Utshovঅধ্যায় 20
20.1
অষ্টাবক্র উবাচ
তথাস্তু সাধয়িষ্যামি তত্র যাস্যাম্যসংশয়ম্
যত্র ত্বং বদসে সাধো ভবান্ভবতু সত্যবাক্
20.2
ভীষ্ম উবাচ
ততোঽগচ্ছত্স ভগবানুত্তরামুত্তমাং দিশম্
হিমবন্তং গিরিশ্রেষ্ঠং সিদ্ধচারণসেবিতম্
20.3
স গত্বা দ্বিজশার্দূলো হিমবন্তং মহাগিরিম্
অভ্যগচ্ছন্নদীং পুণ্যাং বাহুদাং ধর্মদায়িনীম্
20.4
অশোকে বিমলে তীর্থে স্নাত্বা তর্প্য চ দেবতাঃ
তত্র বাসায় শয়নে কৌশ্যে সুখমুবাস হ
20.5
ততো রাত্র্যাং ব্যতীতায়াং প্রাতরুত্থায় স দ্বিজঃ
স্নাত্বা প্রাদুশ্চকারাগ্নিং হুত্বা চৈব বিধানতঃ
20.6
রুদ্রাণীকূপমাসাদ্য হ্রদে তত্র সমাশ্বসৎ
বিশ্রান্তশ্চ সমুত্থায় কৈলাসমভিতো যয়ৌ
20.7
সোঽপশ্যত্কাঞ্চনদ্বারং দীপ্যমানমিব শ্রিয়া
মন্দাকিনীং চ নলিনীং ধনদস্য মহাত্মনঃ
20.8
অথ তে রাক্ষসাঃ সর্বে যেঽভিরক্ষন্তি পদ্মিনীম্
প্রত্যুত্থিতা ভগবন্তং মণিভদ্রপুরোগমাঃ
20.9
স তান্প্রত্যর্চয়ামাস রাক্ষসান্ভীমবিক্রমান্
নিবেদয়ত মাং ক্ষিপ্রং ধনদায়েতি চাব্রবীৎ
20.10
তে রাক্ষসাস্তদা রাজন্ভগবন্তমথাব্রুবন্
অসৌ বৈশ্রবণো রাজা স্বয়মায়াতি তেঽন্তিকম্
20.11
বিদিতো ভগবানস্য কার্যমাগমনে চ যৎ
পশ্যৈনং ত্বং মহাভাগং জ্বলন্তমিব তেজসা
20.12
ততো বৈশ্রবণোঽভ্যেত্য অষ্টাবক্রমনিন্দিতম্
বিধিবত্কুশলং পৃষ্ট্বা ততো ব্রহ্মর্ষিমব্রবীৎ
20.13
সুখং প্রাপ্তো ভবান্কচ্চিত্কিং বা মত্তশ্চিকীর্ষসি
ব্রূহি সর্বং করিষ্যামি যন্মাং ত্বং বক্ষ্যসি দ্বিজ
20.14
ভবনং প্রবিশ ত্বং মে যথাকামং দ্বিজোত্তম
সত্কৃতঃ কৃতকার্যশ্চ ভবান্যাস্যত্যবিঘ্নতঃ
20.15
প্রাবিশদ্ভবনং স্বং বৈ গৃহীত্বা তং দ্বিজোত্তমম্
আসনং স্বং দদৌ চৈব পাদ্যমর্ঘ্যং তথৈব চ
20.16
অথোপবিষ্টয়োস্তত্র মণিভদ্রপুরোগমাঃ
নিষেদুস্তত্র কৌবেরা যক্ষগন্ধর্বরাক্ষসাঃ
20.17
ততস্তেষাং নিষণ্ণানাং ধনদো বাক্যমব্রবীৎ
ভবচ্ছন্দং সমাজ্ঞায় নৃত্যেরন্নপ্সরোগণাঃ
20.18
আতিথ্যং পরমং কার্যং শুশ্রূষা ভবতস্তথা
সংবর্ততামিত্যুবাচ মুনির্মধুরয়া গিরা
20.19
অথোর্বরা মিশ্রকেশী রম্ভা চৈবোর্বশী তথা
অলম্বুসা ঘৃতাচী চ চিত্রা চিত্রাঙ্গদা রুচিঃ
20.20
