UtshovChapter 21
21.1
भीष्म उवाच
अथ सा स्त्री तमुक्त्वा तु विप्रमेवं भवत्विति
तैलं दिव्यमुपादाय स्नानशाटीमुपानयत्
Bhishma uvacha
Atha sa stri tamuktva tu vipramevam bhavatviti
Tailam divyamupadaya snanashatimupanayat
21.2
अनुज्ञाता च मुनिना सा स्त्री तेन महात्मना
अथास्य तैलेनाङ्गानि सर्वाण्येवाभ्यमृक्षयत्
Anugyata cha munina sa stri tena mahatmana
Athasya tailenangani sarvanyevabhyamrikshayat
21.3
शनैश्चोत्सादितस्तत्र स्नानशालामुपागमत्
भद्रासनं ततश्चित्रं ऋषिरन्वाविशन्नवम्
Shanaishchotsaditastatra snanashalamupagamat
Bhadrasanam tatashchitram rishiranvavishannavam
21.4
अथोपविष्टश्च यदा तस्मिन्भद्रासने तदा
स्नापयामास शनकैस्तमृषिं सुखहस्तवत्
दिव्यं च विधिवच्चक्रे सोपचारं मुनेस्तदा
Athopavishtashcha yada tasminbhadrasane tada
Snapayamasa shanakaistamrishim sukhahastavat
Divyam cha vidhivachchakre sopacharam munestada
21.5
स तेन सुसुखोष्णेन तस्या हस्तसुखेन च
व्यतीतां रजनीं कृत्स्नां नाजानात्स महाव्रतः
Sa tena susukhoshnena tasya hastasukhena cha
Vyatitam rajanim kritsnam najanatsa mahavratah
21.6
तत उत्थाय स मुनिस्तदा परमविस्मितः
पूर्वस्यां दिशि सूर्यं च सोऽपश्यदुदितं दिवि
Tata utthaya sa munistada paramavismitah
Purvasyam dishi suryam cha sopashyaduditam divi
21.7
तस्य बुद्धिरियं किं नु मोहस्तत्त्वमिदं भवेत्
अथोपास्य सहस्रांशुं किं करोमीत्युवाच ताम्
Tasya buddhiriyam kim nu mohastattvamidam bhavet
Athopasya sahasranshum kim karomityuvacha tam
21.8
सा चामृतरसप्रख्यमृषेरन्नमुपाहरत्
तस्य स्वादुतयान्नस्य न प्रभूतं चकार सः
व्यगमच्चाप्यहःशेषं ततः संध्यागमत्पुनः
Sa chamritarasaprakhyamrisherannamupaharat
Tasya svadutayannasya na prabhutam chakara sah
Vyagamachchapyahahshesham tatah sandhyagamatpunah
21.9
अथ स्त्री भगवन्तं सा सुप्यतामित्यचोदयत्
तत्र वै शयने दिव्ये तस्य तस्याश्च कल्पिते
Atha stri bhagavantam sa supyatamityachodayat
Tatra vai shayane divye tasya tasyashcha kalpite
21.10
अष्टावक्र उवाच
न भद्रे परदारेषु मनो मे संप्रसज्जति
उत्तिष्ठ भद्रे भद्रं ते स्वप वै विरमस्व च
Ashtavakra uvacha
Na bhadre paradareshu mano me samprasajjati
Uttishtha bhadre bhadram te svapa vai viramasva cha
21.11
भीष्म उवाच
सा तदा तेन विप्रेण तथा धृत्या निवर्तिता
स्वतन्त्रास्मीत्युवाचैनं न धर्मच्छलमस्ति ते
Bhishma uvacha
Sa tada tena viprena tatha dhritya nivartita
Svatantrasmityuvachainam na dharmachchhalamasti te
21.12
अष्टावक्र उवाच
नास्ति स्वतन्त्रता स्त्रीणामस्वतन्त्रा हि योषितः
प्रजापतिमतं ह्येतन्न स्त्री स्वातन्त्र्यमर्हति
Ashtavakra uvacha
Nasti svatantrata strinamasvatantra hi yoshitah
