Utshovঅধ্যায় 21
21.1
ভীষ্ম উবাচ
অথ সা স্ত্রী তমুক্ত্বা তু বিপ্রমেবং ভবত্বিতি
তৈলং দিব্যমুপাদায় স্নানশাটীমুপানয়ৎ
21.2
অনুজ্ঞাতা চ মুনিনা সা স্ত্রী তেন মহাত্মনা
অথাস্য তৈলেনাঙ্গানি সর্বাণ্যেবাভ্যমৃক্ষয়ৎ
21.3
শনৈশ্চোত্সাদিতস্তত্র স্নানশালামুপাগমৎ
ভদ্রাসনং ততশ্চিত্রং ঋষিরন্বাবিশন্নবম্
21.4
অথোপবিষ্টশ্চ যদা তস্মিন্ভদ্রাসনে তদা
স্নাপয়ামাস শনকৈস্তমৃষিং সুখহস্তবৎ
দিব্যং চ বিধিবচ্চক্রে সোপচারং মুনেস্তদা
21.5
স তেন সুসুখোষ্ণেন তস্যা হস্তসুখেন চ
ব্যতীতাং রজনীং কৃত্স্নাং নাজানাত্স মহাব্রতঃ
21.6
তত উত্থায় স মুনিস্তদা পরমবিস্মিতঃ
পূর্বস্যাং দিশি সূর্যং চ সোঽপশ্যদুদিতং দিবি
21.7
তস্য বুদ্ধিরিয়ং কিং নু মোহস্তত্ত্বমিদং ভবেৎ
অথোপাস্য সহস্রাংশুং কিং করোমীত্যুবাচ তাম্
21.8
সা চামৃতরসপ্রখ্যমৃষেরন্নমুপাহরৎ
তস্য স্বাদুতয়ান্নস্য ন প্রভূতং চকার সঃ
ব্যগমচ্চাপ্যহঃশেষং ততঃ সংধ্যাগমত্পুনঃ
21.9
অথ স্ত্রী ভগবন্তং সা সুপ্যতামিত্যচোদয়ৎ
তত্র বৈ শয়নে দিব্যে তস্য তস্যাশ্চ কল্পিতে
21.10
অষ্টাবক্র উবাচ
ন ভদ্রে পরদারেষু মনো মে সংপ্রসজ্জতি
উত্তিষ্ঠ ভদ্রে ভদ্রং তে স্বপ বৈ বিরমস্ব চ
21.11
ভীষ্ম উবাচ
সা তদা তেন বিপ্রেণ তথা ধৃত্যা নিবর্তিতা
স্বতন্ত্রাস্মীত্যুবাচৈনং ন ধর্মচ্ছলমস্তি তে
21.12
অষ্টাবক্র উবাচ
নাস্তি স্বতন্ত্রতা স্ত্রীণামস্বতন্ত্রা হি যোষিতঃ
প্রজাপতিমতং হ্যেতন্ন স্ত্রী স্বাতন্ত্র্যমর্হতি
21.13
স্ত্র্যুবাচ
বাধতে মৈথুনং বিপ্র মম ভক্তিং চ পশ্য বৈ
অধর্মং প্রাপ্স্যসে বিপ্র যন্মাং ত্বং নাভিনন্দসি
21.14
অষ্টাবক্র উবাচ
হরন্তি দোষজাতানি নরং জাতং যথেচ্ছকম্
প্রভবামি সদা ধৃত্যা ভদ্রে স্বং শয়নং ব্রজ
21.15
স্ত্র্যুবাচ
শিরসা প্রণমে বিপ্র প্রসাদং কর্তুমর্হসি
ভূমৌ নিপতমানায়াঃ শরণং ভব মেঽনঘ
21.16
যদি বা দোষজাতং ত্বং পরদারেষু পশ্যসি
আত্মানং স্পর্শয়াম্যদ্য পাণিং গৃহ্ণীষ্ব মে দ্বিজ
21.17
ন দোষো ভবিতা চৈব সত্যেনৈতদ্ব্রবীম্যহম্
স্বতন্ত্রাং মাং বিজানীহি যোঽধর্মঃ সোঽস্তু বৈ ময়ি
21.18
অষ্টাবক্র উবাচ
স্বতন্ত্রা ত্বং কথং ভদ্রে ব্রূহি কারণমত্র বৈ
নাস্তি লোকে হি কাচিত্স্ত্রী যা বৈ স্বাতন্ত্র্যমর্হতি
21.19
পিতা রক্ষতি কৌমারে ভর্তা রক্ষতি যৌবনে
পুত্রাশ্চ স্থবিরীভাবে ন স্ত্রী স্বাতন্ত্র্যমর্হতি
21.20
স্ত্র্যুবাচ
কৌমারং ব্রহ্মচর্যং মে কন্যৈবাস্মি ন সংশয়ঃ
কুরু মা বিমতিং বিপ্র শ্রদ্ধাং বিজহি মা মম
21.21
অষ্টাবক্র উবাচ
যথা মম তথা তুভ্যং যথা তব তথা মম
জিজ্ঞাসেয়মৃষেস্তস্য বিঘ্নঃ সত্যং নু কিং ভবেৎ
21.22
আশ্চর্যং পরমং হীদং কিং নু শ্রেয়ো হি মে ভবেৎ
দিব্যাভরণবস্ত্রা হি কন্যেয়ং মামুপস্থিতা
21.23
কিং ত্বস্যাঃ পরমং রূপং জীর্ণমাসীত্কথং পুনঃ
কন্যারূপমিহাদ্যৈব কিমিহাত্রোত্তরং ভবেৎ
21.24
যথা পরং শক্তিধৃতের্ন ব্যুত্থাস্যে কথংচন
ন রোচয়ে হি ব্যুত্থানং ধৃত্যৈবং সাধয়াম্যহম্