Utshovঅধ্যায় 23
23.1
যুধিষ্ঠির উবাচ
কিমাহুর্ভরতশ্রেষ্ঠ পাত্রং বিপ্রাঃ সনাতনম্
ব্রাহ্মণং লিঙ্গিনং চৈব ব্রাহ্মণং বাপ্যলিঙ্গিনম্
23.2
ভীষ্ম উবাচ
স্ববৃত্তিমভিপন্নায় লিঙ্গিনে বেতরায় বা
দেয়মাহুর্মহারাজ উভাবেতৌ তপস্বিনৌ
23.3
যুধিষ্ঠির উবাচ
শ্রদ্ধয়া পরয়া পূতো যঃ প্রয়চ্ছেদ্দ্বিজাতয়ে
হব্যং কব্যং তথা দানং কো দোষঃ স্যাত্পিতামহ
23.4
ভীষ্ম উবাচ
শ্রদ্ধাপূতো নরস্তাত দুর্দান্তোঽপি ন সংশয়ঃ
পূতো ভবতি সর্বত্র কিং পুনস্ত্বং মহীপতে
23.5
যুধিষ্ঠির উবাচ
ন ব্রাহ্মণং পরীক্ষেত দৈবেষু সততং নরঃ
কব্যপ্রদানে তু বুধাঃ পরীক্ষ্যং ব্রাহ্মণং বিদুঃ
23.6
ভীষ্ম উবাচ
ন ব্রাহ্মণঃ সাধয়তে হব্যং দৈবাত্প্রসিধ্যতি
দেবপ্রসাদাদিজ্যন্তে যজমানা ন সংশয়ঃ
23.7
ব্রাহ্মণা ভরতশ্রেষ্ঠ সততং ব্রহ্মবাদিনঃ
মার্কণ্ডেয়ঃ পুরা প্রাহ ইহ লোকেষু বুদ্ধিমান্
23.8
যুধিষ্ঠির উবাচ
অপূর্বোঽপ্যথ বা বিদ্বান্সংবন্ধী বাথ যো ভবেৎ
তপস্বী যজ্ঞশীলো বা কথং পাত্রং ভবেত্তু সঃ
23.9
ভীষ্ম উবাচ
কুলীনঃ কর্মকৃদ্বৈদ্যস্তথা চাপ্যানৃশংস্যবান্
হ্রীমানৃজুঃ সত্যবাদী পাত্রং পূর্বে চ তে ত্রয়ঃ
23.10
তত্রেদং শৃণু মে পার্থ চতুর্ণাং তেজসাং মতম্
পৃথিব্যাঃ কাশ্যপস্যাগ্নের্মার্কণ্ডেয়স্য চৈব হি
23.11
পৃথিব্যুবাচ
যথা মহার্ণবে ক্ষিপ্তঃ ক্ষিপ্রং লোষ্টো বিনশ্যতি
তথা দুশ্চরিতং সর্বং ত্রয্যাবৃত্ত্যা বিনশ্যতি
23.12
কাশ্যপ উবাচ
সর্বে চ বেদাঃ সহ ষড্ভিরঙ্গৈঃ; সাংখ্যং পুরাণং চ কুলে চ জন্ম
নৈতানি সর্বাণি গতির্ভবন্তি; শীলব্যপেতস্য নরস্য রাজন্
23.13
অগ্নিরুবাচ
অধীয়ানঃ পণ্ডিতং মন্যমানো; যো বিদ্যয়া হন্তি যশঃ পরেষাম্
ব্রহ্মন্স তেনাচরতে ব্রহ্মহত্যাং; লোকাস্তস্য হ্যন্তবন্তো ভবন্তি
23.14
মার্কণ্ডেয় উবাচ
অশ্বমেধসহস্রং চ সত্যং চ তুলয়া ধৃতম্
নাভিজানামি যদ্যস্য সত্যস্যার্ধমবাপ্নুয়াৎ
23.15
ভীষ্ম উবাচ
ইত্যুক্ত্বা তে জগ্মুরাশু চত্বারোঽমিততেজসঃ
পৃথিবী কাশ্যপোঽগ্নিশ্চ প্রকৃষ্টায়ুশ্চ ভার্গবঃ
23.16
যুধিষ্ঠির উবাচ
যদিদং ব্রাহ্মণা লোকে ব্রতিনো ভুঞ্জতে হবিঃ
ভুক্তং ব্রাহ্মণকামায় কথং তত্সুকৃতং ভবেৎ
23.17
ভীষ্ম উবাচ
আদিষ্টিনো যে রাজেন্দ্র ব্রাহ্মণা বেদপারগাঃ
ভুঞ্জতে ব্রহ্মকামায় ব্রতলুপ্তা ভবন্তি তে
23.18
যুধিষ্ঠির উবাচ
অনেকান্তং বহুদ্বারং ধর্মমাহুর্মনীষিণঃ
কিং নিশ্চিতং ভবেত্তত্র তন্মে ব্রূহি পিতামহ
23.19
ভীষ্ম উবাচ
অহিংসা সত্যমক্রোধ আনৃশংস্যং দমস্তথা
আর্জবং চৈব রাজেন্দ্র নিশ্চিতং ধর্মলক্ষণম্
23.20
