্তে বৈ নিরয়গামিনঃ
24.66
সূচকাঃ সংধিভেত্তারঃ পরবৃত্ত্যুপজীবকাঃ
অকৃতজ্ঞাশ্চ মিত্রাণাং তে বৈ নিরয়গামিনঃ
24.67
পাষণ্ডা দূষকাশ্চৈব সময়ানাং চ দূষকাঃ
যে প্রত্যবসিতাশ্চৈব তে বৈ নিরয়গামিনঃ
24.68
কৃতাশং কৃতনির্বেশং কৃতভক্তং কৃতশ্রমম্
ভেদৈর্যে ব্যপকর্ষন্তি তে বৈ নিরয়গামিনঃ
24.69
পর্যশ্নন্তি চ যে দারানগ্নিভৃত্যাতিথীংস্তথা
উত্সন্নপিতৃদেবেজ্যাস্তে বৈ নিরয়গামিনঃ
24.70
বেদবিক্রয়িণশ্চৈব বেদানাং চৈব দূষকাঃ
বেদানাং লেখকাশ্চৈব তে বৈ নিরয়গামিনঃ
24.71
চাতুরাশ্রম্যবাহ্যাশ্চ শ্রুতিবাহ্যাশ্চ যে নরাঃ
বিকর্মভিশ্চ জীবন্তি তে বৈ নিরয়গামিনঃ
24.72
কেশবিক্রয়িকা রাজন্বিষবিক্রয়িকাশ্চ যে
ক্ষীরবিক্রয়িকাশ্চৈব তে বৈ নিরয়গামিনঃ
24.73
ব্রাহ্মণানাং গবাং চৈব কন্যানাং চ যুধিষ্ঠির
যেঽন্তরং যান্তি কার্যেষু তে বৈ নিরয়গামিনঃ
24.74
শস্ত্রবিক্রয়কাশ্চৈব কর্তারশ্চ যুধিষ্ঠির
শল্যানাং ধনুষাং চৈব তে বৈ নিরয়গামিনঃ
24.75
শল্যৈর্বা শঙ্কুভির্বাপি শ্বভ্রৈর্বা ভরতর্ষভ
যে মার্গমনুরুন্ধন্তি তে বৈ নিরয়গামিনঃ
24.76
উপাধ্যায়াংশ্চ ভৃত্যাংশ্চ ভক্তাংশ্চ ভরতর্ষভ
যে ত্যজন্ত্যসমর্থাংস্তাংস্তে বৈ নিরয়গামিনঃ
24.77
অপ্রাপ্তদমকাশ্চৈব নাসানাং বেধকাস্তথা
বন্ধকাশ্চ পশূনাং যে তে বৈ নিরয়গামিনঃ
24.78
অগোপ্তারশ্ছলদ্রব্যা বলিষড্ভাগতত্পরাঃ
সমর্থাশ্চাপ্যদাতারস্তে বৈ নিরয়গামিনঃ
24.79
ক্ষান্তান্দান্তাংস্তথা প্রাজ্ঞান্দীর্ঘকালং সহোষিতান্
ত্যজন্তি কৃতকৃত্যা যে তে বৈ নিরয়গামিনঃ
24.80
বালানামথ বৃদ্ধানাং দাসানাং চৈব যে নরাঃ
অদত্ত্বা ভক্ষয়ন্ত্যগ্রে তে বৈ নিরয়গামিনঃ
24.81
এতে পূর্বর্ষিভির্দৃষ্টাঃ প্রোক্তা নিরয়গামিনঃ
ভাগিনঃ স্বর্গলোকস্য বক্ষ্যামি ভরতর্ষভ
24.82
সর্বেষ্বেব তু কার্যেষু দৈবপূর্বেষু ভারত
হন্তি পুত্রান্পশূন্কৃত্স্নান্ব্রাহ্মণাতিক্রমঃ কৃতঃ
24.83
দানেন তপসা চৈব সত্যেন চ যুধিষ্ঠির
যে ধর্মমনুবর্তন্তে তে নরাঃ স্বর্গগামিনঃ
