Utshovঅধ্যায় 19
19.1
যুধিষ্ঠির উবাচ
যদিদং সহধর্মেতি প্রোচ্যতে ভরতর্ষভ
পাণিগ্রহণকালে তু স্ত্রীণামেতত্কথং স্মৃতম্
19.2
আর্ষ এষ ভবেদ্ধর্মঃ প্রাজাপত্যোঽথ বাসুরঃ
যদেতত্সহধর্মেতি পূর্বমুক্তং মহর্ষিভিঃ
19.3
সংদেহঃ সুমহানেষ বিরুদ্ধ ইতি মে মতিঃ
ইহ যঃ সহধর্মো বৈ প্রেত্যায়ং বিহিতঃ ক্ব নু
19.4
স্বর্গে মৃতানাং ভবতি সহধর্মঃ পিতামহ
পূর্বমেকস্তু ম্রিয়তে ক্ব চৈকস্তিষ্ঠতে বদ
19.5
নানাকর্মফলোপেতা নানাকর্মনিবাসিনঃ
নানানিরয়নিষ্ঠান্তা মানুষা বহবো যদা
19.6
অনৃতাঃ স্ত্রিয় ইত্যেবং সূত্রকারো ব্যবস্যতি
যদানৃতাঃ স্ত্রিয়স্তাত সহধর্মঃ কুতঃ স্মৃতঃ
19.7
অনৃতাঃ স্ত্রিয় ইত্যেবং বেদেষ্বপি হি পঠ্যতে
ধর্মোঽয়ং পৌর্বিকী সংজ্ঞা উপচারঃ ক্রিয়াবিধিঃ
19.8
গহ্বরং প্রতিভাত্যেতন্মম চিন্তয়তোঽনিশম্
নিঃসংদেহমিদং সর্বং পিতামহ যথা শ্রুতিঃ
19.9
যদেতদ্যাদৃশং চৈতদ্যথা চৈতত্প্রবর্তিতম্
নিখিলেন মহাপ্রাজ্ঞ ভবানেতদ্ব্রবীতু মে
19.10
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
অষ্টাবক্রস্য সংবাদং দিশয়া সহ ভারত
19.11
নিবেষ্টুকামস্তু পুরা অষ্টাবক্রো মহাতপাঃ
ঋষেরথ বদান্যস্য কন্যাং বব্রে মহাত্মনঃ
19.12
সুপ্রভাং নাম বৈ নাম্না রূপেণাপ্রতিমাং ভুবি
গুণপ্রবর্হাং শীলেন সাধ্বীং চারিত্রশোভনাম্
19.13
সা তস্য দৃষ্ট্বৈব মনো জহার শুভলোচনা
বনরাজী যথা চিত্রা বসন্তে কুসুমাচিতা
19.14
ঋষিস্তমাহ দেয়া মে সুতা তুভ্যং শৃণুষ্ব মে
গচ্ছ তাবদ্দিশং পুণ্যামুত্তরাং দ্রক্ষ্যসে ততঃ
19.15
অষ্টাবক্র উবাচ
কিং দ্রষ্টব্যং ময়া তত্র বক্তুমর্হতি মে ভবান্
তথেদানীং ময়া কার্যং যথা বক্ষ্যতি মাং ভবান্
19.16
বদান্য উবাচ
ধনদং সমতিক্রম্য হিমবন্তং তথৈব চ
রুদ্রস্যায়তনং দৃষ্ট্বা সিদ্ধচারণসেবিতম্
19.17
প্রহৃষ্টৈঃ পার্ষদৈর্জুষ্টং নৃত্যদ্ভির্বিবিধাননৈঃ
দিব্যাঙ্গরাগৈঃ পৈশাচৈর্বন্যৈর্নানাবিধৈস্তথা
19.18
পাণিতালসতালৈশ্চ শম্যাতালৈঃ সমৈস্তথা
সংপ্রহৃষ্টৈঃ প্রনৃত্যদ্ভিঃ শর্বস্তত্র নিষেব্যতে
19.19
ইষ্টং কিল গিরৌ স্থানং তদ্দিব্যমনুশুশ্রুম
নিত্যং সংনিহিতো দেবস্তথা পারিষদাঃ শুভাঃ
19.20
তত্র দেব্যা তপস্তপ্তং শংকরার্থং সুদুশ্চরম্
অতস্তদিষ্টং দেবস্য তথোমায়া ইতি শ্রুতিঃ
19.21
তত্র কূপো মহান্পার্শ্বে দেবস্যোত্তরতস্তথা
ঋতবঃ কালরাত্রিশ্চ যে দিব্যা যে চ মানুষাঃ
19.22
সর্বে দেবমুপাসন্তে রূপিণঃ কিল তত্র হ
তদতিক্রম্য ভবনং ত্বয়া যাতব্যমেব হি
19.23
ততো নীলং বনোদ্দেশং দ্রক্ষ্যসে মেঘসংনিভম্
রমণীয়ং মনোগ্রাহি তত্র দ্রক্ষ্যসি বৈ স্ত্রিয়ম্
19.24
তপস্বিনীং মহাভাগাং বৃদ্ধাং দীক্ষামনুষ্ঠিতাম্
দ্রষ্টব্যা সা ত্বয়া তত্র সংপূজ্যা চৈব যত্নতঃ
19.25
তাং দৃষ্ট্বা বিনিবৃত্তস্ত্বং ততঃ পাণিং গ্রহীষ্যসি
যদ্যেষ সময়ঃ সত্যঃ সাধ্যতাং তত্র গম্যতাম্