মনোহরা সুকেশী চ সুমুখী হাসিনী প্রভা
বিদ্যুতা প্রশমা দান্তা বিদ্যোতা রতিরেব চ
20.21
এতাশ্চান্যাশ্চ বৈ বহ্ব্যঃ প্রনৃত্তাপ্সরসঃ শুভাঃ
অবাদয়ংশ্চ গন্ধর্বা বাদ্যানি বিবিধানি চ
20.22
অথ প্রবৃত্তে গান্ধর্বে দিব্যে ঋষিরুপাবসৎ
দিব্যং সংবত্সরং তত্র রমন্বৈ সুমহাতপাঃ
20.23
ততো বৈশ্রবণো রাজা ভগবন্তমুবাচ হ
সাগ্রঃ সংবত্সরো যাতস্তব বিপ্রেহ পশ্যতঃ
20.24
হার্যোঽয়ং বিষয়ো ব্রহ্মন্গান্ধর্বো নাম নামতঃ
ছন্দতো বর্ততাং বিপ্র যথা বদতি বা ভবান্
20.25
অতিথিঃ পূজনীয়স্ত্বমিদং চ ভবতো গৃহম্
সর্বমাজ্ঞাপ্যতামাশু পরবন্তো বয়ং ত্বয়ি
20.26
অথ বৈশ্রবণং প্রীতো ভগবান্প্রত্যভাষত
অর্চিতোঽস্মি যথান্যায়ং গমিষ্যামি ধনেশ্বর
20.27
প্রীতোঽস্মি সদৃশং চৈব তব সর্বং ধনাধিপ
তব প্রসাদাদ্ভগবন্মহর্ষেশ্চ মহাত্মনঃ
নিয়োগাদদ্য যাস্যামি বৃদ্ধিমানৃদ্ধিমান্ভব
20.28
অথ নিষ্ক্রম্য ভগবান্প্রয়য়াবুত্তরামুখঃ
কৈলাসং মন্দরং হৈমং সর্বাননুচচার হ
20.29
তানতীত্য মহাশৈলান্কৈরাতং স্থানমুত্তমম্
প্রদক্ষিণং ততশ্চক্রে প্রয়তঃ শিরসা নমন্
ধরণীমবতীর্যাথ পূতাত্মাসৌ তদাভবৎ
20.30
স তং প্রদক্ষিণং কৃত্বা ত্রিঃ শৈলং চোত্তরামুখঃ
সমেন ভূমিভাগেন যয়ৌ প্রীতিপুরস্কৃতঃ
20.31
ততোঽপরং বনোদ্দেশং রমণীয়মপশ্যত
সর্বর্তুভির্মূলফলৈঃ পক্ষিভিশ্চ সমন্বিতম্
রমণীয়ৈর্বনোদ্দেশৈস্তত্র তত্র বিভূষিতম্
20.32
তত্রাশ্রমপদং দিব্যং দদর্শ ভগবানথ
শৈলাংশ্চ বিবিধাকারান্কাঞ্চনান্রত্নভূষিতান্
মণিভূমৌ নিবিষ্টাশ্চ পুষ্করিণ্যস্তথৈব চ
20.33
অন্যান্যপি সুরম্যাণি দদর্শ সুবহূন্যথ
ভৃশং তস্য মনো রেমে মহর্ষের্ভাবিতাত্মনঃ
20.34
স তত্র কাঞ্চনং দিব্যং সর্বরত্নময়ং গৃহম্
দদর্শাদ্ভুতসংকাশং ধনদস্য গৃহাদ্বরম্
20.35
মহান্তো যত্র বিবিধাঃ প্রাসাদাঃ পর্বতোপমাঃ
বিমানানি চ রম্যাণি রত্নানি বিবিধানি চ
20.36
মন্দারপুষ্পৈঃ সংকীর্ণা তথা মন্দাকিনী নদী
স্বয়ংপ্রভাশ্চ মণয়ো বজ্রৈর্ভূমিশ্চ ভূষিতা
20.37
নানাবিধৈশ্চ ভবনৈর্বিচিত্রমণিতোরণৈঃ
মুক্তাজালপরিক্ষিপ্তৈর্মণিরত্নবিভূষিতৈঃ
মনোদৃষ্টিহরৈ রম্যৈঃ সর্বতঃ সংবৃতং শুভৈঃ
20.38