Prajapatimatam hyetanna stri svatantryamarhati
21.13
स्त्र्युवाच
बाधते मैथुनं विप्र मम भक्तिं च पश्य वै
अधर्मं प्राप्स्यसे विप्र यन्मां त्वं नाभिनन्दसि
Stryuvacha
Badhate maithunam vipra mama bhaktim cha pashya vai
Adharmam prapsyase vipra yanmam tvam nabhinandasi
21.14
अष्टावक्र उवाच
हरन्ति दोषजातानि नरं जातं यथेच्छकम्
प्रभवामि सदा धृत्या भद्रे स्वं शयनं व्रज
Ashtavakra uvacha
Haranti doshajatani naram jatam yathechchhakam
Prabhavami sada dhritya bhadre svam shayanam vraja
21.15
स्त्र्युवाच
शिरसा प्रणमे विप्र प्रसादं कर्तुमर्हसि
भूमौ निपतमानायाः शरणं भव मेऽनघ
Stryuvacha
Shirasa praname vipra prasadam kartumarhasi
Bhumau nipatamanayah sharanam bhava menagha
21.16
यदि वा दोषजातं त्वं परदारेषु पश्यसि
आत्मानं स्पर्शयाम्यद्य पाणिं गृह्णीष्व मे द्विज
Yadi va doshajatam tvam paradareshu pashyasi
Atmanam sparshayamyadya panim grihnishva me dvija
21.17
न दोषो भविता चैव सत्येनैतद्ब्रवीम्यहम्
स्वतन्त्रां मां विजानीहि योऽधर्मः सोऽस्तु वै मयि
Na dosho bhavita chaiva satyenaitadbravimyaham
Svatantram mam vijanihi yodharmah sostu vai mayi
21.18
अष्टावक्र उवाच
स्वतन्त्रा त्वं कथं भद्रे ब्रूहि कारणमत्र वै
नास्ति लोके हि काचित्स्त्री या वै स्वातन्त्र्यमर्हति
Ashtavakra uvacha
Svatantra tvam katham bhadre bruhi karanamatra vai
Nasti loke hi kachitstri ya vai svatantryamarhati
21.19
पिता रक्षति कौमारे भर्ता रक्षति यौवने
पुत्राश्च स्थविरीभावे न स्त्री स्वातन्त्र्यमर्हति
Pita rakshati kaumare bharta rakshati yauvane
Putrashcha sthaviribhave na stri svatantryamarhati
21.20
स्त्र्युवाच
कौमारं ब्रह्मचर्यं मे कन्यैवास्मि न संशयः
कुरु मा विमतिं विप्र श्रद्धां विजहि मा मम
Stryuvacha
Kaumaram brahmacharyam me kanyaivasmi na sanshayah
Kuru ma vimatim vipra shraddham vijahi ma mama
21.21
अष्टावक्र उवाच
यथा मम तथा तुभ्यं यथा तव तथा मम
जिज्ञासेयमृषेस्तस्य विघ्नः सत्यं नु किं भवेत्
Ashtavakra uvacha
Yatha mama tatha tubhyam yatha tava tatha mama
Jigyaseyamrishestasya vighnah satyam nu kim bhavet
21.22
आश्चर्यं परमं हीदं किं नु श्रेयो हि मे भवेत्
दिव्याभरणवस्त्रा हि कन्येयं मामुपस्थिता
Ashcharyam paramam hidam kim nu shreyo hi me bhavet
Divyabharanavastra hi kanyeyam mamupasthita
21.23
किं त्वस्याः परमं रूपं जीर्णमासीत्कथं पुनः
कन्यारूपमिहाद्यैव किमिहात्रोत्तरं भवेत्
Kim tvasyah paramam rupam jirnamasitkatham punah
Kanyarupamihadyaiva kimihatrottaram bhavet
21.24
यथा परं शक्तिधृतेर्न व्युत्थास्ये कथंचन
न रोचये हि व्युत्थानं धृत्यैवं साधयाम्यहम्
Yatha param shaktidhriterna vyutthasye kathanchana
Na rochaye hi vyutthanam dhrityaivam sadhayamyaham