যে তু ধর্মং প্রশংসন্তশ্চরন্তি পৃথিবীমিমাম্
অনাচরন্তস্তদ্ধর্মং সংকরে নিরতাঃ প্রভো
23.21
তেভ্যো রত্নং হিরণ্যং বা গামশ্বান্বা দদাতি যঃ
দশ বর্ষাণি বিষ্ঠাং স ভুঙ্ক্তে নিরয়মাশ্রিতঃ
23.22
মেদানাং পুল্কসানাং চ তথৈবান্তাবসায়িনাম্
কৃতং কর্মাকৃতং চাপি রাগমোহেন জল্পতাম্
23.23
বৈশ্বদেবং চ যে মূঢা বিপ্রায় ব্রহ্মচারিণে
দদতীহ ন রাজেন্দ্র তে লোকান্ভুঞ্জতেঽশুভান্
23.24
যুধিষ্ঠির উবাচ
কিং পরং ব্রহ্মচর্যস্য কিং পরং ধর্মলক্ষণম্
কিং চ শ্রেষ্ঠতমং শৌচং তন্মে ব্রূহি পিতামহ
23.25
ভীষ্ম উবাচ
ব্রহ্মচর্যং পরং তাত মধুমাংসস্য বর্জনম্
মর্যাদায়াং স্থিতো ধর্মঃ শমঃ শৌচস্য লক্ষণম্
23.26
যুধিষ্ঠির উবাচ
কস্মিন্কালে চরেদ্ধর্মং কস্মিন্কালেঽর্থমাচরেৎ
কস্মিন্কালে সুখী চ স্যাত্তন্মে ব্রূহি পিতামহ
23.27
ভীষ্ম উবাচ
কাল্যমর্থং নিষেবেত ততো ধর্মমনন্তরম্
পশ্চাত্কামং নিষেবেত ন চ গচ্ছেত্প্রসঙ্গিতাম্
23.28
ব্রাহ্মণাংশ্চাভিমন্যেত গুরূংশ্চাপ্যভিপূজয়েৎ
সর্বভূতানুলোমশ্চ মৃদুশীলঃ প্রিয়ংবদঃ
23.29
অধিকারে যদনৃতং রাজগামি চ পৈশুনম্
গুরোশ্চালীককরণং সমং তদ্ব্রহ্মহত্যয়া
23.30
প্রহরেন্ন নরেন্দ্রেষু ন গাং হন্যাত্তথৈব চ
ভ্রূণহত্যাসমং চৈতদুভয়ং যো নিষেবতে
23.31
নাগ্নিং পরিত্যজেজ্জাতু ন চ বেদান্পরিত্যজেৎ
ন চ ব্রাহ্মণমাক্রোশেত্সমং তদ্ব্রহ্মহত্যয়া
23.32
যুধিষ্ঠির উবাচ
কীদৃশাঃ সাধবো বিপ্রাঃ কেভ্যো দত্তং মহাফলম্
কীদৃশানাং চ ভোক্তব্যং তন্মে ব্রূহি পিতামহ
23.33
ভীষ্ম উবাচ
অক্রোধনা ধর্মপরাঃ সত্যনিত্যা দমে রতাঃ
তাদৃশাঃ সাধবো বিপ্রাস্তেভ্যো দত্তং মহাফলম্
23.34
অমানিনঃ সর্বসহা দৃষ্টার্থা বিজিতেন্দ্রিয়াঃ
সর্বভূতহিতা মৈত্রাস্তেভ্যো দত্তং মহাফলম্
23.35
অলুব্ধাঃ শুচয়ো বৈদ্যা হ্রীমন্তঃ সত্যবাদিনঃ
স্বকর্মনিরতা যে চ তেভ্যো দত্তং মহাফলম্
23.36
সাঙ্গাংশ্চ চতুরো বেদান্যোঽধীয়ীত দ্বিজর্ষভঃ
ষড্ভ্যো নিবৃত্তঃ কর্মভ্যস্তং পাত্রমৃষয়ো বিদুঃ
23.37
যে ত্বেবংগুণজাতীয়াস্তেভ্যো দত্তং মহাফলম্
সহস্রগুণমাপ্নোতি গুণার্হায় প্রদায়কঃ
23.38
প্রজ্ঞাশ্রুতাভ্যাং বৃত্তেন শীলেন চ সমন্বিতঃ
তারয়েত কুলং কৃত্স্নমেকোঽপীহ দ্বিজর্ষভঃ
23.39
গামশ্বং বিত্তমন্নং বা তদ্বিধে প্রতিপাদয়েৎ
দ্রব্যাণি চান্যানি তথা প্রেত্যভাবে ন শোচতি
23.40
তারয়েত কুলং কৃত্স্নমেকোঽপীহ দ্বিজোত্তমঃ
কিমঙ্গ পুনরেকং বৈ তস্মাত্পাত্রং সমাচরেৎ
23.41
নিশম্য চ গুণোপেতং ব্রাহ্মণং সাধুসংমতম্
দূরাদানায়য়েত্কৃত্যে সর্বতশ্চাভিপূজয়েৎ