ঋষিঃ সমন্ততোঽপশ্যত্তত্র তত্র মনোরমম্
ততোঽভবত্তস্য চিন্তা ক্ব মে বাসো ভবেদিতি
20.39
অথ দ্বারং সমভিতো গত্বা স্থিত্বা ততোঽব্রবীৎ
অতিথিং মামনুপ্রাপ্তমনুজানন্তু যেঽত্র বৈ
20.40
অথ কন্যাপরিবৃতা গৃহাত্তস্মাদ্বিনিঃসৃতাঃ
নানারূপাঃ সপ্ত বিভো কন্যাঃ সর্বা মনোহরাঃ
20.41
যাং যামপশ্যত্কন্যাং স সা সা তস্য মনোঽহরৎ
নাশক্নুবদ্ধারয়িতুং মনোঽথাস্যাবসীদতি
20.42
ততো ধৃতিঃ সমুত্পন্না তস্য বিপ্রস্য ধীমতঃ
অথ তং প্রমদাঃ প্রাহুর্ভগবান্প্রবিশত্বিতি
20.43
স চ তাসাং সুরূপাণাং তস্যৈব ভবনস্য চ
কৌতূহলসমাবিষ্টঃ প্রবিবেশ গৃহং দ্বিজঃ
20.44
তত্রাপশ্যজ্জরায়ুক্তামরজোম্বরধারিণীম্
বৃদ্ধাং পর্যঙ্কমাসীনাং সর্বাভরণভূষিতাম্
20.45
স্বস্তীতি চাথ তেনোক্তা সা স্ত্রী প্রত্যবদত্তদা
প্রত্যুত্থায় চ তং বিপ্রমাস্যতামিত্যুবাচ হ
20.46
অষ্টাবক্র উবাচ
সর্বাঃ স্বানালয়ান্যান্তু একা মামুপতিষ্ঠতু
সুপ্রজ্ঞাতা সুপ্রশান্তা শেষা গচ্ছন্তু চ্ছন্দতঃ
20.47
ততঃ প্রদক্ষিণীকৃত্য কন্যাস্তাস্তমৃষিং তদা
নিরাক্রামন্গৃহাত্তস্মাত্সা বৃদ্ধাথ ব্যতিষ্ঠত
20.48
অথ তাং সংবিশন্প্রাহ শয়নে ভাস্বরে তদা
ত্বয়াপি সুপ্যতাং ভদ্রে রজনী হ্যতিবর্ততে
20.49
সংলাপাত্তেন বিপ্রেণ তথা সা তত্র ভাষিতা
দ্বিতীয়ে শয়নে দিব্যে সংবিবেশ মহাপ্রভে
20.50
অথ সা বেপমানাঙ্গী নিমিত্তং শীতজং তদা
ব্যপদিশ্য মহর্ষের্বৈ শয়নং চাধ্যরোহত
20.51
স্বাগতং স্বাগতেনাস্তু ভগবাংস্তামভাষত
সোপাগূহদ্ভুজাভ্যাং তু ঋষিং প্রীত্যা নরর্ষভ
20.52
নির্বিকারমৃষিং চাপি কাষ্ঠকুড্যোপমং তদা
দুঃখিতা প্রেক্ষ্য সংজল্পমকার্ষীদৃষিণা সহ
20.53
ব্রহ্মন্ন কামকারোঽস্তি স্ত্রীণাং পুরুষতো ধৃতিঃ
কামেন মোহিতা চাহং ত্বাং ভজন্তীং ভজস্ব মাম্
20.54
প্রহৃষ্টো ভব বিপ্রর্ষে সমাগচ্ছ ময়া সহ
উপগূহ চ মাং বিপ্র কামার্তাহং ভৃশং ত্বয়ি
20.55
এতদ্ধি তব ধর্মাত্মংস্তপসঃ পূজ্যতে ফলম্
প্রার্থিতং দর্শনাদেব ভজমানাং ভজস্ব মাম্
20.56
সদ্ম চেদং বনং চেদং যচ্চান্যদপি পশ্যসি
প্রভুত্বং তব সর্বত্র ময়ি চৈব ন সংশয়ঃ
20.57
সর্বান্কামান্বিধাস্যামি রমস্ব সহিতো ময়া
রমণীয়ে বনে বিপ্র সর্বকামফলপ্রদে