24.84
শুশ্রূষাভিস্তপোভিশ্চ শ্রুতমাদায় ভারত
যে প্রতিগ্রহনিঃস্নেহাস্তে নরাঃ স্বর্গগামিনঃ
24.85
ভয়াত্পাপাত্তথাবাধাদ্দারিদ্র্যাদ্ব্যাধিধর্ষণাৎ
যত্কৃতে প্রতিমুচ্যন্তে তে নরাঃ স্বর্গগামিনঃ
24.86
ক্ষমাবন্তশ্চ ধীরাশ্চ ধর্মকার্যেষু চোত্থিতাঃ
মঙ্গলাচারয়ুক্তাশ্চ তে নরাঃ স্বর্গগামিনঃ
24.87
নিবৃত্তা মধুমাংসেভ্যঃ পরদারেভ্য এব চ
নিবৃত্তাশ্চৈব মদ্যেভ্যস্তে নরাঃ স্বর্গগামিনঃ
24.88
আশ্রমাণাং চ কর্তারঃ কুলানাং চৈব ভারত
দেশানাং নগরাণাং চ তে নরাঃ স্বর্গগামিনঃ
24.89
বস্ত্রাভরণদাতারো ভক্ষপানান্নদাস্তথা
কুটুম্বানাং চ দাতারস্তে নরাঃ স্বর্গগামিনঃ
24.90
সর্বহিংসানিবৃত্তাশ্চ নরাঃ সর্বসহাশ্চ যে
সর্বস্যাশ্রয়ভূতাশ্চ তে নরাঃ স্বর্গগামিনঃ
24.91
মাতরং পিতরং চৈব শুশ্রূষন্তি জিতেন্দ্রিয়াঃ
ভ্রাতৄণাং চৈব সস্নেহাস্তে নরাঃ স্বর্গগামিনঃ
24.92
আঢ্যাশ্চ বলবন্তশ্চ যৌবনস্থাশ্চ ভারত
যে বৈ জিতেন্দ্রিয়া ধীরাস্তে নরাঃ স্বর্গগামিনঃ
24.93
অপরাদ্ধেষু সস্নেহা মৃদবো মিত্রবত্সলাঃ
আরাধনসুখাশ্চাপি তে নরাঃ স্বর্গগামিনঃ
24.94
সহস্রপরিবেষ্টারস্তথৈব চ সহস্রদাঃ
ত্রাতারশ্চ সহস্রাণাং পুরুষাঃ স্বর্গগামিনঃ
24.95
সুবর্ণস্য চ দাতারো গবাং চ ভরতর্ষভ
যানানাং বাহনানাং চ তে নরাঃ স্বর্গগামিনঃ
24.96
বৈবাহিকানাং কন্যানাং প্রেষ্যাণাং চ যুধিষ্ঠির
দাতারো বাসসাং চৈব তে নরাঃ স্বর্গগামিনঃ
24.97
বিহারাবসথোদ্যানকূপারামসভাপ্রদাঃ
বপ্রাণাং চৈব কর্তারস্তে নরাঃ স্বর্গগামিনঃ
24.98
নিবেশনানাং ক্ষেত্রাণাং বসতীনাং চ ভারত
দাতারঃ প্রার্থিতানাং চ তে নরাঃ স্বর্গগামিনঃ
24.99
রসানামথ বীজানাং ধান্যানাং চ যুধিষ্ঠির
স্বয়মুত্পাদ্য দাতারঃ পুরুষাঃ স্বর্গগামিনঃ
24.100
যস্মিন্কস্মিন্কুলে জাতা বহুপুত্রাঃ শতায়ুষঃ
সানুক্রোশা জিতক্রোধাঃ পুরুষাঃ স্বর্গগামিনঃ
24.101
এতদুক্তমমুত্রার্থং দৈবং পিত্র্যং চ ভারত
ধর্মাধর্মৌ চ দানস্য যথা পূর্বর্ষিভিঃ কৃতৌ