অধ্যায় 22

22.1

যুধিষ্ঠির উবাচ
ন বিভেতি কথং সা স্ত্রী শাপস্য পরমদ্যুতেঃ
কথং নিবৃত্তো ভগবাংস্তদ্ভবান্প্রব্রবীতু মে

ভীষ্ম উবাচ
অষ্টাবক্রোঽন্বপৃচ্ছত্তাং রূপং বিকুরুষে কথম্
ন চানৃতং তে বক্তব্যং ব্রূহি ব্রাহ্মণকাম্যয়া

স্ত্র্যুবাচ
দ্যাবাপৃথিবীমাত্রৈষা কাম্যা ব্রাহ্মণসত্তম
শৃণুষ্বাবহিতঃ সর্বং যদিদং সত্যবিক্রম

উত্তরাং মাং দিশং বিদ্ধি দৃষ্টং স্ত্রীচাপলং চ তে
অব্যুত্থানেন তে লোকা জিতাঃ সত্যপরাক্রম

জিজ্ঞাসেয়ং প্রয়ুক্তা মে স্থিরীকর্তুং তবানঘ
স্থবিরাণামপি স্ত্রীণাং বাধতে মৈথুনজ্বরঃ

তুষ্টঃ পিতামহস্তেঽদ্য তথা দেবাঃ সবাসবাঃ
স ত্বং যেন চ কার্যেণ সংপ্রাপ্তো ভগবানিহ

প্রেষিতস্তেন বিপ্রেণ কন্যাপিত্রা দ্বিজর্ষভ
তবোপদেশং কর্তুং বৈ তচ্চ সর্বং কৃতং ময়া

ক্ষেমী গমিষ্যসি গৃহাঞ্শ্রমশ্চ ন ভবিষ্যতি
কন্যাং প্রাপ্স্যসি তাং বিপ্র পুত্রিণী চ ভবিষ্যতি

কাম্যয়া পৃষ্টবাংস্ত্বং মাং ততো ব্যাহৃতমুত্তরম্
অনতিক্রমণীয়ৈষা কৃত্স্নৈর্লোকৈস্ত্রিভিঃ সদা

গচ্ছস্ব সুকৃতং কৃত্বা কিং বান্যচ্ছ্রোতুমিচ্ছসি
যাবদ্ব্রবীমি বিপ্রর্ষে অষ্টাবক্র যথাতথম্

ঋষিণা প্রসাদিতা চাস্মি তব হেতোর্দ্বিজর্ষভ
তস্য সংমাননার্থং মে ত্বয়ি বাক্যং প্রভাষিতম্

শ্রুত্বা তু বচনং তস্যাঃ স বিপ্রঃ প্রাঞ্জলিঃ স্থিতঃ
অনুজ্ঞাতস্তয়া চাপি স্বগৃহং পুনরাব্রজৎ

গৃহমাগম্য বিশ্রান্তঃ স্বজনং প্রতিপূজ্য চ
অভ্যগচ্ছত তং বিপ্রং ন্যায়তঃ কুরুনন্দন

পৃষ্টশ্চ তেন বিপ্রেণ দৃষ্টং ত্বেতন্নিদর্শনম্
প্রাহ বিপ্রং তদা বিপ্রঃ সুপ্রীতেনান্তরাত্মনা

ভবতাহমনুজ্ঞাতঃ প্রস্থিতো গন্ধমাদনম্
তস্য চোত্তরতো দেশে দৃষ্টং তদ্দৈবতং মহৎ

তয়া চাহমনুজ্ঞাতো ভবাংশ্চাপি প্রকীর্তিতঃ
শ্রাবিতশ্চাপি তদ্বাক্যং গৃহমভ্যাগতঃ প্রভো

তমুবাচ ততো বিপ্রঃ প্রতিগৃহ্ণীষ্ব মে সুতাম্
নক্ষত্রতিথিসংয়োগে পাত্রং হি পরমং ভবান্

ভীষ্ম উবাচ
অষ্টাবক্রস্তথেত্যুক্ত্বা প্রতিগৃহ্য চ তাং প্রভো
কন্যাং পরমধর্মাত্মা প্রীতিমাংশ্চাভবত্তদা

কন্যাং তাং প্রতিগৃহ্যৈব ভার্যাং পরমশোভনাম্
উবাস মুদিতস্তত্র আশ্রমে স্বে গতজ্বরঃ