20.58
ত্বদ্বশাহং ভবিষ্যামি রংস্যসে চ ময়া সহ
সর্বান্কামানুপাশ্নানো যে দিব্যা যে চ মানুষাঃ
20.59
নাতঃ পরং হি নারীণাং কার্যং কিংচন বিদ্যতে
যথা পুরুষসংসর্গঃ পরমেতদ্ধি নঃ ফলম্
20.60
আত্মচ্ছন্দেন বর্তন্তে নার্যো মন্মথচোদিতাঃ
ন চ দহ্যন্তি গচ্ছন্ত্যঃ সুতপ্তৈরপি পাংসুভিঃ
20.61
অষ্টাবক্র উবাচ
পরদারানহং ভদ্রে ন গচ্ছেয়ং কথংচন
দূষিতং ধর্মশাস্ত্রেষু পরদারাভিমর্শনম্
20.62
ভদ্রে নিবেষ্টুকামং মাং বিদ্ধি সত্যেন বৈ শপে
বিষয়েষ্বনভিজ্ঞোঽহং ধর্মার্থং কিল সংততিঃ
20.63
এবং লোকান্গমিষ্যামি পুত্রৈরিতি ন সংশয়ঃ
ভদ্রে ধর্মং বিজানীষ্ব জ্ঞাত্বা চোপরমস্ব হ
20.64
স্ত্র্যুবাচ
নানিলোঽগ্নির্ন বরুণো ন চান্যে ত্রিদশা দ্বিজ
প্রিয়াঃ স্ত্রীণাং যথা কামো রতিশীলা হি যোষিতঃ
20.65
সহস্রৈকা যতা নারী প্রাপ্নোতীহ কদাচন
তথা শতসহস্রেষু যদি কাচিত্পতিব্রতা
20.66
নৈতা জানন্তি পিতরং ন কুলং ন চ মাতরম্
ন ভ্রাতৄন্ন চ ভর্তারং ন পুত্রান্ন চ দেবরান্
20.67
লীলায়ন্ত্যঃ কুলং ঘ্নন্তি কূলানীব সরিদ্বরাঃ
দোষাংশ্চ মন্দান্মন্দাসু প্রজাপতিরভাষত
20.68
ভীষ্ম উবাচ
ততঃ স ঋষিরেকাগ্রস্তাং স্ত্রিয়ং প্রত্যভাষত
আস্যতাং রুচিরং ছন্দঃ কিং বা কার্যং ব্রবীহি মে
20.69
সা স্ত্রী প্রোবাচ ভগবন্দ্রক্ষ্যসে দেশকালতঃ
বস তাবন্মহাপ্রাজ্ঞ কৃতকৃত্যো গমিষ্যসি
20.70
ব্রহ্মর্ষিস্তামথোবাচ স তথেতি যুধিষ্ঠির
বত্স্যেঽহং যাবদুত্সাহো ভবত্যা নাত্র সংশয়ঃ
20.71
অথর্ষিরভিসংপ্রেক্ষ্য স্ত্রিয়ং তাং জরয়ান্বিতাম্
চিন্তাং পরমিকাং ভেজে সংতপ্ত ইব চাভবৎ
20.72
যদ্যদঙ্গং হি সোঽপশ্যত্তস্যা বিপ্রর্ষভস্তদা
নারমত্তত্র তত্রাস্য দৃষ্টী রূপপরাজিতা
20.73
দেবতেয়ং গৃহস্যাস্য শাপান্নূনং বিরূপিতা
অস্যাশ্চ কারণং বেত্তুং ন যুক্তং সহসা ময়া
20.74
ইতি চিন্তাবিষক্তস্য তমর্থং জ্ঞাতুমিচ্ছতঃ
ব্যগমত্তদহঃশেষং মনসা ব্যাকুলেন তু
20.75
অথ সা স্ত্রী তদোবাচ ভগবন্পশ্য বৈ রবেঃ
রূপং সংধ্যাভ্রসংয়ুক্তং কিমুপস্থাপ্যতাং তব
20.76
স উবাচ তদা তাং স্ত্রীং স্নানোদকমিহানয়
উপাসিষ্যে ততঃ সংধ্যাং বাগ্যতো নিয়তেন্দ্রিয়ঃ